5
Mauri be mai Ena Anina Namona
1 Tanobada bona idia noholaia gaudia edia oromadia ese idia hahedinaraia ia karadia Diravana be lalokau Diravana. Bona iena Hereva, Baibel, ese unai ia hahedinaraia. Ia haerelaidia goevagoeva henanadaidia be inai: Dahaka dainai tanobada ai ita noho? bona, Dahaka be ita dekenai do ia vara?
2 Unai haere be Baibel lalonai ita tahudia be namo. Dirava ena Hereva ia gwau: “Bema umui tahua, do umui davaria.” (2 Sisiga 15:2) Vadaeni, Dirava ena Hereva tahua karana ese ena palani ita totona edena bamona ia hahedinaraia?
Dahaka Dainai Taunimanima Ia Karadia?
3 Baibel ese ia hahedinaraia Dirava ese taunimanima ia lalodia dainai tanobada ia karaia. Isaia 45:18 ia gwau Dirava ese “ia karaia kava lasi, to taunimanima ese do idia noholaia totona ia karaia.” Bona taunimanima durulaidia gaudia momo be tanobada ai ia atodia, mauri do idia moalelaia bada totona.—Genese, karoa 1 bona 2.
4 Iena Hereva lalonai, Dirava ese taunimanima ginigunadia, Adam bona Eva, ia karadia sivaraina ia gwauraia, bona ena palani idia edia bese totona be ia hahedinaraia. Ia gwau: “Taunimanima do ita karaia, eda laulau bona eda toana hegeregeredia; davara gwarumedia bona atai manudia bona boromakau bona tanobada ibounai bona tano ai idia rau gaudia iboudiai idia ese do idia biagudia.” (Genese 1:26) Taunimanima ese “tanobada ibounai” bona animal iboudiai do idia biagudia.
5 Midel Ist kahana ai, gabu ta ladana Eden ai, Dirava ese imea badana ta ia karaia. Bena “hari tau ia abia, Eden imeana ai ia atoa, ia ese do ia biru henia bona do ia naria.” Unai paradaiso lalonai taunimanima do idia hitolo lasi. Ia lalonai be au idauidau, “ita-itadia bona anidia namo audia iboudiai,” bona au bona ava ma haida bona animal idauidau danu.—Genese 2:7-9, 15.
6 Taunimanima ginigunadia ruaosi edia tauanidia ia karadia, idia goevadae dainai do idia gorere lasi, do idia buruka lasi, bona do idia mase lasi. Bona dala ia kehoa edia, sibodia edia raka dalana do idia abia hidi. Ia karadia dalana be Genese 1:27 ese ia gwauraia: “Dirava ese taunimanima ia karaia, ia sibona ena laulau bamona, Dirava ena toana hegeregerena ia karaia.” Unai hegeregerena, eda tauanina bona eda darana mo sibona lasi, to kara maoromaoro bona lauma gaudia lalohadailaidia siahuna danu ita ia henia, bona do ita moale momokani totona, unai siahu do ita gaukaralaia namonamo be namo. Dirava ese unai eda kara ai ita do ia durua, aniani, ranu, bona hodahoda ita ia henia hegeregerena. Iesu Keriso ia gwau: “Aniani sibona dekena amo taunimanima do idia mauri lasi, to Dirava ena uduna dekena amo idia mai hereva ibounai ese mauri ia henia.”—Mataio 4:4.
7 Taunimanima ginigunadia ruaosi be Eden ai idia noho neganai, Dirava ese ia haganidia, ia gwau: “Emui bese umui havaradia, do umui hutuma; tanobada do umui hahonua.” (Genese 1:28) Anina be natudia goevadaedia do idia havaradia diba. Do idia hutuma idia lao neganai Eden ena paradaiso do idia habadaia, ela bona tanobada ibounai be paradaiso ai do idia halaoa. Moale taudia goevadaedia, do idia mauri hanaihanai diba taudia, ese do idia noholaia. Dirava ese unai ibounai ia hamatamaia murinai, “ia karadia gaudia iboudiai ia itadia, idia be namo herea.”—Genese 1:31; ma Salamo 118:17 danu itaia.
8 Dirava ena ura be taunimanima ese tanobada do idia gaukaralaia namonamo, sibodia edia namo havaraia totona. Tanobada do idia naria namonamo mai edia hemataurai ida, do idia hadikaia lasi. Hari inai negai idia hadikaia noho be Dirava ena ura hegeregerena lasi, bona idia hadikaia taudia ese ena palani idia dadaraia. Edia kerere davana do ia henidia, badina be Baibel ia gwau Dirava ese “tanobada idia hadikaia vadaeni taudia do [ia] alaia ore.”—Apokalupo 11:18.
Dirava ena Palani Ia Senisi Lasi
9 Matamana negana amo Dirava ena palani be taunimanima goevadaedia be tanobada ai do idia noho hanaihanai paradaiso lalonai. Ena palani ia haidaua lasi ema bona hari, bona do ia hagugurua. Baibel ia gwau: “Iehova ia gwauhamata vadaeni, ia gwau: ‘Lau laloa hegeregerena, unai bamona do ia vara; bona lau lalohadailaia hegeregerena, unai bamona do ia momokani.’ ” “Lau hereva vadaeni, bona ena anina do lau havaraia. Lau lalohadailaia vadaeni, bona do lau karaia.”—Isaia 14:24; 46:11.
10 Iesu Keriso ese Dirava ena palani, paradaiso be tanobada ai do ia havaraia lou palanina, be ia gwauraia; tau ta ia gwauhamata henia, ia gwau: “Ita ruaosi Paradaisa dekenai do ita ginidae.” (Luka 23:43) Aposetolo Petero danu ese ia gwauraia, ia gwau: “Dirava ese ia gwauhamata vadaeni guba matamata [guba amo do ia lohia gavamanina matamatana] bona tanobada matamata [tanobada besena matamatana] do ia havaraia. Inai totona do ita naria noho. Unai gabu dekenai be kara maoromaoro sibona do ia noho.”—2 Petero 3:13.
11 David danu ese do ia mai tanobadana matamatana ia gwauraia, ia hahedinaraia do ia noho ela bona hanaihanai. Ia gwau: “Kara maoromaoro taudia ese tanobada do idia abia, do idia noholaia hanaihanai.” (Salamo 37:29) Unai dainai Iesu ia gwauhamata: “Dagedage lasi taudia be idia namo, badina tanobada do idia abia.”—Mataio 5:5.
12 Helaro namo hereana be inai: Paradaiso tanobadana ai do ita noho hanaihanai diba, bona kara dika, gorere, lalohisihisi, bona hisihisi do idia ore! Baibel ia gwau: “[Dirava] ese matana ranu ibounai edia matana dekena amo do ia dahua. Mase bona lalohisihisi, bona taitai, bona hisihisi be do idia ore momokani. Badina be gau gunadia be idia ore vadaeni.” Ma ia gwau: “Vadaeni helai gabuna badana latanai ia helai Diravana ia hereva, ia gwau, ‘Harihari be gau ibounai lau karaia matamata inai.’ Ma lau dekenai ia hereva, ia gwau, ‘Harihari inai hereva do oi torea, badina ia be maoromaoro bona momokani.’ ”—Apokalupo 21:4, 5.
13 Oibe, Dirava be mai ena palani namona. Ia ese kara maoromaoro tanobadana, noho hanaihanai paradaisona, do ia havaraia. Ena gwauhamata ia hamomokanidia diba bona do ia hamomokanidia, badina be ena hereva be “maoromaoro bona momokani.”
[Study Questions]
1, 2. Dahaka dainai ita diba Dirava ese ita ia laloa, bona eda henanadai edia haere be edesenai ita tahudia be namo?
3. Dahaka dainai Dirava ese tanobada ia karaia?
4. Dahaka dainai taunimanima ia karadia?
5. Taunimanima be edeseniai ia atodia?
6. Dirava ese taunimanima ia karadia neganai, edia lalodia bona edia tauanidia be edena bamona?
7. Dahaka hahegani ia henidia?
8. Ia ura tanobada be edena bamona do idia naria?
9. Dahaka dainai ita diba Dirava ese ena palani do ia hagugurua?
10, 11. Iesu, Petero, bona David ese Paradaiso edena bamona idia gwauraia?
12, 13. Dirava ena palani namona taunimanima totona mani oi gwauraia.
[Pictures on page 20, 21]
Dirava ena palani be taunimanima be paradaiso tanobadana ai do idia mauri hanaihanai
[Picture on page 22]
Ruma hadikaia taudia be biaguna ese ia samanidia diba