MOMO ese do idia henia hereva idia hegaegaelaia neganai, idia hekwarahi bada badina hamatamaia herevana amo ela bona dokona herevana idia torea. Hereva idia do karaia haorea lasi neganai, pepa ginigunadia momo idia torea vadaeni. Unai dekenai hora momo idia negea.

Oi ese unai dala ai hereva oi hegaegaelaia, a? Oi ura dala haragana ta oi dibaia, a? Bema autlain karaia dalana oi dibaia, gau ibounai do oi torea be badina lasi. Unai ese oi dekenai nega bada ia henia, oiemu hereva oi tohoa loulou totona. Hereva do oi henia be auka lasi bona danu, kamonai taudia be mai moale ida do idia kamonai bona idia do ia hagoadaia kara ta idia karaia totona.

Kongregesen ai idia henia pablik tok totona autlain ta idia abia. To, hereva ma haida be unai bamona lasi. Reana oi dekenai do oi herevalaia gauna eiava sinado sibona idia henia. Eiava idia printaia herevana ta idia henia do oi herevalaia totona. Nega haida hadibaia hereva haida sibona oi dekenai idia henia. Unai bamona negadia ibounai lalonai, sibona emu autlain do oi karaia.

Rau 41 ai ia noho haheitalai ese autlain kwadogina karaia dalana ia hahedinaraia. Mani oi itaia hereva badadia ta ta be lauri kahana momokani amo idia matamaia bona leta badadia ai idia torea. Hereva badadia ta ta henunai be idia durudia lalohadai idia noho. Unai lalohadai idia habadaia herevadia be idia henunai idia noho bona sisina lalona kahanai idia torea matamaia. Unai autlain oi itaia namonamo. Mani oi itaia, unai hereva badadia rua ese sinado idia hahedinaraia. Danu, namona be oi itaia unai lalohadai ma haida be lalona veria herevadia sibona lasi. To, idia ta ta ese idia ataiai ia noho hereva badana idia durua.

Autlain oi karaia neganai, reana ena toana be unai haheitalai hegeregerena momokani lasi. To bema autlain karaia dalana oi lalo-pararalaia, oi do ia durua do oi herevalaia gauna oi hegaegaelaia bona hereva namona oi karaia bona ena nega do ia hegeregere. Edena dala ai oi karaia be namo?

Laloa, Abia Hidi, Bona Hegaegaelaia

Sinado be gau badana. Emu sinado be hereva tamona sibona amo do oi gwauraia gauna lasi. Ia be oi ura oi hahedinaraia lalohadai badana, bona ia ese emu hereva ena badina do oi gwauraia dalana ia hahedinaraia. Bema sinado idia henia, anina bada herevadia ta ta oi laloa namonamo. Bema idia henia sinado be buka ta amo do oi herevalaia, idia makaia kahana oi stadilaia lalonai sinado oi laloa. Bema do oi herevalaia gauna sibona idia henia, oi ese sinado do oi abia hidi. To, unai oi do karaia lasi neganai, oi do ia durua gauna be tahua karana oi karaia guna. Bema oi laloa namonamo, nega momo lalohadai namodia do oi abia.

Unai oi karaia lalonai, oi sibona oi nanadaia: ‘Dahaka dainai helai taudia ese inai hereva idia kamonai be gau badana? Egu tahua gauna be dahaka?’ Namo lasi idia henia herevana oi gwauraia sibona eiava lalona veria gaudia oi hahedinaraia sibona, to namona be helai taudia ia durua herevana ta do oi henia. Oiemu tahua gauna oi abia hidi neganai, oi torea be namo. Oi hegaegae lalonai unai tahua gauna oi laloa loulou.

Emu tahua gauna oi laloa bona unai hegeregerena sinado oi abia hidi (eiava idia henia sinado be unai tahua gauna ida ia hegeregere dalana oi laloa) murinai, tahua karana amo unai sibona oi tahua diba. Emu hereva do idia kamonai taudia durua herevadia oi tahua. Iboudiai idia diba vadaeni gaudia lasi, to diba idia habadaia bona heduru korikorina idia henia gaudia oi tahua. Tahua karana amo oi davaria gaudia ibounai oi laloa maoromaoro. Nega momo oi davaria gaudia ibounai oi gaukaralaia diba lasi, unai dainai namona be oi abia hidi namonamo.

Namona be emu sinado oi hahedinaraia totona bona oiemu tahua gauna oi hagugurua totona hereva badadia maorodia oi abia hidi. Idia be emu autlain ena badina herevadia ai do idia lao. Hereva badadia hida oi abia be namo? Reana rua sibona be hegeregere hereva kwadogina totona, bona nega momo 5 be hegeregere hora tamona herevana lalonai oi henia totona. Hereva badadia haida sibona oi gaukaralaia neganai, helai taudia ese do idia lalodiatao namonamo.

Emu sinado bona hereva badadia oi abia hidi vadaeni neganai, tahua karana amo oi davaria gaudia oi hegaegaelaia. Emu hereva badadia idia hahedinaraia herevadia oi abia hidi. Emu hereva do idia hanamoa herevadia sibona oi abia hidi. Hereva badadia durua totona siri haida oi abia hidi neganai, unai siri be mai anina bada dalanai oi herevalaia totona oi idia durua lalohadai oi tahua. Unai gaudia ta ta be hereva badana maorona henunai oi atoa. Bema idia haida be emu hereva badadia ta idia durua lasi, oi negea​—herevana ia be hereva namona​—eiava emu faila lalonai oi udaia, ma nega ta do oi gaukaralaia totona. Hereva namo hereadia sibona oi gaukaralaia. Bema gau momo oi gaukaralaia toho, do oi hereva haraga momokani bona anina ia hedinarai lasi. Helai taudia idia durua herevadia haida sibona oi gaukaralaia bona oi hahedinaraia namonamo be namo herea. Nega oi hanaia lasi.

Bema do oi herevalaia gaudia oi do atoa namonamo lasi, hari unai oi karaia. Evanelia torea tauna Luka be unai bamona ia karaia. Ia torea gauna idia durua herevadia ia haboua murinai, ia “torea namonamo lou.” (Luka 1:3) Reana do oi herevalaia gaudia be idia vara negadia hegeregerena eiava idia hahedinaraia gaudia hegeregerena, reana ia vara gauna ta bona murinai ena badina eiava hekwakwanai ta bona murinai hanaia dalana oi atoa, to gau badana be emu tahua gauna do ia hagugurua dalanai idia oi atoa. Namo lasi lalohadai ta murinai lalohadai idauna momokani oi gwauraia haraga. Namona be lalohadai ta amo ma ta dekenai kamonai taudia oi hakaua lao namonamo, bona idia lalo-pararalaia dalana ai unai oi karaia. Namona be oiemu hereva hamomokania gaudia ese helai taudia idia hakaua lalohadai maorona idia abia totona. Hereva ena kahana idauidau oi hegaegaelaia neganai, emu hereva ese kamonai taudia dekenai ia havaraia mamina oi laloa. Oi hahedinaraia lalohadai idia kamonai be auka lasi, a? Idia kamonai gaudia do idia badinaia, emu tahua gauna hegeregerena, a?

Hari, helai taudia edia lalona ia veria hamatamaia herevana ta oi hegaegaelaia, bona unai ese kamonai taudia dekenai ia hahedinaraia emu hereva be idia do ia durua bada. Reana sentens ginigunadia haida oi torea be namo. Bena, oiemu tahua gauna badinaia totona helai taudia ia veria hereva dokona oi hegaegaelaia.

Bema nega bada ia do noho neganai emu autlain oi karaia, do oi hanamoa totona nega ia noho. Reana oi itaia lalohadai haida be namba haida, haheitalai ta, eiava ekspiriens ta amo oi durua be namo. Bema hari ia vara gauna ta eiava taunimanima idia laloa momo gauna ta oi gaukaralaia, reana helai taudia ese oi herevalaia gauna idia badinaia dalana idia itaia haraga. Emu hereva oi itaia lou neganai, reana helai taudia ia durua daladia ma haida oi davaria. Do oi herevalaia gauna oi laloa namonamo bona oi hanamoa be gau badana hereva namona ai oi halaoa totona.

Hereva henia taudia haida ese hereva haida sibona idia torea to ma haida idia ura hereva sisina momo idia torea. To bema do oi herevalaia gaudia be hereva badadia haida sibona henunai oi hegaegaelaia, hereva badadia idia durua lasi herevadia oi negea, bona dala namona ai lalohadai oi atoa, do oi davaria emu diba oi habadaia sisina murinai, gau ibounai oi torea be badina lasi. Nega bada do oi negea kava lasi! Bona emu hereva do idia namo. Do ia hedinarai Tiokratik Haroro Sikuli amo heduru oi abia momokani.

NEGA ta ta ai sikuli dekenai kahana ta oi abia neganai, dala ia kehoa oi tubu totona. Mai emu lalona ibounai ida unai oi karaia, bena oi bona ma haida do idia itaia oi goada oi lao. (1 Tim. 4:15) Sikuli ese oi do ia durua bada emu diba oi habadaia totona.

Kongregesen vairanai hereva oi henia dainai oi gari, a? Vaia unai ia vara, herevana nega sisina daudau sikuli dekenai oi noho vadaeni. To, gau haida ese oi idia durua diba emu lalo-hekwarahi oi hamaragia totona. Ruma dekenai, duahiduahi badabada oi manadalaia. Kongregesen heboudia dekenai, hanaihanai haere oi henia, bona bema oi be pablisa ta, haroro gaukara lalonai hereva oi henia loulou. Unai ese taunimanima vairanai hereva henia dalana dekenai oiemu diba ia habadaia. Danu, nega bada ia do noho neganai oi abia stiuden kahana oi hegaegaelaia, bona oi tohoa loulou neganai oi hereva badabada. Laloaboio lasi, oi idia lalo-namo henia taudia vairanai hereva do oi henia. Hereva ta oi henia gwauraia neganai, Iehova oi guriguri henia be namo. Ena hesiai taudia idia noinoi neganai, mai ena moale ida lauma helaga ia henia.​—Luka 11:13; Fili. 4:​6, 7.

Oi karaia diba gaudia laloa maoromaoro. Ta be hereva henia bona hadibaia tauna namona ai ia lao haraga lasi. (Mika 6:8) Bema vanegai sibona sikuli dekenai oi vareai, namo lasi oi laloa maoromaoro hereva namona do oi henia. To, emu hereva hanamoa karadia ta ta be edia nega ai oi hanamoa toho. Inai buka lalonai unai kara ia herevalaia kahana oi stadilaia. Bema mai dalana, ia gwauraia eksasais oi tohoa. Unai dala ai, kongregesen vairanai emu kahana oi do henia lasi neganai, unai hereva hanamoa karana ena anina oi diba vadaeni. Emu hereva dalana do ia namo ia lao.

Duahiduahi Kahana Oi Hegaegaelaia Dalana

Taunimanima vairanai duahiduahi totona oi hegaegae neganai, oiemu kahana ai idia noho herevadia oi gwauraia dalana oi dibaia sibona lasi. Namona be oi hekwarahi unai kahana ena anina oi lalo-pararalaia totona. Emu kahana oi abia neganai, maoromaoro oi duahia bona oi lalo-pararalaia toho. Sentens iboudiai edia anina bona paragraf iboudiai idia hahedinaraia lalohadai oi lalo-pararalaia toho, unai amo anina oi gwauraia maoro diba bona mai ena hemami maorona ida. Bema hegeregere, diksenari amo oi diba lasi herevadia gwauraia dalana maorona oi itaia. Do oi duahia kahana oi diba namonamo be namo. Reana tama sina ese unai dekenai edia natuna maragidia idia durua be namo.

Oi dekenai Baibel ena siri haida eiava Gima Kohorona ena hereva ta amo paragraf haida idia henia, do oi duahia totona, a? Bema emu gado ai unai kahana be kaset teipi dekenai ia noho, heduru bada oi abia bema unai oi kamonai bona hereva gwauraia dalana, idia gaukaralaia hereva, anina hahedinaraia dalana, bona gado regena haidaua dalana oi kamonai namonamo. Bena emu duahiduahi lalonai oi tohotohoa.

Emu kahana oi hegaegaelaia matamaia neganai, namona be do oi hanamoa karana ia herevalaia sisiba oi stadilaia namonamo. Bema mai dalana, nega sisina momo oiemu kahana oi duahia badabada murinai, unai sisiba oi itaia lou. Idia torea sisibana ena kahana ibounai oi badinaia toho.

Unai treinini ese haroro gaukara lalonai oi do ia durua bada. Haroro gaukara oi karaia lalonai, nega momo dala ia kehoa ma haida vairanai oi duahiduahi totona. Dirava ena Hereva be mai ena siahu taunimanima edia mauri ia haidaua totona, unai dainai oi duahia namonamo be gau badana. (Heb. 4:12) Oi laloa lasi stiuden ena kahana ta eiava rua oi karaia murinai, duahiduahi namonamo dalana ibounai oi diba vadaeni. Aposetolo Paulo be lagani momo lalonai unai ia karaia vadaeni elda tauna ta dekenai ia gwau, ‘taunimanima dekenai oi duahia karana oi goadalaia noho.’​—1 Tim. 4:13.

Do Oi Herevalaia Gauna Bona Karaia Dalana

Sikuli dekenai oiemu kahana lalonai karaia dalana ta do oi gaukaralaia neganai, edena bamona do oi hegaegae?

Mai anina bada gaudia toi oi laloa: (1) do oi herevalaia gauna, (2) karaia dalana bona do oi hereva henia tauna, bona (3) oiemu hereva hanamoa totona do oi badinaia sisibana.

Namona be do oi herevalaia gauna dekenai diba oi tahua. To unai oi do karaia badabada lasi neganai, namona be karaia dalana bona do oi hereva henia tauna oi laloa namonamo, badina oi herevalaia gaudia bona oi hahedinaraia dalana oi abia hidi neganai idia be mai anina. Edena karaia dalana do oi gaukaralaia? Oi diba tauna dekenai sivarai namona harorolaia dalana do oi haheitalaia, a? Eiava nega ginigunana ta oi davaria neganai ia vara diba gauna do oi hahedinaraia? Unai tauna ia bada eiava oi bada? Oi herevalaia gwauraia gauna dekenai ena lalohadai be reana edena bamona? Unai gauna ia diba sisina vadaeni, eiava? Emu hereva amo dahaka tahua gauna oi ura davaria? Unai henanadai edia haere be mai anina bada, hereva oi hegaegaelaia lalonai oi do idia hakaua.

Do oi herevalaia gauna dekenai hereva ma haida be edeseni amo do oi davaria? Inai buka ena rau 33 ia lao 38 lalonai, “Tahua Karana Karaia Dalana” idia herevalaia. Unai oi duahia, bona oi dekenai idia noho tulu oi gaukaralaia. Nega momo, oi davaria gaudia ibounai oi gaukaralaia diba lasi. Namona be oi duahia gaudia idia hegeregere dainai oi diba edena bamona gaudia oi herevalaia diba. To, unai oi karaia neganai, namona be oiemu hereva karaia dalana bona do oi hereva henia tauna oi laloatao. Do oi gaukaralaia diba gaudia oi makaia.

Emu hereva oi do hegaegaelaia lasi bona ena kahana iboudiai oi do abia hidi lasi neganai, emu hereva hanamoa totona idia henia sisiba ia herevalaia kahana oi duahia. Unai sisiba oi badinaia be inai kahana do oi henia ena badina badana.

Idia makaia negana lalonai emu hereva oi henia ena namo be emu hereva dokona do oi gwauraia danu, badina nega ia ore neganai saini do idia henia. To, haroro gaukara lalonai nega momo nega ita laloa bada lasi. Unai dainai, oi hegaegae lalonai, idia makaia negana oi laloa, to hadibaia namonamo karana oi laloa bada danu.

Hereva Haida Karaia Dalana Dekenai. Rau 82 ai hereva karaia daladia oi itaia, bona haroro gaukara lalonai do oi gaukaralaia diba bona do oi herevalaia gauna oi gaukaralaia namonamo diba dalana ta oi abia hidi. Bema nega sisina bada sikuli dekenai oi noho vadaeni, namona be oi laloa inai be dala ta emu haroro gaukara hanamoa totona.

Bema Tiokratik Haroro Sikuli naria tadikakana ese karaia dalana ia abia hidi, mani unai oi abia dae. Karaia daladia momo be haroro daladia idauidau. Bema idia gwauraia daladia ai nega ta oi do haroro lasi, idia karaia vadaeni pablisa taudia amo lalohadai haida oi abia. Bema mai dalana, do oi herevalaia gauna be sikuli dekenai do oi karaia dalana bamona ta danu oi kikilaia. Unai ese oi ia durua inai treinini oi abia ena badina badana oi hagugurua totona.

Bema Emu Kahana be Helai Taudia Oi Hereva Henia

Bema oi be tau eiava mero, reana oi dekenai kahana idia henia kongregesen vairanai hereva kwadogina do oi henia. Unai hereva hegaegaelaia lalonai, haheitalai bamona idia henia stiuden kahana hegaegaelaia totona idia gwauraia vadaeni gaudia oi badinaia. Idia idau gaudia rua be oi hereva henia taudia bona karaia dalana.

Nega momo helai taudia ibounai durua totona do oi herevalaia gauna oi hegaegaelaia be namo herea. Idia noho taudia momo ese Baibel ena hadibaia hereva badadia idia diba vadaeni. Reana do oi herevalaia totona idia henia gauna be idia diba namonamo. Idia diba vadaeni gaudia oi laloa. Namona be oi hekwarahi, emu hereva amo dala ta ai idia oi durua totona. Oi sibona oi nanadaia: ‘Edena dala ai lau herevalaia gauna lau gaukaralaia diba, lau bona helai taudia ese Iehova laloa bada karana ai habadaia totona? Lau herevalaia gauna lalonai gau ta ese ai ia durua, Dirava ena ura ai itaia totona, a? Edena dala ai lau herevalaia gauna ese ai do ia durua, tauanina ena ura ia badinaia tanobadana lalonai, abia hidi maorodia ai karaia totona?’ (Efe. 2:3) Unai henanadai edia haere maorodia davaria totona hereva ma haida oi tahua be namo. Baibel oi gaukaralaia neganai, ena hereva sibona oi duahia lasi. Oi gaukaralaia siridia oi herevalaia, bona oi hahedinaraia edena dala ai edia hereva amo lalohadai maorona idia davaria diba. (Kara 17:​2, 3) Gau momo oi herevalaia toho lasi. Namona be oi herevalaia gauna oi hahedinaraia dalana dainai taunimanima ese do idia laloatao diba.

Oi hegaegae lalonai emu hereva henia dalana oi laloa namonamo danu. Unai ena anina oi laloa maragi lasi. Emu hereva oi henia badabada loulou. Hereva hanamoa sisiba idauidau oi stadilaia bona badinaia totona oi gaukara goada karana ese emu hereva henia dalana do ia hanamoa bada. Herevana oi be hereva henia tauna matamatana eiava hereva henia dalana oi diba namonamo vadaeni, namona be oi hegaegae namonamo, oi herevalaia gauna be oi abia dae momokani dalanai bona hemami oi hahedinaraia dalanai do oi henia totona. Sikuli ai kahana ta ta oi karaia lalonai, namona be oi laloaboio lasi oiemu tahua gauna be Dirava amo oi abia harihari gauna, emu hereva, be Iehova hanamoa totona oi gaukaralaia.​—Sal. 150:6.

TIOKRATIK Haroro Sikuli ena program be kongregesen ibounai durua totona idia hegaegaelaia. Mai anina bada dibana be kongregesen ena hebou ma haida bona sekit bona distrik hebouhebou lalodiai idia hahedinaraia danu. Bema unai program ta lalonai kahana ta oi dekenai idia henia, maduna badana oi abia unai. Aposetolo Paulo ese Keristani naria tauna Timoteo ia hagoadaia hanaihanai iena hadibaia karana ia laloa namonamo totona. (1 Tim. 4:16) Keristani heboudia dekenai idia mai taudia ese dava bada gauna, edia nega​—bona momo idia hekwarahi bada danu​—unuseniai idia noho bona edia hetura karana Dirava ida idia hanamoa daladia idia dibaia totona. Idia dekenai unai bamona gaudia oi hadibaia be hahenamo badana! Edena dala ai oi karaia namonamo diba?

Baibel Ena Hereva Badadia

Sikuli lalonai inai kahana be pura totona idia makaia Baibel duahiduahi amo. Hari inai negai unai siri edia anina ita dekenai oi gwauraia hedinarai. Nehemia 8:8 ese ia hahedinaraia hegeregerena, Esera bona ena bamodia ese taunimanima vairanai Dirava ena Hereva idia duahia, bona “ena anina idia hedinaraia namonamo” bona taunimanima edia lalo-parara idia habadaia. Baibel ena hereva badadia oi karaia neganai, unai oi karaia diba danu.

Edena dala ai unai kahana oi hegaegaelaia be namo? Bema mai dalana, pura ta eiava haida idia do noho neganai, idia makaia kahana ibounai oi duahia. Emu kongregesen bona durua gaudia oi laloa. Unai oi gurigurilaia. Dirava ena Hereva lalonai inai kahana dekenai, dahaka sisiba, dahaka haheitalai, dahaka hakaua herevadia ese unai heduru idia henia diba?

Tahua karana be mai anina bada. Oi dekenai Watchtower Library kompiuta disket dekenai, Watch Tower Publications Index, eiava Baibel Siri Edia Indeks idia noho, a? Bema idia noho, oi gaukaralaia namonamo. Do oi herevalaia totona oi abia hidi siridia dekenai idia halasia dibana oi tahua karana amo, gau ta ia vara ena badina, peroveta herevadia edia guguru dalana, siri haida ese Iehova ena kara idia hahedinaraia dalana, eiava hakaua herevadia idia hahedinaraia gaudia oi davaria diba. Gau momo oi herevalaia toho lasi. Siri haida sibona oi abia hidi bona unai oi herevalaia namonamo be namo herea.

Reana emu kahana ai, helai taudia do oi nanadaia pura ena Baibel duahiduahi amo idia abia heduru idia gwauraia totona. Dahaka gaudia idia davaria, sibona edia eiava edia ruma bese stadi lalonai eiava haroro gaukara eiava mauri lalonai heduru idia abia totona? Iehova ese ena bese taudia bona bese ma haida ia kara henia lalonai ia hahedinaraia karadia haida be dahaka? Helai taudia be dahaka idia dibaia, edia abidadama idia hagoadaia bona Iehova dekenai edia laloa bada karana idia habadaia totona? Kahana maragimaragidia oi herevalaia bada lasi. Oi abia hidi siridia edia anina bona ita idia durua daladia oi herevalaia.

Instraksen Tok

Inai hereva be idia halasia gaudia amo, hegeregere Gima Kohorona eiava Awake! edia hereva ta eiava buka ta ena kahana. Nega momo unai hereva ibounai be idia makaia negana lalonai oi herevalaia diba lasi. Edena dala ai inai kahana oi karaia be namo? Oi herevalaia sibona lasi, to oi hadibaia namonamo. Namona be Keristani naria tauna ese “hadibaia gaukara namona do ia karaia diba.”​—1 Tim. 3:2.

Oi hegaegae matamaia neganai do oi abia kahana oi stadilaia. Idia noho siridia oi duahia. Oi laloa dobu. Nega bada ia do noho neganai unai oi karaia. Namona be oi laloatao tadikaka idia hagoadaia vadaeni do oi herevalaia kahana idia duahia. Oiemu gaukara be unai kahana oi herevalaia lou sibona lasi eiava hereva haida amo oi gwauraia sibona lasi, to idia badinaia dalana do oi hahedinaraia. Idia henia gauna ena kahana haida be kongregesen ia durua bada dalanai do oi herevalaia.

Natudia ta ta edia kara be idauidau hegeregerena, kongregesen iboudiai be idauidau danu. Natuna ia hadibaia namonamo tama eiava sina be natuna dekenai kara maoro taravatudia ia gwauraia sibona lasi. Ena natuna ida edia badina ia herevalaia. Natuna ena kara bona ia hanaia toho hekwakwanai ia lalodia danu. Unai hegeregerena, kongregesen lalonai hadibaia gaukara idia karaia taudia ese idia hereva henia taudia durua gaudia idia laloa. To, mai laloa kehoa ida ia hadibaia tauna ese helai taudia idia hahemaraia haheitalai ia gaukaralaia lasi. Ia ese Iehova ena dala ai idia raka karana amo ia vara vadaeni namo ia herevalaia bona Baibel amo sisiba ia henia, kongregesen ese ia davaria hekwakwanai idia hanaia dalana ia hahedinaraia totona.

Hadibaia namonamo karana ese helai taudia edia kudouna ia hamarerea. Unai ia karaia totona hereva haida ia gwauraia sibona lasi to unai hereva edia anina idia laloa bada karana ia habadaia. Unai totona ia hadibaia taudia edia namo ia laloa bada be namo. Lauma dalanai mamoe naria taudia ese mamoe oreana idia diba be namo. Bema mai lalokau ida haida edia hekwakwanai idia laloa, edia hereva ese helai taudia do ia hagoadaia, bona lalo-parara bona hebogahisi do idia hahedinaraia.

Hadibaia taudia namodia idia diba, edia hereva amo edia tahua gauna ia hedinarai goevagoeva be namo. Namona be hereva idia henia dalana dainai, hereva badadia idia hedinarai namonamo bona helai taudia ese do idia lalodiatao. Namona be edia mauri do idia haidaua diba hereva namodia idia laloatao.

Hesiai Hebou

Iseda Basileia Gaukara pepana amo hereva oi henia neganai, reana oi henia dalana be sisina idau. Do oi davaria, nega momo idia ura oi ese helai taudia dekenai idia printaia gauna ibounai oi herevalaia, gau namodia sibona oi abia hidi lasi. Helai taudia oi durua, idia noho sisiba edia badina idia hahedinaraia siridia idia laloa namonamo totona. (Tito 1:9) Nega idia makaia dainai, reana ma hereva haida oi herevalaia diba lasi.

To, reana oi dekenai idia henia kahana be Iseda Basileia Gaukara pepana lalonai ia hedinarai lasi. Reana Gima Kohorona ena hereva ta ese unai ia hahedinaraia, eiava hereva haida sibona idia henia. Oi be hadibaia tauna dainai, oiemu gaukara be do oi herevalaia gauna ese kongregesen ia durua daladia oi laloa. Reana oi ese haheitalai namona kwadogina ta oi gaukaralaia eiava ekspiriens namona ta oi gwauraia be namo. Laloaboio lasi, unai gauna oi herevalaia sibona be hegeregere lasi, to namona be oi herevalaia dalana ese kongregesen ia durua, Dirava ena Hereva ese ia hahedinaraia gaukarana idia karaia bona unai amo moale idia abia totona.​—Kara 20:​20, 21.

Emu kahana oi hegaegaelaia neganai, kongregesen taudia edia noho daladia oi laloa. Idia karaia vadaeni gaudia dainai idia oi hanamoa. Do oi herevalaia gauna idia badinaia neganai, reana edena dala ai haroro gaukara ai idia havaraia anina bona edia moale do ia habadaia?

Emu kahana ai haheitalai ta do oi karaia eiava haida do oi henanadai henia, a? Bema unai bamona, namona be nega bada ia do noho neganai oi palanilaia namonamo. Reana oi laloa tadikaka ma ta ese unai do ia hegaegaelaia be namo, to nega momo unai ese namo ia havaraia lasi. Bema mai dalana, unai haheitalai eiava henanadai henia kahana be hebou dinana ia do abia lasi neganai umui tohoa. Namona be oi hamomokania, unai idia karaia namonamo dainai oiemu hadibaia karana ia hanamoa momokani.

Sekit Bona Distrik Hebouheboudia

Lauma dalanai kara namo idia hahedinaraia bona hereva henia bona hadibaia taudia namodia ai idia lao tadikaka be reana nega haida idia noia sekit eiava distrik hebouhebou lalonai kahana ta idia karaia. Unai be tiokratik dalanai ita idia hadibaia nega badadia. Reana unai bamona kahana be maniuskrip, autlain, Baibel drama bona hari ita badinaia dalana ena hadibaia herevadia, eiava hadibaia herevana ena paragraf ta. Bema emu hahenamo be unai bamona program lalonai kahana ta oi karaia, do oi herevalaia gauna oi stadilaia namonamo. Oi laloa namonamo ela bona ena anina oi laloa bada.

Maniuskrip herevana do idia henia taudia ese unai kahana ena hereva ta ta idia duahia. Idia ese sibona edia hereva amo idia gwauraia lasi bona sibona edia ura hegeregerena ena paragraf edia gabu idia haidaua lasi. Idia stadilaia, hereva badadia idia lalo-pararalaia bona edia heau dalana idia itaia namonamo totona. Idia duahia badabada loulou ela bona unai hereva idia henia neganai ena anina idia hahedinaraia maoro, mai edia ura bada, hebogahisi, hemami, momokani, bona abidadama ida, bona edia gado regena ena bada bona hereva edia goada be helai taudia hutuma totona idia hegeregere.

Autlain amo hereva do idia henia tadikakadia edia maduna be autlain idia badinaia namonamo. Hereva ia henia tauna ese autlain amo ia duahia lasi bona maniuskrip ai ia halaoa lasi, to sibona ena hereva amo mai ena kudouna ibounai ida ia karaia. Gau badana be autlain ena kahana ta ta totona idia makaia nega ia badinaia, hereva badadia ia hahedinaraia goevagoeva totona. Namona be hereva henia tauna ese hereva badadia henunai idia noho lalohadai bona siri ia gaukaralaia namonamo. Namo lasi ia sibona ia ura gaudia ma haida ia herevalaia, bena autlain lalonai idia noho gaudia totona nega be lasi. Momokani, ia henia hadibaia herevadia edia badina be Dirava ena Hereva. Keristani elda taudia edia maduna be ‘sivarai namona idia harorolaia.’ (2 Tim. 4:​1, 2) Unai dainai, namona be hereva henia tauna ese autlain lalonai idia noho siridia ia laloa namonamo​—idia ia herevalaia bona badinaia daladia ia hahedinaraia.

Oi Hegaegae Haraga

Emu kongregesen lalonai nega momo hereva oi henia diba, a? Edena dala ai idia ibounai do oi karaia namonamo? Emu kahana be nega ia ore neganai oi hegaegaelaia lasi.

Do oi henia herevadia ese kongregesen idia durua momokani totona idia oi laloa namonamo be namo. Unai dainai, kahana ta ta oi abia neganai maoromaoro do oi herevalaia gauna oi duahia. Unai dala ai gaukara ma haida oi karaia lalonai unai hereva oi laloa diba. Dina haida eiava pura haida idia do noho lalonai, reana haida edia herevahereva amo do oi herevalaia gauna badinaia dalana namona oi itaia. Reana gau haida idia vara bona oi itaia do oi herevalaia gauna be mai anina bada hari inai nega totona. Kahana ta oi abia murinai, maoromaoro oi duahia bona oi laloa totona nega sisina bada do oi gaukaralaia, to unai be dala namona ai oi gaukaralaia negana. Gabeai, autlain oi karaia matamaia neganai, namo oi davaria badina guna oi laloa namonamo vadaeni. Emu kahana be unai bamona oi hegaegaelaia neganai, emu lalo-hekwarahi do ia hamaragia momokani bona unai ese oi do ia durua, oi herevalaia dalana amo kongregesen taudia oi durua momokani bona edia kudouna oi hamarerea.

Iehova ese ena taunimanima ia hadibaia lalonai oi dekenai ia henia harihari gauna oi laloa bada neganai, ia do oi hanamoa bona ia idia lalokau henia taudia dekenai namo do oi havaraia.​—Isa. 54:13; Roma 12:​6-8.

PURA ta ta ai, Iehova ena Witnes taudia edia kongregesen momo dekenai, Baibel ena hereva ta ia hahedinaraia pablik tok idia henia. Bema oi be elda eiava hesiai tauna ta, emu hereva henia dalana amo ia hedinarai oi be hadibaia tauna namona, a? Bema oibe, reana oi idia boiria pablik tok ta do oi henia. Tiokratik Haroro Sikuli ese tadikaka tausen momo ia durua dainai, idia hegeregere unai gaukara idia karaia. Pablik tok do oi henia neganai, dahaka oi karaia guna be namo?

Autlain Oi Stadilaia

Hereva ma haida oi do tahua lasi neganai, autlain oi duahia bona oi lalohadailaia ela bona ena anina oi lalo-pararalaia. Sinado, hereva ena kwarana, oi laloa noho. Helai taudia dekenai dahaka do oi hadibaia? Oiemu tahua gauna be dahaka?

Namona be hereva badadia oi diba namonamo. Idia oi laloa namonamo. Edena dala ai idia ta ta ese sinado idia hahedinaraia? Hereva badadia ta ta henunai be lalohadai ma haida idia noho. Idia henunai be durua lalohadai ma haida idia noho. Autlain ena kahana ta ese kahana ta ia durua bona unai danu be ma ta dekenai ia hakapua bona unai amo emu tahua gauna oi hagugurua dalana oi itaia. Sinado, emu tahua gauna, bona hereva badadia ese unai tahua gauna idia hagugurua dalana oi lalo-pararalaia neganai, do oi herevalaia gauna oi hegaegaelaia matamaia diba.

Matamanai oi ia durua diba gauna ta be oi laloa emu hereva be hereva kwadogidia 4 eiava 5 bamona, ta ta be mai edia hereva badana ta. Bona idia ta ta oi hegaegaelaia.

Idia henia autlain be tulu ta, oi hegaegae neganai oi gaukaralaia totona. Ia amo oiemu hereva iboudiai do oi abia bona henia lasi. Ia be turia sibona bamona. Namona be oi ese ena hidio oi atoa bamona, kudouna oi henia bona oi hamauria.

Baibel Siridia Gaukaralaia

Iesu Keriso bona ena hahediba taudia ese edia hadibaia gaukarana lalonai Baibel idia herevalaia. (Luka 4:​16-21; 24:27; Kara 17:​2, 3) Oi be unai oi karaia diba danu. Baibel be oiemu hereva ena badina be namo. Idia henia autlain ena hereva edia anina bona badinaia dalana oi herevalaia sibona lasi, to idia noho Baibel siridia ese unai hereva idia durudia dalana oi laloa, bona unai siridia amo oi hadibaia.

Emu hereva oi hegaegaelaia neganai, autlain dekenai idia torea siri ta ta oi stadilaia. Badina siridia oi laloa. Reana siri haida ese emu diba idia habadaia sibona. Emu hereva lalonai idia ibounai oi duahia eiava herevalaia be badina lasi. Helai taudia idia durua bada siridia oi abia hidi. Bema autlain dekenai idia printaia siridia oi gaukaralaia, reana Baibel siri ma haida oi gaukaralaia be badina lasi.

Siri momo oi gaukaralaia dainai lasi, to oi hadibaia namonamo dainai, emu hereva ese anina do ia havaraia. Siri ta oi duahia neganai, oi gaukaralaia ena badina oi hahedinaraia. Badinaia dalana oi herevalaia. Siri ta oi duahia murinai, Baibel ia kehoa noho lalonai anina oi herevalaia. Helai taudia be unai do idia karaia danu. Edena dala ai helai taudia edia lalona oi veria bona idia oi durua diba, Dirava ena Hereva amo namo bada idia abia totona? (Neh. 8:​8, 12) Unai oi karaia daladia be, siri ena anina oi gwauraia hedinarai, haheitalai oi gwauraia, bona badinaia dalana oi hahedinaraia.

Anina oi gwauraia hedinarai. Oi ura siri badana ta ena anina oi gwauraia hedinarai neganai, oi sibona oi nanadaia: ‘Ena anina be dahaka? Dahaka dainai egu hereva lalonai lau gaukaralaia? Helai taudia be inai siri dainai, reana edena bamona idia henanadai?’ Reana ia namo bema badina siridia, edeseniai bona dahaka dainai unai siri idia torea, hereva edia siahu, bona torea tauna ena tahua gauna oi laloa. Unai totona, hereva ma haida do oi tahua be namo. “Hesiai tauna mai ena kamonai, bona mai ena kara maoromaoro” oreana ese ia halasia bukadia amo diba namona bona bada herea oi davaria diba. (Mat. 24:​45-47) Siri ena kahana iboudiai oi gwauraia hedinarai lasi, to lalohadai ta oi herevalaia neganai unai siri idia duahia totona helai taudia oi boiria ena badina oi hahedinaraia.

Haheitalai. Haheitalai oi gwauraia ena badina be oi ura helai taudia ese gau ta do idia lalo-pararalaia namonamo eiava oi herevalaia lalohadai eiava hakaua herevana ta do idia laloatao. Haheitalai ese taunimanima idia durua, oi herevalaia gauna idia lalo-pararalaia bona idia diba vadaeni gauna ta ida idia hahegeregerea totona. Iesu ese ena Haroro Herevana Badana ia henia neganai unai bamona ia karaia. “Ataiai manu,” “tano ena herahera,” “iduara maragina,” “ruma nadi latanai,” bona unai bamona gaudia ma haida dainai, ena hadibaia hereva be mai ena siahu, anina ia hahedinaraia goevagoeva, bona taunimanima ese idia laloaboio diba lasi.​​—Mat., karoa 5–7.

Badinaia dalana hahedinaraia. Siri ta ena anina oi gwauraia hedinarai bona haheitalai oi gwauraia karadia ese diba idia henia, to unai diba badinaia karana sibona ese namo ia havaraia. Momokani, Baibel ena hereva idia badinaia be helai taudia edia maduna, to idia oi durua dainai do idia diba dahaka idia karaia be namo. Oi diba momokani helai taudia ese oi herevalaia sirina idia lalo-pararalaia bona oi gwauraia lalohadaina ia hamomokania dalana idia itaia neganai, namona be abidadama bona kara dekenai unai siri ena anina oi hahedinaraia namonamo. Oi herevalaia hereva momokanina ida idia hegeregere lasi lalohadai eiava kara kereredia rakatania karana amo ia vara namo oi hahedinaraia.

Siri badinaia daladia oi laloa neganai, namona be oi laloatao emu hereva idia kamonai taudia be mauri dala idauidau taudia bona edia noho daladia be idauidau. Reana haida be matamata taudia, kamonai matamata taudia, buruka taudia, bona hekwakwanai idauidau dainai idia hekwarahi taudia. Edia mauri lalonai idia badinaia diba gaudia oi herevalaia. Sisiba oi henia neganai, namo lasi ena toana be haida sibona oi laloa dainai unai sisiba oi henia.

Hereva Henia Tauna ese Ia Abia Hidi Gaudia

Emu hereva totona gau haida idia abia hidi vadaeni. Hereva badadia bona idia ta ta do oi herevalaia negana idia hahedinaraia goevagoeva. Oi ese gau ma haida oi abia hidi diba. Reana oi ura lalohadai haida oi herevalaia momo, to ma haida oi herevalaia sisina. Oi laloa lasi idia ta ta do oi herevalaia negana ena lata be tamona. Bema unai bamona oi laloa, reana gau iboudiai oi herevalaia haragaharaga bona helai taudia idia daradara. Edena lalohadai do oi herevalaia momo bona edena do oi gwauraia sisina sibona be edena bamona oi abia hidi diba? Oi sibona oi nanadaia: ‘Edena lalohadai ese lau do idia durua, hereva ena anina badana lau hahedinaraia totona? Edena lalohadai ese helai taudia idia durua bada? Bema idia torea lalohadaina ta bona ia durua sirina lau gaukaralaia lasi, hereva badadia hamomokania herevadia edia heau namonamo dalana ia hadikaia, a?’

Oi naria namonamo, oi hamomokania diba lasi gauna ta eiava sibona emu lalohadai ta oi gwauraia garina. Dirava ena Natuna, Iesu Keriso, ese ia sibona ena lalohadai ta ia gwauraia lasi. (Ioa. 14:​10, NW ) Laloaboio lasi taunimanima be Iehova ena Witnes taudia edia hebou dekenai idia mai ena badina be idia ura Baibel idia gwauraia herevadia idia kamonai. Bema oi idia gwauraia hereva henia tauna namona, reana ena badina be taunimanima edia lalona oi veria Dirava ena Hereva idia laloa totona, to sibona oi abia isi lasi. Unai dainai, oiemu hereva idia laloa bada.​—⁠Fili. 1:​10, 11.

Autlain be Baibel ia hahedinaraia hereva namona ai oi halaoa vadaeni neganai, emu hereva oi tohoa loulou be namo. Unai oi karaia neganai oi hereva badabada be namo. Gau badana be lalohadai iboudiai oi diba namonamo. Namona be mai emu kudouna ibounai ida emu hereva oi henia, oi herevalaia gauna oi hamauria bamona, bona mai emu ura bada ida hereva momokani oi hahedinaraia. Emu hereva oi do henia lasi neganai, oi sibona oi nanadaia: ‘Egu tahua gauna be dahaka? Hereva badadia idia hedinarai namonamo, a? Baibel siridia be egu hereva ena badina ai lau halaoa momokani, a? Hereva badadia ta ta be ma ta dekenai idia heau namonamo, a? Inai hereva ese Iehova bona ia henia gaudia laloa bada karana ia habadaia, a? Hereva dokona ese sinado ia hahedinaraia, helai taudia dekenai ia hahedinaraia dahaka idia karaia be namo, bona idia ia veria unai idia karaia totona, a?’ Bema unai henanadai edia haere be oibe, oi ese ‘diba do oi habadaia’ diba, bona unai amo kongregesen taudia dekenai namo oi havaraia bona Iehova oi hanamoa bada!​—⁠Aon. 15:⁠2.