Iehova Ena Orea Kahirakahira Oi Noho

HAHEDIBA TAUNA Iamesi ia gwau: “Dirava kahirakahira umui lao, bona ia be umui kahirakahira do ia mai.” (Iam. 4:8) Oibe, ena be ita be goevadae lasi taudia bona Iehova be atai herea ai ia noho, to Ia be ita amo ia daudau lasi bona iseda guriguri ia kamonai diba. (Kara 17:27) Bema dala ita tahua Dirava kahirakahira ita lao, vadaeni ia be ita kahirakahira do ia mai. Unai ita karaia totona, namona be Iehova ita tura henia momokani, anina be mai momokani ida guriguri amo Ia ita hereva henia. (Sal. 39:12) Danu, iseda hetura karana Dirava ida ita habadaia diba bema hanaihanai iena Hereva, Baibel, ita stadilaia. Ita abia diba maoromaorona bona laloparara dainai, Iehova Dirava, bona iena ura ita totona ita dibaia. (2 Tim. 3:16, 17) Unai amo, Iehova lalokau henia karana ita dibaia bona ia ita habadua karadia ita dadaraia.​​—Sal. 25:14.

² To, Iehova kahirakahira ita lao diba dalana tamona be ena Natuna, Iesu amo. (Ioa. 17:3; Roma 5:10) Iesu sibona ese ita dekenai Iehova Dirava ena lalohadai bona hemami ia hahedinaraia goevagoeva diba, taunimanima ta lasi. Ia be ena Tamana ia diba namonamo dainai, ia gwau diba: “Ta ese Natuna ia diba lasi to Tamana sibona, bona ta ese Tamana ia diba lasi to Natuna sibona, bona Natuna ia ura tauna dekenai Tamana do ia hahedinaraia.” (Luka 10:22) Unai dainai, Evanelia Bukadia ese Iesu ena lalohadai bona hemami idia herevalaia daladia ita stadilaia neganai, ita be Iehova ena lalohadai bona hemami ita dibaia noho. Unai bamona diba ese ita ia durua iseda Dirava kahirakahira ita lao totona.

³ Dirava ena Natuna ena kwara dagina henunai, ita be Iehova do ita tura henia momokani, bema Dirava ena orea​—Iena ura ia hadibaia oreana unai​—kahirakahira ita noho. Mataio 24:45-47 ese ia perovetalaia bamona, Biaguna, Iesu Keriso, ese “hesiai tauna mai ena kamonai bona mai ena aonega” ia abia hidi abidadama taudia dekenai “nega korikori ai edia aniani” ia henia totona. Hari, unai hesiai tauna mai ena kamonai ese iseda abidadama hagoadaia gaudia momo ia halasia . Unai orea amo, Iehova ese ita ia sisiba henia dina ta ta ai ena Hereva ita duahia, hanaihanai Keristani hebou ita lao henia, bona mai eda kudouna ibounai ida “Basileia ena sivarai namona” ita harorolaia. (Mat. 24:14; 28:19, 20; Ios. 1:8; Sal. 1:1-3) Namo lasi ita laloa unai orea be taunimanima ese idia havaraia bona ia be anina lasi. Namona be ita hekwarahi Iehova ena orea kahirakahira ita noho bona ena hakaua dalana ita badinaia. Unai ese iseda Dirava, Iehova kahirakahira dekenai ita do ia hakaua lao, bona hahetoho lalonai ita do ia hagoadaia bona gimaia.

HETOHO IDIA MOMO IDIA LAO ENA BADINA

⁴ Reana oi be lagani momo hereva momokani lalonai oi noho vadaeni. Bema unai bamona, emu abidadama idia tohoa gaudia haheaukalaia ena anina oi diba. Ena be nega sisina sibona Iehova bona ena taunimanima oi diba bona oi bamodia, to oi hamomokania diba Satani ese Iehova ena lohia siahuna ia abia dae tauna do ia dagedage henia. (2 Tim. 3:12) Herevana Iehova ena hesiai gaukara lalonai oi davaria dagedage ena bada be edena bamona, to namo lasi oi gari eiava oi lalomanoka. Badina Iehova ia gwauhamata vadaeni, oi do ia durua bona oiemu haheauka dainai oi do ia hamauria bona mauri hanaihanai do ia henia.​​—Heb. 13:5, 6; Apok. 2:10.

⁵ Satani ena tanobada dikana ena dina gabedia lalonai ita noho dainai, ita ibounai ese hetoho idauidau do ita davaria. Dirava ena Basileia be lagani 1914 ai ia gini negana amo ema bona hari Satani be dala lasi Iehova ena guba dekenai ia vareai lou totona. Ia be tanobada dekenai idia negea diho, ia bona ena aneru dikadia danu. Satani ia badu dikadika dainai, tanobada ai tuari idia bada idia lao, Iehova ena abidadama hesiai taudia dagedage henia karana ia bada noho. Unai ese ia hamomokania ita be Satani ena lohia dalana dikana ena dina dokodia ai ita noho.​​—Apok. 12:1-12.

⁶ Satani ia badu dikadika badina ia diba ena nega be kwadogi. Iena demoni ida, ia gaukara goada noho Iehova ena taunimanima edia Basileia harorolaia gaukarana bona edia lalotamona karana ia hadikaia totona. Unai ese ia hahedinaraia ita be lauma tuarina lalonai ita noho, “taunimanima ida ita heatu lasi, to gavamani, siahu taudia, inai tanobada diburana ena lohia taudia, bona guba ai idia noho lauma dikadia ida ita heatu noho.” Bema ita ura Iehova ena kahana dekenai ita gini bona ita kwalimu, gau badana be ita tuari noho to namona be iseda lauma tuari dabua ibounai ita hahedokilaia noho. Namona be Diabolo ena “koikoi karadia ibounai dekenai ita gini goada.” (Efe. 6:10-17) Anina be ita haheauka be namo.

HAHEAUKA KARANA HAHEDINARAIA NOHO

⁷ Ta ia haheauka ena anina be “hahetoho eiava hekwakwanai idia vara neganai, ia gini goada.” Iehova tura henia karana dekenai, unai hereva ena anina be ena be metau, dagedage, eiava gau ma haida ese iseda abidadama Dirava dekenai idia hadikaia gwauraia, to kara maoromaoro ita karaia noho. Keristani haheauka karana ita hahedinaraia noho be namo. Inai be mai ena hekwarahi. To, Iehova ita hesiai henia goadagoada ese iseda haheauka karana ia hagoadaia. Bema Keristani tauna ai ita lao negana amo iseda abidadama idia tohoa gau maragidia ita haheaukalaia, do ita goada ita lao, bona do ita hegeregere gabeai idia vara hahetoho badadia ita haheaukalaia totona. (Luka 16:10) Namo lasi ita naria ela bona hahetoho badadia ita davaria bena iseda lalona ita hadaia abidadama lalonai ita gini goada totona. Namona be hahetoho ia do mai lasi neganai iseda lalona ita hadaia dala maorona ita badinaia totona. Aposetolo Petero ese haheauka bona Dirava hamoalea karadia ma haida ita hahedinaraia karana ia herevalaia, ia gwau: “Umui gaukara goada, umui abidadama sibona lasi, to kara namodia do umui karaia danu, bona kara namodia sibona lasi, to diba danu do umui abia, bona diba sibona lasi, to sibona biagua karana danu,bona sibona biagua karana sibona lasi, to haheauka danu, bona haheauka sibona lasi, to Dirava badinaia karana danu,bona Dirava badinaia karana sibona lasi, to tadikaka lalokau henia karana danu, bona tadikaka lalokau henia karana sibona lasi, to taunimanima ibounai lalokau henia karana danu.”​​—2 Pet. 1:5-7; 1 Tim. 6:11.

⁸ Iamesi ese ita dekenai haheauka hahedinaraia karana be mai anina bada ia hadibaia, ia gwau: “Lauegu tadikaka e, hahetoho idauidau umui davaria neganai, umui moale. Badina umui diba, emui abidadama, inai dala ai idia tohoa gauna ese emui haheauka karana do ia hagoadaia. Bona umui haheauka noho karana amo sibona umui hadibaia namonamo, unai amo do umui hegeregere momokani, bona gau ibounai do umui karaia namonamo, gau ta dekenai do umui dabu lasi.” (Iam. 1:2-4) Iamesi ia gwau Keristani taudia ese hahetoho idia abia dae bona moalelaia be namo, badina unai ese ita idia durua haheauka karana ita hahedinaraia totona. Unai bamona lalohadai oi abia, a? Iamesi ma ia hahedinaraia, haheauka be mai ena gaukara ta, ia ese iseda Keristani kara bona iseda hetura karana Dirava ida ia hamaoromaoroa. Oibe, dina ta ta ai hahetoho idauidau ita davaria bona hanaidia neganai, iseda haheauka karana ia goada ia lao. Ma danu, ita ia durua kara namodia ma haida ita havaraia totona.

⁹ Iseda haheauka karana ese Iehova ia hamoalea; bona Ia ese ita dekenai mauri hanaihanai ena davana namona do ia henia. Iamesi ma ia gwau: “Hahetoho ia haheaukalaia noho tauna be ia moale, badina Dirava ese ia lalonamo henia neganai, ia be mauri ena korona do ia abia, Iehova ese unai be ia idia lalokau henia noho taudia dekenai ia gwauhamatalaia.” (Iam. 1:12) Oibe, ita haheauka badina be ita ura mauri do ita abia. Bema ita haheauka lasi, hereva momokani do ita rakatania. Bema ita manoka dainai tanobada ena kara ita karaia, vadaeni ita be tanobada dekenai do ita giroa lou. Bema ita haheauka lasi, Iehova ena lauma helaga do ita abia lasi bona iseda mauri lalonai lauma ena huahua namodia do ita hahedinaraia lasi.

¹⁰ Bema ita ura inai nega aukana lalonai ita haheauka noho totona, ita Keristani taudia namona be hisihisi dekenai lalohadai maorona ita abia. Iamesi ena hereva oi laloatao, ia gwau: “Umui moale.” Unai bamona ita karaia totona be reana ia auka, badina dagedage dainai iseda tauanina idia hisihisi eiava ita lalohekwarahi bada. To laloaboio lasi, ita ura lasi mauri hanaihanai ita haboioa. Aposetolo taudia dekenai ia vara gauna ta ena sivarai ese ita ia durua hari ita davaria noho hisihisi ita haheaukalaia totona. Unai sivarai be Kara bukana lalonai ia noho, bona ia gwau: “Aposetolo taudia idia boiria, idia kwadidia, bona idia oda henidia Iesu ena ladanai do idia hereva lasi, bena idia ruhadia. Vadaeni Sanhedrin idia rakatania bona mai moale ida idia lao, badina Dirava ia laloa idia be hegeregere Iesu ena ladana dainai hemarai idia abia totona.” (Kara 5:40, 41) Aposetolo taudia idia laloparara Iesu ena hahegani idia badinaia dainai hisihisi idia davaria bona Iehova ena lalonamo idia abia. Lagani momo murinai, Petero ese lauma helaga ena siahu amo ena revareva ginigunana ia torea neganai, ia ese kara maoromaoro totona hisihisi ita abia ena namo ia herevalaia.​​—1 Pet. 4:12-16.

¹¹ Sivarai ma ta be Paulo bona Sila dekenai ia vara gauna. Filipi dekenai edia misinari gaukara idia karaia neganai, haida ese idia dogoatao bona idia samanidia, idia gwau hanua dekenai heiriheiri idia havaraia bona Roma taudia ese idia taravatua karadia idia harorolaia. Unai dainai, idia botadia dikadika bona dibura rumana lalonai idia negedia. Baibel ese ita ia hadibaia, idia be mai edia bero ida dibura rumana ai idia do noho lalonai, “hanuaboi momokani ai, Paulo bona Sila idia guriguri bona Dirava hanamoa anedia idia abia bona dibura taudia be idia kamonai noho.” (Kara 16:16-25) Paulo bona ena bamoa tauna idia diba Keriso dainai hisihisi idia abia karana amo, Dirava bona taunimanima vairanai edia abidadama idia hamomokania sibona lasi, to danu, unai amo kamonai taudia dekenai sivarai namona idia harorolaia diba. Unai ese ma haida ia durua diba mauri idia abia totona. Gabeai dibura naria tauna bona ena ruma bese ese sivarai namona idia kamonai henia bona hahediba taudia ai idia lao. (Kara 16:26-34) Paulo bona Sila ese Iehova bona ena siahu idia abidadama henia, bona idia diba Iehova ese edia hisihisi lalonai idia do ia durua. Unai dainai, idia lalohisihisi lasi.

¹² Hari danu, Iehova ese ita dekenai heduru gaudia momo ia henia hahetoho idauidau ita hanaia totona. Ia ura ita haheauka. Ita dekenai iena Hereva ia henia ita ia durua iena ura totona diba maoromaoro ita abia. Unai ese iseda abidadama ia hagoadaia. Bona dala ia kehoa iseda abidadama tamona taudia ita bamoa bona hesiai gaukara helagana ita karaia hebou diba. Danu guriguri karana amo dala ia kehoa iseda hetura karana Iehova ida ita hagoadaia noho diba. Ia ita hanamoa bona mai momokani ida ia vairanai ita goeva totona ena hedurua ita noinoi neganai ita ia kamonai henia. (Fili. 4:13) Bona ita laloaboio lasi, ita vairanai ia noho helarona lalohadailaia karana amo goada do ita abia.​​—Mat. 24:13; Apok. 21:1-4.

HAHETOHO IDAUIDAU HAHEAUKALAIA

¹³ Hari inai negai ita davaria hahetoho idauidau be Iesu Keriso ena hahediba taudia ginigunadia ese idia davaria bamona. Hari inai negai, sivarai kereredia idia kamonai taudia ese Iehova ena Witnes taudia idia hereva dika henia bona tauanina dalanai idia dagedage henidia. Aposetolo taudia edia negai hegeregerena, Basileia ena sivarai namona harorolaia gaukarana ese tomadiho ena hahediba koikoi ia hahedinaraia dainai, tomadiho gunalaia taudia ese dagedage bada idia havaraia. (Kara 17:5-9, 13) Nega haida politikol gavamani edia taravatu dainai, Iehova ena taunimanima be heduru idia abia diba edia gaukara idia karaia noho totona. (Kara 22:25; 25:11) To, nega haida, lohia taudia ese iseda gaukara idia taravatua, idia ura iseda Keristani haroro gaukara idia koua toho. (Sal. 2:1-3) Unai bamona ia vara neganai, ita be mai gari lasi ida abidadama aposetolo taudia edia haheitalai ita tohotohoa, idia gwau: “Dirava be lohia dainai ia ai kamonai henia be maoro, to taunimanima lasi.”​​—Kara 5:29.

¹⁴ Bese abia isi karana be tanobada ibounai dekenai ia bada ia lao lalonai, taunimanima haida ese sivarai namona idia harorolaia taudia edia lalona idia veria Dirava ese ia henia hesiai gaukarana idia rakatania totona. Dirava ena hesiai taudia ibounai be Apokalupo 14:9-12 ena sisiba herevana, “dagedage animal bona ena laulau” tomadiho henia lasi karana idia badinaia momokani. Ioane ena hereva ena anina ita lalopararalaia, ia gwau: “Unai dainai helaga taudia, oibe, Dirava ena taravatu idia badinaia bona Iesu ena abidadama idia tohotohoa taudia unai, idia haheauka be gau badana.”

¹⁵ Tuari, gavamani hamorua karana, dagedage, bona gavamani ese iseda gaukara idia koua dainai, taunimanima vairanai Keristani tomadiho karana reana oi karaia be auka. Reana kongrigeisen ta bamona umui hebou diba lasi. Brens ofesi amo heduru abia dalana be auka. Reana sekit naria taudia idia vadivadi diba lasi. Buka bona magasin abia karana idia koua. Bema unai bamona ia vara, dahaka oi karaia be namo?

¹⁶ Haere be, oiemu goada hegeregerena oi karaia diba gaudia oi karaia be namo. Sibona emu stadi oi karaia diba. Reana ruma ta ta ai tadikaka be grup maragidia dekenai idia hebou diba. Guna idia stadilaia bukadia bona Baibel be unai hebou dekenai idia gaukaralaia diba. Oi gari eiava laloa momo lasi. Hakaua Oreana ese dala do ia karaia diba, nega sisina lalonai maduna idia huaia tadikaka dekenai hereva ia siaia totona.

¹⁷ Ena be emu Keristani tadikaka ibounai oi bamodia diba lasi, laloaboio lasi, oi be Iehova bona ena Natuna, Iesu Keriso kahirakahira oi noho. Emu helaro oi dogoatao noho diba. Iehova be emu guriguri do ia kamonai henia noho, bona ena lauma helaga amo oi ia hagoadaia diba. Ia dekena amo heduru oi tahua. Laloatao oi be Iehova ena hesiai tauna bona Iesu Keriso ena hahediba tauna ta. Unai dainai haroro totona dala idia kehoa neganai, namona be unai oi gaukaralaia namonamo. Iehova ese emu hekwarahi do ia hanamoa, bona daudau lasi lalonai ma haida be tomadiho momokani lalonai oi do idia bamoa diba.​—Kara 4:13-31; 5:27-42; Fili. 1:27-30; 4:6, 7; 2 Tim. 4:16-18.

¹⁸ Aposetolo taudia bona ma haida bamona, bema oi idia hamasea gwauraia, namona be “mase taudia ia hatorea isi lou Diravana” oi abidadama henia. (2 Kor. 1:8-10) Emu abidadama goadana toreisi lou dekenai ese oi do ia durua diba dagedage badadia oi haheaukalaia totona. (Luka 21:19) Keriso Iesu ese haheitalai namona ia hahedinaraia; ia diba bema mai abidadama ida hetoho ia haheaukalaia, iena kara ese ma haida do ia durua idia haheauka totona. Unai hegeregerena, emu kara danu ese emu tadikaka ia hagoadadia diba.​​—Ioa. 16:33; Heb. 12:2, 3; 1 Pet. 2:21.

¹⁹ Iseda hesiai gaukara dainai dagedage sibona ita davaria lasi, to hekwakwanai ma haida danu ita haheaukalaia. Hegeregere, haida idia lalomanoka badina edia teritori lalonai taunimanima be sivarai namona idia ura lasi kamonai. Ma haida be idia gorere, idia lalohisihisi, eiava edia goevadae lasi tauanina dainai edia goada ia hegeregere lasi. Aposetolo Paulo danu be hahetoho ta ia haheaukalaia, nega haida unai ese iena hesiai gaukara ia koua eiava ia hahekwarahia bada. (2 Kor. 12:7) Danu, Filipo hanua amo ia mai Keristani ginigunadia ta ladana Epafrodito be “ia lalometau badina iena gorere sivaraina umui [ena turadia idia] kamonai.” (Fili. 2:25-27) Iseda goevadae lasi tauanina bona ma haida edia kara ese hekwakwanai idia havaraia diba dainai, ita haheaukalaia totona be do ia auka. Reana iseda Keristani tadikaka eiava iseda ruma bese huanai lalotamona do ia noho lasi. To Iehova ena Hereva ena sisiba idia badinaia taudia ese unai bamona hekwakwanai idia haheaukalaia bona idia hamaoromaoroa diba.​​—Ese. 2:3-5; 1 Kor. 9:27; 13:8; Kol. 3:12-14; 1 Pet. 4:8.

EDA LALONA ITA HADAIA ISEDA ABIDADAMA DEKENAI DO ITA GINI GOADA NOHO

²⁰ Namona be Iehova ese kongrigeisen ena kwarana ai ia halaoa tauna, Keriso Iesu, ita kamonai henia hanaihanai. (Kol. 2:18, 19) Namona be “hesiai tauna mai ena kamonai bona mai ena aonega,” bona ita idia hakaua taudia ida ita gaukara hebou. (Heb. 13:7, 17) Bema tiokratik daladia ita badinaia namonamo bona ita idia hakaua taudia ida ita gaukara hebou, ita be Iehova ena ura do ita karaia namonamo. Gau badana be guriguri karana ita goadalaia. Laloatao, dibura ruma eiava ena haba ese iseda herevahereva karana iseda lalokau guba Tamana ida ia koua diba lasi, eiava iseda lalotamona karana iseda tomadiho tamona taudia ida do ia hadikaia lasi.

²¹ Namona be iseda lalona ita hadaia bona mai haheauka danu iseda haroro gaukara ita karaia goadagoada, bona ia toreisi lou tauna, Iesu Keriso, ese ena murinai idia raka taudia ibounai dekenai ia henia gaukarana ita karaia noho. Ia gwau: “Unai dainai umui lao, bese ibounai taudia be hahediba taudia ai umui halaoa, bona Tamana, Natuna, bona lauma helaga ladanai idia do umui bapatisoa, bona idia umui hadibaia, umui dekenai lau henia hahegani ibounai idia badinaia totona.” (Mat. 28:19,  20) Iesu hegeregerena, namona be ita haheauka noho, bona Basileia ena helaro namona bona do ita abia mauri hanaihanai ita laloa noho. (Heb. 12:2) Ita be Keriso ena bapatiso hahediba taudia dainai, Iesu ese “inai nega oromana ena dokona” ai ia gwauraia peroveta herevana ita hagugurua noho be hahenamo badana. Ia gwau: “Basileia ena sivarai namona be tanobada ibounai dekenai do idia harorolaia, bese ibounai idia kamonai totona, unai murinai dokona do ia ginidae.” (Mat. 24:3, 14) Bema hari inai negai, mai iseda kudouna ibounai ida unai gaukara ita goadalaia, vadaeni Iehova ena kara maoromaoro tanobada matamatana dekenai do ita vareai bona do ita noho ela bona hanaihanai!