Haida idia gwau, Dirava idia lalokau henia be auka. Idia laloa Dirava be gabu daudau ai ia noho bona taunimanima ia panisia. Haida edia hereva mani oi laloa:

• “Lau guriguri Dirava ese lau ia durua totona, to danu, lau laloa ia be gabu daudau ai ia noho. Reana Ia mauri lasi o mai ena hemami lasi.”​—Marco, Italy.

• “Ena be lau ura dikadika Dirava lau hesiai henia, to toana be gabu daudau ai ia noho. Lau laloa Dirava ena kara be auka bona ita do ia panisia. Ia be taunimanima ia hebogahisi henia lasi.”​—Rosa, Guatemala.

• “Lau maragi neganai, lau laloa Dirava be eda kerere ia tahua bona ia davaria neganai, ita ia panisia. Gabeai, lau laloa ia be gabu daudau ai ia noho. Ia be praiminista bamona, ena taunimanima ia durua diba, to ia lalodia bada lasi.”​—Raymonde, Canada.

Oi be edena bamona? Dirava oi lalokau henia be auka, a? Lagani momo lalodiai, dubu idia lao taudia be unai henanadai idia henia. Lagani 500 C.E. ia lao lagani 1500 C.E. lalodiai, Kerisendom taudia momo ese Siahu Ibounai Diravana idia guriguri henia lasi. Dahaka dainai? Taunimanima be Dirava idia gari henia. Histori torea tauna, Will Durant ia gwau: “Oi laloa goevadae lasi tauna ta ese gabu daudau ai ia noho dagedage Diravana ia guriguri henia diba, a?”

Dahaka dainai taunimanima idia laloa Dirava be dagedage tauna bona gabu daudau ai ia noho? Baibel ese Dirava be edena bamona ia herevalaia? Bema Dirava ena sivarai momokanina oi dibaia, ia do oi lalokau henia, a?

MOMO EDIA BILIV BE DAHAKA?

“Dirava be mai ena ladana o lasi ena lalohadai be idauidau, to bema ia be mai ena ladana, vadaeni ena ladana be daika?”​—Profesa David Cunningham, Theological Studies.

BAIBEL BE DAHAKA IA HADIBAIA?

Dirava ia gwau: “Lau be Iehova, egu ladana be unai.” (Isaia 42:8, BHḡ) Iehova be Heberu ladana, ena anina be “Ia ese Ia Halaoa.”​—Genese 2:4, NW, futnout.

Iehova ia ura ena ladana ita gaukaralaia. Baibel ia gwau: “Iena ladana do umui boiboi henia. Bese idauidau taudia dekenai, Lohiabada ena kara namodia do umui hadibaia. Lohiabada ena ladana bada herea, do umui gwauraia hedinarai, tanobada taudia dekenai.”​—Isaia 12:4.

Iesu ese Dirava ena ladana ia gaukaralaia. Guriguri lalonai, Iesu ese Iehova ia hamaoroa: “Lau ese emu ladana be idia [Iesu ena hahediba taudia] dekenai lau gwauraia hedinarai vadaeni, bona do lau gwauraia hedinarai.” Dahaka dainai Iesu ese Dirava ena ladana be ena hahediba taudia dekenai ia gwauraia hedinarai? Iesu ma ia gwau: “Unai amo lau dekenai oi [Dirava] hahedinaraia lalokauna be idia dekenai do ia noho, bona lau be idia ida do lau hakapua.”​—Ioane 17:26.

DAHAKA DAINAI BAIBEL ITA BADINAIA?

Tomadiho ia stadilaia tauna, Walter Lowrie ia gwau: “Dirava ena ladana ia diba lasi tauna be Dirava ena kara ia diba lasi. Eiava bema ia laloa Dirava be siahu ta sibona, vadaeni ia lalokau henia be auka.”

Vicktor be wiki ta ta ai dubu dekenai ia lao, to ia laloa ia be Dirava ia diba lasi. Ia gwau: “Gabeai lau davaria Dirava ena ladana be Iehova, bona unai be hegeregere nega ginigunana Dirava ese lau dekenai ena ladana ia hadibaia. Toana be, guna iena sivarai lau kamonai momo Tauna be hari lau davaria. Lau abia dae ia be Dirava momokanina bona ena turana ai lau lao.”

Iehova be ena ladana idia gaukaralaia taudia kahirakahira ia noho. “Lohiabada idia matauraia [“ia ladana idia laloa,” BHḡ] noho taudia” dekenai, Dirava ena gwauhamata be inai: “Lau ese idia do lau hamauria, tau ta ese iena natuna, iena ura ia karaia merona, ia hamauria bamona.” (Malaki 3:16, 17) Danu, Dirava be ena ladana dekenai idia boiboi taudia edia ahuna ia henia noho. Baibel ia gwau: “Iehova ena ladana dekenai idia boiboi taudia ibounai be hahemauri do idia abia.”​—Roma 10:13.

MOMO EDIA BILIV BE DAHAKA?

“Dubu badadia toi hegeregere Katolik, Otodoks bona Protestan idia laloa Dirava be toi tamona: Tamana be Dirava, Natuna be Dirava, bona Lauma Helaga be Dirava. Tomadiho stadilaia taudia idia gwau ‘Tamana, Natuna, bona Lauma Helaga’ anina be dirava toi lasi to dirava tamona.”​—The New Encyclopædia Britannica.

BAIBEL BE DAHAKA IA HADIBAIA?

Iesu, Dirava ena Natuna, be nega ta ia gwau lasi ia bona ena Tamana be hegeregere. Ia gwau: “Tamana dekenai do lau lao . . . badina Tamana ese lau ia hereaia.” (Ioane 14:28) Danu, Iesu ese ena murinai ia raka hahinena ta ia hamaoroa: “Lau be egu Tamana bona emui Tamana bona egu Dirava bona emui Dirava dekenai do lau lao.”​—Ioane 20:17.

Lauma helaga be dirava ta lasi. Baibel ia gwau, Keristani taudia ginigunadia be “lauma helaga amo idia honu,” bona Iehova ia gwau: “Lau ese taunimanima idauidau latanai egu lauma do lau bubua.” (Kara 2:1-4, 17) Lauma helaga be Toi Tamona ena kahana ta lasi. Lauma helaga be Dirava ena gaukara siahuna.

DAHAKA DAINAI BAIBEL ITA BADINAIA?

Katolik dubu edia diba bada taudia, Karl Rahner bona Herbert Vorgrimler idia gwau, “taunimanima be toi tamona ena anina idia abia diba lasi, bona ena be Dirava ese toi tamona ia hahedinaraia vadaeni, to taunimanima be toi tamona ena anina do idia diba lasi momokani.” Bema tau ta oi diba namonamo lasi, ia do oi tura henia, a? Unai hegeregerena, Toi Tamona ena koikoi herevana dainai, momo idia ura lasi Dirava idia dibaia bona lalokau henia.

Marco (rau 3 ese ia herevalaia tauna) be Toi Tamona ena koikoi herevana ese ia koua. Ia gwau: “Lau laloa Dirava ia ura lasi ia lau dibaia dainai, ia kahirakahira lau lao be auka bona lau mamia ia be lau amo ia noho daudau.” To Baibel ia gwau, Dirava “be ita ta ta amo ia noho daudau lasi.” (Kara 17:27) Dirava be ia hunia lasi, to ia ura ia ita dibaia. Iesu ia gwau: “Ai be ai diba gauna ai tomadiho henia.”​—Ioane 4:22.

Marco ia gwau: “Dirava be Toi Tamona lasi herevana lau dibaia neganai, unai ese lau ia durua Ia lau tura henia totona.” Bema ita abia dae Iehova be Dirava korikori tamona bona ia ita diba be auka lasi, ia do ita lalokau henia be auka lasi danu. Baibel ia gwau: “Lalokau ia hahedinaraia lasi tauna be Dirava ia diba lasi, badina Dirava be lalokau.”​—1 Ioane 4:8.

MOMO EDIA BILIV BE DAHAKA?

“Kara dika tauna ia mase neganai, karaharaga ena lauma be hel dekenai ia diho, bona ‘ia bodo lasi lahina’ o hel ena panisi ia mamia.” (Catechism of the Catholic Church) Dubu gunalaia taudia haida idia gwau, hel dekenai idia lao taudia be sibona idia noho bona Dirava amo idia daudau.

BAIBEL BE DAHAKA IA HADIBAIA?

Salamo 146:4 ia gwau, taunimanima “idia mase neganai tano ena kahu dekenai idia giroa lou. Edia mase dina dekenai, idia ura do idia karaia gaudia be do idia doko.” Bema mase tauna be tano dekenai ia giroa lou bona ita itaia lasi, vadaeni hel ena lahi dekenai hisihisi ia ania herevana be koikoi, ani?

Baibel ai, nega momo Heberu bona Grik herevana idia hahanaia “hel,” ena anina be mase taudia guria gabuna o gara. Hegeregere, Iobu be gorere dikana ese ia hahisia neganai, ia guriguri: “Lau ura mase gabuna dekenai [“hel ai,” Douay-Rheims Version] lau do oi hunia.” (Iobu 14:13) Iobu ia ura ia laga-ani gara ai​—ia be lahi lalonai hisihisi abia gabuna o Dirava amo ia daudau karana ia herevalaia lasi.

DAHAKA DAINAI BAIBEL ITA BADINAIA?

Bema Dirava be taunimanima ia panisia, ia kahirakahira ita lao be do ia auka. Mexico ai, hahine ta ladana Rocío ia gwau: “Lau maragi negana amo hel lahina ena hahediba herevana lau abia dae. Lau gari dikadika bona lau laloa Dirava ena kara ibounai be dika sibona. Lau laloa ia badu momo bona ta ia hebogahisi henia lasi.”

Rocío be Baibel amo Dirava ena hahemaoro dalana bona mase taudia dekenai ia vara gauna ia dibaia murinai, ia ura Dirava ena turana ai ia lao. Ia gwau: “Hari lau laga-ani bamona​—badina guna gari karana ese lau ia hametaua, to ta ese unai ia kokia bamona. Hari lau diba Dirava be ita ia laloa bada bona lalokau henia dainai, ia lau lalokau henia be namo. Ia be tamana ta bamona, ena natudia edia imana ia dogoatao bona ia ura idia be namo idia davaria.”​—Isaia 41:13.

Momo be hel lahina dekenai idia gari dainai Dirava idia hesiai henia, to Dirava ia ura lasi unai bamona ita karaia. Iesu ia gwau: “Iehova emu Dirava do oi lalokau henia.” (Mareko 12:29, 30) Bema ita laloparara Dirava be hari inai negai kara namodia sibona ia karaia, ita diba vaira negana ai ia be unai bamona do ia karaia danu. Iobu ena turana Elihu bamona, ita gwau diba: “Dirava be nega ta do ia kara dika diba lasi. Siahu Ibounai Dirava be do ia kerere lasi, lasi bona lasi momokani.”​—Iobu 34:10.

Dina ta ai, Ierusalema ai, Iesu ese ena Tamana, Iehova ia harorolaia, bona ia hahedinaraia ena negai idia noho tomadiho gunalaia taudia be koikoi. (Ioane 8:12-30) Unai negai Iesu ese ia gwauraia herevana ese ita do ia durua, hari momo ese Dirava idia herevalaia daladia ita laloa namonamo totona. Iesu ia gwau: “Bema egu hereva umui badinaia, umui be momokani egu hahediba taudia, bona umui be hereva momokani do umui diba, bona hereva momokani ese umui do ia ruhaia.”​—⁠Ioane 8:31, 32.

“Egu hereva umui badinaia.” Toana be Iesu ia gwau bema unai bamona ita karaia, do ita diba edena tomadiho be “hereva momokani” ia hadibaia. Ta ese Dirava ia herevalaia dalana oi kamonai neganai, oi sibona oi nanadaia, ‘Unai tau ena hadibaia herevana be Baibel bona Iesu ena hereva hegeregerena, a?’ Aposetolo Paulo ena hereva idia kamonai taudia oi tohotohoa, idia be “dina ta ta ai Toretore Helagadia idia tahua namonamo bema idia kamonai [o dibaia] herevadia be momokani eiava lasi.”​—⁠Kara 17:11.

Marco, Rosa, bona Raymonde (rau 3 ese ia herevalaia taudia) be Iehova ena Witnes taudia amo Baibel ena hereva idia kamonai neganai, idia abia dae gaudia ida idia hahegeregerea. Bena dahaka idia gwau?

Marco: “Lau bona egu adavana emai henanadai ibounai be Witnes tauna ese Baibel amo ia haerelaia. Unai nega amo Iehova ai lalokau henia, bona lau bona egu adavana ai noho namonamo!”

Rosa: “Guna, lau laloa Baibel be buka ma haida bamona bona taunimanima edia lalohadai hegeregerena Dirava ia herevalaia. To gabeai, egu henanadai edia haere be Baibel ai lau davaria. Hari, lau diba Iehova be Dirava momokanina bona ia lau abidadama henia diba.”

Raymonde: “Lau guriguri Dirava ese lau ia durua ia lau dibaia totona. Daudau lasi murinai, lau bona egu adavana be Baibel ai stadilaia. Hari, Iehova Dirava ena kara namodia ai diba dainai ai moale bada!”

Baibel ese Dirava ena kara namodia ia hahedinaraia bona koikoi herevadia ia hamaoromaorodia. Momokani, Baibel be ita ia durua, ‘Dirava ese mai moale ida ita dekenai ia henia gaudia ita diba’ totona. (1 Korinto 2:12) Baibel ese Dirava, iena ura bona eda vaira negana ia herevalaia dalana oi itaia be namo. Bema oi ura diba ma haida oi abia, www.pr418.com dekenai oi lao: “Bible Teachings > Bible Questions Answered.” Danu, unai Web sait o Iehova ena Witnes ta amo Baibel stadi oi noia. Bema unai bamona oi karaia, ai diba Dirava do oi lalokau henia bada.