Dika Idia Vara to Helaro Ia Noho

“Dina gabediai nega aukadia do idia vara, bona unai ese taunimanima do idia hahekwarahia bada.”​—2 TIMOTEO 3:1.

DIKA idauidau edia sivarai be henunai ai gwauraia, unai bamona sivarai ta oi kamonai eiava itaia, a?

● Gorere dikadia ese taunimanima tausen momo ia hamasea.

● Hitolo bada dainai taunimanima handred momo idia mase.

● Tano mareremarere ese tausen momo ia hamasea bona momo edia ruma ia hadikaia.

Rau ma haida ai, unai bamona sivarai haida do oi duahia. Danu do oi itaia, Baibel ia perovetalaia hegeregerena, “dina gabediai” unai bamona gaudia do idia vara.a

Oi sibona oi itaia diba ita be hekwakwanai momo tanobadana ai ita noho, to ai ura inai atikol amo oi diba helaro ia noho. Danu inai atikol lalonai, unai peroveta herevadia siks idia guguru ese ia hamomokania kahirakahira ‘dina gabedia’ do idia ore. Bona idia hahedinaraia, ena be haida ese peroveta herevadia idia hamomokania gaudia idia itaia, to koua herevadia idia gwauraia. Danu, inai atikol ese vaira negai gau namodia do idia vara ena badina idia hahedinaraia.

[Futnout]

Peroveta Hereva 1. Tano Mareremarere

“Tano mareremarere badadia do idia vara.”​—LUKA 21:11.

● Haiti ai tano mareremarere ese gau momo ia hadikaia bona unai gaudia edia henunai, hua 16 beibi maragina, Winnie, idia veria raka-lasi. Unai dika ena niusi ia ripotilaia tauna ese Winnie ena taitai ia kamonai. Winnie be unai tano mareremarere amo ia roho mauri, to ena tama sina lasi.

HAMOMOKANIA GAUDIA ESE DAHAKA IDIA HAHEDINARAIA? January 2010 ai, Haiti dekenai tano mareremarere ena bada 7.0 ese taunimanima 300,000 mai kahana ia hamasea. Bona taunimanima 1.3 milioni be edia ruma idia haboioa. Ena be Haiti dekenai ia vara tano mareremarere be bada herea, to gabu ma haida dekenai unai bamona ia vara danu. April 2009 bona April 2010 huanai, tano mareremarere badadia 18 bamona idia vara.

KOUA HEREVA BADANA BE DAHAKA? Hari ita be tano mareremarere momo ita davaria lasi. Bona teknoloji matamata dainai, tano mareremarere momo idia vara ena namba idia rekodia diba, guna bamona lasi.

UNAI KOUA HEREVANA BE MAORO, A? Mani inai oi laloa: Baibel ese inai nega dokonai tano mareremarere hida do idia vara be ia herevalaia lasi. To ia gwau, “tano mareremarere badadia” be “gabu idauidau ai” do idia vara, unai amo ita itaia ita be histori lalonai mai anina bada negana ai ita noho.​—Mareko 13:8; Luka 21:11.

DAHAKA OI LALOA? Baibel ena peroveta herevana hegeregerena, tano mareremarere badadia ita itaia noho, a?

Tano mareremarere idia vara karana ese ia hamomokania ita be nega dokonai ita noho. To, Baibel ese tano mareremarere sibona ia perovetalaia lasi. Mani ia vara dika iharuana ita laloa.

[Blurb on page 4]

“Ai [saiens taudia] ese unai dika badana ai gwauraia, tano mareremarere badadia. To taunimanima ese idia gwauraia, dika havaraia gaudia sibona.”​—KEN HUDNUT, US GEOLOGICAL SURVEY.

[Picture Credit Line on page 4]

© William Daniels/Panos Pictures

Peroveta Hereva 2. Hitolo Bada

“Hitolo bada do idia vara.”​—MAREKO 13:8.

● Tau ta be hitolo bada dainai, Niger ena hanua ladana Quaratadji ai aniani tahua totona ia lao. Unai tauna ena kasin, ena tadikaka bona taihu danu be idia hitolo bada dainai, edia gabu idia rakatania bona unai hanua dekenai idia lao. Unai tauna be geda latanai ia hekure. Dahaka dainai ia be sibona? Hanua ena tau badana, Sidi, ia gwau, “Unai tauna be [iena ruma bese] ia ubua diba lasi bona ia hegeregere lasi edia hisihisi ia itaia totona.”

HAMOMOKANIA GAUDIA ESE DAHAKA IDIA HAHEDINARAIA? Tanobada hegegemadai, kahirakahira taunimanima 7 7 amo tamona tamona be dina ta ta ai idia hitolo. To Africa ena saut kahana, Sahara dekenai, taunimanima toi toi amo, tamona tamona be nega daudau lalonai idia aniani lasi. Unai ita lalopararalaia totona, ruma bese ta mani ita laloa, ia lalonai be tamana, sinana bona beibi ta idia noho. Bema aniani be hegeregere rua totona, vadaeni daika do ia hitolo? Tamana, sinana, eiava beibi? Dina ta ta ai, unai bamona ruma besedia ese unai abia hidi do idia karaia.

KOUA HEREVA BADANA BE DAHAKA? Tanobada ai aniani be ia hegeregere ibounai ubua totona. To namona be aniani hariharilaia dalana idia naria namonamo.

UNAI KOUA HEREVANA BE MAORO, A? Momokani, biru taudia be aniani momo idia hadoa bona tano ma haida dekenai idia siaia diba, guna unai bamona ia vara lasi. Oibe, gavamani taudia ese hitolo idia haorea diba bema tanobada ena aniani idia hariharilaia namonamo. Ena be lagani momo unai bamona idia karaia, to hitolo idia haorea diba lasi.

DAHAKA OI LALOA? Mareko 13:8 ena hereva ia guguru noho, a? Ena be hari teknoloji ia namo ia lao, to tanobada hegegemadai taunimanima idia hitolo noho, a?

Nega momo tano mareremarere bona hitolo bada dainai, gorere idauidau idia vara. Bona unai be nega dokona ena toa ta.

[Blurb on page 5]

“Natudia toi toi amo ta ta be nimonia, dairia bona gorere ma haida dainai idia mase, to bema idia aniani namonamo, vadaeni do idia mase lasi.”​—ANN M. VENEMAN, FORMER EXECUTIVE DIRECTOR OF THE UN CHILDREN’S FUND.

[Picture Credit Line on page 5]

© Paul Lowe/Panos Pictures

Peroveta Hereva 3. Gorere Idauidau

“Taunimanima be . . . gorere dikadia momo do idia abia.”​—LUKA 21:​11, Contemporary English Version.

● Tuari ese ia hadikaia Africa tanona ta ai, helt ofesa ta ladana, Bonzali, be ena taoni ena maini gabunai idia gaukara taudia ia durua, badina idia be Marburg gorerena idia abia. Bonzali be siti badana ai gavamani taudia amo heduru ia noia, to gau ta idia karaia lasi. Hua foa murinai heduru ia ginidae, to Bonzali ia mase vadaeni. Ia durua taudia amo unai gorere ia abia.

HAMOMOKANIA GAUDIA ESE DAHAKA IDIA HAHEDINARAIA? Gorere idauidau hegeregere nimonia, dairia, AIDS, TB, bona malaria ese taunimanima momo ia hamasea. Lagani 2004 ai, unai gorere idauidau ese taunimanima 10.7 milioni bamona ia hamasea. Eiava ita gwau diba, unai bamona gorere idauidau ese lagani ta ai, sekeni toi sibona lalonai taunimanima ta ta ia hamasea.

KOUA HEREVA BADANA BE DAHAKA? Tanobada ena popiuleisen ia bada ia lao dainai, gorere idauidau idia abia taudia edia namba danu ia bada ia lao.

UNAI KOUA HEREVANA BE MAORO, A? Tanobada ena popiuleisen be ia bada ia lao haraga. To taunimanima edia diba danu ia bada ia lao, unai dainai gorere idauidau edia badina idia davaria bona idia hanamoa diba. Unai ese tanobada hegegemadai gorere ia hamaragia, a? Lasi.

DAHAKA OI LALOA? Baibel ena peroveta herevana hegeregerena, taunimanima be gorere idauidau dainai idia hisihisi noho, a?

Tano mareremarere, hitolo bada, bona gorere idauidau ese taunimanima milioni momo dekenai dika bada ia havaraia. Taunimanima milioni momo be idia do idia gimaia o durua taudia ese idia hahisidia. Baibel ese unai do ia vara ia perovetalaia dalana mani ita laloa.

[Blurb on page 6]

“Laiona eiava gau ta ese oi ia ania be dika herea, to gorere ta ena gems be emu tauanina ena lalona ia ania, bona taunimanima momo dekenai unai bamona ia vara oi itaia neganai, unai be dika herea danu.”​—EPIDEMIOLOGIST MICHAEL OSTERHOLM.

[Picture Credit Line on page 6]

© William Daniels/Panos Pictures

Peroveta Hereva 4. Lalokau be Lasi

“Ruma bese lalonai lalokau be lasi.”​—2 TIMOTEO 3:​1-3.

● United Kingdom ai, Chris be ruma bese ai dagedage idia davaria taudia durua oreana ta ida ia gaukara. Chris ia gwau: “Lau laloatao, hahine ta be mai bero bada ida ia raka vareai, ena be guna ia lau itaia, to unai bero dainai ena vairana ena toana lau reaia. Hahine ma haida be idia lalohisihisi bada dainai, edia kwarana idia atoa diho bona oi do idia itaia lasi.”

HAMOMOKANIA GAUDIA ESE DAHAKA IDIA HAHEDINARAIA? Africa tanona ta ai, hahine toi toi amo ta ta be maragi neganai idia kara bodaga henidia. Unai tano ai tahua gaukarana idia karaia neganai idia davaria, tatau 33 pesen idia laloa edia adavadia idia botaia be maoro. To, hahine sibona be unai hekwakwanai idia davaria lasi. Hegeregere Canada ai, tatau 10 10 amo toi toi be idia noho hebou hahinedia ese idia botadia.

KOUA HEREVA BADANA BE DAHAKA? Ruma bese lalonai dagedage karana be hanaihanai ia vara. Bona hari taunimanima ese idia herevalaia momo, guna bamona lasi.

UNAI KOUA HEREVANA BE MAORO, A? Idia hanaia laganidia lalonai, ruma bese ai dagedage hadokoa karana idia herevalaia momo. To unai ese ruma bese lalonai dagedage karana ia koua, a? Lasi. Ruma bese lalonai lalokau be lasi.

DAHAKA OI LALOA? Timoteo Iharuana 3:1-3 ia guguru, a? Ruma bese lalonai lalokau ia noho be namo, to momo ese unai idia hahedinaraia, a?

Peroveta hereva namba 5 be iseda tanobada ia herevalaia, bona hari ia guguru noho. Baibel ese unai ia herevalaia dalana mani ita laloa.

[Blurb on page 7]

“Ruma bese lalonai ia vara dagedage karana be nega momo idia ripotilaia lasi. Hegeregere hahine ta be ia noho hebou tauna ese nega 35 ia hahisia murinai, pulisi edia heduru ia tahua.”​—A SPOKESWOMAN FOR WALES DOMESTIC ABUSE HELPLINE.

Peroveta Hereva 5. Tanobada Idia Hadikaia

‘[Dirava ese] tanobada idia hadikaia taudia do ia hadikaia ore.’​—APOKALUPO 11:18.

● Nigeria ena hanua ta, Kpor ai, Mr. Piri be pama au gabunai ia gaukara. Niger Delta ai bouti amo oela bada herea ia hebubu dainai, ena gaukara ia haboioa. Ia gwau, “Unai ese emai gwarume ia hamasea, emai kopina ia hadikaia bona sinavai idia dika. Dala be lasi egu mauri durua gaudia lau abia totona.”

HAMOMOKANIA GAUDIA ESE DAHAKA IDIA HAHEDINARAIA? Diba bada taudia haida idia gwau, lagani ta ta ai tanobada ibounai momoru ena bada 6.5 milioni be davara dekenai idia lao. Unai momoru amo 50 pesen be plastik gaudia, bona lagani handred momo lalonai idia hure kava. Taunimanima ese tanobada idia hamiroa sibona lasi, to au, gwarume, bona unai bamona gaudia ma haida idia haorea haraga. Stadi haida idia hahedinaraia, taunimanima ese lagani ta lalonai idia haorea gaudia be lagani ta bona hua faiv lalonai idia tubu lou. Australia ena niuspepa ta (Sydney Morning Herald) ia gwau, “Bema tanobada ena popiulesen be unai bamona dala ai unai gaudia idia haorea haraga noho, vadaeni lagani 2035 ai tanobada ma rua ita abia be namo.”

KOUA HEREVA BADANA BE DAHAKA? Taunimanima be mai edia aonega bona hekwakwanai hanaia daladia idia diba. Unai dainai hekwakwanai ita haorea bona tanobada ita hanamoa diba.

UNAI KOUA HEREVANA BE MAORO, A? Taunimanima ta ta bona orea idauidau idia gaukara goada tanobada hadikaia lasi herevadia idia halasia totona. To, tanobada idia do hamiroa noho.

DAHAKA OI LALOA? Dirava ese kara ta ia karaia bona ena gwauhamata hegeregerena tanobada do ia hanamoa, a?

Baibel ese unai peroveta herevadia faiv sibona ia gwauraia lasi, to dina gabediai do idia vara gau namodia ia perovetalaia danu. Peroveta hereva namba siks ai ia noho haheitalai ta mani ita laloa.

[Blurb on page 8]

“Guna egu noho gabuna be paradaiso, to hari ia be rabesi negea gabuna.”​—ERIN TAMBER, AMERICA ENA GULF COAST AI IA NOHO. LAGANI 2010 AI, GULF OF MEXICO AI OELA BADA BE DAVARA AI IA HEBUBU MURINAI, UNAI IA GWAURAIA.

[Maua Rau Ai 8]

Dirava Ena Kerere, A?

Idia vara dika idauidau be Baibel ese ia perovetalaia dainai, unai be Dirava ena kerere, a? Ia ese ita ia hahisia, a? Unai haere be Baibel be Dahaka Ia Hadibaia? bukana, karoa 11 ai oi davaria diba. Iehova ena Witnes taudia ese idia karaia.

[Picture Credit Line on page 8]

U.S. Coast Guard photo

Peroveta Hereva 6. Haroro Gaukara Badana

“Basileia ena sivarai namona be tanobada ibounai dekenai do idia harorolaia.”​—MATAIO 24:14.

● Hahine ta ladana, Vaiatea be Pacific motumotu ta dekenai ia noho. Unai motumotu be Tuamotu Archipelago dekenai. Ena be Tuamotu ai motumotu 80 bamona idia noho, to idia ibounai edia bada be sikoea kilomita 802,900 bona taunimanima 16,000 bamona idia noho. To Iehova ena Witnes taudia ese Vaiatea bona ena dekena taudia idia vadivadi henia. Dahaka dainai? Badina Witnes taudia idia ura Dirava ena Basileia ena sivarai namona be taunimanima ibounai dekenai idia harorolaia.

HAMOMOKANIA GAUDIA ESE DAHAKA IDIA HAHEDINARAIA? Basileia ena sivarai be tanobada ena gabu ibounai dekenai ia lao noho. Lagani 2010 ai, Iehova ena Witnes taudia be tano 236 ai hora 1.6 bilioni idia gaukaralaia, sivarai namona idia harorolaia totona. Anina be dina ta ta ai, Witnes taudia ta ta be miniti 30 idia haroro. Idia hanaia lagani gunadia 10 lalonai, Witnes taudia ese Baibel buka bona magasin 20 bilioni idia halasia bona hariharilaia.

KOUA HEREVA BADANA BE DAHAKA? Baibel ena sivarai be lagani tausen momo lalodiai idia harorolaia.

UNAI KOUA HEREVANA BE MAORO, A? Momokani, taunimanima momo ese Baibel ena sivarai idia harorolaia. To idia momo be gabu haida sibona ai nega kwadogina lalonai idia haroro. To, Iehova ena Witnes taudia be tanobada ibounai taunimanima milioni momo idia haroro henia. Histori lalonai, siahu bada oreadia ese Iehova ena Witnes taudia idia dagedage henia, to mai haheauka ida idia haroro noho.a (Mareko 13:13) Danu, Iehova ena Witnes taudia edia haroro gaukara dainai, davana idia abia lasi. To, sibona edia ura dainai edia nega idia henia bona Baibel buka bona magasin idia hariharilaia neganai, davana idia gwauraia lasi. To taunimanima edia ura hegeregerena ai idia henia kontribusen monina ese edia gaukara ia durua.

DAHAKA OI LALOA? “Basileia ena sivarai namona” be tanobada ibounai dekenai idia harorolaia, a? Unai peroveta herevana ia guguru ese ia hahedinaraia, kahirakahira vaira negai gau namodia do idia vara, a?

[Futnout]

[Blurb on page 9]

“Iehova ese iseda gaukara ia do koua lasi lalonai, mai eda ura bada ida dala idauidau ai Basileia ena sivarai namona be taunimanima dekenai ita harorolaia noho.”​—2010 YEARBOOK OF JEHOVAH’S WITNESSES.

Nega Namona be Kahirakahira!

“Nega daudau lasi lalonai kara dika taudia do idia ore. . . . To manau taudia ese noho gabuna tano do idia abia, do idia helai namonamo, mai moale bona mai maino danu.”​—SALAMO 37:​10, 11.

OI URA ataiai ia noho peroveta herevana ia guguru, a? Oibe. Badina namodia dainai oi abia dae unai peroveta herevana be kahirakahira do ia guguru.

Inai magasin ena matamana kahanai, ita be Baibel ena peroveta herevadia haida ita herevalaia, idia hahedinaraia ita be “dina gabediai” ita noho. (2 Timoteo 3:1-5) Dirava ese Baibel torea taudia ia hasiahua unai gaudia idia perovetalaia totona, unai amo helaro ita abia. (Roma 15:4) Unai peroveta herevadia idia guguru karana ese idia hahedinaraia, ita abia hekwakwanai idauidau be kahirakahira do idia ore.

Dina gabedia murinai dahaka do ia vara? Dirava ena Basileia ese taunimanima do ia lohiaia. (Mataio 6:9) Unai negai do idia vara gaudia be Baibel ese inai bamona ia herevalaia:

● Hitolo do ia ore. ‘Koni momo herea, be tano dekenai do ia vara namonamo. Bona ororo gabudia dekenai danu uiti bona aniani avadia do idia tubu namonamo.’​—Salamo 72:16.

● Gorere do ia ore. “Ta do ia gwau lasi, ‘Lau gorere.’”​—Isaia 33:24.

● Tanobada be do ia matamata lou. “Taunimanima idia noho lasi tanona, bona tano kaukauna be do idia moale, bona palauapalaua be unai tano dekenai do idia tubu namonamo.”​—Isaia 35:1.

Unai Baibel ena peroveta hereva namodia haida be kahirakahira do idia guguru. Iehova ena Witnes taudia idia diba momokani nega namona be kahirakahira do ia vara. Unai ena badina oi diba totona, idia oi nanadaia be namo, ani?