Keristani Tadikaka Burukadia Oi Lalodia Bada, A?
IDAUNEGAI Israela taudia be Iehova ida gwauhamata idia karaia neganai, Iehova ese idia ia hagania: “Tau buruka edia vairanai do umui toreisi, bona buruka taudia ibounai do umui matauraia. Umui emui Dirava garina do umui gari.” (Levitiko 19:32) Unai dainai, buruka taudia matauraia karana be maduna helagana ta, bona Dirava badinaia karana ida idia hakapua. Ena be hari Keristani taudia be Mose ena Taravatu henunai idia noho lasi, to ita ia hadibaia Iehova dekenai ia idia hesiai henia buruka taudia be dava bada gaudia bamona. (Aonega Herevadia 16:31; Heberu 7:18) Iehova ena lalohadai ita hahedinaraia, a? Iseda Keristani tadikaka bona taihu burukadia ita lalodia bada, a?
Iena Turana Burukana Ia Laloa Bada
Baibel ena sivarai ta ese ia hahedinaraia buruka taudia ita matauraia be namo, unai be Baibel bukana King Taudia Iharuana dekenai ia noho. Unai sivarai ese peroveta merona Elisaia be peroveta tauna Elia ena gabu ia abia dalana ia herevalaia. Israela ena iduhu ten basileiana dekenai Elia be peroveta gaukarana ia karaia, to iena dina ginigabedia lalonai ia vara gauna mani ita laloa.
Unai dina ai, Iehova ese peroveta tauna burukana ia hamaoroa Gilegala amo Betele dekenai do ia lao, Betele amo Ieriko dekenai do ia lao, bona Ieriko amo Ioridane Sinavai dekenai do ia lao. (2 King Taudia 2:1, 2, 4, 6) Unai be kahirakahira kilomita 50 loaloana lalonai, Elia ese nega toi Elisaia ia hamaoroa ia badinaia noho karana ia hadokoa totona. To, lagani handred haida gunanai hahine matamata Ruta ia ura lasi Naomi ia rakatania hegeregerena, Elisaia ia ura lasi peroveta tauna burukana do ia rakatania. (Ruta 1:16, 17) Nega toi Elisaia be Iehova ena ladana dekenai ia gwauhamata Elia do ia rakatania lasi totona. (2 King Taudia 2:2, 4, 6) Unai nega ai, Elisaia be lagani 6 bamona lalonai Elia ia durua vadaeni. To, Elisaia ia ura Elia ida hanaihanai do idia gaukara hebou. To, sivarai ma ia gwau: “Idia raka noho, bona herevahereva noho neganai, . . . Elia be koehirihiri ese ia abia daekau lao guba dekenai.” (Siri 11) Elia bona Elisaia idia herevahereva heheni ela bona Elia ena haroro dokona Israela dekenai. Toana be unai peroveta merona ia ura dikadika unai diba bada peroveta tauna burukana amo hadibaia bona hagoadaia herevadia momo ia abia. Ia hedinarai goevagoeva, Elisaia be ena turana burukana ia laloa bada.
‘Oiemu Tamana Bona Sinana Bamona’
Elisaia ese peroveta tauna burukana be turana ta—lauma dalanai tamana ta—bamona ia lalokau henia ena badina ita itaia diba. (2 King Taudia 2:12) Israela dekenai Elia ena gaukara ia doko gwauraia neganai, Elisaia dekenai ia gwau: “Oi dekena amo Lohiabada ese lau ia do abia daekau lasi neganai, lau do oi noia, bona oiemu ura gauna oi dekenai do lau henia.” (Siri 9) Unai dainai ela bona dokona, Elia ia hahedinaraia ia ese ena gabuna do ia abia tauna ena lauma dalana bona Dirava ena gaukara ia heau noho dalana ia laloa bada.
Hari, ita moale badina iseda Keristani tadikaka bona taihu burukadia danu be tamana bona sinana bamona, matamata taudia idia laloa bada bona idia dekenai edia diba bona aonega idia hadibaia. Hegeregere, Iehova ena Witnes taudia edia brens opesi dekenai lagani momo idia gaukara volantia taudia be mai ura bada ida Betele famili taudia matamatadia idia durua bona idia hadibaia, edia hesiai gaukara idia karaia totona. Unai hegeregerena, lagani momo lalonai kongregesen idauidau idia vadivadi henia sekit bona distrik naria taudia bona edia adavadia be mai edia moale ida edia ekspiriens be sekit bona distrik naria gaukara totona treinini idia abia taudia dekenai idia hadibaia. Danu, tanobada hegegemadai Iehova ena Witnes taudia edia kongregesen ai idia noho buruka tadikaka bona taihu be mai kamonai ida lagani daudau Iehova idia hesiai henia, bona mai moale ida edia aonega bona ekspiriens amo kongregesen ai idia noho taudia matamatadia idia durua.—Aonega Herevadia 2:7; Filipi 3:17; Tito 2:3-5.
Unai Keristani buruka taudia namodia ese edia laloa bada karana idia hahedinaraia dainai, idia ita matauraia be moale gauna. Unai dainai, ita ura Elisaia ena haheitalai ita tohotohoa bona Keristani tadikaka burukadia ita lalodia bada. Aposetolo Paulo ese ita ia hadibaia lou, nega ibounai buruka tauna be “tamana bamona” bona buruka hahine be “sinana bamona” ita kara henidia be namo. (1 Timoteo 5:1, 2) Unai bamona ita karaia neganai, ita be tanobada hegegemadai Keristani kongregesen ena heau maoromaoro bona tubu dalana ita durua bada herea.
[Picture on page 30]
Elisaia ia ura Elia ida hanaihanai do idia gaukara hebou
[Pictures on page 31]
Matamata taudia be Keristani buruka taudia amo namo bada herea idia abia