Portuguese gado idia hereva taudia, Angola amo idia mai taudia, ai durudia bona idia ida Bible ai stadilaia danu.

Zimbabwe amo idia mai matamata taudia haida danu ai durudia. Unai tano dekenai Iehova ena Witness be mai edia dala, sikuli dekenai Bible idia hadibaia totona. Unai ese hereva momokani dekenai matamata taudia edia ura ia haidaua. Gabeai, Botswana dekenai idia lao neganai, ai davaridia bona idia henanadai Bible stadi idia abia totona. Edia tama sina idia ura lasi, to idia mai misinari ruma dekenai, unuseniai Bible stadi ai karaia. Idia goada idia lao bena idia be bapatiso Witness taudia ai idia lao.

Unai lagani 41 lalodiai nega ibounai gaukara lau karaia unai tano 8 lalodiai lau laloa neganai, Iehova lau tanikiu henia bada ena hahenamo momo dainai. Unai ai karaia be nega haida ia auka, to lau bona Joyce ai moale badina ma taunimanima momo ai durudia Dirava ena Basileia totona idia gini tutukatutuka bona ena be hekwakwanai momo idia vara bona momo idia ura lasi momokani Iehova ena Witness taudia do idia kamonai henidia, to gaukara ia bada ia lao. Inai be momokani ‘sivarai namona ai harorolaia goadagoada, nega namodia neganai, bona nega dikadia neganai danu.’ Oibe nega ibounai hesiai gaukara be mai ena ekspiriens momo, bona emai kudouna ibounai ida ai moale ma haida ai hamaorodia inai gaukara do idia abia dae bona do idia moalelaia totona.​—⁠2 Timoteo 4⁠:⁠2.

Duahia Taudia Edia Henanadai

◼ Horoa Keristen taudia haida be ‘hisihisi bada’ ena nega amo do idia roho mauri tanobada matamatana dekenai, bena murinai do idia lao guba dekenai, a?

Bible ese unai henanadai ena haere ia gwauraia hedinarai lasi.

Keristen taudia be nega daudau lalonai, Dirava ese do ia henidia gaukarana idia laloa momo. (Kara 1:6) Hari iseda nega lalonai, Basileia ia gini vadaeni dainai, unai gaukara ita laloa momo. (Mataio 24:​3, 24, 34) Hari inai nega lalonai, tanobada dokona be ia kahirakahira dainai, Keristen taudia idia laloa lauma helaga ia horoa taudia haida be reana “Siahu Ibounai Diravana ena Dina Badana” amo do idia roho mauri, bona tanobada dekenai nega sisina lalonai hesiai gaukara do idia karaia, bena murinai guba maurina do idia abia. (Apokalupo 16:14) Bible lalonai unai bamona do ia vara ia gwauraia lasi, to kara haida bona peroveta herevadia haida dainai, ita laloa reana unai bamona do ia vara diba. To, unai hereva ita hamomokania diba lasi dainai, namona be ita naria bona Dirava ena kara do ita itaia.

Bible ese ia gwauraia guna gaudia be mai edia anina hari idia noho Dirava ena taunimanima dekenai. Haheitalai ta be inai, ita diba dina toi bona hanuaboi toi lalodiai Iona be gwarume badana ena bogana dekenai ia noho. Taunimanima haida idia laloa unai be Dirava ena hamauria karana ta sibona, to Iesu ia gwau unai kara be ia dekenai do ia vara gauna, hegeregere ia be dina toi kahadia guri dekenai do ia noho bona murinai do ia toreisi lou karana ia laulaulaia. (Iona 1:17; Mataio 12:40) Oibe, Iona dekenai ia vara gauna be gabeai do ia vara gauna ta ia laulaulaia. Dirava ena hesiai taudia be Bible ia gwauraia guna gaudia idia tahua, badina idia ura diba idia dekenai Iehova ese dahaka do ia karaia.

Haheitalai be inai, December 15, 1928 ena Watch Tower magasin lalonai, Bible ia gwauraia peroveta herevana Mika 5:​2-15 dekenai ena sivarai idia kikilaia. Mika bukana lalonai, ‘Asuria’ be Samaria ia hadikaia bona igui hesiai Iuda taudia be Babulono dekenai idia giroa lou ena sivarai ia gwauraia. (Mika 1:​1, 5-7; 4:10) To guna idia vara gaudia be gabeai do idia vara gaudia idia laulaulaia, hegeregerena Mesia do ia vara Betelehem dekenai. (Mika 5:2) “Asuria tauna” dekena amo ia hamauridia murinai, “Iakobo natudia oredia” be “hunu bamona Iehova ena amo” bona “leona natuna bamona mamoe seridia bogaragidiai.” (Mika 5:​6-8) Unai Watch Tower magasin lalonai, ia gwau: “Unai anina be Aramagedono tuarina do ia ore murinai, reana orena taudia haida be tanobada dekenai do idia noho, bona Lohiabada ena hesiai gaukara ma haida do idia karaia ena ladana idia hanamoa bona idia hahairaia totona.” Namona be oi laloa, idia hekokoroku lasi bona idia gwau lasi unai bamona do ia vara momokani, to idia gwau: “Reana unai bamona do ia vara.”

Bible ia gwauraia sivaraina ta ese gabeai tanobada dekenai do idia roho mauri karana ia laulaulaia, a? Haheitalai ta be Noa bona iena ruma bese taudia. Hari inai nega dokona lalonai, Noa ese Iesu ia laulaulaia. (Genese 6:​8-10; Mataio 24:37) Noa ese ena adavana bona edia natudia memero toi bona ena ravadia toi ia hakaudia unai nega ena tanobada dokona amo idia roho mauri totona. Unai hegeregerena, Keriso ese ena headava hahine orea ena orena taudia, bona “Noho Hanaihanai Tamana,” Iesu ena natudia ai idia lao taudia ia hakaudia. Noa ena adavana be Abata amo ia roho mauri bona tanobada goevana dekenai tomadiho momokanina haginia lou gaukarana lalonai ia heduru. Unai be hegeregere, headava hahine oreana ena orena taudia be do idia roho mauri tanobada matamatana lalonai.​—Isaia 9:​6, 7; 2 Korinto 11:2; Apokalupo 21:​2, 9.

Bible ena sivarai haida dainai, taunimanima haida idia laloa reana orena taudia haida be do idia roho mauri tanobada matamatana lalonai. Haheitalai ta be inai, Ierusalem idia hadikaia ore neganai, Ieremia be ia roho mauri; bona “tau ta” mai ena toretore gaudia be ia noho unai hahemaoro karana ia itaia totona, bena murinai ia giroa lao ia ripotilaia totona.​—Esekiel 9:​4, 8, 11.

Taunimanima haida be mai lalo-namo danu idia laloa, reana horoa taudia haida be do idia roho mauri tanobada matamatana lalonai, bona idia be unai bamona idia laloa badina Bible ia gwauraia karadia bona peroveta herevadia be, nega haida, gabeai idia vara gaudia idia laulaulaia dainai. To, bema horoa taudia be unai neganai tanobada dekenai idia noho lasi, unai be lalohisihisilaia gauna ta lasi. Badina ita diba vadaeni, nega ia hanaia murinai, Bible ia gwauraia gaudia edia anina ita lalo-pararalaia diba. Haheitalai ta be inai, July 15, 1981 ena Watchtower magasin ese Mika 5:​6-9 ena anina ia kikilaia lou, idia gwau “lauma Israel orena taudia be do idia naria lasi ela bona . . . Aramagedono murinai, to hari idia be ‘hunu’ bamona taunimanima idia hagoadaia.” Unai hereva lalonai idia gwau reana orena taudia haida ese Dirava ena tuari badana amo do idia roho mauri, bona nega sisina lalonai “idia be ‘hunu’ bamona ‘mamoe idaudia’ ena ‘hutuma bada herea’ taudia dekenai.” Ita diba vadaeni, nega ia hanaia murinai bona lauma dalanai diari ia bada ia lao neganai, iseda diba peroveta herevadia dekenai, eiava Bible ena sivarai dekenai do ia bada diba bona hari ita laloa ia maoro gauna do ia haidaua diba.​—Hereva Lada-isidia 4:18.

Ita diba vadaeni Bible ese ‘Taunimanima ena Natuna ia mai negana’ bona ‘ia abia hidi taudia be lai edia gabuna 4 dekena amo do idia gogoa negana’ be ia gwauraia tamona. (Mataio 24:​29-31) Danu, mai ena Basileia siahuna ida “Lohiabada do ia giroa mai neganai” mase dekenai idia mahuta horoa taudia be do idia toreisi lou bona guba dekenai mauri do idia abia. (1 Tesalonika 4:​15, 16) Unai abia hidi taudia be unuseniai do idia lao, badina idia be Mamoe Natuna ena adavana ai do idia lao. Unai be edena negai do ia vara?

Ioane be Apokalupo bukana dekenai, Dirava ese tomadiho ariara hahine, Babulono Badana, ia hamasea ore sivaraina ia torea murinai, ia ese “Mamoe ena Natuna ena headava negana” ena sivarai ia torea. Mai ena kara bodaga ariara “hahine” be ia mase bona iena gabu dekenai “Mamoe ena Natuna ena headava” hahine ia noho, iena “dabua be goevagoeva bona ia diaridiari. Unai be Dirava ena helaga taudia edia kara namodia ena toana” ia laulaulaia. (Apokalupo 18:10; 19:​2, 7, 8; 21:9) Babulono Badana do idia hadikaia ore hisihisi badana ena nega lalonai. (Mataio 24:21; Apokalupo 7:14) Unai dainai, haida idia laloa, reana unai headava hahine oreana haida be unai hisihisi badana dekena amo do idia roho mauri neganai, unai be Iehova ena hahemauri bona hanamoa karana idia dekenai do ia hahedinaraia. (Sefania 2:3; Mataio 24:22 oi itaia danu.) Bema tanobada dekenai do idia roho mauri, unuseniai do idia mauri noho diba ela bona Dirava ia ura guba dekenai do ia abidia daekau negana.

To, Apokalupo bukana dekenai idia torea gaudia be hereva ginigunana ela bona hereva dokona be nega ena lain bamona idia torea lasi. Bona tanobada matamatana ena gaukara karaia totona horoa taudia edia orena maragi taudia edia heduru idia abia be gau badana lasi, badina idia ese tanobada dekenai mauri hanaihanai do idia abia kamonai Keristen taudia milion momo idia hadibadia vadaeni. Unai dainai, Babulono Badana ia hadikaia ore neganai, Dirava ese ena horoa taudia be maoromaoro guba dekenai ia abidia daekau diba, bona unai neganai ‘Mamoe ena headava’ do idia karaia diba. Unai neganai, helaga taudia iboudiai be hisihisi badana ena nega dokona lalonai, Keriso danu “auri itotohina dekena amo tanobada besedia do idia biagudia” diba. (Apokalupo 2:​26, 27; 19:​11-21) Bema unai dala amo Dirava do ia karaia, 144,000 taudia iboudiai be Iesu danu ‘lohia siahu idia abia, ela bona lagani 1,000 ibounai lalonai.’​—Apokalupo 20:4.

Dirava ena taunimanima be idia ura dikadika idia diba Dirava be edena bamona do ia hakaudia bona edena bamona do ia hanamodia, bona unai idia karaia be namo herea. (1 Petero 1:12 danu oi hahegeregerea.) Unai bamona kara ese ia hahedinaraia idia diba momokani iena ura do ia hagugurua. Ena be do ia karaia kara maragimaragidia ibounai ita gwauraia diba lasi, to do idia vara gaudia be mai moale danu ita naria noho diba.