Oi Hegeregere Gaukara Karaia Totona, A?

“Dirava sibona ese aonega ai dekenai ia henia, vadaeni inai gaukara ai karaia diba.”​—2 KORINTO 3:5.

1. Edena bamona taudia edia gabu ta be lasi Keristen kongregesen dekenai?

IEHOVA DIRAVA bona Iesu Keriso be gaukara taudia. Iesu ia gwau: “Egu Tamana be ia gaukara noho ia mai bona hari, lau danu lau gaukara noho.” (Ioane 5:17) Gaukara idia ura karaia lasi taudia be Dirava ia ura henidia lasi; bema taunimanima be gaukara dagi ena siahu idia tahua badina idia ura taunimanima ma haida do idia biagudia totona, Dirava be unai bamona kara ia ura henia lasi danu. Lahedo tauna eiava gaukara dagi ia tahua sibona ena ladana habadaia totona tauna ena gabu be lasi Keristen kongregesen lalonai.​—Mataio 20:​25-27; 2 Tesalonika 3:10.

2. Dahaka dainai Keristen kongregesen lalonai harihari tatau haida ese gaukara maduna idia huaia be namo?

² Iehova ena Witness taudia be ‘nega ibounai Lohiabada ena gaukara idia karaia,’ badina hari taunimanima momo herea be tomadiho momokani ena “ororo” dekenai idia mai noho. (1 Korinto 15:58; Isaia 2:​2-4) Kongregesen lalonai gaukara bada ia noho lauma dalanai idia hegeregere taudia idia karaia totona. Unai gaukara idia huaia taudia be sibona edia gau haida idia abia totona idia karaia lasi, idia be sibona idia hanamoa lasi, to Iehova idia hanamoa. (Hereva Lada-isidia 8:13) Idia diba Dirava ese idia ia durua idia hegeregere kongregesen ena gaukara idia karaia totona, hegeregere ‘taravatu matamata ena hesiai taudia dekenai aonega ia henidia bamona.’​—2 Korinto 3:​4-6.

3. Elda bona hesiai taudia edia gaukara be dahaka?

³ Keristen ginigunadia edia nega hegeregerena, hari inai negai danu lauma helaga ese Iehova ena orea dekena amo tatau ia abia hidi elda bona hesiai tauna edia gaukara idia karaia totona. (Kara 20:28; Filipi 1:1; Tito 1:5) Lauma dalana dekenai elda taudia be Dirava ena mamoe orea idia naria, bona mamoe idia hakaudia dika idia davaria garina. Hesiai taudia ese elda taudia idia durudia, to lauma dalanai taunimanima idia gunalaia lasi. (1 Petero 5:2; Kara 6:​1-6 itaia danu.) Dirava ena Natuna be ia mai, hesiai gaukara ia karaia totona, bona ia hegeregerena, unai dagi idia abia taudia be idia ura idia bamoa abidadama taudia totona hesiai gaukara idia karaia. (Mareko 10:45) Bema oi be Keristen tauna ta, oi be unai bamona ura oi abia, a?

Dagi ena Taravatu

4. Kongregesen gaukara idia gunalaia taudia ese dahaka taravatudia idia badinaia dagi idia abia totona?

⁴ Aposetolo Paulo ese dahaka taravatu idia badinaia dagi idia abia totona ia gwauraia hedinarai 1 Timoteo 3:​1-10, 12, 13 bona Tito 1:​5-9 dekenai. Kongregesen dekenai dagi idia abia taudia be unai kara idia badinaia be gau badana. Unai dagi ena taravatu ita herevalaia neganai, do ita itaia unai kara haida be mai anina elda bona hesiai taudia dekenai danu, to namo lasi murimuri taudia idia laloa bamona ita laloa. Namona be Keristen ginigunadia edia nega lalonai unai dagi ena taravatu edia anina idia dekenai, bona hari edia anina Iehova ena taunimanima dekenai do ita laloa danu. Taunimanima ese unai dagi ena taravatu idia badinaia toho, to ita gwau diba lasi hanaihanai idia badinaia goevagoeva diba, badina unai neganai tau ta ia hegeregere lasi unai dagi ia abia totona. (1 Ioane 1:8) To, bema oi be Keristen tauna ta, bona herevana hari oi ese kongregesen dekenai gaukara ena maduna haida oi abia eiava lasi, gau badana be oi sibona emu kara oi tahua, bena do oi diba oi hegeregere eiava lasi dagi do oi abia totona, ani?

5. Tau ta be kara maoromaoro tauna ena anina be dahaka?

⁵ Kara maoromaoro taudia; edia sivarai do ia namo ekalesia lasi taudia edia vairana dekenai; tau ta ese edia kerere ta ia gwauraia diba lasi. (1 Timoteo 3:​2, 7, 8, 10; Tito 1:​6, 7) Dagi idia abia neganai, bona unai gaukara idia karaia noho lalonai, hesiai taudia bona elda taudia edia kara ibounai do idia namo be gau badana, namo lasi bema tau ta ese idia ta do ia samania be maoro bona sisiba idia henia ena kara ia kerere eiava hahediba koikoi ia hadibaia dainai. Bema “varavara koikoi” eiava taunimanima ma haida ese idia ta idia samania koikoi, unai kara maoromaoro tauna be ia kerere lasi. Kongregesen lalonai tau ta be dagi ena gaukara ia karaia neganai, ena dagi idia kokia kava diba lasi, to iena kara ena maoro eiava ena dika idia diba totona Bible ena taravatu dekenai idia hahegeregerea guna. (2 Korinto 11:26; 1 Timoteo 5:19) Namona be kongregesen lalonai dagi ia abia tauna ena “sivarai be do ia namo ekalesia lasi taudia edia vairana dekenai. Vadaeni inai murimuri taudia ese ia do idia matauraia, haida ese ia do idia samania bona Satani ena koikoi gabuna lalonai do ia moru garina.” Bema guna tau ta be kara dika badana ta ia karaia, ia ese dagi ia abia diba lasi ela bona taunimanima ese unai dika idia laloaboio bona taunimanima vairanai ladana namona ia abia.

6. Hahine tamona adavaia ena anina be dahaka?

⁶ Hahine tamona ena adavana. (1 Timoteo 3:​2, 12; Tito 1:6) Ita gwau lasi headava tatau sibona be hesiai tauna bona elda dagina idia abia diba. To, bema tau ia headava, ena hahine ia do mauri noho neganai unai hahine sibona be iena adavana bona ma hahine ta dekenai do ia heudahanai lasi. (Heberu 13:4) Keristen ginigunadia edia nega lalonai Keristen lasi tatau bamona ia karaia diba lasi, idia be hahine momo nega tamona idia adavaia.a

7. (a) Tau ta ena lagani idia hegeregere neganai, ia be mai ena gwau maoro elda dagina ia abia totona, eiava? (b) Tau ta be ena ruma bese ia biagua namonamo ena anina be dahaka?

⁷ Iena ruma taudia, adavana bona iena natuna do ia biagua namonamo. Iena natuna ese ia do idia kamonai henia bona matauraia. (1 Timoteo 3:​4, 5, 12; Tito 1:6) Reana haida idia laloa edia mauri lagani idia 30 neganai elda dagina idia abia be namo, to Bible dekenai tatau ese dagi idia abia lagani ia gwauraia lasi. To, lauma dalanai ia be tau badadia edia kara ia hahedinaraia be namo. Namona be hesiai taudia bona elda taudia dagina idia abia taudia edia lagani be natuna idia havaraia taudia edia lagani bamona. Bema tau ta ia headava vadaeni, bona taunimanima vairanai Dirava ena kara ia hahedinaraia, to iena ruma dekenai mai dagedage danu ena ruma bese ia biagudia, ia be hegeregere lasi dagi ia abia totona. Gau badana be Bible ena taravatu hegeregerena iena ruma taudia ia biagudia namonamo, bona unai neganai do idia matauraia. Danu namona be ia ura iena ruma bese taudia ta ta ibounai ia durudia lauma dalanai idia goada totona. Kahirakahira nega ibounai bema elda ta be mai ena natuna, gau badana be edia kara idia namo bona idia be mai edia “abidadama.” Namona be idia goada idia lao Dirava dekenai gwauhamata do idia karaia totona, eiava idia bapatiso bona idia be Iehova ena Witness taudia ai idia lao vadaeni. Bema tau ta be ena natuna ia durudia diba lasi abidadama taudia ai idia lao totona, ia be hegeregere lasi ma haida ia durudia totona.

8. Ruma bese kwarana be elda dagina ia do abia lasi neganai, dahaka ia diba guna be gau badana?

⁸ Bema ruma bese kwarana tauna be elda dagina do ia ura abia bona kongregesen taudia be lauma dalanai do ia hakaudia, gau badana be guna ia sibona ena ruma bese ia biagua namonamo dalana ia diba. “Bema tau ta ese iena ruma korikori taudia ia biagua diba lasi neganai, Dirava ena ekalesia edena bamona do ia gunalaia diba?” (1 Timoteo 3:5) Momokani, reana tau ta ena adavana be kamonai lasi hahinena. (Mataio 10:36; Luka 12:52) Eiava reana iena natuna ta be kara dika badana do ia karaia, to ena natuna ma haida be lauma dalanai idia goada idia lao. To, bema unai tau be ia hekwarahi bada iena ruma bese taudia ia hakaudia namonamo totona, bona ena natudia oredia be lauma dalanai idia goada, ena be iena natuna tamona ese ena hakaua dalana namona ia dadaraia, to reana hesiai tauna eiava elda dagina ia do dogoatao noho diba.

9. Dahaka dainai elda bona hesiai taudia idia naria namonamo kekero muramurana idia inua neganai?

⁹ Kekero heai tauna lasi eiava ia be uaina inuinu momo lasi tauna. (1 Timoteo 3:​3, 8; Tito 1:7) Hesiai tauna eiava elda tauna be kekero muramura do ia inua momo lasi. Inuinu karana ia manadalaia neganai ena lalohadai bona ena lalona ena goada do idia manoka diba, bena reana ia kekero dainai do ia heatu diba. Dagi abia tauna be ‘uaina ia inua momo lasi’ eiava taunimanima idia gwau diba lasi ia be inuinu momo tauna. (Hereva Lada-isidia 23:​20, 21, 29-35) Bema tadikaka ta ese haida ia vadivadi henia idia ia durudia totona, to unuseniai ia inuinu bada, madi unai be namo lasi! Bema tadikaka be ia ura ia inuinu sisina, namo lasi ia inuinu do ia lao hebou neganai, do ia lao haroro neganai, eiava helaga gaukara ma haida ia karaia neganai.​—Levitiko 10:​8-11; Esekiel 44:21.

10. Dahaka dainai moni idia mataganigani henia taudia bona koikoi dalanai moni idia abia gwauraia taudia be idia hegeregere lasi hesiai tauna eiava elda dagina idia abia totona?

¹⁰ Ia be moni do ia mataganigani henia lasi. (1 Timoteo 3:​3, 8; Tito 1:7) Moni idia ura henia bada taudia be lauma dalanai idia manoka diba, bona “mataganigani taudia” be Dirava ena Basileia do idia abia lasi. Unai dainai, unai bamona taudia be hegeregere lasi elda tauna eiava hesiai tauna ena dagi idia abia totona. (1 Korinto 6:​9, 10; 1 Timoteo 6:​9, 10) Greek gado ai unai hereva “moni . . . mataganigani henia” ena anina ta be “koikoi dalanai moni oi abia” bona ma anina ta be “hemarai dalanai moni oi abia.” (Filipi 1:21; 3:​4-8) Momokani, bema tau ta ena kara dainai ia hedinarai ia be Dirava ena “mamoe” do ia koidia ia be hegeregere lasi kongregesen dekenai gaukara ena dagi ia abia totona. (Esekiel 34:​7-10; Kara 20:​33-35; Iuda 16) Dagi abia totona tau ta ena ladana idia do siaia lasi neganai, gau badana be unai tau ena kara idia laloa namonamo guna, badina dagi ia abia murinai, reana moni idia henia ia naria totona bona namo lasi ia manoka dainai unai moni haida ia henaoa.​—Ioane 12:​4-6.

11. Kongregesen dekenai dagi abia totona, dahaka dainai ‘vareai matamata tauna’ ena ladana do idia siaia lasi?

¹¹ Vareai matamata tauna lasi; ena kara do idia tahua namonamo guna. (1 Timoteo 3:​6, 10) Bapatiso matamata tauna be nega bada lalonai ia do hahedinaraia lasi ia be hegeregere dagi ena gaukara ibounai do ia naria namonamo diba totona. Dika idia davaria taudia reana ia hebogahisi henidia bada lasi, eiava ena aonega be do ia hegeregere lasi tomadiho tamona taudia ia durudia totona, bona reana taunimanima haida do ia laloa bada to ma haida do ia laloa bada lasi. Hesiai tauna eiava elda ena dagi do ia abia totona ena ladana idia do siaia lasi neganai, gau badana be unai tau ‘ena kara do idia tahua namonamo guna,’ namona be ia hahedinaraia ia laloa namonamo diba bona hanaihanai ena maduna ia huaia diba. Unai tau ena kara idia tahua ena nega ena daudau idia gwauraia lasi, bona lauma dalanai taunimanima idia goada idia lao ena daudau be idauidau. To, elda taudia do idia haragaharaga lasi bapatiso matamata tauna ena ladana do idia siaia dagi abia totona, badina namo lasi unai tau “do ia hekokoroku, vadaeni Satani ena hedibagani ese do ia hakererea garina.” Namona be guna unai tau be Keriso bamona ena manau ia hahedinaraia.​—Filipi 2:​5-8.

Hesiai Taudia edia Gaukara

12. Hesiai tauna totona idia torea dagi taravatudia be idia mo sibona idia badinaia be maoro, a?

¹² Hesiai taudia ese dahaka taravatu haida idia badinaia dagi abia totona idia torea. To, bema elda taudia danu ese unai dagi ena taravatu idia badinaia lasi, idia be hegeregere lasi dagi idia abia totona. Keristen bamona unai dagi taravatudia dekenai oi hegeregere eiava lasi?

13. Laloa maoromaoro karaia ena anina be dahaka?

¹³ Laloa maoromaoro tauna. (1 Timoteo 3:8) Bema tau ta ese hesiai tauna ena dagi ia tahua noho, namo lasi unai dagi ena gaukara ia laloa bada lasi. Namona be ena kara ibounai do idia namo bena unai neganai taunimanima do idia matauraia. Ena be nega ta ta ai ia hevaseha diba, to bema nega hanaihanai ia be hevaseha kava tauna, ia hegeregere lasi unai dagi ia abia totona.

14. (a) Lalo-rua lasi tauna ena anina be dahaka? (b) Mai ena laloa maoromaoro tauna ena kara be dahaka?

¹⁴ Lalo-rua tauna lasi; ena lalona ena mamina ia namo. (1 Timoteo 3:​8, 9) Hesiai taudia (bona elda taudia) be hereva momokani taudia, idia kiki kava lasi bona taunimanima idia koia lasi. Idia be lalo-rua taudia lasi, unai dainai, gau badana be idia koikoi lasi, namo lasi tau ta dekenai edia hereva be ta, to ma tau ta dekenai edia hereva be ia idau. (Hereva Lada-isidia 3:32; Iakobo 3:17) Gau badana be unai taudia danu be ia hedinarai hereva momokanina idia abia dae momokani, bona hehuni hereva helaga ena “abidadama henia ena sivarai momokani do idia badinaia, mai edia laloa maoromaoro danu.” Dirava vairanai, unai bamona tauna ena laloa maoromaoro karana ese ia hahedinaraia ia be kara namo tauna bona koikoi eiava dika karadia ia karaia lasi. (Roma 9:1; 2 Korinto 1:12; 4:2; 7:1) Bema tau ta be hereva momokani bona Dirava ena taravatu ia badinaia lasi, ia be hegeregere lasi Dirava ena mamoe orea ia naria totona.

Elda ena Dagi Taravatudia Itaia Namonamo

15. Daidia edia dagi taravatudia hari ita tahua, bona badinaia karadia be dahaka?

¹⁵ Dagi taravatudia haida be mai anina elda taudia sibona edia hakaua bona hadibaia gaukara dekenai. Bema oi be Keristen tauna ta, oi hegeregere unai dagi taravatudia oi badinaia totona, a?

16. (a) Edia kara dekenai idia haheauka totona dahaka idia karaia? (b) Elda tauna be edena bamona do ia boga-auka?

¹⁶ Haheauka bona boga-auka tauna. (1 Timoteo 3:2; Tito 1:8) Namona be elda tauna be sibona ena tauanina ia biagua diba, kara dikadia do ia karaia lasi. Hetoho ia davaria neganai, Dirava ese ia do ia durua ia laloa maoromaoro totona bema salamo torea tauna bamona do ia guriguri, ia gwau: “Egu lalona ena hisihisi ia bada ia lao; egu hisihisi dekena amo lau oi hakaua.” (Salamo 25:17) Gaukara gunalaia tauna be do ia guriguri Dirava ena lauma helaga ena heduru ia abia totona bona ena lauma huahua ia hahedinaraia, unai huahua ta be boga-auka karana. (Luka 11:13; Galatia 5:​22, 23) Elda tauna be ena lalohadai, ena hereva, bona ena kara ia biagua namonamo neganai, ia ese lauma dalanai kongregesen taudia ia hakaudia neganai ena gaukara ibounai do idia namo.

17. Laloa namonamo karana ena anina be dahaka?

¹⁷ Aonega tauna. (1 Timoteo 3:2) Elda tauna do ia kara namo, ia hereva kava lasi, bona mai aonega danu ia hereva. Namona be iena hereva amo bona iena kara amo ia hedinarai ia be mai ena ura namo bona aonega danu ia gaukara. Iena manau bona laloa namonamo karadia be Dirava ena aonega, bona Iehova ena Hereva dekenai idia noho hahediba herevadia amo ia abia, badina ia ese unai hereva ia stadilaia momo dainai.​—Roma 12:3; Tito 2:1.

18. Gaukara taria namonamo totona elda tauna be dahaka ia karaia be gau badana?

¹⁸ Gaukara taria namonamo tauna. (1 Timoteo 3:2) Unai be Greek gado herevana bona 1 Timoteo 2:9 dekenai unai hereva idia hahanaia “mai manau bona mai hemataurai” danu kara ta idia karaia. Unai dainai, namona be elda tauna ena mauri lalonai gau ibounai do idia namo. Hegeregere, namona be nega korikori dekenai do ia ginidae. Keristen ginigunadia edia nega lalonai gau haida torea gaukarana idia gwauraia bada lasi, bona hari inai negai, bema kongregesen hakaua tauna be akaun eiava kalaka edia gaukara ia diba momo lasi, unai be herevana. Badina reana hesiai taudia be unai gaukara idia naria diba. To Greek gado dekenai unai hereva ‘taria namonamo’ ena anina ma ta be kara namodia karaia tauna. Bema tau ta ese ena kara ia biagua lasi eiava idia be namo lasi, ia be hegeregere lasi elda ena dagi ia abia totona.​—1 Tesalonika 5:14; 2 Tesalonika 3:​6-12; Tito 1:10.

19. Elda be abia dae tauna dainai dahaka ia karaia?

¹⁹ Abia dae karana. (1 Timoteo 3:2; Tito 1:8) Elda tauna be ‘taunimanima ia abia dae.’ (Roma 12:13; Heberu 13:2) Greek gado dekenai “abia dae karana” ena anina be “ia diba lasi taudia ia moale henidia.” Vadaeni, Keristen heboudia dekenai kamonai matamata taudia idia mai neganai, elda tauna be ia lao ia hanamodia totona, iena kara ogogami taudia bona taga taudia dekenai be idia idau lasi. Keristen ena gaukara idia karaia loaloa taudia ia abia dae bona idia lao gwauraia neganai, ia durudia “Dirava ena ura dalana hegeregerena.” (3 Ioane 5-8) Momokani, abidadama tamona taudia idia dabu neganai, elda tauna be heabidae karana ia hahedinaraia, bona bema mai dalana do ia durudia.​—Iakobo 2:​14-17.

20. Namona be edena dala idauidau amo elda tauna be ia hegeregere hadibaia gaukara do ia karaia diba totona?

²⁰ Hadibaia gaukara do ia karaia diba tauna. (1 Timoteo 3:2) Elda tauna be lauma dalanai hadibaia tauna namona ai ia lao neganai, unai diba ia abia lasi sibona ena aonega dainai eiava tanobada ena aonega dainai. (1 Korinto 2:​1-5, 13) Unai diba ia abia badina ia be “hereva momokani, [ia] abidadama henia bona ita [idia] hadibaia gauna, do ia badinaia momokani. Unai dekena amo ia be hegeregere, haida do ia hagoadaia, hadibaia hereva namodia dekena amo. Danu do ia hegeregere, hereva momokani idia negea taudia do ia hamaoromaoroa.” (Tito 1:9; Kara 20:​18-21, 26, 27 itaia danu.) Gau badana be Dirava ena “hereva idia utua taudia do ia sisiba henidia mai ena manau danu.” (2 Timoteo 2:​23-26) Kongregesen lalonai, ena be elda tauna be pablik haroro henia tauna namona momokani lasi, to gau badana be Dirava ena Hereva ia diba momo, bona mai aonega dalana amo Bible idia stadilaia abidadama taudia ia hadibaia bona ia sisiba henidia diba. (2 Korinto 11:6) Gau badana be ia hegeregere “hadibaia hereva maoromaorona” ia gwauraia totona, bona ruma bese ena taunimanima ta ta ibounai ia durudia edia mauri lalonai Dirava ena hereva idia badinaia totona.​—Tito 2:​1-10.

21. (a) Dahaka dainai ita gwau diba elda tauna be heatu tauna lasi? (b) Manau karana ena anina be dahaka? (c) Maino karana ena anina be dahaka?

²¹ Heatu tauna lasi, to mai ena manau bona maino. (1 Timoteo 3:3; Tito 1:7) Elda tauna be mai ena maino dainai ia be taunimanima ia botaia lasi, eiava hereva mai dagedage amo idia ia dadabaia lasi. (2 Korinto 11:20 oi itaia.) (Hereva gunana ia gwau “ia be kekero tauna lasi,” bona unai ese ia hahedinaraia kekero muramura ia inua momo lasi, badina unai be kerere havaraia karana.) Ia be mai ena “manau” (eiava, “haida edia hereva ia abia dae diba”), ena dagi dainai taunimanima ia hereva auka henidia lasi bona edia kara namo dainai ia moale, ia ese kerere maragidia be kerere badadia bamona do ia kara henidia lasi. (1 Korinto 9:12; Filipi 4:5; 1 Petero 2:18) Elda tauna be taunimanima ia heatu henia lasi, ia heai henia lasi, hepapahuahu karana ia dadaraia, bona ‘ia be heatu tauna lasi.’​—Tito 3:2; Iakobo 1:​19, 20.

22. Dahaka ese ia hahedinaraia elda tauna be ia hekokoroku lasi be gau badana?

²² Hekokoroku lasi tauna. (Tito 1:7) Unai anina be ia be “sibona ena namo ia tahua lasi.” (2 Petero 2:10 oi itaia.) Elda tauna be sibona ena lalohadai ia hekokorokulaia lasi, to ia manau, ia laloa lasi iena lalohadai be ma elda taudia haida edia lalohadai ia hanaia, to mai ena manau danu ia ese gaukara ena maduna ia henia ma haida dekenai, bona taunimanima momo edia heduru hereva ia moalelaia bada.​—Numera 11:​26-29; Hereva Lada-isidia 11:14; Roma 12:​3, 16.

23. (a) ‘Kara namo ia ura henia tauna’ ena kara be dahaka mani oi gwauraia. (b) Kara maoromaoro karaia dalana be dahaka?

²³ Kara namo ia ura henia; ia be kara maoromaoro tauna. (Tito 1:8) Tau ta ia hegeregere elda ena dagi do ia abia totona, gau badana be kara namo ia ura henia bona ia be kara maoromaoro tauna. Kara namo ia ura henia tauna be Iehova matana dekenai ia namo gauna ia ura henia, ia ese hebogahisi bona heduru karadia ia karaia, bona taunimanima edia kara namodia dainai do ia hanamodia. (Luka 6:35; Kara 9:​36, 39; bona 1 Timoteo 5:​9, 10 itaia danu.) Kara maoromaoro ena anina be tau ta be Dirava ena taravatu bona dala maorodia do ia badinaia. Danu, unai bamona tauna ena kara haida be inai: ia be dala tamonai taunimanima iboudiai ia kara henidia bona kara maoromaoro, kara goevagoeva, bona kara namodia ia laloa noho. (Luka 1:6; Filipi 4:​8, 9; Iakobo 2:​1-9) Kara namo bona kara maoromaoro edia anina be idau. Kara maoromaoro ia karaia tauna be hahemaoro maoromaoro ia karaia sibona, to kara namo ia karaia tauna be unai sibona ia karaia lasi, ia ese heduru ma haida ia henia taunimanima dekenai.​—Mataio 20:​4, 13-15; Roma 5:7.

24. Mai ena abidadama tauna be dahaka ia karaia?

²⁴ Mai ena abidadama. (Tito 1:8) Bema tau ta ia hegeregere elda dagina ia abia totona, iena lalokau Dirava dekenai idia hamakohia diba lasi, bona Dirava ena taravatu ia badinaia noho, herevana dahaka ese iena abidadama ia tohoa. Iehova ena ura ia karaia, bona Iehova ena ura ta be Basileia ena sivarai ia harorolaia.​—Mataio 24:14; Luka 1:​74, 75; Kara 5:29; 1 Tesalonika 2:10.

Taravatu Badinaia Dalana

25. Ita kikilaia vadaeni taravatudia be daidia idia badinaia be namo, bona edena dala amo unai taravatu idia badinaia diba?

²⁵ Hari inai sivarai dekenai ai kikilaia dagi abia karadia momo be Iehova ena Witness taudia iboudiai idia badinaia be gau badana, bona unai taravatu idia badinaia dalana be idia ta ta ibounai idia stadi, gaukara idia goadalaia, hebamo namodia idia abia, bona idia guriguri, unai neganai Dirava ese idia do ia hanamoa. Reana kara haida dekenai ma haida edia aonega idia bada to kara haida dekenai idia edia aonega be maragi. To gau badana be hesiai taudia bona elda taudia be dagi ena taravatu iboudiai do idia badinaia namonamo.

26. Dahaka dainai Keristen taudia be dala idia tahua kongregesen dekenai maduna idia huaia totona?

²⁶ Namona be Iehova ena Witness taudia iboudiai be Dirava ena hesiai gaukara idia karaia goadagoada. Bema Keristen taudia be unai bamona idia karaia idia be dala idia tahua kongregesen dekenai maduna idia huaia totona. Oi be gwauhamata oi karaia bona bapatiso oi abia vadaeni tauna ta, a? Bema oibe, namona be dagi oi tahua bona oi goada karaia ela bona oi hegeregere unai dagi oi abia totona!

[Footnotes]

Edena Bamona Do Oi Haere?

◻ Hari inai nega lalonai, dahaka dainai bapatiso tataudia be kongregesen dekenai dagi idia tahua be gau badana?

◻ Hesiai taudia ese idia badinaia taravatudia haida be dahaka?

◻ Elda taudia ese idia badinaia taravatudia haida be dahaka?

◻ Dahaka dainai elda tauna be sibona ena ruma bese ia hakaua namonamo diba be gau badana?

◻ Dahaka ese Keristen taudia ia hasiahua dala idia tahua kongregesen dekenai dagi idia abia totona?

[Picture on page 18, 19]

Namona be elda bona hesiai taudia be edia ruma bese idia hakaudia Bible ena taravatu hegeregeredia