Nega ta oi sibona ese unai bamona henanadai oi laloa, a? Bema oibe, oi sibona ese unai oi laloa lasi. Tanobada hegegemadai, taunimanima be edia mauri lalonai unai bamona henanadai badadia idia laloa danu. Haere oi davaria diba, a?

Momo idia gwau, “Oibe!” Dahaka dainai? Badina Baibel amo edia henanadai ena haere idia davaria. Oi ura Baibel ena hereva oi diba, a? Vadaeni Iehova ena Witnes taudia ese idia karaia davana lasi Baibel stadi program ese oi ia durua diba.a

To, Baibel stadilaia karana dekenai haida idia gwau: “Lau bisi bada.” “Baibel lau lalopararalaia be auka.” “Lau ura lasi gwauhamata lau karaia.” To, haida edia lalohadai be idau. Idia ura Baibel ena hereva idia dibaia. Mani haheitalai haida ita itaia:

• “Lau be Katolik, Protestan, Shik bona Budis tomadiho lau lao, bona iunivesiti ai tomadiho karadia lau stadilaia. To, egu henanadai momo edia haere lau davaria lasi. Bena Iehova ena Witnes tauna ta be egu ruma dekenai ia mai. Baibel amo egu henanadai ia haerelaia dainai, lau hoa bada bona Baibel stadi lau abia dae.”—Gill, England.

• “Egu mauri ai gau momo lau daradaralaia, to egu dubu ena pasto ena haere ese lau idia durua lasi. To, Iehova ena Witnes tauna ta ese Baibel amo egu henanadai ia haerelaia. Lau ia nanadaia bema lau ura Baibel amo diba ma haida lau abia neganai, mai moale ida lau abia dae.”—Koffi, Benin.

• “Mase taudia dekenai ia vara gauna lau daradaralaia. Lau abia dae mase taudia ese mauri taudia idia hadikaia diba, to lau ura Baibel ena hereva lau diba. Unai dainai egu turana ta ida Baibel lau stadilaia, ia be Iehova ena Witnes tauna.”—José, Brazil.

• “Baibel lau duahia to lau lalopararalaia lasi. Bena Iehova ena Witnes taudia idia mai bona Baibel ena peroveta herevadia haida edia anina idia gwauraia hedinarai. Lau ura ma gau haida do lau dibaia.”—Dennize, Mexico.

• “Lau daradara bema Dirava be lau ia laloa bada eiava lasi. Unai dainai, Baibel ese ia herevalaia Diravana lau guriguri henia. Unai dina murinai, Iehova ena Witnes taudia be egu iduara dekenai idia pidipidi bona Baibel stadi lau abia dae.”—Anju, Nepal.

Unai sivarai idauidau amo Iesu ena hereva ita laloatao, ia gwau: “Dirava dibaia totona idia hitolo taudia be idia moale.” (Mataio 5:3) Oibe, taunimanima dekenai Dirava tomadiho henia urana ia noho. Dirava sibona ese unai ura do ia hagugurua, bona iena Hereva, Baibel amo unai ia karaia diba.

Baibel stadi be dahaka? Edena dala ai oi do ia durua? Unai henanadai be atikol gabena ese do ia haerelaia.

Taunimanima momo idia diba Iehova ena Witnes taudia sibona ese haroro gaukara idia karaia. To tanobada hegegemadai, ai ese Baibel stadi program ta ai karaia danu.

Lagani 2014 ai, tano 240 lalonai Witnes taudia 8,000,000 mai kahana ese hua ta ta ai Baibel stadi 9,500,000 bamona idia karaia.a Tanobada hegegemadai taunimanima milioni momo be Baibel idia stadilaia noho!

Iehova ena Witnes taudia ese edia hadibaia gaukarana idia karaia totona, idia ese Baibel, buka, magasin, bona Baibel stadilaia bukadia ma haida be gado 700 mai kahana ai idia hahanaia bona kahirakahira bilioni ta mai kahana ai idia printaia. Unai hahanaia bona printaia gaukarana ese dala ia kehoa taunimanima be edia gado ai Baibel idia stadilaia totona.

BAIBEL STADI PROGRAM—HENANADAI BONA EDIA HAERE

Edena bamona Baibel stadi umui karaia?

Ai ese Baibel topik idauidau ai abia hidi bona unai topik idia herevalaia Baibel siridia ai duahia danu. Hegeregere, Baibel ese inai henanadai haida ia haerelaia: Dirava be Daika? Ia be edena bamona tauna? Ia be mai ena ladana, a? Ia be edeseni ia noho? Ia kahirakahira ita lao diba, a? Taunimanima momo idia diba lasi Baibel lalonai edeseniai edia haere idia davaria diba.

Taunimanima ai durua edia henanadai edia haere idia davaria totona, ai ese Baibel be Dahaka Ia Hadibaia?b bukana ai gaukaralaia. Unai buka idia karaia ena badina be taunimanima do ia durua Baibel ena hadibaia herevadia idia lalopararalaia namonamo totona. Unai buka ese ia herevalaia gaudia haida be: Dirava, Iesu Keriso, taunimanima edia hisihisi, toreisi lou, guriguri, bona topik ma haida danu.

Baibel stadi be edena negai bona edeseniai umui karaia?

Emu ura taim bona gabu ai Baibel stadi oi karaia diba.

Baibel stadi be miniti hida lalonai umui karaia?

Taunimanima momo be wiki ta ta ai hora ta o miniti haida lalonai Baibel idia stadilaia. To, stadi ena lata be oi sibona ese oi idia abia hidi diba, bona emu sediual hegeregerena do ai badinaia. Haida be wiki ta ta ai miniti 10 o 15 lalonai stadi idia karaia.

Baibel stadi be mai ena davana, a?

Stadi program bona stadi bukadia be davana lasi. Unai be Iesu ese ena hahediba taudia dekenai ia gwauraia herevana ida ia hegeregere, ia gwau: “Umui abia davana lasi, umui henia davana lasi.”—Mataio 10:8.

Baibel stadi be lagani hida lalonai do lau karaia?

Baibel stadi ena daudau be oi sibona emu ura hegeregerena. Baibel be Dahaka Ia Hadibaia? bukana ena karoa ibounai be 19. Bema oi ura, unai buka ena karoa ibounai o karoa haida sibona oi stadilaia diba, bona emu laloparara hegeregerena oi stadi diba.

Iehova ena Witnes tauna ta ai do lau lao, a?

Lasi. Ai laloparara taunimanima ta ta be mai edia maoro, edena hadibaia herevadia idia abia dae totona, bona unai ai matauraia. To, Baibel amo diba idia abia taudia ese abia hidi maorona idia karaia diba.

Edeseniai hereva ma haida lau abia diba?

Iehova ena Witnes taudia edia hahediba herevadia bona gaukara oi diba totona, jw.org Web sait dekenai oi itaia diba.

Edena dala ai Baibel stadi ta lau noia diba?

• www.pr418.com amo oi noia diba

• Inai magasin ena rau 2 ai ia noho adres ta dekenai revareva oi siaia.

• Emu gabu kahirakahira ai idia noho Iehova ena Witnes taudia oi hereva henia. Eiava telefon buka dekenai “Iehova ena Witnes taudia” edia namba oi tahua bona oi rini henidia.