Matamana negana amo, taunimanima idia ura idia matamata bona mauri hanaihanai. To madi, ia vara gauna be inai: Taunimanima be idia mase noho. Lagani 3,000 gunanai, Iobu be ataiai siri ena hereva ia gwauraia, bona hari unai be ia guguru noho.

Ita ibounai ita ura lasi ita mase. Baibel ia gwau, Dirava ese eda kudouna ai mauri hanaihanai urana ia atoa. (Hadibaia Tauna 3:11, NW) Oi laloa lalokau Diravana ese ita hagugurua diba lasi urana ta be eda kudouna ai ia atoa diba, a? Lasi. Baibel ia gwau mase be eda inai tauna, bona Dirava ia gwauhamata, mase be “do ia ore momokani.”​—1 Korinto 15:26.

Momokani, mase be iseda inai tauna. Ita ibounai ita ura lasi do ita mase. Dika ta ia vara gwauraia neganai, ita heau eiava mauri gabuna ta ita tahua. Ita gorere neganai, heduru ita tahua ita namo totona. Oibe, gau idauidau ita karaia diba, ita mase lasi totona.

Oi laloa mase be do ia ore momokani, a? Oibe. Ita ia havaraia Diravana, Iehova, be taunimanima ia karaia idia mauri hanaihanai totona. Ia ura lasi idia be lagani haida sibona idia noho bena idia mase. Ia ura taunimanima be tanobada ai do idia noho hanaihanai, bona unai do ia hagugurua momokani.​—Isaia 55:11.

Edena dala ai mase be do ia ore momokani? Idaunegai, taunimanima idia gaukara goada mase idia haorea totona, to idia kwalimu lasi. Hari danu, taunimanima be unai bamona idia karaia noho. Saiens taudia be muramura haida idia karaia, unai amo gorere haida idia koua. Danu idia ese mauri gaudia idia stadilaia. Oibe, saiens taudia edia heduru dainai, gabu momo ai, taunimanima haida be idia mauri daudau, lagani 100 gunanai idia noho taudia bamona lasi. To dokonai, unai taudia idia mase. Baibel ia gwau, ibounai be “kahu dekenai do idia giroa lou.”​—Hadibaia Tauna 3:20.

Sivarai namona be inai: Mase haorea totona, taunimanima edia aonega dekenai ita tabekau be anina lasi. Iehova Dirava be Iesu Keriso amo dala ia hegaegaelaia vadaeni, mase amo ita ia hamauria totona.

Iehova ia ura lasi taunimanima idia mase

“Lohiabada Dirava ese unai tau ia abia, Eden ena uma gabu lalonai ia atoa, do ia geia bona naria totona. Lohiabada Dirava ese unai tau dekenai taravatu ia atoa, ia gwau, ‘Uma gabu dekenai gini au ibounai edia huahua oi ania diba, idia be taravatu lasi, to kara namo bona kara dika hadibaia au ena huahua oi ania lasi, badina be inai huahua oi ania dina dekenai do oi mase momokani.’”​—Genese 2:15-17.

Dirava ese Adamu be Eden umana, tanobada paradaisona ai ia atoa, unuseniai animal bona au huahua idauidau idia noho. Adamu be au idauidau edia huahua ia ania diba. To, Iehova Dirava ese au huahua ta ia taravatua, bona Adamu ia hamaoroa unai au ena huahua ia ania neganai do ia mase.

Adamu be unai taravatu ia lalopararalaia, a? Ia be mase ena anina ia diba, badina animal idia mase be ia itaia. Bema Adamu be nega sisina do ia noho bona gabeai do ia mase, Dirava ese unai taravatu ia atoa be anina lasi. To, Adamu ia diba bema Dirava ia badinaia bona au ena huahua ia ania lasi, ia be do ia mauri hanaihanai​—ia be do ia mase lasi.

Haida idia gwau unai au huahua ese mahuta hebou karana ia laulaulaia. To unai be lalohadai kererena, badina Iehova ia ura Adamu bona ena hahine, Heva, ese ‘bese do idia havaraia, do idia momo herea. Tanobada ena gabu ibounai dekenai do idia noho.’ (Genese 1:28) Dirava be au korikorina ia taravatua. Iehova ese unai au ia gwauraia “kara namo bona kara dika hadibaia au,” bona unai ese ia laulaulaia gauna be inai: Dirava be mai ena maoro taunimanima ia hamaoroa dahaka be namo bona dahaka be dika. Bema Adamu be unai au ena huahua ia ania lasi, ia be ena Havaraia Tauna bona gau namodia momo ia henia Diravana ia badinaia bona matauraia.

Adamu ia mase badina Dirava ia kamonai henia lasi

“Adamu danu dekenai ia gwau henia, ia gwau, . . . ‘Lau taravatua au huahua oi ania vadaeni. Unai bamona oi karaia dainai, . . . do oi varahu, bona do oi gaukara auka, tano ena anina abia totona, ia lao bona tano dekenai do oi giroa lou, badina be tano dekena amo oi mai. Oi be tano dekena amo karaia gauna, bona tano dekenai do oi giroa lou.’”​—Genese 3:17, 19.

Adamu be taravatu auna ena huahua ia ania. Unai be gwau-edeede karana​—ia hahedinaraia ia be Iehova ena kara namodia ibounai ia laloa bada lasi. Adamu be unai huahua ia ania amo ia hahedinaraia, ia be Iehova ia dadaraia, bona dika bada do ia vara.

Iehova ia hereva bamona, Adamu be gabeai ia mase. Dirava ese Adamu be “tano ena kahu dekena amo” ia karaia, bona ia hamaoroa “tano dekenai do oi giroa lou.” Unai dainai, Adamu ia mase neganai, ia be guba o gabu ma ta dekenai ia lao lasi, to tano ena kahu dekenai ia giroa lou.​—Genese 2:7; Hadibaia Tauna 9:5, 10.

Adamu dainai ita mase

“Tau tamona dekena amo kara dika be tanobada dekenai ia vareai, bona kara dika ese mase ia mailaia. Bona unai dainai mase be taunimanima ibounai dekenai ia hanaia lao, badina idia ibounai be idia kara dika vadaeni.”​—Roma 5:12.

Adamu ena gwau-edeede karana​—o kara dika​—ese ena bese taudia dekenai dika ia havaraia. Ia kara dika neganai, ia be lagani 70 o 80 maurina lasi, to mauri hanaihanai ia haboioa. Bona ia be kara dika tauna dainai, ena bese taudia ibounai be goevadae lasi taudia ai idia lao.

Ita be Adamu ena bese taudia bona kara dika be ita dekenai ia hanaia dainai, gabeai do ita mase. Paulo be unai ia gwauraia hedinarai. Ia gwau: “Lau be taunimanima sibona, bona lau be kara dika ena igui hesiai tauna. Lau madi o! Inai tauanina, egu mase do ia havaraia gauna amo daika ese lau ia hamauria diba?” Paulo ia haere: “Iesu Keriso, iseda Lohiabada amo Dirava lau tanikiu henia!”​—Roma 7:14, 24, 25.

Iesu be ena mauri ia henia, mauri hanaihanai ita abia totona

“Tamana ese ena Natuna ia siaia mai, inai tanobada ena Hahemauri Tauna ai ia lao totona.”​—1 Ioane 4:14.

Iehova Dirava ese dala ta ia karaia, kara dika ena metau ita hanaia bona ita mase hanaihanai lasi totona. Edena dala ai? Dirava ese ena lalokau Natuna be tanobada dekenai ia siaia neganai, Iesu be tau goevadaena, Adamu bamona. To, Iesu be “kara dika ta ia karaia lasi.” (1 Petero 2:22) Ia be tau goevadaena dainai, do ia mase lasi to ia mauri hanaihanai diba.

Dagedage taudia ese Iesu idia hamasea neganai, Iehova ese unai ia koua lasi. Dina toi murinai, Iehova ese Iesu be ia hatorea isi lou, ia be aneru ta bamona​—unai amo guba dekenai ia giroa lou. Unuseniai, Iesu ese ena mauri goevadaena be Dirava dekenai ia henia, unai amo Adamu bona Adamu ena bese ese idia haboioa gauna ena davana ia karaia. Iehova ese unai boubou gauna ia abia dae dainai, Iesu idia abidadama henia taudia be mauri hanaihanai idia abia diba.​—Roma 3:23, 24; 1 Ioane 2:2.

Adamu ia haboioa gauna be Iesu ese ia hoia lou. Ia hisihisi ela bona ia mase, unai amo mauri hanaihanai ita abia diba. Baibel ia gwau: “Iesu . . . be hisihisi ia abia bona ia mase. . . . Dirava ena hebogahisi hereadaena dainai, ia be taunimanima ibounai totona ia mase.”​—Heberu 2:9.

Unai ese Iehova ena kara idia hahedinaraia. Iena hahemaoro goeva karana dainai, goevadae lasi taudia be mauri idia abia diba. Lalokau bona hebogahisi Diravana be sibona ena taravatu ia badinaia dainai, ia karaia kara badana be inai: Iena Natuna amo mauri davana ia karaia.​—Roma 5:6-8.

Ma haida be mase amo do idia mauri lou, Iesu bamona

“Keriso be mase amo ia toreisi lou, ia be mase lalonai idia mahuta taudia amo ia toreisi lou tauna ginigunana. Badina tau tamona amo mase ia vara, unai hegeregerena tau tamona amo mase taudia do idia toreisi lou. Adamu amo taunimanima ibounai idia mase noho, unai hegeregerena Keriso amo taunimanima ibounai be mauri do idia abia.”​—1 Korinto 15:20-22.

Iesu be ia mauri bena ia mase, to dahaka ese ia hahedinaraia ia be mase amo ia toreisi lou? Ia toreisi lou murinai, ia be gabu bona nega idauidau ai, taunimanima momo dekenai ia hedinarai. Nega ta ai, ia be taunimanima 500 dekenai ia hedinarai. Aposetolo Paulo be Korinto revareva ai ia gwau, unai taudia haida be idia mauri noho, idia ese idia itaia bona kamonai gauna idia hamomokania diba.​—1 Korinto 15:3-8.

Paulo ia gwau Iesu be mase amo ia toreisi lou “tauna ginigunana,” anina be, haida danu be gabeai do idia toreisi lou. Danu, Iesu ia gwau nega ta do ia mai, idia mase taudia ibounai be “guria gabuna” amo “do idia raka-lasi.”​—Ioane 5:28, 29.

Namona be Iesu ita abidadama henia, mauri hanaihanai ita abia totona

“Dirava ese tanobada ia lalokau henia bada dainai, ena natuna korikorina ia henia, unai amo ia idia abidadama henia taudia ibounai be do idia mase lasi, to mauri hanaihanai do idia abia.”​—Ioane 3:16.

Baibel buka ginigunana be mase ia vareai dalana bona Paradaiso ia boio dalana ia herevalaia. To Baibel buka ginigabena be mase do ia ore dalana bona Dirava ese tanobada Paradaisona do ia havaraia dalana ia herevalaia. Unai negai, taunimanima be do idia moale bona mauri hanaihanai. Apokalupo 21:4 ia gwau: “Mase be do ia ore.” Siri 5 ese unai hereva ia hamomokania, ia gwau: “Inai hereva oi torea, badina idia be taunimanima ese idia abia dae diba bona idia be momokani.” Iehova ese ena gwauhamata do ia hagugurua momokani.

Unai hereva oi “abia dae diba bona idia be momokani,” a? Vadaeni, Iesu Keriso oi dibaia bona abidadama henia noho be namo. Unai bamona oi karaia neganai, Iehova do ia moale. Bona ia ese hari oi do ia hanamoa sibona lasi, to nega vairai tanobada Paradaisona ai mauri hanaihanai do oi abia, unuseniai “mase be do ia ore, bona lalohisihisi, taitai, bona hisihisi danu be do idia ore.”

Hanuaboi ginigabena ai, Iesu ese ena aposetolo taudia ia hamaoroa ena boubou gauna do idia laloatao. Ia gwau: “Inai bamona do umui karaia noho lau umui laloatao totona.”​—Luka 22:19.

Hari lagani, Iesu ena Anibou o mase laloatao negana be Friday, April 3, dina ia diho murinai do idia karaia. Iehova ena Witnes taudia be oi bona emu famili idia boiria, tok ta umui kamonai totona. Unai tok ese do ia hahedinaraia dahaka dainai Iesu ena mase be mai anina bada bona edena dala ai oi do ia durua.