Reana nega ta oi laloa: ‘Ta ia mase neganai dahaka ia vara? Iseda lalokau mase taudia be gabu ta dekenai idia hisihisi, a? Idia do ita itaia lou, a? Edena bamona do ita hamomokania?’ Mani Baibel ena hereva ita itaia. Ginigunana be, Baibel ese mase be edena bamona ia herevalaia. Bona do ita itaia Dirava ena Hereva, Baibel, ese mase taudia edia helaro be edena bamona ia herevalaia.

Mase taudia dekenai dahaka ia vara?

BAIBEL ENA HAERE: “Mauri taudia idia diba do idia mase, to mase taudia be gau ta idia diba lasi. Idia be mai edia ahuna lasi, bona taunimanima ese mase taudia idia laloaboio momokani. Oiemu imana ese ia davaria gaukara ibounai, be do oi karaia mai oiemu goada ibounai danu. Badina be mase taudia edia gabu, oi lao gabuna, dekenai be kara ta lasi, laloa ta lasi, diba bona aonega ta lasi.”b​—Hadibaia Tauna 9:5, 10.

Inai hereva Mase Taudia Edia Gabu be taunimanima idia mase neganai ita guria gabuna ia herevalaia; unuseniai tau ta be gau ta ia lalohadailaia diba lasi eiava gau ta ia karaia diba lasi. Abidadama tauna Iobu ese Mase Taudia Edia Gabu be edena bamona ia laloa? Dina tamona lalonai ena kohu ibounai ia haboioa bona ena natuna ibounai idia mase, bena toto dika hereana ese ena tauanina ia hadikaia. Dirava ia noia ia gwau: “Lau ura mase gabuna dekenai [“hel lalonai” Catholic Douay Version] lau do oi hunia. Mani lau do oi hunia.” (Iobu 1:13-19; 2:7; 14:13) Oibe, Iobu ia laloa lasi Mase Taudia Edia Gabu be lahi gabuna eiava hisihisi do ia abia hanaihanai gabuna. To ia diba unai be laga-ani gabuna.

Mase taudia dekenai idia vara gaudia ita dibaia dalana ta be, Baibel lalonai mase amo idia toreisi lou taudia eit edia sivarai ita duahia. Maua ladana “Baibel ese Ia Gwauraia Toreisi Lou Sivaraidia Eit” itaia.

Unai taunimanima eit amo ta ia gwau lasi ia be guba dekenai ai lao o hel dekenai hisihisi ia abia. Bema idia be unai bamona gabu ta dekenai idia lao, taunimanima dekenai unai do idia gwauraia, ani? Bona Baibel lalonai do idia torea, unai amo ita ibounai ese ita duahia diba, ani? Baibel lalonai unai bamona sivarai ta ia noho lasi. Idia toreisi lou taudia eit ese guba eiava hel idia herevalaia lasi. Dahaka dainai? Badina idia be gau ta idia diba lasi, idia mahuta mase bamona. Danu, nega haida Baibel ese mase be mahuta ida ia hahegeregerea. Hegeregere, abidadama tauna Davida bona Stefano be “mase lalonai [idia] mahuta.”​—Kara 7:60; 13:36.

Mase taudia totona dahaka helaro ia noho? Mahuta amo idia toreisi lou diba, a?

Mase taudia do idia toreisi lou, a?

BAIBEL ENA HAERE: “Nega ia mai noho, guria gabuna lalonai idia noho taudia ibounai ese [Iesu] ena gadona do idia kamonai, bona do idia raka-lasi.”​—Ioane 5:28, 29.

Iesu ese vaira negana ia herevalaia neganai, ia gwau iena Basileia ena lohia henunai guria gabuna dekenai ta do ia noho lasi. Fernando, matamanai ita herevalaia tauna, ia gwau: “Egu nega ginigunana Ioane 5:28, 29 lau duahia neganai, lau hoa bada. Unai ese lau dekenai helaro korikorina ia henia, bona mai moale ida vaira negana lau naria noho.”

Idaunegai, abidadama tauna Iobu ia diba, ia mase neganai Dirava ese maoromaoro ia do ia hamauria lou. Iobu ia henanadai: “Bema tau ta ia mase, ia be do ia mauri lou, a?” Bena mai lalogoada ida ia gwau: “Do lau naria noho, [Guria Gabuna dekenai] ela bona inai hisihisi bona hekwarahi idia ore. Unai neganai oi ese lau dekenai do oi boiboi, vadaeni oi dekenai do lau haere.”​—Iobu 14:14, 15.

Lasaro ena taihuna Mareta dekenai toreisi lou herevana be gau matamatana lasi. Lasaro ia mase murinai, Iesu ese Mareta ia hamaoroa: “Emu tadikaka do ia toreisi lou.” Mareta be ia dekenai ia gwau: “Lau diba dina gabediai do ia toreisi lou.” Iesu be ia dekenai ia gwau: “Toreisi lou be lau bona mauri be lau. Lau ia abidadama henia tauna, ena be ia mase, to do ia mauri lou.” (Ioane 11:23-25) Bena Iesu ese maoromaoro Lasaro ia hamauria lou! Unai moale sivaraina ese nega vairai do idia vara hahenamo ia hahedinaraia. Mani oi laloa, tanobada ai taunimanima momo be mase amo do idia toreisi lou!

Haida be guba dekenai do idia lao, a?

BAIBEL ENA HAERE: Baibel ese ia hahedinaraia, Iesu ena toreisi lou be Baibel ese ia gwauraia toreisi lou eit amo ia idau. Badina idia mase taudia eit be tanobada dekenai idia mauri lou. To, Iesu ena toreisi lou be idau, Baibel ia gwau: “Iesu Keriso, . . . be guba dekenai ia daekau bona hari Dirava ena idibana kahanai ia helai.” (1 Petero 3:21, 22) Iesu sibona be guba dekenai ia daekau, a? Iesu ese guna ena aposetolo taudia ia hamaoroa: “Bema lau lao bona umui totona gabu ta lau hegaegaelaia, do lau giroa mai bona umui do lau abia lao, lau noho gabuna dekenai umui danu be unuseniai do umui noho totona.”​—Ioane 14:3.

Keriso be guba dekenai ia daekau bona ena hahediba taudia haida edia gabu ia hegaegaelaia. Idia toreisi lou bona guba do idia lao taudia edia namba be 144,000. (Apokalupo 14:1, 3) To, unai taudia be guba ai dahaka gaukara do idia karaia?

Idia be gaukara bada herea do idia karaia! Baibel ia gwau: “Unai toreisi lou ginigunana lalonai idia toreisi lou taudia be idia moale bona idia helaga. Idia dekenai mase iharuana be siahu lasi, to idia be Dirava bona Keriso edia hahelaga taudia bona lagani 1,000 lalonai Keriso ida do idia lohia.” (Apokalupo 20:6) Guba dekenai do idia lao taudia be Keriso ida tanobada do idia lohiaia bona hahelaga gaukara do idia karaia.

Daidia be gabeai do idia toreisi lou?

BAIBEL ENA HAERE: Aposetolo Paulo ia gwau: “Lau be mai egu abidadama Dirava dekenai, inai tatau danu be inai hereva idia abidadama henia, kara maoromaoro taudia bona kara maoromaoro lasi taudia be do idia toreisi lou.”​—Kara 24:15.

Paulo ese ia gwauraia “kara maoromaoro taudia” be daidia? Mani inai haheitalai ita laloa. Abidadama tauna Daniela be ena mauri dokonai ia idia hamaoroa: “Do oi laga-ani, to nega dokona dekenai be do oi toreisi, bona oiemu gaukara davana namona do oi abia.” (Daniela 12:13) Daniela be edeseniai do ia toreisi lou? Baibel ia gwau: “Kara maoromaoro taudia ese, Dirava ia henidia tano dekenai do idia noho ela bona hanaihanai.” (Salamo 37:29) Bona Iesu ia gwau: “Manau taudia be idia moale, badina idia ese tanobada do idia abia.” (Mataio 5:5) Daniela bona abidadama tatau bona hahine haida be tanobada ai do idia mauri hanaihanai.

Paulo ese ia gwauraia “kara maoromaoro lasi taudia” be daidia? Idia be taunimanima bilioni, tanobada ai idia mauri bona mase taudia, idia momo be Baibel ena hereva momokani idia diba lasi bona badinaia lasi taudia. Idia toreisi lou neganai, Iehovaa bona Iesu do idia dibaia bona hanamoa. (Ioane 17:3) Iehova be ia noho hanaihanai dainai, Ia idia hesiai henia taudia ibounai do idia mauri hanaihanai.

Nega vairai tanobada ai mauri be edena bamona?

BAIBEL ENA HAERE: Dirava “ese mata ranu ibounai be edia matana amo do ia dahua oho, bona mase be do ia ore, bona lalohisihisi, taitai, bona hisihisi danu be do idia ore.” (Apokalupo 21:4) “Idia ese edia ruma do idia haginia, bona unai ruma lalonai do idia noho. Idau taudia ese edia ruma do idia abia lasi.”​—Isaia 65:21.

Mani oi laloa, emui lalokau taudia do idia toreisi lou bona idia ida unai bamona mauri namona do umui moalelaia! To henanadai be inai: Edena bamona oi diba toreisi lou do ia vara?

Oi laloa mase taudia do idia toreisi lou be lalohadai kavakavana ta sibona, a? Aposetolo Paulo be unai bamona ia laloa lasi. Badina lauma helaga ena siahu amo inai hereva ia torea: “Bema inai mauri sibona lalonai Keriso ita abidadama henia, taunimanima ibounai amo ita madi o. To momokani, Keriso be mase amo ia toreisi lou, ia be mase lalonai idia mahuta taudia amo ia toreisi lou [huahua ginigunadia] tauna ginigunana.” (1 Korinto 15:19, 20; futnout) Paulo be toreisi lou herevana ia abia dae momokani. Badina Iesu ena toreisi lou ese unai ia hamomokania.a (Kara 17:31) Unai dainai Paulo ese Iesu ia gwauraia, “huahua ginigunadia”​—mauri hanaihanai abia totona ia toreisi lou tauna ginigunana. Bema Iesu be ginigunana, vadaeni haida danu do idia toreisi lou.

Ita diba mase taudia be mai edia helaro ena badina ma ta be, Iehova be kara momokani Diravana bona “Ia koikoi diba lasi.” (Tito 1:2) Iehova be nega ta ia koikoi lasi. Ia gwauhamata mase taudia do ia hatorea isi lou, bona unai ia hamomokania vadaeni. Oi laloa hari unai gwauhamata do ia hakoikoia, a? Lasi!

Dahaka dainai Iehova ia gwau vaira negana ai toreisi lou do ia vara? Badina taunimanima ia lalokau henia. Iobu ia henanadai: “Bema tau ta ia mase, ia be do ia mauri lou, a? Lau dekenai do oi boiboi, vadaeni oi dekenai do lau haere, bona lau, oi ese oi karaia tauna dekenai, do oi moale noho.” (Iobu 14:14, 15) Iobu ia diba momokani ena lalokau guba Tamana ia ura dikadika Iobu ia hatorea isi lou. Dirava be ena kara ia haidaua, a? Dirava ia gwau: “Lau be [Iehova], bona lauegu kara lau haidaua lasi.” (Malaki 3:6) Dirava ia ura mase taudia do ia hatorea isi lou, unai nega ai do idia gorere lasi bona do idia moale. Unai be hegeregere, tama sina ta be edia natuna ia mase bona idia ura dikadika edia natuna idia itaia lou. To, ena idau be Dirava be mai ena siahu unai ura ia hagugurua totona.​—Salamo 135:6.

Iehova ese ena Natuna dekenai siahu do ia henia, unai amo edia lalokau taudia idia haboioa dainai idia lalohisihisi taudia dekenai moale bada ia mailaia totona. Iesu ese toreisi lou be edena bamona ia laloa? Iesu ese Lasaro ia do hatorea isi lasi neganai, Lasaro ena taihudia bona turadia edia hisihisi ia mamia, bona ena “mata ranu ia diho.” (Ioane 11:35) Nega ma ta ai, Iesu ese taoni ta ladana Naina dekenai vabu ta ia davaria, ena natuna tamona ia mase dainai ia lalohisihisi. Iesu ese vabu ia hebogahisi henia bona ia dekenai ia gwau: “Oi taitai lasi.” Maoromaoro Iesu ese ena natuna ia hatorea isi lou. (Luka 7:13) Unai dainai taunimanima idia mase bona lalohisihisi neganai, Iesu ia lalohisihisi danu. Tanobada hegegemadai Iesu ese do ia karaia gauna ese taunimanima do ia hahisia lou lasi to do idia moale bada!

Emu lalokau tauna ia mase neganai, oi lalohisihisi, a? Reana oi laloa mase be hekwakwanai badana ta bona hanamoa dalana ta be lasi. To, hanamoa dalana ta ia noho, Dirava ese ena Natuna amo mase taudia do ia hatorea isi lou. Laloatao, Dirava ia ura unai oi itaia. Unai ia vara neganai, ia ura oi be unuseni oi noho emu lalokau taudia ida oi hedavari lou totona. Mani inai oi laloa, nega vaira ai emu lalokau taudia ida do oi noho hanaihanai dainai umui palanilaia gaudia do umui karaia hebou. Unai negai mase be lasi!

Lionel, matamanai ita herevalaia tauna ia gwau: “Gabeai, toreisi lou herevana lau dibaia. Matamanai unai lau abia dae be auka bona lau ia hadibaia tauna ena hereva lau hamomokania lasi. To, gabeai Baibel ai lau itaia neganai, unai lau hamomokania! Lau ura dikadika egu tubuna tauna lau itaia lou.”

Oi ura diba ma haida oi abia, a? Iehova ena Witnes taudia be mai moale ida emu Baibel amo do idia hahedinaraia dahaka dainai vaira negana ai toreisi lou do ia vara.b