Inai hereva “Dokona be ia kahirakahira!” oi kamonai neganai, dahaka oi laloa? Mesia do ia mai bona taunimanima namodia do ia abia lao guba, bona taunimanima dikadia be hel lahina ai do ia siaia o ta ena mase oi laloa? Haida be unai gaudia dainai idia lalohekwarahi, haida idia daradara bona ma haida be unai idia kirikirilaia.

Baibel ia gwau: “Dokona be do ia ginidae.” (Mataio 24:14) Unai nega idia gwauraia danu, ‘Dirava ena dina badana’ bona “Aramagedono.” (Apokalupo 16:14, 16) Oibe, tomadiho momo be unai idia daradaralaia bona edia lalohadai be idauidau. To, Baibel sibona ese dokona ena anina ia hahedinaraia goevagoeva. Danu, Dirava ena Hereva ese ita ia durua unai amo ita laloparara dokona be ia kahirakahira eiava lasi. To gau badana be, Baibel ese ita dekenai roho mauri dalana ia hadibaia! To namona be lalohadai kereredia ita hamaoromaoroa bona dokona ena anina korikorina ita tahua. Baibel ese “dokona” ena anina be edena bamona ia herevalaia?

LALOHADAI KEREREDIA HAMAOROMAOROA

1. TANOBADA BE LAHI ESE DO IA GABUA ORE LASI.

   Baibel ia gwau: “[Dirava] ese inai tanobada [ia] karaia goada, ena gabu korikori dekenai, bona inai tanobada ia goada noho, ia marere sisina lasi, lasi momokani.” (Salamo 104:5) Unai siri bona ma siri haida amo ita dibaia Dirava ese tanobada do ia hadikaia lasi bona do ia rakatania lasi taunimanima ese idia hadikaia totona.—Hadibaia Tauna 1:4; Isaia 45:18.

2. DO IA VARA KAVA LASI.

   Dirava ese dokona do ia vara negana ia abia hidi vadaeni. Baibel ia gwau: “Unai dina bona hora be tau ta ia diba lasi, guba anerudia idia diba lasi, Natuna danu be ia diba lasi, to Tamana sibona. Umui gima noho bona umui noga noho, badina Dirava ese ia abia hidi negana be umui diba lasi.” (Mareko 13:32, 33) Ia hahedinaraia, Dirava (“Tamana”) ese “ia abia hidi negana” korikorina ai dokona do ia ginidae.

3. GUBA AMO NADI MAI LAHI DO IDIA MORU LASI EIAVA TAUNIMANIMA ESE DO IDIA HAMATAMAIA LASI.

   Dokona ai dahaka do ia vara? Apokalupo 19:11 ia gwau: “Lau itaia guba ia kehoa, bona hosi kurokurona ta ia hedinarai. Bona unai hosi latanai ia helai tauna ena ladana be Abidadama bona Momokani.” Siri 19 ma ia gwau: “Bona lau itaia, dagedage animal bona tanobada ena king taudia mai edia tuari oreadia idia haboua, unai hosi latanai ia helai tauna bona ena tuari oreana idia tuari henia totona.” (Apokalupo 19:11-21) Unai laulau herevadia amo ita lalopararalaia gauna be: Dirava ese ena tuari oreana do ia siaia ena inai taudia hamasedia totona.

DOKONA ENA ANINA

1. HARI IDIA LOHIA GAVAMANI DO IDIA ORE.

   Baibel ia gwau: “Guba ena Dirava ese basileia [o gavamani] ta do ia haginia, inai basileia be do idia hadikaia diba lasi ela bona hanaihanai. Unai basileia be Dirava ese do ia naria, vadaeni bese ta ese do ia halusia diba lasi. Bona unai basileia ese basileia ibounai do ia hamakohia, bona haorea momokani, bona ia sibona do ia noho ela bona hanaihanai.” (Daniela 2:44) Point namba 3 ia hahedinaraia bamona, “tanobada ena king taudia mai edia tuari oreadia idia haboua, unai hosi latanai ia helai tauna bona ena tuari oreana idia tuari henia totona” be Dirava ese do ia hamasedia ore.—Apokalupo 19:19.

2. TUARI, DAGEDAGE BONA KARA GAGEVA DO IDIA ORE.

   “Tuari be Dirava ese ia hadokoa noho, tanobada kahana ibounai dekenai.” (Salamo 46:9) “Kara maoromaoro taudia, be inai tano dekenai do idia mauri noho, bona laloa maoromaoro taudia be, inai tano lalonai do idia noho momokani. To kara dika taudia be tano dekena amo, Dirava ese do ia abidia siri, bona kara koikoi taudia be, tano dekena amo do ia kokidia momokani.” (Aonega Herevadia 2:21, 22) “Lau ese gau ibounai lau hamatamataia noho.”—Apokalupo 21:4, 5.

3. DIRAVA BONA TAUNIMANIMA IDIA KOIA TOMADIHO OREADIA DO IDIA ORE.

   “Peroveta taudia be idia peroveta koikoi noho, bona hahelagaia taudia ese, sibodia edia laloa hegeregerena taunimanima idia naria noho. . . . To nega ena dokona do ia ginidae neganai, dahaka do umui karaia?” (Ieremia 5:31) “Unai dina dekenai momo be lau dekenai do idia gwau: ‘Lohiabada e, Lohiabada e, emu ladana dekenai ai peroveta, emu ladana dekenai demoni ai lulua, bona emu ladana dekenai siahu karadia ai karaia, ani?’ To idia dekenai do lau gwau, umui lau diba lasi! Umui siri, umui taravatu utua taudia!”—Mataio 7:21-23.

4. KARA DIKA IDIA KARAIA BONA DURUA TAUDIA DO IDIA ORE.

   Keriso ia gwau: “Vadaeni hahemaoro ena badina be inai, diari be tanobada dekenai ia mai vadaeni, to taunimanima ese dibura idia ura henia to diari idia ura henia lasi, badina edia kara be idia dika.” (Ioane 3:19) Baibel ese Noa ena negai ia vara dika badana ia gwauraia. “Unai nega ai ia noho tanobada be abata badana ese ia hadikaia ore. Unai hereva tamona amo hari idia noho guba bona tanobada be lahi ese ia araia totona idia naria noho, oibe, do idia noho ela bona hahemaoro negana, unai negai Dirava idia badinaia lasi taudia be do idia ore momokani.”—2 Petero 3:5-7.

Laloatao, kahirakahira do ia vara “hahemaoro negana” be Noa ena nega ai abata ese “tanobada” ia hadikaia hegeregerena. Edena tanobada ia hadikaia? Tanobada be ia dika lasi; to “Dirava idia badinaia lasi taudia”—ena inai taudia unai—be idia “ore momokani.” Dirava ena “hahemaoro negana” lalonai, Dirava ena inai taudia ai idia ura lao taudia be do idia mase ore. To Dirava ena turadia be do idia roho mauri, Noa bona ena ruma bese bamona.—Mataio 24:37-42.

Mani oi laloa Dirava ese kara dikadia ia haorea murinai, inai tanobada be gabu namona ai do ia lao! Oibe, Baibel ese ia herevalaia nega dokona be sivarai namona—sivarai dikana lasi. To, reana oi daradara: ‘Baibel ese tanobada dokona do ia mai dinana ia herevalaia, a? Ia be kahirakahira, a? Edena bamona lau roho mauri diba?’

Haida ese taunimanima idia biagua auka bona idia hamasedia ore karana be Dirava ese do ia koua lasi, a? Ita diba Dirava ese lagani momo lalodiai idia vara dagedage bona hisihisi karadia do ia hadokoa. Taunimanima bona tanobada ia Havaraia Tauna ia ura oi diba, kahirakahira kara ta do ia karaia. Edena dala ai unai ia hahedinaraia?

Mani inai haheitalai oi laloa: Bema oi ura motuka amo gabu ta oi lao bona unai be emu nega ginigunana, reana mapu bona hadibaia hereva haida do oi abia guna. Bena dala ai oi itaia saini be emu mapu bona hadibaia herevadia ida ia hegeregere neganai, oi diba oi be dala maorona oi badinaia noho. Unai hegeregerena, Dirava ese ita dekenai Baibel ia henia bona tanobada ai do idia vara gaudia ia hahedinaraia goevagoeva. Hari idia vara gaudia ita itaia neganai, ita abia dae dokona be kahirakahira momokani.

Baibel ese ia hahedinaraia tanobada ai idia vara hekwakwanai bona toa be do idia idau momokani, bena dokona do ia ginidae. Nega dokona ai unai gaudia be nega tamona ai idia vara—guna bamona lasi. Mani Baibel ese ia herevalaia gaudia haida ita itaia.

1. TANOBADA HEGEGEMADAI IDIA VARA HEKWAKWANAI Mataio karoa 24 ena peroveta herevana ese tanobada ai nega tamona do idia vara toa idauidau ia herevalaia. Unai ese nega dokona ena toana idia hahedinaraia bona unai murinai “dokona be do ia ginidae.” (Siri 14) Unai toa be gabu idauidau ai tuari badadia, hitolo bada, tano mareremarere do idia vara, kara dika do ia bada, lalokau be do ia keru, bona tomadiho gunalaia taudia ese momo do idia hakaudia kerere. (Siri 6-26) Momokani, lagani momo lalonai unai gaudia haida idia vara vadaeni. To, dokona ia kahirakahira noho lalonai, unai gaudia ibounai be nega tamona do idia vara. Inai toa toi do idia vara danu.

2. TAUNIMANIMA EDIA KARA Baibel ia gwau “dina gabediai”—dokona ia kahirakahira lalonai—taunimanima edia kara do ia dika momokani. Ia gwau: “Taunimanima be sibodia do idia laloa bada, moni do idia ura henia bada, sibodia do idia abia isi, do idia hekokoroku, hadikaia herevadia do idia gwauraia, tama sina do idia kamonai henia lasi, tanikiu karana do idia hahedinaraia lasi, ma haida do idia badinaia lasi, ruma bese lalonai lalokau be lasi, do idia ura lasi gwauhamata idia karaia, idia be ladana hadikaia taudia, sibodia edia ura do idia biagua lasi, do idia dagedage, kara namodia do idia ura henia lasi, ma haida edia mase dalana do idia karaia, do idia kwara auka, do idia heagi, moale karadia do idia ura henia bada, to Dirava do idia lalokau henia lasi.” (2 Timoteo 3:1-4) Momokani, ma haida matauraia lasi karana be guna ia vara danu, to hari “dina gabediai” unai kara be ia dika momokani dainai, inai nega ita gwauraia “nega aukadia.” Oi itaia taunimanima edia kara ia dika ia lao momokani, a?

3. TANOBADA IDIA HADIKAIA Baibel ia gwau, Dirava ese ‘tanobada idia hadikaia taudia do ia hadikaia ore.’ (Apokalupo 11:18) Edena dala ai taunimanima ese tanobada idia hadikaia noho? Baibel ese Noa ena nega be iseda nega ida ia hahegeregerea, ia gwau: “Taunimanima ibounai be dika momokani Dirava ena vairana dekenai, bona edia dika be gabu ibounai dekenai. Dirava ese tanobada ia itaia, ia dika rohoroho vadaeni.” Unai kara dika taudia dainai, Dirava ia gwau: “Ibounai do lau hamasea.” (Genese 6:11-13) Oi itaia tanobada be dagedage amo ia honu, a? Danu, taunimanima be inai idia karaia diba: Idia be mai edia siahu tanobada latanai taunimanima ibounai idia hamasea ore totona, badina,idia be mai edia tuari kohu badadia. Danu, dala ma ta ai tanobada idia hadikaia noho. Taunimanima ese mauri ia durua gaudia—hodahoda, animal, tubutubu gaudia, bona davara—idia naria namonamo lasi dainai, ibounai be idia dika idia lao.

Sibona oi nanadaia, ‘Lagani momo gunanai, taunimanima be mai edia siahu ma haida idia hadikaia ore totona, a?’ Hari taunimanima ese tuari kohu matamatadia momo idia karaia noho bona mauri ia durua gaudia idia hadikaia noho. Teknoloji amo idia karaia kohudia be momo herea dainai, taunimanima edia diba be ia hegeregere lasi unai kohu ese idia havaraia dika idia lalopararalaia bona biagua totona. To, vaira nega ai tanobada ai do ia vara gauna be taunimanima ese idia biagua diba lasi. Taunimanima bona mauri gaudia do idia mase ore lasi lalonai, Dirava ese tanobada idia hadikaia taudia do ia haoredia. Unai be iena gwauhamata!

4. TANOBADA IBOUNAI HARORO GAUKARANA Nega dokona ena toana ta be gaukara badana ta do ia vara. Baibel ia gwau: “Basileia ena sivarai namona be tanobada ibounai dekenai do idia harorolaia, unai amo bese ibounai ese idia kamonaia diba, unai murinai dokona be do ia ginidae.” (Mataio 24:14) Inai haroro gaukara be guna idia karaia gaukarana amo ia idau. Nega dokona ai idia harorolaia mai anina bada herevana be, “Basileia ena sivarai namona.” Oi diba edena tomadiho oreana ese unai sivarai idia harorolaia, a? Oiemu gabu ai grup maragina ta sibona ese unai sivarai idia harorolaia, eiava idia be orea badana ta bona ‘tanobada ibounai dekenai idia haroro, bese ibounai ese idia kamonai’ totona?

Web sait ladana www.pr418.com ese “Basileia ena sivarai namona” ia herevalaia momo. Unai Web sait ai, Baibel buka bona magasin be gado 700 mai kahana ai idia halasia. Tanobada hegegemadai Basileia ena sivarai namona idia harorolaia orena ta oi diba, a? Intanet be do lasi neganai, taunimanima idia diba Iehova ena Witnes taudia be gabu momo ai Dirava ena Basileia ena sivarai namona idia harorolaia. Lagani 1939 amo ema bona hari Gima Kohorona magasin ai ia hedinarai herevana be, “Iehova Ena Basileia Ia Harorolaia.” Tomadiho bukana ta ia gwau Iehova ena Witnes taudia edia haroro gaukara be “gaukara badana bona tanobada hegegemadai idia karaia.” Iseda haroro gaukara ese ia hahedinaraia sivarai namona be, kahirakahira “dokona be do ia ginidae,” bona Dirava ena Basileia ese unai do ia karaia.

MAI ANINA BADA NEGANA AI ITA NOHO

Oi itaia inai atikol ese idia herevalaia toa foa be hari idia vara noho, a? Lagani 100 mai kahana lalonai, inai magasin ese tanobada ai idia vara gaudia ia herevalaia, bona duahia taudia ia durua idia laloparara nega dokona be kahirakahira. To, Baibel ena hereva idia abia dae lasi taudia idia gwau, unai be taunimanima edia lalohadai bona ia idau diba. Danu, idia gwau Intanet, mobael fon, bona unai bamona teknoloji gaudia dainai, tanobada ena kahana ta ai ia vara hekwakwanai be tanobada hegegemadai ese idia itaia o kamonai bona ta ta idia durua dainai, hekwakwanai ia bada ia lao. To, idia vara noho gaudia ese idia hamomokania ita be mai anina bada negana ai ita noho.

Diba bada taudia haida idia gwau, kahirakahira nega vaira ai tanobada ai dika badadia haida do idia vara. Lagani 2014 ai, saiens taudia haida ese ripoti ta amo idia hahedinaraia, dika badadia do idia vara bona taunimanima do idia hadikaia ore. Idia gwau: “Unai gaudia ai tahua murinai, ai davaria bese haida be tuari kohudia momo idia haboua dainai, nega vaira ai tanobada ai taunimanima idia hamasea orea diba.” Taunimanima momo idia abia dae momokani ita be mai anina bada negana ai ita noho. Inai magasin idia halasia bona idia duahia taudia momo idia diba momokani, ita be mai anina bada negana ai ita noho bona dokona be kahirakahira do ia mai. To, namo lasi vaira negana ita garilaia. Ita moale be namo. Dahaka dainai? Badina tanobada dokona amo ita roho mauri diba!

Baibel ese ita ia hadibaia nega dokonai dika bada do ia vara: “Unai nega ai hisihisi badana do ia vara, tanobada ena matamaia negana amo ema bona hari, unai bamona hisihisi ta ia vara lasi . . . Momokani, bema Dirava ese unai nega ia hakwadogia lasi, taunimanima ta do ia mauri lasi.” (Mataio 24:21, 22) To, Dirava ia gwauhamata taunimanima momo do idia roho mauri. Ia gwau: “Tanobada . . . be do ia ore, to Dirava ena ura ia karaia tauna be do ia noho hanaihanai.”—1 Ioane 2:17.

Bema oi ura tanobada ena dokona amo oi roho mauri bona ‘oi noho hanaihanai,’ dahaka oi karaia be namo? Aniani o kohu do oi haboua eiava ma gau haida oi hegaegaelaia, a? Lasi. To, Baibel ese ita ia hagoadaia Dirava tura henia karana do ita laloa bada. Ia gwau: “Unai gaudia ibounai be inai dala ai do idia veve ore dainai, namona be emui kara idia helaga bona Dirava badinaia karadia umui hahedinaraia. Bona Iehova ena dina ia mai negana umui naria bona umui laloa noho. Unai nega ai guba be lahi ese do ia araia ore, bona guba bona tanobada gaudia be do idia siahu momokani bona do idia veve!” (2 Petero 3:10-12) Do idia ore “gaudia ibounai” be inai: Tanobada ena gavamani ibounai bona Dirava ena lohia siahuna idia dadaraia taudia. Unai ese ia hahedinaraia bema ita be aniani o kohu ita haboua, unai ese ita do idia hamauria lasi.

Oibe, ita roho mauri totona Iehova do ita badinaia bona ia moalelaia karadia do ita dibaia. (Sepanaia 2:3) Namo lasi tanobada taudia ita badinaia bena nega dokona ena toa idauidau ita laloa bada lasi. To, gau badana be ‘Iehova ena dina ia mai negana do ita laloa noho.’ Iehova ena Witnes taudia ese Baibel amo oi idia durua diba, oi roho mauri totona.