Emu Dabua Toana ese Dirava ia Hanamoa, A?

1, 2. Dahaka dainai Iehova ena Witnes taudia be hemataurai dabuadia idia hahedokilaia? (Laulau ginigunana herevalaia.)

DUTCH ena niuspepa ta ese dubu gunalaia taudia edia hebou ta ia herevalaia. Ia gwau: “Siahu negana ai, taunimanima momo be loaloa dabua idia hahedokilaia. To, Iehova ena Witnes taudia edia hebouhebou ai be idau. . . . Memero bona tatau be kouti bona nektai idia atoa bona kekeni bona hahine edia sket ena lata be namo.” Oibe, nega momo taunimanima ese Iehova ena Witnes taudia idia hanamoa, badina idia be ‘mai hemataurai bona laloa maoromaoro ida dabua namona idia hahedokilaia . . . Dirava tomadiho henia [taudia], sibodia idia hahairaia dalana amo unai idia hamomokania.’ (1 Tim. 2:9, 10) Ena be aposetolo Paulo ese hahine ia herevalaia, to Keristani tatau ese unai idia badinaia danu be namo.

² Ita be Iehova ena taunimanima dainai, namona be iseda dabua ena toana ia namo, bona ita tomadiho henia Diravana ese ia abia dae. (Gen. 3:21) Baibel ese iseda dabua ia herevalaia dainai, ita diba momokani, guba bona tanobada ena Lohiabada ia ura ia idia tomadiho henia taudia ese hemataurai dabuadia idia hahedokilaia. Unai dainai, iseda dabua ita abia hidi neganai, namo lasi ita sibona ita laloa. To, Siahu Ibounai Lohiabadana, Iehova, ita laloa danu be namo.

3. Dirava ese Israela taudia dekenai ia henia Taravatuna amo dahaka ita dibaia?

³ Hegeregere, Dirava ena Taravatu ese Israela taudia ia gimaia, badina idia kahirakahira idia noho besedia be matabodaga maurina idia noholaia. Unai Taravatu ese Iehova ena lalohadai, tatau bona hahine ese idia hahedokilaia dabuadia dekenai ia hahedinaraia. (Deuteronomi 22:5 duahia.) Oibe, Dirava be ia moale lasi bema tatau ese hahine edia dabua idia hahedokilaia bona hahine ese tatau edia dabua idia hahedokilaia.

4. Dahaka ese Keristani taudia do ia durua abia hidi maorona idia karaia totona?

⁴ Baibel ena hakaua herevadia ese Keristani taudia ia durua, dabua maorodia idia abia hidi totona. Oibe, herevana idia be edeseni idia noho, edia kastom be idau eiava edia gabu be paraka o siahu, to unai hakaua herevadia idia badinaia be namo. Baibel lalonai ita hahedokilaia o ita hahedokilaia lasi dabuadia edia lista ta ia noho lasi. To, Baibel ese hakaua hereva namodia ia henia, bona ita sibona ese abia hidi ita karaia diba. Mani unai hakaua hereva haida ita itaia. Unai amo do ita abia dae “Dirava ena ura be ia namo, ia ese ia abia dae bona ia goevadae.”​—Roma 12:1, 2.

“AI BE DIRAVA ENA HESIAI TAUDIA”

5, 6. Ita hahedokilaia dabuana dainai taunimanima be dahaka idia karaia be namo?

⁵ Lauma helaga ese Paulo ia hasiahua dainai, ia ese 2 Korinto 6:4 (duahia) ai ia noho mai anina bada hakaua herevana ia torea. Oibe, iseda dabua toana ese do ia hahedinaraia ita be edena bamona taudia. Taunimanima momo be idia itaia gaudia dainai, ita idia herevalaia diba. (1 Sam. 16:7) Ita be Dirava ena hesiai taudia dainai, dabua ita hahedokilaia neganai, namo lasi ita laloa, ita hahedokilaia dabuana ita ura henia bada. Baibel ena hakaua herevadia ese ita do ia durua, tauanina dekenai idia kamokau dabua, tauanina ena hehuni kahadia idia hahedinaraia eiava mahuta hebou urana ia havaraia dabuadia ita dadaraia totona. Unai bamona dabuadia ita hahedokilaia neganai, ta ita hahekwakwanaia diba.

⁶ Ita be Siahu ibounai Lohiabada Iehova ena hesiai taudia dainai, bema hemataurai dabuadia ita hahedokilaia, taunimanima ese ita do idia matauraia. Bona ita tomadiho henia Diravana idia tomadiho henia diba. Danu, bema hemataurai dabuadia ita hahedokilaia, taunimanima ese iseda orea idia hanamoa diba. Bona do idia ura ita harorolaia sivaraina idia kamonai.

7, 8. Edena bamona negadia ai hemataurai dabuadia ita hahedokilaia be namo?

⁷ Ita hahedokilaia dabua amo eda helaga Diravana, tadikaka taihu, bona iseda teritori ai idia noho taudia dekenai ita hahedinaraia, ita be ita harorolaia sivaraina ita laloa bada bona Iehova ita hanamoa. (Roma 13:8-10) Unai dainai Keristani heboudia ai eiava ita haroro neganai, namona be hemataurai dabuadia ita hahedokilaia. Oibe, namona be “Dirava tomadiho henia [taudia], sibodia idia hahairaia dalana” ai dabua ita hahedokilaia. (1 Tim. 2:10) Momokani, gabu haida ai idia hahedokilaia dabuadia be gabu ma haida ai idia hahedokilaia lasi. Unai dainai tanobada hegegemadai, Iehova ena taunimanima be tano ta ta edia kastom idia laloa, badina idia ura lasi ma haida idia hahekwakwanaia.

⁸ Korinto Ginigunana 10:31 duahia. Sekit hebouhebou bona rijinol hebouhebou ita lao neganai, namona be hemataurai dabua namodia ita hahedokilaia, to namo lasi inai tanobada taudia edia sitaelo dabuadia ita hahedokilaia. Bona hotel ai ita noho eiava ita rakatania bona hebouhebou ia do matamaia lasi eiava ia ore murinai tadikaka taihu ida ita moale neganai, namo lasi gadara dabuadia o toana namo lasi dabuadia ita hahedokilaia. To, namona be nega ibounai iseda dabua ena toana amo ita hahedinaraia ita be Iehova ena Witnes taudia. Oibe, bema unai ita karaia, do ia auka lasi taunimanima ita haroro henia totona.

9, 10. Dabua hahedokilaia karana dekenai, dahaka dainai Filipi 2:4 ese ita ia durua diba?

⁹ Filipi 2:4 duahia. Dahaka dainai Keristani taudia ese idia hahedokilaia dabua idia laloa namonamo be namo? Badina ta be, Dirava ena taunimanima be idia hekwarahi inai sisiba idia badinaia totona: “Unai dainai emui tauanina ena kahadia idauidau umui hamasea, idia havaraia gaudia be inai, matabodaga karadia, kara mirodia, matabodaga urana.” (Kol. 3:2, 5) Unai dainai ita ura lasi iseda tadikaka taihu ita hahekwakwanaia bena unai Baibel ena hakaua herevana idia badinaia lasi. Oibe, idia haida be edia matabodaga maurina idia rakatania, bona idia hekwarahi noho edia kara dika urana idia dadaraia totona. (1 Kor. 6:9, 10) Unai dainai ita ura lasi idia ita hahekwakwanaia.

¹⁰ Bema ita be iseda tadikaka taihu ida ita noho, namona be iseda dabua hahedokilaia dalana amo ita hahedinaraia, ita ura kara maoromaoro ita badinaia. Unai dainai kongrigeisen heboudia ai o ita moale hebou neganai, unai ita laloa be namo. Ita sibona ese ita ura hahedokilaia dabuana ita abia hidi diba. To, namona be hemataurai dabuadia ita hahedokilaia, unai amo ma haida ita durua diba kara goeva idia badinaia noho totona, bona Dirava ena kara maoromaoro taravatu hegeregerena edia laloa, hereva, bona kara be do ia helaga. (1 Pet. 1:15, 16) Lalokau korikori be “dala kererena ai ia kara lasi, ia be sibona ena namo ia tahua lasi.”​—1 Kor. 13:4, 5.

DABUA MAORONA​—NEGA BONA GABU MAORONA AI

11, 12. Iseda dabua ita abia hidi neganai, dahaka ita laloa be namo?

¹¹ Dirava ena hesiai taudia be idia ura hahedokilaia dabua idia abia hidi neganai, inai idia laloatao, “idia vara gaudia ibounai be mai edia nega korikori, bona kara ibounai danu be mai edia nega.” (Had. 3:1, 17) Momokani, keru bona siahu negana hegeregerena dabua ita hahedokilaia diba. Unai sibona lasi, to nega bona noho daladia hegeregerena danu. To, siahu bona keru negadia ese Iehova ena kara maoromaoro taravatudia idia haidaua lasi.​—Mal. 3:6.

¹² Siahu negadia ai, namona be ita hahedokilaia dabuana ese ia hahedinaraia, ita be ma haida ita matauraia bona ita laloa maoromaoro. Bona iseda tadikaka taihu idia moale, bema ita hahedokilaia dabuana be iseda tauanina ai ia kamokau lasi o tauanina ia hahedinaraia lasi. (Iobu 31:1) Danu, kone o nahu gabudiai ita laga-ani neganai, namona be hemataurai digudigu dabua ita hahedokilaia. (Aon. 11:2, 20) Ena be inai tanobada taudia be edia tauanina ia hahedinaraia digudigu dabuadia idia hahedokilaia, to ita be Iehova ita tomadiho henia dainai, ita ura ita lalokau henia helaga Diravana ita hanamoa.

13. Iseda dabua ita abia hidi neganai, edena dala ai 1 Korinto 10:32, 33 ena sisiba ita badinaia diba?

¹³ Mai anina bada hakaua herevana ma ta ese ita do ia durua hemataurai dabuadia ita abia hidi totona. Unai amo ita hahedinaraia ita be ma haida edia lalomamina ita laloa​—herevana idia be iseda tadikaka taihu eiava lasi. (1 Korinto 10:32, 33 duahia.) Namo lasi ma haida idia hahekwakwanaia dabuadia ita hahedokilaia. Paulo ia gwau: “Namona be ita ta ta ese iseda dekena tauna ita hamoalea bona kara namodia do ita karaia ia ita hagoadaia totona.” Ma ia gwau: “Badina Keriso danu ese sibona ia hamoalea lasi.” (Roma 15:2, 3) Oibe, Iesu be sibona ena ura lasi, to ma haida durua karana ia atoa guna. Idia ia durua karana amo ia ese Dirava ena ura ia karaia. Unai dainai ita ura henia gaudia o dabua sitaelo ita dadaraia diba, bema ita ura taunimanima ese ita laohaia sivaraina idia kamonai.

14. Edena dala ai tama sina ese edia natudia idia durua diba Dirava idia hanamoa totona?

¹⁴ Namona be Keristani tama sina ese edia ruma bese idia durua Baibel ena hakaua herevadia idia badinaia totona. Anina be idia bona edia natudia idia hekwarahi be namo, hemataurai dabuadia idia hahedokilaia totona, unai amo Dirava do idia hamoalea. (Aon. 22:6; 27:11) Oibe, namona be tama sina ese edia natudia dekenai haheitalai namona idia hahedinaraia bona idia dekenai hakaua hereva namodia idia henia, unai amo edia natudia idia durua diba idia tomadiho henia helaga Diravana idia matauraia totona. Danu, bema tama sina ese edia natudia dekenai dabua maorodia davaria gabudia bona daladia idia hadibaia, do idia moale! Anina be edia ura gaudia sibona lasi, to edia abia hidi amo do idia hahedinaraia idia be Iehova Dirava ena gwaukau taudia.

EMU URA KWALIMU OI GAUKARALAIA NAMONAMO

15. Dahaka ese ita ia durua diba dabua ita abia hidi totona?

¹⁵ Baibel ai hakaua hereva namodia idia noho, unai ese ita do ia durua abia hidi maorodia ita karaia totona. Oibe, ita sibona ese ita ura hahedokilaia dabuana ita abia hidi diba. Badina ita ta ta iseda ura dabua bona sitaelo be idauidau, bona iseda moni davaria daladia danu be idauidau. To, namona be nega ibounai iseda dabua ena toana ia namo, ia goeva bona ia maoro.

16. Dahaka dainai ita hekwarahi be namo hemataurai dabua ita tahua totona?

¹⁶ Momokani, nega haida ia auka abia hidi maorona ita karaia totona. Stoa momo be dabua sitaelo idauidau idia hoihoilaia, unai dainai nega bada ita halusia diba sket, dres, bona blaus maorodia, eiava tauanina dekenai idia kamokau lasi piripou bona siedi ita hoia totona. To bema tadikaka taihu idia itaia ita hekwarahi hemataurai dabuadia ita tahua totona, do idia moale. Bona ita danu ita moale, badina iseda hekwarahi amo ita hahedinaraia ita ura ita hahedokilaia dabuadia amo iseda lalokau guba Tamana ita hamoalea.

17. Dahaka dainai tadikaka ese edia besoso idia sevia be namo?

¹⁷ To bema tadikaka ese edia besoso idia sevia lasi be edena bamona? Mose ena Taravatu ese tatau ia haganidia edia besoso do idia utua lasi. To, Keristani taudia be Mose ena Taravatu henunai lasi, bona idia badinaia be anina lasi. (Lev. 19:27; 21:5; Gal. 3:24, 25) Tano haida ai, besoso idia utua namonamo bona ia kwadogi be kerere lasi bona unai ese Basileia sivaraina harorolaia gaukarana ia koua lasi. Maduna idia huaia tadikaka haida danu be mai edia besoso. To, tadikaka ma haida be edia besoso idia sevia. (1 Kor. 8:9, 13; 10:32) Tano ma haida ai, bema Keristani tadikaka ta ese ena besoso ia sevia lasi, unai be hemataurai lasi karana. Momokani, bema tadikaka ta ese ena besoso ia sevia lasi, unai ese ia hahedinaraia ena dabua bona toana amo ia be Dirava ia matauraia lasi.​—Roma 15:1-3; 1 Tim. 3:2, 7.

18, 19. Iseda dabua ena sitaelo ita abia hidi neganai, edena dala ai Mika 6:8 ese ita ia durua?

¹⁸ Ita moale badina iseda dabua dekenai Iehova be taravatu momo ia atoa lasi. To, ia ura Baibel ena hakaua herevadia hegeregerena, ita sibona ese abia hidi maorodia ita karaia. Bona iseda dabua bona toana amo ita hahedinaraia ita ura “mai manau danu Dirava danu do ita raka hebou.”​—Mika 6:8.

¹⁹ Ita manau anina be sibona ita sekea bema iseda dabua be Iehova ena helaga karana ida ia hegeregere eiava lasi, badina ita ura iena hakaua herevadia ita badinaia. Bona bema ita manau, do ita ura ma haida edia hemami bona lalohadai ita matauraia. Unai dainai, iseda mauri lalonai Dirava ena kara maoromaoro taravatudia ita badinaia bona ma haida edia hemami ita matauraia neganai, ita be “mai manau danu Dirava danu do ita raka hebou.”

20. Iseda dabua bona toana ese edena bamona ma haida edia lalona ia veria diba?

²⁰ Namona be iseda dabua ena toana amo ita hahedinaraia ita be Iehova ita tomadiho henia. Bona namona be iseda tadikaka taihu bona taunimanima ma haida ese idia itaia, ita be kara maoromaoro Diravana ena hesiai taudia. Ita ura Dirava ena kara maoromaoro taravatudia ita badinaia. Ita moale badina tadikaka taihu be hemataurai dabuadia idia hahedokilaia bona edia kara be ia namo dainai, kudou-maoro taudia be Baibel ena hahemauri sivaraina idia abia dae bona unai ese Iehova ena ladana ia abia isi bona hanamoa. Iseda dabua ita abia hidi namonamo neganai, ita ese iseda hairai Diravana ena ladana ita hanamoa bada.​—⁠Sal. 104:1, 2.