Oi do laloatao noho, oi maragi neganai nega ta oi moru, a? Reana emu imana ai bero oi abia o emu tuina oi kakasia. Unai nega ai emu sinana ena heduru oi laloatao, a? Ia ese emu bero ia hagoevaia bona ia kumia. Oi tai, to ena hereva namodia bona mai lalokau ida oi ia rosia neganai emu hemami ia namo. Unai negai heduru oi abia be haraga, ani?

To ita buruka ita lao neganai iseda mauri dalana ia idau. Hekwakwanai idia bada, bona heduru ita abia haraga lasi. Taunimanima badadia ese idia davaria hekwakwanai be idia hamaoromaoroa diba lasi, sina ta ese ena natuna ena bero ia kumia bona rosia neganai ena hisihisi ia ore bamona. Mani haheitalai haida ita herevalaia.

• Nega ta emu moni gaukara oi haboioa dainai oi lalohisihisi, a? Julian ia gwau ena gaukara amo ia idia hadokoa neganai, ia daradoko bona lalometau. Bona ia gwau: ‘Edena dala ai egu famili do lau naria? Dahaka dainai lagani momo lalonai inai kampani ai lau gaukara to lau idia hadokoa?’

• Reana emu headava ia dika neganai oi lalohisihisi bada. Raquel ia gwau: “Hua 18 gunanai egu tau ese lau ia rakatania neganai, lau lalometau bada. Egu kudouna be kahana rua ai ia makohia bamona. Unai hisihisi be egu kudouna ai sibona lasi, to egu tauanina danu. Unai ese lau ia hagaria.”

• Reana gorere badana ta oi abia to ia ore haraga lasi. Nega haida emu hemami be bese kwarana Iobu bamona, ia gwau: “Egu mauri lau ura lasi momokani, bona mauri hanaihanai lau ura lasi.” (Iobu 7:16) Reana emu hemami be mauri lagani 80 tauna Luis bamona, ia gwau: “Nega haida lau mamia lau ura mase sibona.”

• Eiava emu lalokau tauna ta ia mase dainai oi ura heduru oi abia. Robert ia gwau: “egu natuna be peleini aksiden ta lalonai ia mase neganai, matamanai lau hamomokania lasi. Gabeai ena hisihisi lau mamia, ia be Baibel ese ia gwauraia tuari kaia latana amo oi idia gwadaia bamona.”​—Luka 2:35.

Robert, Luis, Raquel, bona Julian be heduru idia abia, herevana unai hekwakwanai idauidau idia davaria. Idia be heduru ia henia Tauna namona idia davaria​—ia be Siahu Ibounai Diravana. Edena dala ai heduru ia henia? Oi dekenai unai bamona heduru ia henia diba, a?

Aposetolo Paulo ese Iehovaa ia gwauraia “lalogoada ibounai ia henia Diravana iseda hisihisi ibounai lalonai ia ese ita dekenai lalogoada ia henia noho.” (2 Korinto 1:3, 4) To Baibel ese ita ia hagoadaia Iehova ese ita ibounai ia hagoadaia diba bona iseda guba Tamana be Ia hegeregere nega aukadia ai ita ia hagoadaia totona.

To, bema ita ura Dirava amo heduru ita abia kara ta ita karaia be namo. Edena bamona doketa be ita ia durua diba bema ia ida apoinmen ta ita karaia lasi? Unai dainai Baibel ia gwau: “Dirava kahirakahira do umui lao bona ia be umui kahirakahira do ia mai.”​—Iamesi 4:8.

Edena bamona do ita diba Dirava be ita kahirakahira do ia mai? Gau ginigunana be, hanaihanai ita ia hadibaia ia ura ita ia durua. (Maua itaia.) Bona iharuana be, Dirava ese taunimanima ia durua sivaraidia ita kamonai​—idia be taunimanima korikoridia, hari iseda negai bona idaunegai idia noho taudia.

Hari inai negai Dirava dekenai heduru idia tahua taudia bamona, King Davida danu nega aukadia ia davaria. Nega ta Iehova ia noia, ia gwau: “Durua totona lau noinoi neganai, egu hereva do oi kamonai henia.” Dirava be ena noinoi ia haerelaia, a? Oibe. Davida ma ia gwau: “Ia ese lau ia durua noho, bona egu kudouna ia hamoalea noho.”​—Salamo 28:2, 7.

IESU ESE TAITAI TAUDIA IA HAGOADAIA

Dirava ia ura Iesu be taunimaniama hagoadaia gaukarana do ia gunalaia. Dirava ese ia dekenai ia henia gaukara ma haida amo, Iesu be ‘kudouna idia makohia taudia do ia hanamoa’ bona ‘taitai taudia ibounai do ia durua.’ (Isaia 61:1, 2) Peroveta herevadia hegeregerena, Iesu be idia ‘hekwarahi bona metau bada idia huaia taudia’ ia laloa bada.​—Mataio 11:28-30.

Iesu ese taunimanima dekenai sisiba namodia amo, mai hebogahisi ida ia kara henidia, bona nega haida edia gorere ia hanamoa. Nega ta lepera tauna ese Iesu ia noia, “Bema oi ura, lau oi hanamoa diba.” Iesu ia hebogahisi dainai ia gwau: “Lau ura, harihari do oi goeva.” (Mareko 1:40, 41) Bena lepera tauna ia goeva.

Hari, Dirava ena Natuna be tanobada dekenai ia noho lasi ita ia hagoadaia totona. To iena Tamana, Iehova, “lalogoada ibounai ia henia Diravana,” be heduru idia ura taudia ia durua noho. (2 Korinto 1:3) Dirava ese taunimanima ia durua daladia foa mani ita laloa.

• Baibel. “Toretore Helagadia dekenai idia torea herevadia ibounai be ita hadibaia totona idia torea. Bona unai hereva ese ita idia durua ita haheauka totona, bona Toretore Helagadia ese ita dekenai goada ia henia, unai amo helaro ita abia.”​—Roma 15:4.

• Dirava Ena Lauma Helaga. Iesu ia mase bena daudau lasi murinai, Keristani kongrigeisen ibounai be maino ai idia noho. Dahaka dainai? “Kongrigeisen be Iehova ia gari henia dalanai ia raka, bona lauma helaga ese ia hagoadaia.” (Kara 9:31) Lauma helaga, Dirava ena gaukara siahuna unai, ena siahu be bada. Dirava be unai siahu ia gaukaralaia diba dala idauidau ai ita ia durua totona.

• Guriguri. Baibel ia gwau: “Namo lasi gau ta umui lalohekwarahilaia.” Ma ia gwau: “Dirava dekenai emui noinoi herevadia do umui gwauraia hedinarai. Bona Dirava ena maino, laloparara ibounai ia hereaia gauna, ese emui kudouna bona lalona do ia gimaia.”​—Filipi 4:6, 7.

• Iseda Keristani Tadikaka be ita idia durua tura korikoridia. Aposetolo Paulo ese iena turadia ese ena turadia be inai bamona ia herevalaidia, ia “dabu bona dagedage” ia davaria neganai idia ese ia “idia durua bona hagoadaia bada.”​—Kolose 4:11; 1 Tesalonika 3:7.

To reana do oi laloa edena dala ai unai ibounai ia vara diba. Mani matamanai ita herevalaia hekwakwanai idia davaria taudia edia ekspiriens ita laloa. Idia bamona, do oi itaia Dirava be inai gwauhamata namona ia hagugurua noho: “Sinana ese iena mero ia hamoalea bona hagoadaia bamona, lau ese umui do lau hamoalea bona hagoadaia.”​—Isaia 66:13.

MONI GAUKARA OI HABOIOA NEGANAI

Setha ia gwau: “Lau bona egu adavana be nega tamona emai moni gaukara ai haboioa. Lagani rua lalonai emai varavara ese moni dalanai ai idia durua bona gaukara maragidia ai karaia. Unai dainai, egu adavana Priscilla, ia lalometau, bona lau mamia lau be anina lasi.

“Edena bamona unai ai haheaukalaia? Priscilla be hanaihanai Iesu ena hereva Mataio 6:34 ia laloa loulou. Unai siri ia gwau namo lasi kerukeru totona ita lalohekwarahi, badina dina ta ta be mai ena lalohekwarahi gauna. Bona mai kudouna ibounai ida ia guriguri karana ese ia hagoadaia ia haheauka noho totona. To lau be, Salamo 55:22 ese ia hagoadaia. Salamo torea tauna bamona, lau davaria egu lalohekwarahi ibounai be Iehova lau henia, bona lau itaia Ia ese lau ia durua. Ena be hari moni gaukara ta lau davaria, to, Iesu ena sisiba Mataio 6:20-22 hegeregerena ai ese kohu momo ai tahua lasi. Unai ibounai dainai, ai be Dirava kahirakahira ai lao bona ai gaukara hebou.”

Jonathan ia gwau, “emai bisinesi maragina ia dika neganai lau gari vaira negai dahaka do ia vara. Moni ena hekwakwanai be bada dainai, lagani 20 lalonai emai hekwarahi be anina lasi. Lau bona egu adavana be moni totona ai hepapahuahu matamaia. Emai banika kadi amo gau ta ai hoia diba lasi, badina ai gari banika dekenai emai moni be ia hegeregere lasi.

“To Dirava ena Hereva bona ena lauma ese ai ia durua abia hidi namodia ai karaia totona. Gaukara idauidau lau karaia, bona anina lasi gaudia hoia karana ai hadokoa. Ai be Iehova ena Witnes taudia dainai, emai abidadama keristani taudia amo heduru ai abia danu. Ai idia hagoadaia bona nega aukadia ai, ai idia durua.”

HEADAVA IA DIKA NEGANAI

Raquel ia gwau: “egu adavana ese lau ia rakatania neganai, lau lalohisihisi bona badu. Lauegu lalona ia hisihisi bada. To Dirava kahirakahira lau lao, bona ia ese lau ia hagoadaia. Dina ta ta ai Dirava lau guriguri henia karana dainai Iena maino ese egu kudouna ia gimaia. Lau mamia Ia ese egu kudouna ia hanamoa lou.”

“Lau tanikiu Iena Hereva, Baibel dainai, lau ese badu bona inai karana lau rakatania. Aposetolo Paulo ena hereva Roma 12:21 ai lau badinaia, ia gwau: “Namo lasi dika ese oi ia halusia, to namona be kara namo amo dika oi halusia noho.”

“Tura namona ta ese lau ia durua unai hekwakwanai lau hanaia totona. Ia ese lau dekenai Hadibaia Tauna 3:6 ia hahedinaraia bona mai manau ida ia gwau, nega haida, “gau do ita haboioa” danu. Unai be sisiba aukana, to unai ese lau ia durua. Hari egu mauri lalonai tahua gaudia matamatadia lau atoa.”

Elizabeth ia gwau: “emu headava ia dika neganai, heduru oi abia be namo. Lau be mai egu lalokau turana ta, bona dina ta ta ai ia ese unai bamona heduru lau dekenai ia henia. Lau danu ia taitai, lau ia hagoadaia, lau ia lalokau henia dainai lau mamia lasi ta ese lau ia ura henia lasi. Lau diba momokani Iehova ese ia gaukaralaia lau egu lalohisihisi lau hanaia totona.”

GORERE EIAVA BURUKA NEGADIAI

Luis, inai atikol ena matamanai ita herevalaia tauna, be kudou gorere badana ta ia davaria, bona nega rua kahirakahira ia mase. Hari dina ta ta ai hora 16 lalonai oksijen be oksijen tanika amo ia abia. Luis ia gwau: “Dirava lau guriguri henia murinai, lau mamia iena lauma ese lau dekenai goada ia henia. Guriguri karana ese lau ia durua lau goada noho totona badina Dirava lau abidadama henia bona lau diba Ia be lau ia laloa bada.”

Petra, ena mauri lagani be 80 hahinena ia gwau: “Lau ura gau momo lau karaia, to lau hegeregere lasi. Egu goada ia ore lao karana be lau ura lasi. Egu tauanina ia manoka bona hanaihanai muramura lau inua. Nega momo Iesu be ena Tamana ia noia ena hisihisi ia kokia karana lau laloa. To Iehova be Iesu dekenai goada ia henia, bona lau dekenai goada ia henia danu. Guriguri karana be lauegu dina ta ta ena muramura bamona. Guriguri amo Dirava lau hereva henia murinai egu hemami ia namo.”​—Mataio 26:39.

Julian, kahirakahira lagani 30 bamona lalonai multiple sclerosis gorerena ia abia ena hemami be unai bamona danu. Ia gwau, “Lau ese davana bada moni gaukara lau haboioa bona wilsea ai lau helai. To egu mauri be mai anina bada badina ma haida lau durua. Henia karana ese hisihisi ia hamaragia diba, bona Iehova be ena gwauhamata ia badinaia, hisihisi negadiai ita ia hagoadaia totona. Aposetolo Paulo bamona, lau gwau diba: ‘Lau dekenai siahu ia henia tauna amo goada lau abia gau ibounai lau karaia totona.’”​—Filipi 4:13.

LALOKAU TAUNA TA IA MASE NEGANAI

Antonio ia gwau: “Egu tamana be motuka ese ia bampaia bena ia mase neganai, matamanai unai lau abia dae be auka. Lau laloa unai be maoro lasi​—ia be dala ia ura hanaia sibona. To gau ta lau karaia diba lasi. Dina faiv lalonai ia maserea (coma) bena ia mase. Unai nega ai, egu sinana ena vairanai lau tai lasi, to sibona lau noho neganai lau tai. Lau sibona dekenai lau henanadai, ‘Dahaka dainai? Dahaka dainai?’

“Unai lalometau negadia ai, Iehova lau noia loulou lau ia durua egu lalohisihisi lau biagua totona bona lau dekenai maino ia henia totona. Bena metairametaira egu lalometau ia ore. Lau laloatao Baibel ia gwau, idia ‘vara kava’ dika be ita ibounai dekenai ia vara diba. Dirava be ia koikoi diba lasi dainai, lau abia dae momokani toreisi lou neganai egu tamana do lau itaia lou.”​—Hadibaia Tauna 9:11; Ioane 11:25; Tito 1:2.

Robert, inai atikol ena matamanai ita herevalaia tauna be unai bamona ia laloa danu. Ia gwau: Lau bona egu adavana, be Filipi 4:6, 7 ese ia herevalaia mainona ai mamia. Unai be Iehova guriguri henia karana amo ai abia. Inai maino dainai ai ese nius ripoti taudia dekenai emai toreisi lou helarona ai gwauraia totona. Ena be emai natuna mero be peleini aksiden ai ia mase, to guna ai karaia hebou moale karadia ai do laloatao noho. Ai hekwarahi unai ai laloaboio lasi totona.

“Emai Witnes turadia be ai idia hamaoroa televisen ai idia itaia ai be mai gari lasi ida emai abidadama ai gwauraia neganai, ai gwau, unai ai karaia diba badina idia momo be ai dainai idia guriguri. Lau abia dae momokani Iehova be edia hagoadaia herevadia amo ai ia durua.”

Ita herevalaia haheitalai ese idia hahedinaraia, Dirava be hekwakwanai bona hisihisi idauidau idia davaria taudia dekenai heduru ia henia diba. Oi be edena bamona? Herevana emu mauri lalonai dahaka hekwakwanai oi davaria, to nega aukadia lalonai heduru abia dalana ia noho.b Unai dainai namona be Iehova dekenai heduru oi tahua, ani? Badina ia be “lalogoada ibounai ia henia Diravana.”​—2 Korinto 1:3.