Gima Kohorona INTANET LAIBRI
Gima Kohorona
INTANET LAIBRI
Hiri Motu
  • BAIBEL
  • PABLIKEISEN
  • HEBOUDIA
  • Biaguna Rua Edia Hesiai Gaukara Ita Karaia Diba Lasi
    Gima Kohorona—2014 | April 15
    • Marilyn be ia lao gwauraia neganai, mai lalohisihisi ida ena adavana James bona natuna Jimmy ia itaia

      Biaguna Rua Edia Hesiai Gaukara Ita Karaia Diba Lasi

      “Tau ta be biaguna rua edia igui hesiai gaukara ia karaia diba lasi, . . . Dirava bona Taga edia hesiai gaukara umui karaia diba lasi.”—MAT. 6:24.

      DAHAKA OI LALOA?

      • Edena Baibel hakaua herevadia ese ita idia durua famili naria ena maduna ita laloa maoromaoro totona?

      • Edena dala ai iseda abia hidi amo ita hahedinaraia Iehova sibona ita hesiai henia?

      • Eda abia hidi lalonai Iehova ita atoa guna neganai, edena dala ai ita do ia hanamoa?

      1-3. (a) Hari, momo be moni dalanai dahaka hekwakwanai idia davaria, bona haida be dahaka idia karaia? (Laulau ginigunana itaia.) (b) Bema tama sina be moni gaukara totona tano ma ta idia ura lao, edia natudia naria totona dahaka idia lalohekwarahilaia?

      MARILYN ia gwau: “Egu adavana James be dina ta ta ai gaukara amo ia giroa mai neganai ia hesiku bada, to ena pei be hegeregere lasi emai dabu gaudia ai hoia totona. Lau ura ia lau durua bona emai natuna Jimmy totona kohu namodia haida do ai hoia ena turadia edia hegeregerena.”a Marilyn ia ura edia varavara ma haida ia durua, bona vaira nega totona moni haida do ia haboua danu. Ena turadia momo be moni momo abia totona tano ma haida dekenai idia gaukara. To, Marilyn be ena famili do ia rakatania karana ia laloa neganai, ia daradara edena abia hidi do ia karaia. Dahaka dainai?

      2 Marilyn ia ura lasi ena famili bona hanaihanai idia karaia tomadiho karadia ia rakatania. To ia laloa, haida be tano ma ta ai idia gaukara, bona edia famili edia hetura karana Iehova ida be ia namo. Danu ia lalohekwarahi, edena bamona Jimmy do ia naria bema ia be tano ma ta ai ia noho. Marilyn ese Intanet amo ena natuna dekenai “Iehova ena matahakani bona sisiba” ia hadibaia diba, a?—Efe. 6:4.

      3 Marilyn ese heduru ia tahua. Ena be ena adavana ia ura lasi Marilyn do ia lao, to ia gwau bema ia ura lao, do ia koua lasi. Elda bona kongrigeisen taudia ma haida ese Marilyn idia sisiba henia do ia lao lasi, to taihu haida ese idia doria ia lao totona. Idia gwau: “Bema emu famili oi lalokau henidia, do oi lao. Iehova do oi hesiai henia noho diba.” Ena be Marilyn ia daradara, to ia ese James bona Jimmy ia bamahuta henidia bona moni gaukara totona tano ma ta dekenai ia lao. Ia gwauhamata, ia gwau: “Do lau noho daudau lasi.”

      FAMILI ENA MADUNA BONA BAIBEL ENA HAKAUA HEREVADIA

      4. Dahaka dainai momo be tano ma ta dekenai idia lao, bona daika ese edia natudia idia naria?

      4 Iehova ia ura lasi ena hesiai taudia do idia ogogami. Idaunegai taunimanima be idia ogogami lasi totona, tano ma ta dekenai idia lao. (Sal. 37:25; Aon. 30:8) Hegeregere, Iakobo be ena bese ia hitolo lasi totona, ena natudia ia siaia Aigupito dekenai aniani idia hoia totona.b (Gen. 42:1, 2) To hari, tano ma haida idia lao taudia momo be hitolo dainai lasi, to badina idauidau dainai idia lao. Hegeregere, edia abitorehai be momo, eiava idia ura edia famili edia noho dalana idia hanamoa. Moni ena siahu ia maragi gabudia ai, momo be provinsi o tano idauna ma ta dekenai idia gaukara, unai amo edia ura gaudia idia hagugurua diba. Nega momo edia natudia be edia adavana, kakana, tubudia, varavara, o turadia dekenai idia rakatania. Ena be edia adavana o natudia idia rakatania dainai idia lalohisihisi, to idia laloa dala ma ta be lasi.

      5, 6. (a) Moale korikorina bona noho namo abia totona Iesu ena hadibaia hereva be dahaka? (b) Iesu ese iena murinai idia raka taudia ia hadibaia dahaka gaudia totona do idia guriguri? (c) Iehova ese edena dala ai ita ia hanamoa?

      5 Iesu ena negai momo be idia ogogami bona idia laloa moni momo idia abia neganai, reana mauri namona do idia moalelaia. (Mar. 14:7) To, Iesu ia ura lasi idia ese noho daudau lasi gaudia do idia abidadama henia. Ia ura Iehova do idia tabekau henia, badina iena hahenamo be idia noho hanaihanai. Iesu ena Ororo Harorona ai ia hahedinaraia, moale korikorina bona noho namo be kohu, moni, edukeisen badana o unai bamona gaudia amo ita davaria lasi, to Iehova tura henia karana amo.

      6 Lohiabada ena guriguri lalonai, Iesu ese ita ia hadibaia moni totona do ita guriguri lasi, to “hari dina ena paraoa” totona do ita guriguri. Ia ese ena kamonai taudia ia hadibaia: “Tanobada dekenai umui sibona totona dava bada kohu do umui haboua lasi, . . . To guba dekenai umui sibona totona dava bada kohu do umui haboua.” (Mat. 6:9, 11 futnout, 19, 20) Namona be ita abia dae Iehova be ena gwauhamata hegeregerena ita do ia hanamoa. Anina be ia ese ita ia lalonamo henia bona eda dabu gaudia ia henia. Unai dainai, moale korikorina bona noho namo ita abia totona, gau badana be iseda lalokau Tamana ita abidadama henia, to moni ita abidadama henia lasi.—Mataio 6:24, 25, 31-34 duahia.

      7. (a) Iehova ese natudia naria ena maduna be daidia ia henia? (b) Dahaka dainai tama bona sina idia gaukara hebou natudia idia naria totona be gau badana?

      7 Iehova ena ura ita karaia anina be iena ura hegeregerena iseda famili maduna ita huaia. Keristani taudia ese Mose ena Taravatu lalonai ia noho hakaua herevana ta idia badinaia diba: Tama sina ese edia natudia do idia hadibaia Iehova idia hesiai henia totona. (Deuteronomi 6:6, 7 duahia.) Dirava ese unai maduna be tama sina dekenai ia henia, to tubudia o ma ta dekenai ia henia lasi. King Solomona ia gwau: “Lauegu natuna e, oiemu tamana bona sinana, edia hadibaia hereva do oi kamonai henia.” (Aon. 1:8) Iehova ena hereva ena anina be tama sina do idia noho hebou, edia natudia idia hadibaia bona hakaua be gau badana. (Aon. 31:10, 27, 28) Bema natudia idia itaia tama sina be dina ta ta ai Iehova idia herevalaia bona idia hesiai henia, idia ese unai do idia tohotohoa.

      IDIA VARA DIBA HEKWAKWANAI

      8, 9. (a) Tama o sina be famili ida ia noho lasi neganai, dahaka idia vara diba? (b) Bema tama sina bona natudia idia noho hebou lasi, dahaka hekwakwanai idia vara diba?

      8 Momo be tano ma ta dekenai moni gaukara totona idia do lao lasi neganai, idia davaria diba hekwakwanai idia lalohadailaia guna. To, do idia vara hekwakwanai ibounai idia diba lasi. (Aon. 22:3)c Marilyn be ena famili ia rakatania neganai, ia lalohisihisi matamaia badina idia ia reaia. Iena adavana bona natuna danu be unai bamona idia mamia. Jimmy be ena sinana ia nanadaia: “Dahaka dainai lau oi rakatania?” Ena be matamanai Marilyn ia laloa hua haida sibona do ia gaukara, to lagani haida murinai ia lalometau, badina ia itaia ena famili ena mauri dalana ia idau ia lao. Jimmy be ia herevahereva momo lasi, bona ena sinana ia tura henia namonamo lasi. Marilyn ia lalometau bona ia gwau: “Ia ese lau ia lalokau henia lasi.”

      9 Bema tama sina bona natudia idia noho hebou lasi, do idia moale lasi bona hekwakwanai badadia idia vara diba.d Bema natuna be ia do maragi bona ena tama o sina be nega daudau ia ida idia noho lasi, natuna ena kara be do ia idau ia lao bona idia do ia matauraia lasi. Marilyn ese Jimmy ia hamaoroa, ia be tano ma ta ai ia gaukara, badina ia ura ia dekenai mauri namona do ia henia. To, Jimmy ia laloa iena sinana be ia ia ura henia lasi dainai ia rakatania. Matamanai ena sinana ia noho lasi dainai ia lalohisihisi. To gabeai, ena sinana be idia ia vadivadi henia neganai, Jimmy ia moale lasi. Jimmy ia laloa ena sinana do ia lalokau henia lasi bona kamonai henia lasi be maoro. Edia tama sina ese idia rakatania natudia momo be unai bamona idia laloa.—Aonega Herevadia 29:15 duahia.

      Marilyn be Intanet amo James bona Jimmy ia hereva henidia

      Intanet amo emu natuna oi rosia diba lasi (Paragraf 10 itaia)

      10. (a) Bema tama sina be natudia ida idia noho lasi to harihari gaudia idia siaia, dahaka ia vara diba? (b) Tama o sina be gabu daudau ai ia noho neganai, natudia dekenai dahaka ia karaia diba lasi?

      10 Marilyn be natuna ia hamoalea totona moni bona harihari gaudia ia siaia. To, ia itaia unai kara ese ena natuna ia durua lasi. Toana be ia ese ena natuna ia hadibaia moni do ia laloa bada, to ena famili bona Iehova do ia ura henia lasi. (Aon. 22:6) Jimmy be ena sinana dekenai ia gwau: “Oi mai lasi, to harihari gaudia sibona oi siaia.” Gabeai, Marilyn ia laloparara ena natuna ia hadibaia namonamo totona revareva, telefon, o vidio amo idia herevahereva sibona be hegeregere lasi. Ia gwau: “Oi ese Intanet amo emu natuna oi rosia o kisi henia diba lasi.”

      Marilyn be gaukara gabunai ena bosi ena hegahusi karana ia dadaraia

      Emu adavana amo oi daudau neganai, dahaka hahetoho oi davaria diba? (Paragraf 11 itaia)

      11. (a) Edena dala ai tano ma ta ai moni gaukara karaia karana ese headava ia hadikaia diba? (b) Edena dala ai Marilyn ia laloparara ena famili dekenai ia giroa be namo?

      11 Marilyn ena hetura karana Iehova bona ena adavana James ida, be ia dika ia lao danu. Wiki ta lalonai ia be nega tamona sibona ia lao hebou bona haroro. Danu, gaukara gabunai ia hekwarahi ena bosi ena hegahusi karana ia dadaraia totona. Marilyn bona James be ta ta amo idia daudau dainai, hekwakwanai idia vara neganai ta ta idia durua diba lasi. Unai dainai, ma haida amo heduru idia tahua bona kahirakahira heudahanai ena tarapu lalonai idia moru. Marilyn ia laloparara ena be ia bona James be heudahanai ena tarapu lalonai idia moru lasi, to idia noho hebou lasi dainai Baibel ena hakaua herevana mahuta hebou karana dekenai idia badinaia lasi. Idia ruaosi be ta ta amo idia daudau dainai, headava taudia ese idia moalelaia karadia idia karaia hebou lasi. (Sol. 1:2; 1 Kor. 7:3, 5) Danu, edia natuna ida Iehova idia tomadiho henia hebou lasi. Marilyn ia gwau: “Hebouhebou ta dekenai lau kamonai Iehova ena dina badana ai ita roho mauri totona, ruma bese ena tomadiho be mai anina bada. Unai dainai, lau laloparara egu famili dekena lau giroa be namo. Lau hekwarahi egu hetura karana Iehova bona egu famili ida lau hagoadaia lou totona.”

      SISIBA NAMONA BONA SISIBA DIKANA

      12. Baibel ai edena hakaua herevadia ese famili amo idia daudau taudia idia durua diba?

      12 Marilyn ia ura giroa neganai, haida idia moale bona haida idia badu. Iena kongrigeisen elda taudia ese ena abidadama karana dainai idia hanamoa. To, ma haida ese idia koua bona idia hamaoroa, bema ia giroa moni gaukara namona ta do ia davaria lasi. Idia gwau: “Daudau lasi murinai do oi giroa mai.” Namo lasi Keristani taudia ese unai bamona sisiba dikadia idia henia, to “hahine matamatadia idia hadibaia edia adavadia do idia lalokau henia, bona edia natudia do idia lalokau henia, . . . ruma ai idia gaukara,” o sibodia edia famili idia naria, “unai amo haida ese Dirava ena hereva do idia gwauraia dika lasi.”—Tito 2:3-5 duahia.

      13, 14. Dahaka dainai famili edia ura ita dadaraia to Iehova ita atoa guna be abidadama karana? Haheitalai ta gwauraia.

      13 Moni gaukara totona tano o provinsi ma ta idia lao taudia momo edia kastom lalonai tama sina bona varavara matauraia bona naria karana be gau badana. Unai dainai, Keristani tauna ta be Iehova hamoalea totona, famili edia ura bona kastom ia dadaraia neganai, ia hahedinaraia ena abidadama be ia goada.

      14 Mani Carin ena sivarai ita laloa. Ia gwau: “Egu natuna Don ia vara neganai, lau bona egu adavana be tano ma ta ai moni gaukara ai karaia, bona lau be Baibel lau stadilaia matamaia. Egu famili taudia ibounai idia ura egu tama sina dekenai Don do lau siaia, bona idia naria ela bona moni dalanai ai hegeregere.” To, Carin ia gwau ia sibona ese Don do ia naria neganai, ena varavara bona adavana danu, be ia idia kirikirilaia bona idia gwau ia be lahedo hahinena. Carin ia gwau: “Unai nega ai, lau laloa egu tama sina dekenai Don lau siaia lagani haida idia ida ia noho be kerere lasi, to lau diba Iehova ese emai natuna naria ena maduna be ai, tama sina dekenai ia henia.” Carin ia rogorogo lou neganai, ena Witnes lasi adavana ia gwau namona be bogana lalonai natuna ia hamasea. Guna Carin ese ia karaia abia hidi maorona ese ena abidadama ia hagoadaia dainai, ia ese Iehova ia hamoalea abia hidi ma ta ia karaia. Bema Carin ese ena natuna ta o ruaosi ia siaidia ma haida ese idia naria totona, reana edia mauri do ia idau. To unai idia karaia lasi dainai, hari ia, ena adavana, bona natudia be idia moale.

      15, 16. (a) Mani Vicky ia maragi negana ena sivarai oi gwauraia. (b) Dahaka dainai ena natuna totona abia hidi idauna ia karaia?

      15 Taihu ta ladana Vicky, ia gwau: “Lagani haida lalonai, lau be egu tubuna hahinena ese ia naria, bona egu tadina kekenina be egu tama sina ida ia noho. Egu tama sina dekenai lau lao neganai, idia dekenai lau manada lasi. Egu tadina be ia gari lasi emai tama sina ida ia herevahereva, ia rosidia, bona edia hetura karana ia moalelaia. To, lau be egu tama sina dekenai lau manada lasi, bona lau bada neganai, egu hemami korikorina lau herevalaia be auka. Lau bona egu tadina ese emai tama sina ai gwauhamata henidia idia buruka neganai, do ai naridia. Egu tadina be idia ia lalokau henia dainai do ia naridia, to lau ese do lau naridia badina unai be egu maduna ta sibona.”

      16 Vicky ma ia gwau: “Hari egu sinana ia ura egu natuna kekeni be ia dekenai do lau siaia, guna lau dekenai ia karaia bamona. To, lau ese mai hemataurai ida lau abia dae lasi. Lau bona egu adavana ai ura emai natuna be Iehova ena dala hegeregerena do ai naria. Bona lau ura lasi vaira nega ai lau bona egu natuna emai hetura karana do lau hadikaia.” Vicky ia laloparara Iehova bona ena hakaua herevadia do ia atoa guna be gau badana, to moni bona famili ena ura be gabeai. Iesu ia gwau: “Tau ta be biaguna rua edia igui hesiai gaukara ia karaia diba lasi.” Oibe, Dirava bona Taga be nega tamona ita hesiai henidia diba lasi.—Mat. 6:24; Eso. 23:2.

      IEHOVA ESE EDA HEKWARAHI ENA ‘ANINA DO IA HAVARAIA’

      17, 18. (a) Keristani taudia be edena gwauhamata idia abidadama henia diba? (b) Stadi gabena ai edena henanadai do ita herevalaidia?

      17 Iseda Tamana, Iehova ia gwauhamata vadaeni, bema Basileia bona ena kara maoromaoro ita tahua guna, ita do ia durua eda dabu gaudia ita abia totona. (Mat. 6:33) Danu, herevana hekwakwanai badadia ita davaria, to bema Baibel ena hakaua herevadia ita badinaia, Iehova ia gwau “dala do ia kehoa.” (1 Korinto 10:13 duahia.) Bema Iehova ita “naria,” ‘Ia dekenai ita abidadama,’ ena aonega bona hahekau totona ita guriguri, bona ena taravatu bona hakaua herevadia ita badinaia, ‘ia ese ita do ia durua.’ (Sal. 37:5, 7) Ia sibona be iseda Biaguna korikorina bona ita hesiai henia neganai, ita do ia hanamoa. Bema iena ura ita atoa guna, ia ese iseda mauri do ia hanamoa.—Genese 39:3 sekea.

      18 Bema ta be moni gaukara totona tano ma ta ia lao bona hekwakwanai ia vara, dahaka ia karaia diba? Ena be moni gaukara totona tano ma ta ita lao lasi, to dahaka gaudia ita karaia diba eda famili ita naria totona? Bona edena dala ai mai lalokau ida ma haida ita durua abia hidi maorona idia karaia totona? Stadi gabena ai unai henanadai do ita herevalaidia.

  • Oi Lalogoada—Iehova be Emu Durua Tauna!
    Gima Kohorona—2014 | April 15
    • Peleini abia gabunai Marilyn bona James idia rosia bona edia natuna Jimmy be idia ia itaia

      Oi Lalogoada Iehova be Emu Durua Tauna!

      “Mai lalogoada ida do ita gwau: ‘Iehova be egu durua tauna.’”—HEB. 13:6.

      DAHAKA OI LALOA?

      • Famili ena hetura karana Dirava ida ia goada totona, tama sina ese dahaka idia karaia be namo?

      • Ena be tama be moni gaukara totona tano ma ta idia lao lasi, to edena dala ai edia famili idia naria namonamo diba?

      • Keristani tama ta be dahaka ia karaia diba bema ena varavara ese idia doria tano ma ta ai moni gaukara ia karaia totona?

      1, 2. Tano ma ta ai idia gaukara taudia idia giroa neganai, dahaka hekwakwanai idia davaria? (Laulau ginigunana itaia.)

      EDUARDO ia gwau: “Tano ma ta ai gaukara namona bona moni momo lau abia.a To, Iehova ena Witnes taudia ida Baibel lau stadilaia neganai, lau laloparara lau be mai egu maduna badana ta—egu famili be tomadiho bona tauanina dalanai do lau naridia. Unai dainai egu hanua dekenai lau giroa.”—Efe. 6:4.

      2 Eduardo ia diba iena famili dekenai ia giroa dainai, ia be Iehova ia hamoalea. Vanegai stadi ai Marilyn ita herevalaia bamona, Eduardo danu ia hekwarahi ena famili taudia ia tura henia lou totona. Danu, ena pei be bada lasi dainai, ia hekwarahi iena adavana bona natudia ia naria totona. Edena dala ai ena famili do ia naria? Kongrigeisen taudia haida ese ia do idia durua diba, a?

      IA HEKWARAHI IEHOVA BONA FAMILI TAUDIA IA TURA HENIA LOU

      3. Tama o sina be famili ida ia noho lasi neganai, dahaka hekwakwanai idia vara diba?

      3 Eduardo ia gwau: “Lau laloparara egu natudia be egu lalokau bona heduru idia ura negadia ai, lau noho lasi. Lau noho lasi idia ida Baibel sivarai ai duahia, ai guriguri hebou, lau rosidia bona ai gadara totona.” (Deu. 6:7) Ena natuna kekeni badana, Anna ia gwau: “Emai tamana be ai ida ia noho lasi dainai, lau mamia lau ia lalokau henia lasi. Ia giroa mai neganai, iena vairana bona gadona regena amo ai diba ia be emai tamana. To, lau ia rosia neganai lau mamia ia be idau tauna ta bamona.”

      4. Tama be ena famili ida ia noho lasi neganai, edena dala ai ena kwara dagina gaukaralaia dalana ia dika diba?

      4 Danu, tama be ena famili ida ia noho lasi neganai, ena kwara dagina gaukaralaia dalana ia dika diba. Eduardo adavana Ruby, ia gwau: “Lau be Sina bona Tama ena maduna lau huaia dainai, abia hidi momo be lau sibona ese lau karaia. Eduardo ia giroa mai neganai, Baibel ena hereva hegeregerena hahine be tau henunai do ia noho ena anina lau dibaia namonamo. Hari danu, nega haida sibona lau hamaoroa egu adavana be ia giroa mai vadaeni bona ia ese abia hidi do ia karaia.” (Efe. 5:22, 23) Eduardo ia gwau: “Egu natudia kekeni be edia sinana amo gwaumaoro abia karana idia manadalaia. Bona ai ruaosi ai laloparara, namona be emai natudia idia itaia ai be abia hidi ai karaia hebou, bona Baibel ena hereva hegeregerena kwara dagina gaukaralaia dalana lau dibaia.”

      5. Edena dala ai Eduardo ese ena famili ena hekwakwanai ia hanamoa, bona dahaka ia vara?

      5 Eduardo ia hekwarahi ena hetura karana ena famili ida ia hanamoa bona ia durudia edia abidadama ia goada lou totona. Ia gwau: “Lau ura egu hereva bona haheitalai namona amo egu natudia dekenai hereva momokani lau hadibaia. Namo lasi lau hereva sibona Iehova lau lalokau henia, to do lau hahedinaraia danu.” (1 Ioa. 3:18) Iehova ese Eduardo ena hekwarahi ia hanamoa, a? Anna ia gwau: “Ai moale badina ai itaia ia gaukara goada tama namona ai ia lao bona ai ia tura henia. Danu, ai moale badina kongrigeisen maduna haida abia totona ia gaukara goada. Tanobada ia ura Iehova amo ai ia veria oho. To ai itaia emai tama sina be hereva momokani idia laloa bada neganai, ai ura idia ai tohotohoa. Emai tamana ia gwauhamata ai do ia rakatania lou lasi, bona ena gwauhamata ia hamomokania. Bema ena gwauhamata ia hamomokania lasi, reana lau be hari Iehova ena orea lalonai lau noho lasi.”

      MADUNA HUAIA

      6. Tuari negana ta lalonai, tama sina haida be dahaka idia dibaia?

      6 Ekspiriens haida ese idia hahedinaraia, guna Balkan tanodia ai ena be tuari ia vara, to Witnes natudia be idia moale. Dahaka dainai? Badina tuari lalonai tama sina be moni gaukara idia lao lasi, to ruma ai idia noho, natudia ida idia stadi, gadara bona herevahereva. Unai amo dahaka ita dibaia? Ena be natudia be moni o harihari gaudia idia abia, to idia ura edia tama sina be idia ida do idia noho. Oibe, Dirava ena Hereva hegeregerena, bema tama sina ese natudia idia laloa bada bona hadibadia, natudia be namo do idia davaria.—Aon. 22:6.

      7, 8. (a) Tano ma ta amo idia giroa mai tama sina haida be dahaka hekwakwanai idia davaria? (b) Edena dala ai tama sina ese edia hetura karana natudia ida idia hanamoa diba?

      7 To madi, tano ma ta amo idia giroa mai tama sina haida idia davaria edia natudia idia moale lasi o idia hemataurai lasi neganai, idia gwau: “Umui totona lau karaia gaudia ibounai umui laloa bada lasi, a?” To, natuna ia lalohisihisi badina badana be tamana be nega daudau lalonai idia ida ia noho lasi. Tama o sina be dahaka do ia karaia ena natudia ia tura henia namonamo totona?

      8 Iehova oi noia oi do ia durua emu famili taudia ena kara oi lalopararalaia totona. Bena, emu famili ida oi herevahereva neganai, namona be oi hahedinaraia oi abia dae idia vara hekwakwanai haida be emu kerere. Emu lalona ibounai ida sori herevana oi gwauraia. Bema emu adavana bona natudia ese unai idia itaia, do idia mamia oi be idia oi laloa bada. Bema oi haheauka bona oi hekwarahi noho, emu famili ese oi do idia lalokau henia bona matauraia lou.

      ‘IENA RUMA BESE TAUDIA DO IA NARIA’

      9. Dahaka dainai iseda ‘ruma bese taudia ita naridia’ totona, hanaihanai moni o kohu momo maurina do ita tahua lasi?

      9 Aposetolo Paulo ia gwau Keristani burukadia be sibona idia naria diba lasi neganai, edia natudia bona tubudia ese “edia abitorehai do idia haloua” be namo. Danu, Paulo ese Keristani taudia ia hamaorodia bema idia be mai edia aniani, dabua bona noho gabuna, unai be hegeregere. Namo lasi hanaihanai ita hekwarahi moni o kohu momo maurina ita abia totona. (1 Timoteo 5:4, 8; 6:6-10 duahia.) Keristani tauna be “iena ruma bese taudia ia naridia” totona, namo lasi kahirakahira do ia ore tanobadana ena kohu ia tahua momo. (1 Ioa. 2:15-17) Namo lasi “taga ena koikoi siahuna” bona “mauri ena lalohekwarahi” dainai, eda famili be Dirava ena kara maoromaoro tanobadana ai “mauri korikorina” idia abia lasi.—Mar. 4:19; Luka 21:34-36; 1 Tim. 6:19.

      10. Dahaka dainai aonega karana be oi abitorehai lasi?

      10 Iehova ia diba moni haida ita abia be namo. To, Dirava amo ia mai aonega ese moni ia hereaia, badina moni ese ita ia gimaia o naria diba lasi. (Had. 7:12; Luka 12:15) To, momo idia laloparara lasi tano ma ta idia lao karana be hekwakwanai momo ia havaraia diba, bona reana unuseniai pei bada gaukarana ta do idia davaria lasi. Oibe, hekwakwanai badadia idia vara diba. Unai bamona taudia idia giroa mai neganai, edia abitorehai be bada herea. Idia be nega lasi Dirava idia hesiai henia, badina edia nega bada be idia gaukara abitorehai davana idia henia totona. (Aonega Herevadia 22:7 duahia.) Aonega karana be oi abitorehai lasi.

      11. Edena dala ai moni gaukaralaia namonamo ena lista ta torea karana be mai ena namo?

      11 Eduardo ia diba iena famili ida do ia noho ena abia hidi ia hagugurua totona, moni do ia gaukaralaia namonamo. Ia bona ena adavana ese moni idia gaukaralaia namonamo totona, lista ta idia torea. Unai lista dekenai edia dabu gaudia sibona idia torea. Bona idia ibounai ese unai lista idia badinaia dainai, anina lasi gaudia dekenai moni idia negea kava lasi.b Eduardo ia gwau: “Hegeregere, lau ese egu natudia be praivete sikuli amo lau kokidia bona gavamani sikuli namodia dekenai lau atodia.” Eduardo bona ena famili ese Iehova ena heduru idia noia, unai amo edia tomadiho karadia do ia hadikaia lasi moni gaukara ta ia davaria diba. Edena dala ai Iehova ese edia guriguri ia haerelaia?

      12, 13. Eduardo be ena famili naria totona dahaka ia karaia? Bona edena dala ai Iehova ese ia hanamoa?

      12 Eduardo ia gwau: “Lagani ginigunadia rua lalonai, egu pei be hegeregere lasi emai dabu gaudia ai hoia totona. Danu, lau haboua monina be kahirakahira ia ore bona lau hesiku. To, ai be hebou ibounai ai lao bona ai haroro.” Eduardo ese abia hidi ia karaia ena famili do ia rakatania lou lasi tano ma ta ai moni gaukara ia karaia totona. Ia gwau: “Lau ese gaukara idauidau karaia dalana lau dibaia, unai amo bema gaukara ta be lasi, ma ta lau karaia diba.”

      Marilyn bona ena famili be aniani idia hoihoilaia unai amo sibona idia naria diba

      Emu famili oi naria totona, gaukara idauidau oi dibaia diba, a? (Paragraf 12 itaia)

      13 Eduardo be metairametaira abitorehai davana ia haloua dainai, idia atoa kau monina ese ia abitorehai monina ia hanaia. To, ia be unai ia laloa bada lasi, badina Iehova ena ura hegeregerena, ia be ena famili ida ia noho. Eduardo ia gwau: “Hari lau abia pei be bada lasi, to ai hitolo lasi. Iehova ‘ena imana be ia kwadogi’ lasi. Abia hidi ai karaia do ai painia. Bona hoa gauna be, unai murinai moni ena siahu ia goada lou dainai, ai hegeregere emai dabu gaudia ai hoia totona.”—Isa. 59:1.

      VARAVARA EDIA LALONA VERIA DALANA DADARAIA

      14, 15. Bema Keristani famili ta be edia varavara ese idia doria moni idia laloa bada totona, dahaka idia karaia diba? Bona haheitalai namona idia hahedinaraia neganai, dahaka namo ia vara diba?

      14 Tano momo ai taunimanima idia laloa edia varavara bona turadia dekenai moni bona harihari gaudia idia henia be namo. Eduardo ia gwau: “Emai hanua dekenai harihari karana ai moalelaia.” Ma ia gwau: “To, unai be mai ena hetoana. Egu varavara lau hamaorodia idia dekenai harihari gaudia lau henia diba, bema unai ese egu famili edia tomadiho karana ia hadikaia lasi.”

      15 Tano ma ta amo ia giroa mai tauna bona ia ura lasi tano ma ta ia lao tauna be reana edia varavara ese do idia badu henia. Do idia gwau, idia be sibona idia laloa bona edia varavara idia lalokau henidia lasi. Dahaka dainai? Badina tano ma ta ai ia gaukara neganai, ia be unai varavara taudia dekenai moni ia siaia diba. (Aon. 19:6, 7) Eduardo ena natuna kekeni, Anna ia gwau: “Emai tomadiho karana ai atoa guna to moni momo ai tahua lasi neganai, emai varavara do idia itaia ai be Iehova tomadiho henia karana ai laloa bada. To, bema unai ai karaia lasi, edena bamona do idia diba ai be Iehova ai laloa bada?”—1 Petero 3:1, 2 sekea.

      DIRAVA ABIDADAMA HENIA

      16. (a) Edena dala ai ta be ‘lalohadai koikoi amo ia sibona ia koia’ diba? (Iam. 1:22) (b) Iehova be edena bamona abia hidi ia hanamoa?

      16 Moni gaukara totona taga tanona ta dekenai ia lao taihu ta ese elda taudia ia hamaorodia: “Iniseniai lau mai totona, emai ura gaudia momo ai dadaraia. Egu adavana danu be iena elda maduna ia rakatania. Unai dainai, lau ura bada egu abia hidi be Iehova ese do ia hanamoa.” Mai abidadama ida abia hidi ita karaia neganai, Iehova ese do ia hanamoa. To, bema iseda abia hidi be iena ura hegeregerena lasi, bona iseda hesiai maduna haida ita dadaraia, edena bamona ita ia hanamoa diba?—Heberu 11:6; 1 Ioane 5:13-15 duahia.

      17. Dahaka dainai abia hidi ta ita ura karaia neganai, Iehova ena lalohadai ita tahua guna be namo? Bona edena dala ai unai ita karaia diba?

      17 Abia hidi ta ita ura karaia neganai, namona be Iehova ena lalohadai ita tahua guna. Namo lasi abia hidi ita karaia, bena gabeai Iena lalohadai ita tahua. Namona be iena lauma helaga, aonega bona hakaua dalana totona do ita guriguri. (2 Tim. 1:7) Sibona oi nanadaia: ‘Edena bamona negadiai Iehova lau badinaia? Ena be moni momo lasi maurina ai noholaia, to Iena hakaua dalana lau badinaia bona egu famili ida do lau noho, a?’ (Luka 14:33) Namona be elda edia heduru oi noia bona Baibel amo idia henia sisiba oi badinaia. Unai amo oi hahedinaraia oi abia dae Iehova ese iena gwauhamata hegeregerena oi do ia durua. Elda taudia be oi totona abia hidi do idia karaia lasi, to oi do idia durua abia hidi maorodia do oi karaia bona oi moale diba.—2 Kor. 1:24.

      18. Famili naria be daika ena maduna? To, edena bamona negadiai heduru ita henia diba?

      18 Iehova ese famili naria ena “maduna” be tama dekenai ia henia. Tama haida be ma haida ese idia doria moni gaukara totona tano ma ta do idia lao, to unai idia dadaraia bona edia adavana bona natudia ida idia noho. Namona be idia ita hanamoa bona idia totona ita guriguri. Danu, idia vara kava hekwakwanai hegeregere, disasta o gorere negadia be nega namona idia dekenai iseda Keristani lalokau ita hahedinaraia bona idia ita durua. (Gal. 6:2, 5; 1 Pet. 3:8) Idia oi durua diba moni gaukara ta idia abia, o edia dabu gaudia hegeregere aniani bona moni oi henia diba, a? Unai oi karaia neganai, idia be moni gaukara totona tano ma ta do idia lao lasi.—Aon. 3:27, 28; 1 Ioa. 3:17.

      LALOATAO IEHOVA BE EMU DURUA TAUNA!

      19, 20. Dahaka dainai Keristani taudia idia diba momokani Iehova ese idia do ia durua?

      19 Baibel ia gwau: “Namona be emui mauri dalana amo umui hahedinaraia, moni umui ura henia dikadika lasi, to umui dekenai idia noho gaudia be hegeregere. Badina Dirava ia gwau: ‘Lau ese umui do lau negea lasi, bona umui do lau rakatania lasi momokani.’ Unai dainai mai lalogoada ida do ita gwau: ‘Iehova be egu durua tauna, lau be do lau gari lasi. Taunimanima be lau dekenai dahaka idia karaia diba?’” (Heb. 13:5, 6) To, eda mauri lalonai edena dala ai unai ita badinaia diba?

      20 Ogogami tanona ta ai elda ta ia gwau: “Nega momo taunimanima idia gwau Iehova ena Witnes taudia be nega ibounai idia moale. Idia gwau ogogami Witnes taudia danu be dabua namodia idia hahedokilaia, bona toana be gau ta dekenai idia dabu lasi.” Iesu ia gwauhamata Basileia do idia tahua guna taudia dekenai unai do ia vara. (Mat. 6:28-30, 33) Oibe, emu guba Tamana, Iehova be oi ia lalokau henia bona ia ura oi bona emu natudia ese namo do umui davaria. Baibel ia gwau: “Lohiabada ena matana ese tanobada ena kahana ibounai idia itaia noho, ia ese ia dekenai idia badinaia momokani taudia do ia hagoadaia totona.” (2 Siv. 16:9) Unai dainai ia ese ita ia durua totona, famili ena mauri bona tauanina durua gaudia abia dalana ena taravatu ia henia. Unai taravatu ita badinaia neganai, ita hahedinaraia Iehova ita lalokau bona abidadama henia. Baibel ia gwau: “Dirava ita lalokau henia ena anina be inai, iena taravatu ita badinaia, bona iena taravatu be idia metau lasi.”—1 Ioa. 5:3.

      21, 22. Dahaka dainai oi ura Iehova oi abidadama henia?

      21 Eduardo ia gwau: “Lau diba egu adavana bona natudia lau rakatania negana do lau abia lou diba lasi, to unai lau laloa momo lasi. Egu gaukara turadia momo be idia taga, to idia moale lasi bona mai edia hekwakwanai badadia. To, egu famili be ia moale! Bona lau hoa badina lau itaia inai tano ai tadikaka taihu haida be idia ogogami, to edia mauri lalonai Iehova ena hesiai gaukara idia atoa guna. Ai ibounai ai itaia Iesu ena gwauhamata be emai mauri lalonai ia guguru noho.”—Mataio 6:33 duahia.

      22 Oi lalogoada noho! Emu lalona oi hadaia Iehova oi badinaia bona abidadama henia noho totona. Namona be Iehova, emu adavana, bona emu natudia oi lalokau henia karana ese oi ia doria, emu famili oi naria namonamo totona. Unai amo do oi itaia ‘Iehova be emu durua tauna.’

Hiri Motu Pablikeisen (1987-2026)
Log aut
Login
  • Hiri Motu
  • Ta dekenai siaia
  • Preferens
  • Copyright © 2025 Watch Tower Bible and Tract Society of Pennsylvania
  • Gaukaralaia Taravatudia
  • Privacy Policy
  • Privacy Settings
  • JW.ORG
  • Login
Ta dekenai siaia