Jordan be bouti pensolo shapener ta ia abia, reana ia be anina lasi gauna. To, ia dekenai unai harihari gauna be mai anina bada. Jordan ia gwau, “Lau maragi neganai, Russell ese lau dekenai unai ia henia, ia be tau burukana bona emai famili turana.” Russell ia mase murinai, Jordan ia kamonai nega aukadia lalonai ena tubuna tauna bona tama sina be Russell ese ia hagoadadia. Jordan ia gwau, “Hari, Russell ena sivarai lau diba dainai, lau dekenai inai harihari gauna maragina be mai anina bada.”

Jordan ena ekspiriens ese ia hahedinaraia, haida dekenai harihari gauna ta be anina lasi o gau maragina ta sibona. To harihari gaudia ia laloa bada tauna dekenai, unai be mai anina bada, o dava bada gauna. Momo idia diba vadaeni Baibel siri ta ese harihari gauna ta ia herevalaia, ia gwau: “Dirava ese tanobada ia lalokau henia bada dainai, ena natuna korikorina ia henia, unai amo ia idia abidadama henia taudia ibounai be do idia mase lasi, to mauri hanaihanai do idia abia.”​—Ioane 3:16.

Unai harihari gauna ia abia tauna be mauri hanaihanai ia abia diba! Unai ia hereaia harihari gauna ma ta ia noho, a? Herevana haida be unai harihari gauna ena anina idia lalopararalaia lasi, to Keristani taudia korikoridia dekenai unai ‘davana bada’ harihari gauna be mai anina bada. (Salamo 49:8; 1 Petero 1:18, 19) Dahaka dainai, Dirava ese taunimanima totona ena Natuna ena mauri ia bouboulaia harihari gauna bamona?

Aposetolo Paulo ese unai ia herevalaia: “Tau tamona dekena amo kara dika be tanobada dekenai ia vareai, bona kara dika ese mase ia mailaia. Bona unai dainai mase be taunimanima ibounai dekenai ia hanaia lao.” (Roma 5:12) Ena be tau ginigunana, Adamu be taravatu ia diba, to Dirava ia gwau-edeede henia, unai dainai kara dika ena davana mase ia abia. Adamu ena kerere dainai, iena bese taudia, tanobada taudia ibounai unai, idia mase.

“Kara dika ena davana be mase, to Dirava ese Keriso Iesu iseda Lohiabada amo ia henia harihari gauna be mauri hanaihanai.” (Roma 6:23) Dirava ese taunimanima be mase amo ia ruhaia totona, iena Natuna, Iesu Keriso, ia siaia tanobada dekenai ena mauri goevadaena ia bouboulaia totona. Unai boubou gauna, eiava “mauri davana” dainai, Iesu idia abidadama henia taudia ibounai be mauri hanaihanai do idia abia.​—Roma 3:24.

Dirava ese Iesu Keriso amo Ia idia tomadiho henia taudia dekenai ia henia hahenamo ibounai dainai, Paulo ia gwau: “Dirava ena davana lasi harihari gauna dainai ia ita tanikiu henia, inai harihari gauna be hereadae.” (2 Korinto 9:15) Oibe, unai mauri davalaia boubouna be hereadae dainai, ita be hegeregere lasi unai ita gwauraia hedinarai totona. To Dirava ese taunimanima dekenai ia henia harihari gaudia ibounai amo, dahaka dainai unai boubou gauna be mai anina bada? Edena dala ai unai harihari gauna hereadaena be Dirava ena harihari gaudia ma haida amo ia idau?a Bona edena bamona do ita hahedinaraia unai ita abia dae? Umui ai noia Baibel ena haere inai henanadai dekenai be inai atikol rua dekenai do umui duahia.

DAIKA ESE IA HENIA?

Harihari gaudia haida be dava bada gaudia bamona ita dekenai, badina idia be ladana bada o ita matauraia bada taudia ese ita dekenai idia henia. Herevana harihari gaudia haida edia davana be maragi, to unai harihari gaudia ita moalelaia badina idia be iseda turana ta eiava famili memba ta amo ita abia. Rau 3 ai ia noho atikol lalonai, Russell ese Jordan dekenai unai bamona harihari gauna ta ia henia. Edena dala ai unai sivarai be mauri davalaia boubouna ida ia hegeregere?

Ginigunana, Baibel ia gwau: “Dirava ena lalokau ita dekenai be inai dala ai ia hahedinaraia, Dirava ese ena Natuna korikorina be tanobada dekenai ia siaia mai, ia amo mauri do ita abia totona.” (1 Ioane 4:9) Unai ese ia hamomokania unai harihari gauna be mai anina bada. Ta ese Dirava ena siahu ia hereaia diba lasi. Unai dainai, Salamo ia torea Heberu tauna, ia gwau: “Oiemu ladana be Iehova. Bona oi sibona, Ataiai Momokani Diravana, ese tanobada oi biagua noho.” (Salamo 83:18) Ladana bada o siahu tauna ta amo unai bamona harihari gauna do ita abia diba lasi.

Iharuana be, Dirava be ‘iseda Tamana’ (Isaia 63:16) Edena dala ai? Ia ese ita dekenai mauri ia henia. Danu, tama ta ese ena natudia ia naria hegeregerena, Iehova be mai lalokau ida ita ia naria. Dirava ese Israela taudia ia hereva henia neganai, ia gwau: “Oi Israela, be lauegu natuna lalokauna, oi be lau lalokau henia bada merona. . . . Mai egu kudouna ibounai oi lau ura henia noho, vadaeni oi dekenai do lau bogahisihisi henia.” (Ieremia 31:20) Dirava ese hari ia idia tomadiho henia taudia be unai bamona ia laloa. Ia be iseda Havaraia Tauna sibona lasi, to ia be iseda lalokau Tamana bona Turana danu. Unai ese ia hahedinaraia Ia amo ita abia harihari gaudia be mai anina bada, ani?

IA HENIA ENA BADINA

Harihari gaudia haida be dava bada gaudia bamona ita dekenai, badina lalokau korikorina dainai idia henia, to maduna dainai idia henia lasi. Mai ura bada ida ena harihari gauna ia henia tauna be unai hebogahisi karana ena davana totona do ia noinoi lasi.

Dirava ese ita ia lalokau henia dainai, ita totona iena Natuna ia siaia. Baibel ia gwau: “Dirava ena lalokau ita dekenai be inai dala ai ia hahedinaraia, Dirava ese ena Natuna korikorina  .  .  . ia siaia mai.” Dahaka dainai? Baibel ma ia gwau: “Ia amo mauri do ita abia totona.” (1 Ioane 4:9) Dirava be unai ia karaia badina unai be iena maduna, a? Lasi! To, “Keriso Iesu ese ia henia mauri davana” ese Dirava ena “hebogahisi hereadaena” ia hahedinaraia.​—Roma 3:24.

Dahaka dainai unai harihari gauna be Dirava ena “hebogahisi hereadaena”? Baibel ese ia hahedinaraia, “Dirava ese ita dekenai iena lalokau ia hahedinaraia dalana be inai: Ita be do kara dika taudia neganai, Keriso be ita totona ia mase.” (Roma 5:8) Dirava ese taunimanima ia lalokau henia dainai, manoka taudia, sibona idia durua diba lasi bona goevadae lasi taudia ia durua. Ita be gau ta ita karaia lasi unai lalokau ita abia totona, eiava ia dekenai davana ita haloua diba lasi. Histori ai, Dirava ena harihari gauna ese iena lalokau bada karana ia hahedinaraia.

DAHAKA BOUBOU GAUNA IA HENIA?

Harihari gaudia haida be dava bada gaudia bamona ita dekenai, badina ia henia tauna ena hekwarahi ia hahedinaraia. Bema ta be ita dekenai iena dava bada harihari gauna ia henia, unai harihari gauna do ita laloa bada, ani?

Dirava ese “ena natuna korikorina ia henia.” (Ioane 3:16) Ia ese ita dekenai ia lalokau henia bada tauna ia henia. Lagani milioni momo ai, Dirava be iunives ia karaia neganai, Iesu be ia ida ia gaukara bona “dina ibounai Dirava be [ia] dekenai ia moale.” (Aonega Herevadia 8:30) Iesu be Dirava ena “lalokau Natuna,” bona “ita itaia diba lasi Diravana ena toana hegeregerena.” (Kolose 1:13-15) Oibe, Iehova bona Iesu edia huanai ia noho hetura karana be ia goada momokani.

To, Dirava ese “ena Natuna be hisihisi amo ia koua lasi.” (Roma 8:32) Iehova be ita totona harihari gauna hereadaena ia henia. Unai harihari gauna ese harihari gaudia ibounai ia hereaia.

DAHAKA IA HAGUGURUA?

Harihari gaudia haida be dava bada gaudia bamona ita dekenai, badina iseda dabu gaudia idia durua momokani. Hegeregere, bema ta be emu mauri durua totona hospital ena davana ia karaia, do oi moale bada. Reana unai harihari gauna ena davana be bada, ani?

“Adamu amo taunimanima ibounai idia mase noho, unai hegeregerena Keriso amo taunimanima ibounai be mauri do idia abia.” (1 Korinto. 15:22) Ita be Adamu ena bese taudia dainai, ita ibounai ita “mase,” gorere bona mase amo ita heau mauri diba lasi o do ita hegeregere lasi Dirava ida maino ita karaia bona unai dika amo ita ia ruhaia totona. Ita be taunimanima sibona dainai, ita sibona o ma haida dekenai “mauri” do ita henia diba lasi. Baibel ia gwau: “Tau ta ese sibona ena mauri, be moni dekena amo ia hoia diba lasi. Ia be hegeregere lasi, Dirava dekenai moni do ia henia, iena mauri davaria totona . . . Ta ena moni be hegeregere lasi.” (Salamo 49:7, 8) Heduru ita abia be namo, badina mauri davalaia boubouna ena davana karaia totona ita hegeregere lasi. Bema ita sibona ita noho, ta ese ita do ia durua diba lasi.

Iehova ena lalokau bada dainai, ita dekenai mauri hanaihanai abia dalana ia kehoa. Unai dainai Iesu amo “taunimanima ibounai be mauri do idia abia.” Edena dala ai unai boubou gauna ese unai ia hagugurua? Baibel ia gwau: “Ena Natuna Iesu ena rara ese kara dika ibounai amo ita ia hagoevaia.” Oibe, Iesu ena rara ita abidadama henia neganai, iseda dika do ia gwauatao bona mauri hanaihanai ena dala ia kehoa. (1 Ioane 1:7; 5:13) Bona mauri davalaia boubouna ese iseda lalokau mase taudia totona dahaka do ia hagugurua? “Badina tau tamona amo mase ia vara, unai hegeregerena tau tamona [Iesu] amo mase taudia do idia toreisi lou.”​—1 Korinto. 15:21.a

Iesu ena mase be Dirava ese ita dekenai ia henia harihari gauna hereadaena, bona iena lalokau bada dainai unai bamona ia karaia. Danu Iehova ese ita totona ia karaia gauna be ta ese ia karaia diba lasi. Bona kara dika bona mase amo ita ia ruhaia mauri davalaia boubouna ese harihari gaudia ibounai ia hereaia. Oibe, harihari gauna ta be unai boubou gauna hereadaena ida do ia hegeregere diba lasi.

UNAI harihari gauna hereadaena dainai iseda tanikiu karana ita hahedinaraia be namo. Iesu ese lepera gorere idia abia tatau ten​—unai negai ta ese ia hanamoa diba lasi​—ia hanamoa murinai mai anina bada gauna ta ia gwauraia. Idia huanai, ta be “ia giroa lou bona mai gado badana ida Dirava ia hanamoa.” Iesu ia gwau, tamona sibona be “ia giroa lou bona mai gado bada ida Dirava ia hanamoa.” Iesu ma ia gwau: “Idia ibounai 10 idia goeva, ani? To idia 9 be edeseni?” (Luka 17:12-17) Dahaka ita dibaia? Ma haida ese ita dekenai hebogahisi karana idia hahedinaraia neganai ita laloaboio haraga diba!

Iesu ena boubou gauna be harihari gaudia ibounai bamona lasi. Ita dekenai unai be harihari gauna hereadaena, ani? To, edena bamona do oi hahedinaraia Dirava ese oi totona ia karaia gauna oi abia dae?

• Unai harihari gauna ia Henia Tauna oi dibaia be namo. Namo lasi ita laloa boubou gauna dainai taunimanima ibounai ese mauri hanaihanai idia abia diba. Iesu be Dirava ia guriguri henia neganai, ia gwau: “Mauri hanaihanai abia totona, namona be idia ese oi, Dirava momokani tamona, bona oi ese oi siaia tauna, Iesu Keriso dekenai diba do idia abia noho.” (Ioane 17:3) Bema ta be oi ia hamaoroa oi maragi neganai tau ta ese oi ia hamauria, unai oi kamonai neganai, do oi ura unai tauna oi dibaia bona oi ia hamauria ena badina oi diba, a? Iehova, mauri davalaia boubouna ena harihari gauna ia henia Diravana, ia ura ia do oi dibaia sibona lasi to emu hetura karana ia ida do ia goada be namo. Baibel ia gwau: “Dirava kahirakahira do umui lao bona ia be umui kahirakahira do ia mai.”​—Iamesi. 4:8.

• 

  Mauri davalaia boubouna oi abidadama henia. “Natuna [Iesu] ia abidadama henia tauna be mauri hanaihanai do ia abia.” (Ioane 3:36) Abidadama henia ena anina be dahaka? Anina be, ita abidadama sibona lasi to iseda kara amo ita hahedinaraia be namo. (Iamesi 2:17) Dahaka do oi karaia? Harihari gauna ta oi abia diba, bema oi gaukara goada bona unai harihari gauna oi abia dae. Unai dainai, namona be oi gaukara goada bona Iesu ena mauri davalaia boubouna oi abia dae. Edena dala ai? Namona be Dirava ese ia moalelaia mauri dalana oi dibaia bona unai hegeregerena oi kara.a Dirava ita guriguri henia iseda kara dika ia gwauatao bona lalomamina goevana ita abia totona. Mai abidadama ida Dirava ita guriguri henia, ita diba momokani mauri davalaia boubouna ese idia abidadama henia taudia dekenai vaira nega namona do ia mailaia, bona maino ai do idia noho!​—Heberu 11:1.

• 

  Iesu ena Mase Laloatao hebouna dekenai oi lao. Unai hebou be Iesu ese ia hamatamaia, unai dainai lagani ta ta ai unai hebou ita karaia, ena mauri davalaia boubouna ita laloatao totona. Unai hebou ia herevalaia neganai, ia gwau: “Inai bamona do umui karaia noho lau umui laloatao totona.” (Luka 22:19) Iehova ena Witnes taudia be Tuesday, April 11, 2017 ai, dina ia diho murinai, Iesu ena mase laloatao hebouna do idia karaia. Unai program be hora tamona lalonai do idia karaia, bona tadikaka ta ese tok ta amo, Iesu ia mase ena badina bona iena mase ese hari bona vaira negai do ia mailaia hahenamo do ia herevalaia. Lagani 2016 ai, tanobada hegegemadai taunimanima 20 milioni mai kahana bamona be memorial hebouna dekenai idia lao. Oi ai boiria Dirava ena harihari gauna hereadaena laloatao hebouna dekenai oi mai totona.