Tanobada Taudia be Dirava Do Idia Diba be Namo

‘Iehova gari henia kara do oi diba, bona Dirava do oi diba.’ ​—⁠AONEGA HEREVADIA 2:⁠5.

HARIHARI tanobada ai taunimanima 5,600,000,000 edia kudoudia idia gaukara noho. Dina ta ta iboudiai oiemu kudouna be nega 100,000 ia tahataha bona rara lita 7,600 bamona be emu tauanina ena rara varovarodia, edia lata be kilomita 100,000, lalodiai ia pamua. Dirava ese kudou ia karaia namo herea, bona ena gaukara ena bada ese emu masolo iboudiai edia gaukara edia bada ia hereaia.

² Tanobada ai unai taunimanima edia lalona 5,600,000,000 danu idia gaukara noho. Iseda lalokau, iseda badu, iseda moale, bona iseda ura be iseda lalona ai. Iseda lalohadai bona iseda lalo-parara danu be unuseniai. Ta ena lalona o kudouna ia hekokoroku o ia manau diba, ia hisihisi o ia moale diba, ia dibura eiava ia diari diba.​—⁠Nehemia 2:1; Aonega Herevadia 16:​5, NW; Mataio 11:​29, NW; Kara 14:17; 2 Korinto 4:6; Efeso 1:​16-18.

³ Iehova Dirava ese taunimanima ibounai edia lalona o kudouna ia duahia diba. Aonega Herevadia 17:3 ia gwau: “Golo bona siliva be lahi ese, ia tohoa bona ia hagoevaia, bona tau ta ena kudouna be [Iehova] ese, ia tohoa bona ia hagoevaia noho.” Iehova ese taunimanima edia lalona ia duahia bona ia hahemaoro henia lasi, to ena Witness taudia ia gaukaralaia sivarai namona amo taunimanima edia lalona veridia totona. Unai dainai aposetolo Paulo be unai hereva hegeregerena ia torea: “ ‘[Iehova] ena ladana idia noinoi henia taudia ibounai, be mauri do idia davaria.’ To idia abidadama henia lasi taudia be edena bamona Lohiabada do idia noinoi henia diba? Bona iena Sivarai idia kamonai lasi taudia be edena bamona do idia abidadama diba? Bona bema haroro tauna be lasi neganai, edena bamona do idia kamonai? Bona haida bema idia siaidia lasi, haroro taudia be edena bamona do idia haroro? Buka Helaga dekenai ia torea hegeregerena, ia gwau: ‘Sivarai Namona ena moale idia mailaia taudia edia aena, be namo herea momokani, ani.’ ”​—⁠Roma 10:​13-15.

⁴ Mai ena moale ida Iehova ese ena Witness taudia ia siaia lao tanobada ena gabu iboudiai, “Sivarai Namona” idia harorolaia bona lalo-namo taudia idia tahua totona. Hari ita be 5,000,000 ita hanaia​—⁠anina be tanobada taudia 1,200 1,200 amo tamona tamona be Witness taudia. Sivarai namona be tanobada taudia milioni momo dekenai harorolaia be haraga lasi. To Dirava ese Iesu Keriso ena amo inai gaukara ia naria, bona lalo-momokani taudia be ia dekenai ia veria mai. Unai dala amo, peroveta herevana Isaia 60:22 dekenai ena anina ia vara noho: “Oiemu ladana maragi momokani tauna mai ena famili, be bese badana mai goadana danu do idia lao. Oibe, negana korikori ia ginidae neganai, lau ese inai kara do lau havaraia haraga. Lau inai [Iehova]!”

⁵ Negana korikori be inai, bona inai ia hedinarai goevagoeva​—⁠tanobada taudia milioni momo ese diba idia abia be namo. Gau haida ita diba, badina be ita manadalaidia, eiava ita raraidia namonamo vadaeni, o ita stadilaidia dainai. Tanobada ese diba momo ia gogoa vadaeni. Ena diba trenspot daladia, gorere hanamoa daladia, bona hereva siaia daladia dekenai be ia habadaia momokani vadaeni. To taunimanima ese tanobada ena diba idia abia be mai anina bada, a? Lasi! Tuari, hahisia karadia, gorere, bona mase ese taunimanima idia hadikaia noho. Nega momo idia davaria tanobada ena aonega be lai-gubana ese tano gagaena ai ia odaia lao miri bamona.

⁶ Haheitalai ta be inai: Lagani 200 gunanai, idia be vaia gorere taudia edia rara taina be edia tauanina amo idia kokia, badina idia laloa gorere hanamoa dalana ta be unai. George Washington, United States ena presiden ginigunana, ena mase be kahirakahira momokani neganai, unai bamona idia kara henia loulou. Nega ta ai ia gwau: “Mani lau umui rakatania do lau mase mai egu regerege lasi; lau mauri daudau diba lasi.” Ena hereva be momokani, badina be unai dina​—⁠December 14, 1799​—⁠ai ia mase. Hari inai negai, rara be tauanina amo idia kokia lasi, to tauanina dekenai rara idia henia hanai. Unai dala ruaosi amo idia vara hekwakwanai ese mase idia havaraia. To Dirava ena Hereva ia gwau: “Rara . . . umui dadaraia noho.” (Kara 15:​29, NW) Nega ibounai Dirava ena diba be maoro bona ita badinaia diba.

⁷ Tanobada ena aonega ena haheitalai ma ta ita laloa. Lagani momo lalodiai psychologist taudia idia gwau natudia kwadia karana be namo lasi, to hari, idia ta, guna unai lalohadai ia abia dae tauna, ia gwau idia kerere. The German Philological Association be nega ta ia gwau, natudia kwadia lasi karana be “reana matamata taudia ese idia havaraia hekwakwanai edia badina ta.” Tanobada ena aonega be lai ia hamarerea gauna bamona, ia lao ia mai, to Baibel ena aonega ia marere lasi. Baibel ese natu hadibalaia sisiba namona ia henia. Aonega Herevadia 29:17 ia gwau: “Oiemu natuna tau do oi matakani henia, vadaeni ia ese laga-ani oi dekenai do ia henia. Ia ese oiemu laumana do ia hamoalea.” Unai matahakani karana do idia karaia mai lalokau ida, badina Paulo ia gwau: “Tamana bona sinana e, emui natudia do umui habadua lasi, to [Iehova] ena hadibaia hereva idia dekenai do umui hadibaia.”​—⁠Efeso 6:⁠4.

“Dirava Do Oi Diba”

⁸ Paulo be edukeisini bada ia abia tauna to ia gwau: “Sedira umui emui huanai tau ta ia laloa inai tanobada ena aonega ia davaria vadaeni. Namona be unai tau ese kavakava tauna bamona do ia halaoa guna, gabeai aonega korikori do ia abia. Badina be inai tanobada ena aonega be kavakava, Dirava ena vairana dekenai.” (1 Korinto 3:​18, 19) Dirava mo sibona ese taunimanima idia abia be namo dibana ia henidia diba. Aonega Herevadia 2:​1-6 ia gwau: “Egu natuna e, lau, aonega, egu hadibaia hereva do oi tahua, bona egu oda do oi laloaboio lasi. Aonega herevadia do oi kamonai, bona oiemu kudouna ese laloa kehoa do ia ura henia. Bema oi ese aonega totona oi noinoi, bona bema laloa kehoa totona oi boiboi goada, bema oi tahua, siliva do oi tahua bamona, bema oi tahua goada, kohu momo, idia hunia gaudia, do oi tahua bamona, unai neganai [Iehova] gari henia kara do oi diba, bona Dirava do oi diba. Badina be [Iehova] ese aonega, be oi dekenai ia henia noho, bona iena uduna dekena amo, diba bona laloa kehoa idia mai noho.”

⁹ Edia kudou namodia ese idia ha-uraia taudia ese aonega herevadia idia kamonai henia dalana be, Dirava ese ia henidia dibana idia gaukaralaia maoromaoro. Edia kudoudia ese lalo-parara idia ura henia, bona idia dibaia hereva maorodia idia laloa namonamo. Idia kara, hegeregere lalo-parara totona idia boiboi bamona, badina be lalo-parara amo idia ese hereva ta ena kahana idauidau idia hakapua dalana do idia diba. Lalo-maoromaoro taudia idia gaukara, hegeregere siliva abia totona tano idia geia bona dava bada kohu hehunidia idia tahua bamona. Dahaka dava bada kohuna be lalo-namo taudia ese idia davaria? ‘Dirava idia diba.’ Ena anina be dahaka? Ena anina be, mauri henia dibana be Dirava ena Hereva, Baibel lalonai idia davaria.

¹⁰ Dirava ese ia henia dibana be ia namo, ia senisi lasi, bona ia amo mauri ita abia. Ia dainai lauma dalana ai ita goada. Paulo ese Timoteo ia hagoadaia, ia gwau: “Hereva momokani, oi dekenai lau hadibaia gaudia do oi badinaia noho, bona idia edia murinai do oi raka. Keriso Iesu danu ita hakapua tamona dainai, ita be iena abidadama bona lalokau lalonai ita noho.” (2 Timoteo 1:​13) Gado ta ta be mai edia hereva siriudia daladia, bona Baibel ena hereva momokani ‘gadona goevadaena’ danu be unai bamona. Ena hereva namodia momo siriudia dalana be Baibel ena sinado hegeregerena ai, Iehova ese Basileia amo iena lohia siahuna do ia hamomokania herevana unai. (Sepanaia 3:⁠9, NW) Lauma dalana ai do ita goada noho totona, namona be unai hereva siriudia dalana do ita laloatao. Iseda lalona do idia dika lasi totona, bona lauma dalana ai do ita goada noho totona, namona be Baibel ena hereva be iseda mauri lalonai do ita badinaia, bona Dirava ese ‘hesiai tauna mai ena kamonai bona mai ena kara maoromaoro’ ena amo ita ia henia lauma gaudia do ita gaukaralaia guguru. (Mataio 24:​45-47; Tito 2:⁠2) Laloaboio lasi, lauma dalana ai do ita goada noho totona, namona be Dirava ita diba.

¹¹ Mani, tanobada taudia iboudiai, bilioni momo ese inai diba hereana do idia abia be namo ena badina umui laloa. Taunimanima momo be tanobada bona taunimanima be matamana neganai idia vara dalana idia diba, a? Lasi, unai idia diba lasi. Taunimanima iboudiai be Dirava momokanina bona ena Natuna idia diba, a? Satani ese Dirava ena lohia siahuna bona taunimanima edia kara maoromaoro ia hepapahuahulaia dalana be idia diba, a? Lasi. Taunimanina idia diba badina be dahaka ita buruka ita lao bena ita mase, a? Lasi. Tanobada taudia iboudiai idia diba Dirava ena Basileia be guba dekenai hari ia lohia noho bona ita be dina gabedia ai ita noho, a? Idia be lauma dikadia edia koikoi karadia idia lalo-pararalaia, a? Edia famili do idia moale momokani dalana be idia diba, a? Bona taunimanima momo herea idia diba ita ia karaia Diravana ena palani be kamonai taudia be Paradaiso lalonai do idia noho mai edia moale ida, a? Unai gau iboudiai be idia diba lasi. Unai dainai, taunimanima be Dirava ese ia henia dibana do idia abia be namo.

¹² Tanobada taudia ese Dirava ia henia dibana idia abia be namo ena badina ma ta be, tanobada dekenai Iesu ese ena hanuaboi ginigabena ai ena guriguri lalonai ia gwauraia herevana dainai. Iena hereva ese ena aposetolo taudia edia kudou ia hamarerea; ia gwau: “Mauri hanaihanai be inai: Idia ese oi Dirava momokani tamona do idia diba, bona Iesu Keriso, oi ese oi siaia tauna danu do idia diba.” (Ioane 17:⁠3) Unai diba badinaia karana be Dirava ese ia abia dae tomadiho henia dalana tamona sibona. Iesu ia gwau: “Dirava be Lauma, bona do idia tomadiho henia taudia ese, lauma bona momokani dekena amo do idia tomadiho henia.” (Ioane 4:24) Dirava do ita tomadiho henia mai “lauma” danu, bema iseda lalona be abidadama bona lalokau amo ia honu neganai. Edena bamona “momokani” dekena amo ia ita tomadiho henia? Iena Hereva ita stadilaia bona ena hereva momokani hegeregerena ita tomadiho henia​—⁠“Dirava do oi diba” dalana amo.

¹³ Lagani ta ta ai taunimanima tausen tausen ese Iehova idia tomadiho henia matamaia. To, kamonai taudia be Baibel amo do ita stadi henidia nega daudau be namo, a, eiava lalo-momokani taudia do ita durudia haraga diba, bena nega daudau lasi bapatiso do idia abia? Vadaeni, Filipi dekenai dibura rumana naria tauna bona ena famili dekenai ia vara gauna be mani umui laloa; unai sivarai be Kara 16:​25-34 ai. Paulo bona Sila be dibura rumana ai idia koua vadaeni, to hanuaboi momokani ai tano ia marere bada neganai, dibura rumana ena iduara ia kehodia. Dibura rumana naria tauna ia laloa dibura taudia iboudiai be idia heau boio vadaeni bona ia be panisi auka hereana do ia abia, unai dainai ia be sibona ia alaia mase gwauraia, to Paulo ese ia hamaoroa idia iboudiai idia do noho. Paulo bona Sila ese Iehova “ena hereva, ia bona iena ruma noho bese taudia ibounai dekenai idia gwauraia.” Unai dibura rumana naria tauna bona ena famili be Idau Bese taudia, Baibel ena hereva idia diba lasi taudia. To, hanuaboi tamona lalonai, idia be Dirava abidadama henia taudia ai idia lao, “bona ia, mai ena ruma bese taudia ibounai danu nega tamona bapatiso idia abia.” Unai be idau momokani to kongregesen ena hebou ai Keristani taudia ese unai bamona matamata taudia be diba hamatamaia herevadia bona ma gau haida idia hadibalaia. Vadaeni, unai bamona karadia be hari inai negai danu ita karaia diba.

Uiti Ena Anina be Bada!

¹⁴ Namona be Iehova ena Witness taudia ese nega kwadogi lalonai Baibel stadi namodia, anina bada idia havaraia gaudia, do idia karaia guguru. Unai bamona do idia karaia be mai badina korikori. Eastern Europe tanodia ai, ura taudia edia ladadia be lista ai idia torea, bena idia naria ela bona Baibel stadi idia abia diba. Tano ma haida danu be unai bamona. Dominican Republic ena taoni ta ai, Witness taudia ima be kamonai taudia momo ese idia noidia dainai, idia be stadi momo idia karaia diba lasi. Dahaka idia karaia? Unai kamonai taudia idia hamaoroa, namona be hebou do idia lao henidia Kingdom Hall ai, bena edia ladadia be Baibel stadi abia negana idia naria taudia edia lista ai do idia torea. Tanobada hegegemadai tano momo dekenai unai bamona ia vara.

¹⁵ Teritori bada herea​—⁠uiti ena anina be bada gabudia​—⁠be Dirava ena taunimanima dekenai idia kehoa. Ena be Iehova, “uma ena biaguna,” be utua taudia ma haida ia siaia, to gaukara bada herea ia do noho. (Mataio 9:​37, 38) Dirava ena diba halasia gaukarana haharagaia totona, “hesiai tauna mai ena kamonai” ese gau namona ta idia henia, bona ia amo Baibel stadilaia taudia do ita hadibadia goevagoeva, bona stadi negadia ta ta iboudiai amo lauma dalana ai do idia goada idia lao. Unai buka matamata be​—⁠reana hua haida sibona lalodiai​—⁠do idia stadilaia ore diba. Bona unai buka be iseda baege o reana iseda poketi lalonai ita abia loaloa diba. Iehova ena Witness taudia edia “Dirava Hanamoa mai Moale Ida” Distrik Hebouhebou ai idia lao taudia handred tausen momo be inai rau 192 buka matamatana, Diba ese Mauri Dekenai Ita Ia Hakaua Lao, mai moale ida idia abia.

¹⁶ Toretore taudia tano idauidau ai be Diba bukana ena hereva idia hegaegaelaidia, unai murinai idia hamaoromaoroa bona hamomokania, buka ai idia torea totona. Unai dainai, bese idauidau taudia ese do idia ura henia. Inai buka be tanobada hegegemadai idia noho taudia edia gado idauidau ai do idia halasia lasi ela bona nega daudau, a? Lasi, badina be rau 192 bukana be gado idaudia ai idia hahanaia haraga diba. October 1995 ai, Hakaua Oreana ena Toretore Komiti ese gwaumaoro ia henia, unai buka be English gado amo do idia hahanaia gado 130 mai kahana ai.

¹⁷ Diba bukana ena karoa ta ta ai idia noho herevadia ese stadilaia taudia do idia durua lauma dalana ai do idia goada idia lao haraga totona. Hereva momokani ia hahedinaraia goevagoeva. Hahediba herevadia koikoidia ia herevalaia lasi. Ena hereva edia anina idia hedinarai goevagoeva bona lalohadai idia hesiriu namonamo dainai, inai buka amo Baibel stadi do ita karaia bona taunimanima be Dirava do idia dibaia totona do ita durudia be haraga. Baibel siri haida be idia torea hanai, bona ma haida idia gwauraia sibona. Namona be stadi tauna do ita hagoadaia, stadi totona do ia hegaegae neganai, unai siri danu be Baibel lalonai do ia duahia. Bema nega be hegeregere, stadi negana lalonai do umui duahidia diba. To, namona be hereva ma haida do umui atoa kau lasi, idia dainai stadi ena hereva badadia do idia hedinarai goevagoeva lasi garina. To, namona be buka ese karoa ta ta lalonai ia hamomokania gaudia do oi lalo-pararalaia, bena stadi tauna dekenai do oi hadibalaia. Anina be hadibaia tauna ese inai buka do ia stadilaia namonamo guna, lalohadai badadia do ia lalo-pararalaia momokani totona.

¹⁸ Edena dala ai Diba ese Mauri Dekenai Ita Ia Hakaua Lao bukana ese hahediba gaukara ia haharagaia diba? Inai rau 192 bukana be nega kwadogina lalonai idia stadilaia ore diba, bona idia abia dibana amo “mauri hanaihanai abia totona taudia” be Iehova dekenai edia mauri do idia gwauhamatalaia bona idia bapatiso. (Kara 13:48) Namona be iseda hesiai gaukara ai Diba bukana ita gaukaralaia namonamo. Bema Baibel stadilaia tauna be buka ma ta ia stadilaia ore gwauraia, namona be unai buka ia haorea. Bema lasi, namona be Diba bukana do umui stadilaia hamatamaia. Unai buka matamata ia haorea murinai, buka iharuana do umui stadilaia lasi. Hereva momokani idia abia dae taudia be Iehova ena Witness taudia edia hebou dekenai idia lao bona Baibel duahiduahi bona Keristani buka idauidau duahidia karana amo, edia diba do idia hadibaia.​—⁠2 Ioane 1.

¹⁹ Hari Diba bukana idia torea badina be idia ura bapatiso lasi pablisa taudia do idia durua, bapatiso do idia abia gwauraia neganai, elda taudia ese idia henia henanadai iboudiai do idia haerelaia totona. Unai dainai, inai buka be Baibel stadi ai oi do gaukaralaia lasi neganai, namona be buka ladana Hesiai Gaukara Karaia Totona Ita Hegaegaea ena rau 175 ia lao 218 ai idia noho henanadaidia do oi tahua lou guna. Unai ese oi do ia durua, Diba bukana amo Baibel do umui stadilaia neganai, unai henanadai edia haere do oi hahedinaraidia goevagoeva totona.

²⁰ Gabu iboudiai taudia ese sivarai namona do idia kamonai be namo. Oibe, tanobada taudia ese Dirava do idia diba be namo, bona ena gaukara karaia totona Iehova be mai ena Witness taudia. Hari ita be unai buka matamatana ita abia; iseda Tamana lalokauna guba ai ese hesiai tauna mai ena kamonai bona mai ena kara maoromaoro ena amo ita ia henia. Do umui gaukaralaia, hereva momokani hahedibalaia bona Dirava ena ladana helagana abia isi totona, a? Mauri hanaihanai dekenai ia hakaudia dibana henidia totona umui hekwarahi neganai, Iehova Dirava ese umui do ia hanamoa bada.

[Footnotes]

Edena Bamona Do Oi Haere?

◻ Taunimanima edia lalona be edena bamona oi herevalaia diba?

◻ Dirava ena diba be dahaka?

◻ Dahaka dainai tanobada taudia be Dirava ena diba idia abia be namo?

◻ Edena buka matamatana be hari ia noho, bona edena bamona do oi gaukaralaia?

[Study Questions]

1. Dahaka dainai ita gwau diba Dirava ese kudou ia karaia namo herea?

2. Taunimanima edia lalona be edena bamona oi herevalaia diba?

3, 4. Edena dala ai sivarai namona be taunimanima edia lalona ia veridia?

5. Dahaka dainai gau haida ita diba, bona tanobada ena diba ita herevalaia neganai, dahaka ita gwau diba?

6. Dirava ena diba rara dekenai bona tanobada taudia edia aonega rara dekenai ita hahegeregerea neganai, dahaka ita davaria?

7. Natu hadibaia karana dekenai Baibel ena diba maorona bona tanobada taudia edia diba ita hahegeregere neganai, dahaka ita davaria?

8, 9. Aonega Herevadia 2:​1-6 ena hereva amo, tanobada taudia ese do idia abia be namo dibana be edena bamona oi gwauraia hedinarai diba?

10. Lauma dalanai ita goada totona, dahaka ita karaia be namo?

11. Taunimanima be Dirava idia diba be namo ena badina idauidau be dahaka dahaka?

12. Edena dala ai Dirava ita tomadiho henia ‘mai lauma bona mai momokani danu’?

13. Dahaka sivarai be Kara 16:​25-34 ai, bona unai amo dahaka ita dibaia?

14. Dahaka dainai nega kwadogina lalonai anina bada idia havaraia Baibel stadi namodia momo ita karaia be namo?

15, 16. Dirava ena diba halasia gaukarana haharagaia totona dahaka ita abia, bona ia be edena bamona gauna?

17. Dahaka dainai Diba bukana gaukaralaia be auka lasi?

18. Diba bukana gaukaralaia daladia haida be dahaka dahaka?

19. Baibel stadi ai Diba bukana ita do gaukaralaia lasi neganai, dahaka dainai Hesiai Gaukara Karaia Totona Ita Hegaegae bukana ena rau 175 ia lao 218 ita duahia lou guna be namo?

20. Emu Diba ese Mauri Dekenai Ita Ia Hakaua Lao bukana amo, dahaka do oi karaia?

[Picture on page 10]

Badina momo dainai, tanobada taudia bilioni momo ese Dirava ena diba idia abia be namo