Emu Laloa Daradara Lasi Karana Oi Dogoatao Auka ela Bona Dokona
PELEINI maragina be lai bona medu bada herea negana lalonai ia roho mani oi laloa. Peleini taria tauna be tano ia itaia diba lasi. Ori badadia ese ia idia gegea ahu. Iena peleini ena uindo amo gau ta ia itaia diba lasi, to ia laloa daradara lasi, ia diba iena laolao do ia haorea mai kerere lasi ida. Dahaka dainai iena laloa ia daradara lasi?
Peleini ena taria gaudia namodia dainai ori bona dibura lalonai ia roho diba ela bona ia diho. Ia roho noho lalonai, peleini diho gabuna kahirakahira dekenai idia noho beacon ese ia idia hakaua bona reidio amo tano dekenai peleini hakaua herevadia idia henia taudia ida ia herevahereva diba.
Unai hegeregerena, ena be inai tanobada dekenai idia vara gaudia idia dika idia lao, to nega vairai dahaka do ia vara ita laloa daradara lasi. Reana ita laloa iseda laolao inai tanobada dikana lalonai ena lata be daudau herea, to ita diba dala maorona ita badinaia noho bona edena nega lalonai ita noho. Badina be dahaka ita diba unai be momokani? Badina be ita badinaia hakaua dalana ese taunimanima idia itaia diba lasi gaudia ia hahedinaraia.
Dirava ena Hereva be iseda ‘dala ia hadiaria noho’ bona ia ‘ese aonega lasi taudia dekenai, aonega ia henia.’ (Salamo 19:7; 119:105) Beacon ese peleini taria tauna idia hakaua hegeregerena, Baibel ese nega vairai do ia vara gaudia ia gwauraia hedinarai bona ita lao gabuna dekenai, kerere lasi ida ita ginidae totona, hakaua herevadia ia henia. To Dirava ena hakaua dalana ena namo ita abia totona, gau badana be ita abidadama henia.
Paulo be ena revareva Heberu taudia dekenai, Iuda Keristani taudia ia hagoadaia idia ese ‘inai abidadama do idia badinaia noho, ela bona idia mase.’ (Heberu 3:14) Bema unai abidadama ita ‘badinaia noho’ lasi, do ita gini goada lasi. Unai dainai inai henanadai ia vara, Iseda laloa daradara lasi karana Iehova dekenai be edena bamona ita dogoatao auka ela bona dokona?
Oiemu Abidadama Gaukaralaia
Peleini taria tauna be iena matana amo lasi, to peleini taria gaudia bona tano ai idia hakaua taudia edia hereva amo peleini do ia taria diba lasi ela bona treinini badana bona hora momo lalodiai do ia karaia loulou guna. Unai hegeregerena, Keristani tauna ese ena abidadama do ia gaukaralaia loulou be namo, bena hekwakwanai badadia idia vara neganai, Iehova ena hakaua dalana do ia laloa daradara lasi. Aposetolo Paulo ia gwau: “ ‘Lau be Dirava lau abidadama henia, vadaeni hereva lau gwauraia.’ Aiemai abidadama be unai ia torea hereva bamona, ai danu be ai abidadama noho, unai dainai ai danu ai hereva noho.” (2 Korinto 4:13) Unai dainai, Dirava ena sivarai namona ita herevalaia neganai, iseda abidadama ita gaukaralaia bona ita hagoadaia.
Magdalena, tanobada ena tuari iharuana negana lalonai lagani 4 dibura kamepa ai ia noho hahinena, ese haroro gaukara ena namo ia hahedinaraia: “Egu sinana ese lau ia hadibaia abidadama goadana dogoatao noho totona, ma haida edia namo lauma dalanai tahua karana be gau badana. Emai hemami ia haheitalaia gauna ta lau laloatao. Ravensbrück dibura kamepa amo ai idia ruhaia murinai, Friday ai, lau bona egu sinana be aiemai ruma dekenai ai ginidae. Dina rua murinai, Sunday ai, tadikaka ida ai lao ruma-ta-ruma-ta haroro gaukara ai karaia. Lau abia dae vaitani bema aiemai goada ai henia taunimanima ai durua Dirava ena gwauhamata idia abidadama henia totona, aiemai abidadama unai gwauhamata dekenai do ia goada momokani.”—Kara 5:42 itaia.
Iseda laloa daradara lasi karana ita dogoatao auka ela bona dokona totona, namona be lauma gaukara idauidau ita karaia. Sibona eda stadi karaia karana be abidadama hagoadaia gauna hereadaena ta. Bema Berea taudia ita tohotohoa bona dina ta ta ibounai Baibel ena hereva ita tahua, ita do ia durua iseda abidadama ‘do ita gaukaralaia goadagoada noho, ela bona dokona.’ (Heberu 6:11; Kara 17:11) Momokani, sibona eda stadi karaia totona, nega do ita atoa bona do ita hekwarahi. Unai dainai Paulo ese Heberu taudia ia sisiba henia do idia “lahedo lasi,” to idia hekwarahi noho unai gaudia karaia totona.—Heberu 6:12.
Lahedo karana ese emu mauri ena dala idauidau ia hadikaia diba. Solomona ia gwau “bema tau ta ia lahedo dainai guhi ia hanamoa lasi, medu be ruma lalonai do ia vareai.” (Hadibaia Tauna 10:18) Nega daudau lasi murinai, eiava gabeai, guhi oi hanamoa noho lasi neganai, medu be do ia vareai. Bema lauma dalanai ita lahedo bona iseda abidadama ita dogoatao auka lasi, laloa daradara ese iseda lalona do ia ania matamaia. To idau, Dirava ena Hereva laloa dobu bona stadilaia karana ese iseda abidadama do ia habadaia bona ia do ia naria.—Salamo 1:2, 3.
Abidadama Idia Habadaia, Itaia Loulou Gaudia Amo
Peleini ia taria tauna be nega momo iena peleini taria gaudia ia gaukaralaia loulou bona ia stadilaia dainai, ia abidadama henia diba. Unai hegeregerena, iseda mauri lalonai Iehova ena lalokau karana ita itaia loulou neganai, iseda laloa daradara lasi karana ia dekenai ia tubu daekau. Iosua ese unai ia mamia, bona Israela taudia ia hamaoroa: “Umui ibounai be emui lalona, bona emui laumana dekenai umui diba, Lohiabada, emui Dirava, ese iena gwauhamata namodia ibounai umui dekenai ia hamomokania vadaeni, idia ta ia reaia lasi. Ibounai idia vara momokani, ta ia moru lasi.”—Iosua 23:14.
Josefina, headava taihu ta Philippines amo, ese unai ia dibaia vadaeni. Ia ese ena mauri dalana, hereva momokani ia do abia dae lasi negana, ia herevalaia, ia gwau: “Egu adavana ia inuinu momo, bona ia kekero neganai, ia badu bona lau ia botaia. Aiemai moale lasi headava ese aiemai natuna mero ia hadikaia. Egu adavana bona lau ai gaukara, moni bada herea ai abia, to laki gadara lalonai kahirakahira ibounai ai haorea. Egu adavana ena turadia be momo, to idia momo idia tura henia edia bia ia hoia totona, bona nega haida idia ura ia kekero do idia kirikirilaia totona.
“Iehova ai dibaia bona ena sisiba ai abia dae momokani neganai, gau haida idia idau. Egu adavana ena inuinu karana ia haorea, laki gadara ai karaia lasi, bona aiemai tura korikoridia ese ai idia durua bona lalokau henia. Aiemai headava lalonai moale ia noho, bona aiemai mero hari be tauhau namona ta ai ia lao. Gaukara horadia ai hamaragia, to aiemai moni be bada. Ai itaia loulou Iehova be lalokau Tamana, hanaihanai dala maorona ai ita ia hakaua.”
Nega haida peleini taria taudia ese edia heau dalana do idia haidaua, reidio amo idia abia hakaua herevadia dainai, eiava iena peleini taria gaudia idia hahedinaraia gauna dainai. Ita danu Iehova ena hahediba herevadia dainai, iseda heau dalana do ita haidaua. “Bema idiba kahanai o lauri kahanai do umui raka siri neganai, emui Hadibaia Tauna ena gadona do umui kamonai, do ia gwau, ‘Dala be inai, ia dekenai do umui raka lao.’ ” (Isaia 30:21) Iena Hereva amo bona iena orea amo, sisiba ita abia lauma dalanai ita idia hadikaia gaudia ita dibaia totona. Idia ta be hebamo karana.
Iseda Hebamo ese Ita Idia Hamorua Diba
Lai goadana ese peleini maragina ta be dala kererena ai ia hodaia lao diba, bema taria tauna ese taria dalana ia hanamoa lasi. Unai hegeregerena, hari iseda nega ai, murimuri taudia edia lalohadai ese Keristani taudia idia botaia hanaihanai. Ita noho tanobadana lalonai taunimanima ese tauanina gaudia sibona idia laloa bona lauma gaudia idia hevasehalaia; moni bona moale karadia idia tahua guna. Paulo ese Timoteo ia hamaoroa dina gabedia ai “metau dikadia momo do idia vara.” (2 Timoteo 3:1-5) Matamata taudia idia ura dikadika taunimanima momo idia diba bona idia ese idia abidia dae dainai, hebamo dikadia edia lalo-ani dainai idia moru haraga diba.—2 Timoteo 2:22.
Amanda, lagani 17 kekenina, ia gwau: “Nega sisina lalonai egu sikuli turadia ese egu abidadama idia hamanokaia. Idia gwau loulou egu tomadiho ena taravatu be momo bona idia auka dainai, egu lalona ia hametaua. To egu tamana bona sinana edia heduru amo lau itaia Keristani hakaua herevadia ese lau idia koua lasi, to lau idia naria. Hari lau diba unai gaudia ese lau idia durua mauri namona lau moalelaia totona, egu sikuli turadia gunadia edia mauri bamona lasi. Lau diba lau idia laloa bada momokani taudia—egu tamana bona sinana bona Iehova—lau abidadama henia be namo, bona hari painia gaukara lau moalelaia.”
Herevana iseda mauri lagani be hida, iseda tomadiho henia karana idia gwauraia dika taudia do ita davaria. Reana diba bada taudia bamona idia hereva, to Dirava dekenai idia be tauanina taudia, lauma gaudia laloa lasi taudia. (1 Korinto 2:14) Paulo ena nega lalonai, Korinto ai ia noho siahu bada oreana ta be Skeptics, idia be tanobada ena aonega idia gaukaralaia taudia. Edia hahediba herevadia ese Korinto Keristani taudia haida ia hakaua kerere bona edia abidadama toreisi lou dekenai idia haboioa. (1 Korinto 15:12) Paulo ia gwau: “Umui laloa kerere lasi. Bema kara dika taudia danu umui turana karaia neganai, idia ese emui kara namona do idia hadikaia.”—1 Korinto 15:33.
To idau, hebamo namodia ese lauma dalanai ita idia hagoadaia. Keristani kongregesen ai, edia mauri lalonai abidadama idia hahedinaraia taudia ita bamoa diba. Norman, lagani 1939 ai hereva momokani ia dibaia tauna, ese taunimanima momo ia do hagoadaia noho. Dahaka ese ia durua lauma gaudia ia laloa goevagoeva noho totona? Ia gwau: “Hebou lao henia bona abidadama tadikaka bamoa karana be mai anina bada. Unai bamona hebamo ese lau ia durua Dirava ena orea ena idau bona Satani ena orea ena idau lau itaia goevagoeva totona.”
Kohu Ura Henia Bada Ena Dika
Lagani momo peleini ia taria tauna, Brian, ia gwau, “nega haida ia manada vadaeni peleini taria tauna ese peleini taria gaudia idia hahedinaraia gauna ia abia dae lasi—iena hemami be idau dainai. Nega haida, idia manada tuari peleini taria taudia be peleini idia hagiroa bona idia taria kerere badina tano dekenai idia noho diari edia toana be hisiu bamona—ena be edia peleini taria gaudia idia hahedinaraia idia roho kerere.”
Unai hegeregerena, iseda mataganigani urana ese lauma dalanai ita ia hakaua kerere diba. Iesu ia gwau “kohu ura henia bada” karana ese ita ia koia, bona Paulo ia gwau ‘moni ura bada dainai taunimanima haida ese abidadama karana idia rakatania.’—Mareko 4:19; 1 Timoteo 6:10.
Unai diari ese idia koidia hegeregerena, ia diaridiari bamona kohudia ese ita ia koia bena heau dalana kererena ai ita lao diba. Unai neganai “Dirava ena davana namona” do ita moalelaia lasi badina unai tanobada dekena amo idia mai gaudia, do idia ore gaudia, ese ita idia hakaua kerere. (Heberu 11:1; 1 Ioane 2:16, 17) Bema ita “ura” taga maurina ita moalelaia, ita be nega lasi dainai lauma dalanai do ita tubu daekau lasi.—1 Timoteo 6:9; Mataio 6:24; Heberu 13:5.
Ia headava tauna matamatana, ladana Patrick, ia gwau ia bona ena adavana be lauma gaudia idia bouboulaia edia mauri lalonai kohu sisina bada idia tahua totona. Ia gwau: “Ai itaia tadikaka haida kongregesen lalonai be mai edia motuka namodia bona ruma badadia, unai ese ai ia veria. Ena be Basileia helarona ai haboioa lasi, to aiemai lalohadai be moni amo ai hoia diba kohudia do ai moalelaia. To gabeai, ai lalo-parara moale korikorina be Iehova hesiai henia karana bona lauma dalanai tubu namonamo karana amo ia mai. Hari aiemai mauri lalonai kohu momo ai tahua lasi. Gaukara horadia ai hamaragia, bona hari ai be regula painia gaukara ai karaia.”
Lalona Kehoa Taudia Do Idia Abidadama
Bema ita be lalona kehoa taudia, unai ese ita do ia durua Iehova dekenai laloa daradara lasi karana hahedinaraia totona. Momokani, “abidadama ena anina be inai bamona: Ita daradara lasi, to ita diba momokani, Dirava ena davana namona ita naria kava lasi. Matana dekenai ita itaia lasi, to iseda lalona ia diba momokani, [eiava, “hamomokania gaudia idia noho dainai ita diba,” futnout, NW] inai gauna do ita abia.” (Heberu 11:1) To bema iseda lalona ita kehoa lasi, hamomokania gaudia do ita abia dae lasi. (Aonega Herevadia 18:15; Mataio 5:6) Unai badina dainai aposetolo Paulo ia gwau, “taunimanima haida sibona be mai edia abidadama Dirava dekenai.”—2 Tesalonika 3:2.
Edena dala ai iseda lalona ita kehoa, idia noho hamomokania gaudia ita abia dae noho totona? Dirava ese ia hahedinaraia karadia, iseda abidadama idia habadaia bona idia hagoadaia karadia ita karaia amo. Petero ese ita ia hagoadaia ‘abidadama sibona lasi, to kara namodia, diba, tauanina edia ura do ita biagua namonamo, haheauka, Dirava badinaia karana, tadikaka dekenai bogahisihisi henia karana, bona taunimanima do ita lalokau henia’ karadia ita karaia be namo. (2 Petero 1:5-7; Galatia 5:22, 23) To idau, bema sibona eda ura ita tahua eiava Iehova dekenai gaukara sisina sibona ita kara, iseda abidadama do ia tubu lasi.
Esera “ese mai ena lalona ibounai” ida Iehova ena Hereva ia duahia bona ia gaukaralaia. (Esera 7:10) Mika danu ese ena lalona ia kehoa, ia gwau: “Lau ese Lohiabada do lau naria noho. Ia ese lauegu guriguri do ia kamonai, bona lau abidadama henia, ia ese lau do ia hamauria.”—Mika 7:7.
Magdalena, guna ai gwauraia hahinena, ese Iehova ia naria noho danu. (Habakuku 2:3) Ia gwau: “Lauma paradaisona ita abia vadaeni. Gau iharuana, Paradaiso korikorina, be kahirakahira do ia mai. To harihari taunimanima handred tausen momo ese hutuma bada taudia idia bamoa matamaia. Lau ia hamoalea bada gauna be taunimanima momo herea be Dirava ena orea lalonai idia aru mai.”
Hamauria Diravana Ena Hakaua Tahua
Iseda laloa daradara lasi karana ita dogoatao auka ela bona dokona totona, Iehova bona ena orea edia hakaua herevadia do ita kamonai henia mai iseda abidadama ida. Iseda hekwarahi ese ahuna namona do ia havaraia. Peleini ia taria tauna be laolao aukana ia haorea gwauraia bona ori badadia amo ia diho neganai, ia moale bada herea. Ia vairanai tanobada ia hedinarai—iena kala be grin bona iena toana ese ia boiria. Peleini diho gabuna be ia henunai, ia naria noho peleini ia diho totona.
Ita do ia hamoalea bada gauna ese ita ia naria danu. Inai tanobada dikana do ia ore bona tanobada matamatana mai ena kara maoromaoro do ia vara. Dirava ia hanamoa gaudia ese ita do idia boiria. Unuseniai do ita ginidae bema salamo torea tauna ena hereva ita badinaia, ia gwau: “Lohiabada Dirava e, oi be egu mauri namona abia dalana. Lohiabada e, egu uhau dinadia ia mai bona hari, lau ese oi lau abidadama henia vadaeni. . . . Lau ese nega ibounai oi do lau hanamoa noho.”—Salamo 71:5, 6.