‘Herevahereva Lasi be mai Ena Nega Bona Herevahereva be mai Ena Nega’

NEGA hida mai tai ida, oi gwau, “Bema unai hereva lau gwauraia lasi be namo”? To reana oi laloatao nega haida oi hereva be namo neganai oi hereva lasi. Reana unai negadia ai oi laloa, ‘Bema gau ta lau gwauraia be namo.’

Baibel ia gwau ‘herevahereva lasi be mai ena nega, bona herevahereva be mai ena nega.’ (Hadibaia Tauna 3:⁠7) Iseda hekwarahi gauna be inai​—⁠edena negai do ita herevahereva bona edena negai do ita herevahereva lasi. Ita be kara dika taudia dainai nega momo be nega kereredia ai ita kara bona ita hereva. (Roma 7:​19) Edena bamona iseda gwau-edeede malana ita biagua diba?​—Iamesi 3:​2.

Malana Biagua Daladia

Edena negai do ita hereva bona edena negai do ita hereva lasi ita abia hidi totona, idia vara diba karadia iboudiai edia hakaua taravatudia ena lista badana be heduru gauna lasi. To Keristani kara korikoridia ese ita idia hakaua be heduru gauna badana. Unai kara be dahaka dahaka?

Iesu Keriso ia hahedinaraia iena diba tahua taudia edia kudouna ia hamarerea karana badana be lalokau. Ia gwau: “Unai dekena amo taunimanima ibounai do idia diba umui be lauegu diba tahua taudia, ta ta dekenai do umui lalokau henia dainai.” (Ioane 13:35) Unai bamona lalokau karana ita goadalaia neganai, iseda malana do ita biagua namonamo diba.

Unai bamona kara ma rua ese ita idia durua danu. Unai kara ta be manau. Ita ia durua bena ‘ita laloa, “Haida be idia namo herea, to lau be namo lasi.” ’ (Filipi 2:3) Ma ta be lalo-manau, ia ese ita ia durua badu negadiai ita “haheauka.” (2 Timoteo 2:24, 25) Unai kara hahedinaraia daladia dekenai Iesu Keriso be haheitalai hereadaena.

Lalo-hekwarahi negadia ai iseda malana ita biagua be auka herea dainai, namona be Iesu ena hanuaboi ginigabena, ia do mase lasi negana ita laloa​—unai neganai iena “kudouna danu ia hisihisi bada.” (Mataio 26:37, 38) Taunimanima iboudiai edia mauri hanaihanai ena helaro be kara tamona, Iesu ese Dirava ia badinaia noho karana, latanai ia noho dainai, Iesu ena lalona ena mamina ita hoalaia lasi.​—Roma 5:​19-​21.

Momokani, unai neganai Iesu be iena guba Tamana dekenai ia herevahereva be namo. Unai dainai ia lao ia guriguri, iena diba tahua taudia toi ia boiria do idia naria. Nega sisina murinai ia mai bona idia mahuta noho lalonai idia ia davaria. Petero dekenai ia gwau: “Be, umui goada lasi, hora tamona sibona lau danu do umui naria?” Lalokau dalana amo sisiba ia henia, bona iena hereva ma haida ese idia hahedinaraia edia manoka ia lalo-pararalaia. Ia gwau: “Emui lauma be ia ura, to emui tauanina be ia manoka vadaeni.” Gabeai, Iesu ia mai lou bona idia mahuta. Hebogahisi dalanai ia hereva henia bona “ia rakatanidia, ia giroa lao, nega ihatoina ma ia guriguri.”—Mataio 26:36-44.

Iesu be nega ihatoina iena diba tahua taudia ia davaria idia mahuta neganai, ia hereva auka lasi, to ia gwau: “Madi, umui mahuta. Umui laga-ani, a? Vadaeni, nega ia ginidae vadaeni. Taunimanima ena Natuna be dika taudia edia imadia dekenai do idia atoa.” (Mataio 26:45) Iena kudouna be lalokau amo ia honu bona ia manada bona lalo-manau momokani tauna sibona be unai nega aukana lalonai iena malana be unai bamona ia gaukaralaia diba.​—Mataio 11:29; Ioane 13:⁠1.

Nega sisina ia lao bena Iesu idia dogoatao bona kota ai idia atoa. Idia vara gaudia amo do ita diba nega haida ita herevahereva lasi be namo, iseda Keristani hesiai gaukara lalonai danu. Dubu biagudia ese Iesu ia samania gauna ta idia tahua neganai, idia ura lasi vaitani, hereva momokani idia diba. Unai dagedage ia vara gwauraia neganai, Iesu be ia herevahereva lasi.​—Mataio 7:⁠6 itaia.

To hahelagaia tauna badana ia henanadai neganai Iesu be iena uduna ia koua noho lasi, Iesu ia nanadaia: “Mauri Dirava ena ladana dekenai lau hereva oi dekenai, oi hamaoroa ai dekenai, oi be Keriso, Dirava ena Natuna, o?” (Mataio 26:63) Dirava ena ladana dekenai ia henanadai dainai Iesu ia haere henia be namo. Unai dainai ia gwau: “Oi hereva unai. To umui ibounai dekenai lau hereva, Taunimanima ena Natuna do umui itaia, Siahu Ibounai Dirava ena imana idibana kahana dekenai do ia helai, bona guba ena ori edia latanai do ia mai.”—Mataio 26:64.

Unai mai anina bada dinana lalonai, Iesu be iena malana ia biagua namo herea. Lalokau, lalo-manau, bona manau be iena kara korikoridia. Edena bamona ita ese lalo-hekwarahi negadiai unai kara ita gaukaralaidia diba?

Badu Neganai Malana Biagua

Bema ita badu, nega momo iseda malana ita biagua lasi. Haheitalai ta be nega ta Paulo bona Banaba idia lalo-tamona lasi. “Banaba ia ura Ioane Mareko be idia danu do ia lao. To Paulo ia laloa, ia idia abia lao be namo lasi. Badina be Pamupulia dekenai ia ese idia ia rakatania, bona gaukara dekenai idia danu ia lao lasi. Idia ruaosi idia hepapahuahu bona idia parara.”​—Kara 15:37-​39.

Michael,a lagani haida lalonai konstraksen idauidau ai ia gaukara tauna, ia gwau: “Ai gaukara gabuna ai be tau ta ia noho, ia lau diba namonamo bona lau matauraia. To toana be ia ese lauegu gaukara ia maumauraia hanaihanai. Egu lalona ia hisihisi bona ia dika to gau ta lau gwauraia lasi. Dina ta ai, ia ese lau haorea gaukarana ia maumauraia neganai, egu haheauka ia ore.

“Guna lau koua lalohisihisi iboudiai lau hahedinaraia. Reana unai ese toana dikana ia hahedinaraia ai idia itaia taudia dekenai, to lau badu dikadika dainai lau laloa lasi. Unai dina lalonai lau ura lasi ia dekenai lau herevahereva eiava ia lau itaia. Bena lau lalo-parara, unai hekwakwanai be dala maorona lau hamaoromaoroa lasi. Unai neganai bema lau herevahereva lasi ela bona lauegu badu ia maragi be namo.”

Gau namona be unai tadikaka rua ese Keristani lalokau dainai edia hepapahuahu idia hanamoa. Michael ia gwau: “Ai herevahereva namonamo murinai, ai lalo-parara heheni, bona hari aiemai turana karana ia goada.”

Michael be hari ia diba hegeregerena, bema ita badu neganai, nega haida aonega dalana be ita herevahereva lasi. Aonega Herevadia 17:27 ia gwau: “Ia badu haraga lasi tauna, be mai ena lalona kehoa.” Lalo-parara bona tadikaka lalokau henia karana ese ita idia durua do ita haheauka bena hadikaia herevadia do ita gwauraia haraga lasi. Bema ta ese ita ia habadua, namona be ia sibona danu mai lalo-manau bona manau ida ita herevahereva maino havaraia totona. To bema mai badu ida umui heai be edena bamona? Unai neganai lalokau dainai iseda maoro ita laloa lasi bona mai manau ida hanamoa dalana do ita tahua. Unai be nega namona iseda sori ita hahedinaraia bona mamina hanamoa totona do ita herevahereva namonamo.​—Mataio 5:⁠23, 24.

Herevahereva Lasi ese Ia Durua Lasi Negadia

Reana badu o lalona ia dika dainai, ita ia habadua tauna dekenai ita herevahereva lasi. Unai ese dika ia habadaia diba. Mariab ia gwau: “Aiemai headava ena lagani ginigunana ai, nega haida dina momo lalonai egu adavana dekenai lau herevahereva lasi. Nega momo unai be hekwakwanai badadia dainai lasi, to lalona idia hadikaia gaudia maragidia lau haboua dainai. Unai gau maragidia lau laloa loulou ela bona ororo bamona hekwakwanai ta ai ia lao. Bena, egu haheauka ia ore neganai egu adavana lau hereva henia lasi ela bona egu badu ia ore.”

María be ma ia gwau: “Baibel ena siri ta ​—‘dina do ia diho lasi neganai, emui badu do umui haorea’⁠—ese lau ia durua egu lalona do lau hamaoromaoroa. Egu adavana bona lau ese emai herevahereva dalana ai hanamoa totona ai hekwarahi bada, bena hekwakwanai be idia bada idia lao lasi. Ena be mai ena hekwarahi, to lagani 10 ai headava vadaeni murinai lau moale, badina lau gwau diba unai herevahereva lasi negadia be hari idia vara momo lasi. To hari danu unai kara koua totona lau hekwarahi noho.”​—Efeso 4:​26.

María be hari ia diba hegeregerena, taunimanima rua idia badu heheni negadiai, herevahereva lasi karana ese ia durudia lasi. Bema ita herevahereva lasi, reana badu ia bada ia lao bona turana karana ia hadikaia. Iesu ia gwau namona be ‘maino ita karaia haraga.’ (Mataio 5:​25) “Hereva maorona gwauraia namonamo karana” ese ita ia durua diba ‘maino ena dala ita badinaia.’​—Aonega Herevadia 25:11; 1 Petero 3:​11.

Bema heduru ita abia be namo, ita hereva be gau badana. Bema lauma dalanai hekwarahi ta ita davaria, reana ita laloa, namo lasi unai amo ma haida ita hametaua. To bema ita hereva lasi, reana unai hekwakwanai do ia bada ia lao. Keristani elda taudia ese ita idia laloa bona, bema edia heduru ita tahua, mai edia ura ida ita do idia durua. Unai negadiai ita hereva be mai anina bada.​—Iamesi 5:⁠13-​16.

Unai gaudia iboudiai ia hanaia gauna be mai eda kudouna ibounai ida guriguri amo Iehova ita hereva henia, Iesu bamona. Momokani, namona be iseda guba Tamana dekenai be ‘iseda kudouna edia ura gaudia ita hamaoroa.’​—Salamo 62:8; Heberu 5:7 itaia.

Dirava Ena Basileia Ita ‘Herevalaia Ena Nega’

Keristani haroro gaukarana be Dirava ia henia haheganina bona dokona be do lasi neganai ita hagugurua be namo. Hari iseda negai, Iehova ena hesiai taudia ese Basileia ena sivarai namona idia harorolaia be mai anina bada, guna bamona ia hanaia. (Mareko 13:10) Aposetolo taudia bamona, Keristani taudia korikoridia be ‘idia kamonai gaudia idia hunia diba lasi, edia uduna idia koua diba lasi.’​—Kara 4:​20.

Momokani, taunimanima iboudiai lasi be do idia ura hereva momokani idia kamonai. Oibe, iena hahediba taudia be haroro totona ia siaidia neganai, Iesu ia gwau idia be ‘kara namona tauna ta do idia tahua.’ Iehova ese taunimanima ta ia doria lasi Ia idia tomadiho henia totona, unai hegeregerena, mai ena ura ibounai ida Basileia ena sivarai ia dadaraia tauna dekenai do ita hereva noho lasi. (Mataio 10:​11-​14) To mai moale danu “Dirava ese ia abia hidi, mauri hanaihanai abia totona taudia” dekenai Iehova ena lohia dalana ita herevalaia.​—Kara 13:48; Salamo 145:10-​13.

Ita be kara dika taudia dainai mai badu ida ita hereva eiava badu dainai ita herevahereva lasi be haraga, to sibona ita biagua totona inai kara, lalokau, lalo-manada, bona manau ese ita do ia durua. Unai kara ita goadalaia neganai, herevahereva ena nega namona bona herevahereva ena nega dikana edia idau ita diba namonamo.

[Footnotes]

[Picture on page 23]

Herevahereva namonamo karana amo hekwakwanai ita hamaoromaoroa diba