Hahemauri—Ena Anina Korikori

‘HAHEMAURI oi abia vadaeni, a?’ Unai bamona idia henanadai taudia momo idia laloa Dirava ese ia hamauridia vadaeni, badina be ‘Iesu idia abia dae vadaeni, sibona edia hahemauri tauna.’ Ma haida idia laloa hahemauri davaria daladia be idauidau bona bema ‘Iesu be emu kudouna ai,’ edena hereva oi abia dae eiava edena tomadiho oreana oi badinaia be herevana.

Baibel ia gwau Dirava ena ura be “taunimanima ibounai ese mauri do idia davaria.” (1 Timoteo 2:3, 4) Unai dainai, hahemauri idia abia dae taudia ibounai ese do idia abia diba. To ta be Dirava ese ia hamauria ena anina korikori be dahaka? Ena be oi hekwarahi sisina eiava oi hekwarahi lasi, to unai hahemauri do oi abia kava, a?

Inai hereva “hahemauri” ena anina be “dika o hadikaia ore karana amo roho mauri karana.” Unai dainai hahemauri korikorina be lalo-maino sibona lasi. Ena anina be inai: Dirava ese inai tanobada oromana dikana do ia hadikaia ore neganai, haida be unai amo do ia hamauridia, bena gabeai mase amo do ia hamauridia danu! To Dirava ese daidia do ia hamauria? Haere davaria totona, Iesu Keriso ena hereva mani ita tahua. Do ita davaria gaudia dainai, reana do oi hoa.

Hahemauri​—⁠Tomadiho Oreadia Ibounai Lalonai Idia Davaria, A?

Nega ta, Iesu be Samaria hahinena ta ida ia herevahereva. Ena be unai hahine be Iuda hahinena lasi, to ia abia dae Mesia, “Keriso idia gwauraia tauna,” be do ia mai. (Ioane 4:​25) Unai ia abia dae sibona dainai, mauri do ia davaria diba, a? Lasi, badina be Iesu ese unai hahine ia hamaoroa, ia gwau: “Umui Samaria taudia ese dahaka umui tomadiho henia be umui diba lasi.” Iesu ia diba, unai hahine ese mauri do ia davaria totona, namona be ena tomadiho dalana do ia haidaua. Unai dainai Iesu ia gwau: “Nega ta do ia mai, bona harihari ia ginidae vadaeni, tomadiho taudia momokani ese mai Lauma bona mai momokani danu Tamana do idia tomadiho henia, badina be Tamana ese unai bamona idia tomadiho henia taudia ia tahua noho.”​—⁠Ioane 4:22, 23.

Ma nega ta Iesu ese Farisea taudia, Iuda ena tomadiho oreana badana ta, dekenai ena lalohadai hahemauri dekenai ia hahedinaraia. Farisea taudia ese tomadiho dalana ta idia haginia, bona idia laloa Dirava ese ia abia dae. To Iesu ese Farisea taudia ia hamaoroa herevana be mani oi kamonai, ia gwau: “Umui koikoi taudia e! Isaia ese umui ia perovetalaia maoro, ia gwau: ‘Inai taudia ese edia uduna amo lau idia hanamoa, to edia kudouna be daudau masemase. Edia tomadiho lau dekenai be anina lasi. Edia hadibaia hereva be taunimanima edia taravatu sibona.’ ”​—⁠Mataio 15:7-9, New International Version.

Tomadiho oreadia momo hari inai negai, idia gwau Keriso idia abia dae, be edena bamona? Iesu do ia gwau idia ibounai be mauri davaria daladia maorodia, a? Unai do ita laloa kava sibona lasi, badina be Iesu ia hereva goevagoeva, ia gwau: “Idia gwau, ‘Lohiabada e, Lohiabada e,’ taudia momo be Guba Basileia lalonai do idia raka vareai lasi. To lauegu Tamana, guba dekenai ia noho ena ura idia karaia taudia, idia sibona do idia vareai. Unai Dirava ena Kota Dina ia ginidae neganai, taunimanima momo do idia hereva lau dekenai, do idia gwau, ‘Lohiabada e, Lohiabada e, oiemu ladana dekenai guna ai haroro, ani? Oiemu ladana dekenai lauma dika ai lulua, bona oiemu ladana dekenai hoa kara momo ai karaia, ani?’ Vadaeni lau ese do lau haere idia dekenai, do lau gwau, ‘Umui be lau diba lasi momokani. Idau gabuna dekenai umui lao, umui dika karaia taudia.’ ”​—⁠Mataio 7:​21-23.

Mauri Do Ita Davaria Totona, Iesu Ita Diba Maoromaoro be Gau Badana

Iesu ena hereva be mai anina bada. Idia hahedinaraia tomadiho idia goadalaia taudia momo ese ‘Tamana ena ura idia karaia’ lasi. Vadaeni, ta ese hahemauri korikorina be edena bamona ia davaria diba? Timoteo Ginigunana 2:​3, 4 ena haere be inai: “Dirava ia ura taunimanima ibounai ese mauri do idia davaria, bona hereva momokani do idia diba.”​—⁠Kolose 1:​9, 10 itaia.

Unai diba be mai anina bada, hahemauri abia karana ai. Roma dibura rumana gimaia tauna ta ese Paulo bona ena bamona, Sila, ia nanadaidia, ia gwau, “Dahaka lau karaia Dirava ese lau do ia hamauria totona?” neganai, idia haere, idia gwau: “Lohiabada Iesu oi abidadama henia, bona hamauria do oi abia, oi bona oiemu ruma bese taudia danu.” (Kara 16:30, 31) Unai ena anina be unai gima tauna bona ena ruma taudia be mamina ta sibona edia kudouna ai do idia abia be hegeregere, a? Lasi, badina be, bema Iesu ena dagi, iena kara, bona iena hahediba herevadia sisina idia diba lasi, ‘Lohiabada Iesu idia abidadama henia’ diba lasi mai edia momokani ida.

Hegeregere, Iesu ese guba gavamanina ta​—⁠“Dirava ena Basileia”—do ia haginia gauna, be taunimanima dekenai ia hadibaia. (Luka 4:43) Ia ese danu Keristani kara maoromaoro taravatudia ia gwauraia. (Mataio, karoa 5-7) Ia hahedinaraia ena hahediba taudia edia lalohadai be dahaka politikol karadia dekenai. (Ioane 15:19) Ia ese tanobada ibounai ena hahediba gaukarana ta, ia hamatamaia bona ena orea taudia ia hagania do idia karaia. (Mataio 24:14; Kara 1:8) Oibe, ‘Iesu do idia abidadama henia’ ena anina be gau momo do idia lalo-pararalaia! Unai dainai, Paulo bona Sila ese “Lohiabada ena hereva, [dibura rumana gimaia tauna] bona iena ruma noho bese taudia ibounai dekenai idia gwauraia” guna, unai kamonai matamata taudia be bapatiso idia do abia lasi neganai.—Kara 16:​32, 33.

Dirava Ita Diba Maoromaoro Danu be mai Anina Bada

Iesu ita abidadama henia momokani ena kahana badana ta be Iesu ese ia tomadiho henia Diravana be ita danu ita tomadiho henia. Iesu ia guriguri, ia gwau: “Mauri hanaihanai be inai: Idia ese oi Dirava momokani tamona do idia diba, bona Iesu Keriso, oi ese oi siaia tauna danu do idia diba.”​—⁠Ioane 17:​3.

Dirava ena Natuna be tanobada ai ia haroro neganai, nega ibounai iena Tamana ia gwauraia, sibona ia gwauraia lasi. Nega ta ia gwau lasi ia be Siahu Ibounai Diravana. (Ioane 12:49, 50) Nega momo Iesu ese iena dagi Dirava ena orea lalonai ia hahedinaraia goevagoeva, ia hahedinaraia ia be ena Tamana henunai. (Luka 22:41, 42; Ioane 5:19) Momokani, Iesu ia gwau: “Egu Tamana ese lau ia hereaia.” (Ioane 14:28) Vadaeni, oiemu tomadiho oreana ese Dirava bona Keriso edia dagi korikoridia be oi idia hadibaia, a? Eiava edia hereva dainai oi laloa Iesu sibona be Siahu Ibounai Diravana? Mauri do oi davaria totona, diba maorona do oi abia be gau badana.

Lohiabada ena Guriguri ai, Iesu ese ena hahediba taudia ia hamaoroa do idia guriguri, do idia gwau: “Oiemu ladana do ai hahelagaia.” (Mataio 6:9) Idia hahanaia Baibel momo lalonai Dirava ena ladana idia hunia, iena gabunai “Lohiabada” idia torea. To idaunegai “Taravatu Gunana” bukadia ai, Dirava ena ladana be nega 6,000 mai kahana idia torea! Salamo 83:18 ia gwau: “Idia be do idia diba oiemu ladana be Iehova. Bona oi sibona, Ataiai Momokani Diravana, ese tanobada oi biagua noho.” Oi idia hadibaia Dirava ena ladana, Iehova, do oi gaukaralaia totona, a? Bema lasi, mauri do oi davaria be auka, badina be “Lohiabada ena ladana dekenai do idia boiboi taudia ibounai be mauri do idia davaria”!​—⁠Kara 2:​21; Ioela 2:​32 (NW) itaia.

Lauma Bona Momokani Ai

Iesu Keriso ese danu Dirava ena Hereva, Baibel, ia gwauraia. Dirava ena lalohadai gau idauidau dekenai ia herevalaia neganai, nega momo ia gwau: “Ia torea vadaeni.” (Mataio 4:4, 7, 10; 11:10; 21:13) Ia do mase lasi hanuaboina ai, Iesu be ena hahediba taudia dainai ia guriguri, ia gwau: “Hereva momokani dekena amo idia do oi hahelagaia, oiemu hereva be hereva momokani.”​—Ioane 17:17.

Mauri do ita davaria totona, ita ese danu Dirava ena Hereva, Baibel, ena hahediba herevadia ita lalo-pararalaia be namo. (2 Timoteo 3:​16) Baibel sibona ese inai henanadai ia haerelaidia: Mauri ena anina be dahaka? Badina be dahaka Dirava ese nega daudau kara dika ia koua lasi? Ta ia mase neganai, dahaka ia vara ia dekenai? Dirava ese momokani taunimanima be hel ena lahi lalonai ia hahisidia, a? Dirava ena palani tanobada totona be dahaka?a Bema ta ese diba maorona unai gau dekenai ia abia lasi, Dirava ia tomadiho henia maoromaoro diba lasi, badina be Iesu ia gwau: “Tomadiho taudia momokani ese mai Lauma bona mai momokani danu Tamana do idia tomadiho henia.”​—⁠Ioane 4:23.

Abidadama Dainai Ita Kara

Mauri do ita davaria totona, diba ita abia sibona be hegeregere lasi. Bema ta ena kudouna ia namo, Dirava ena diba maorona ese abidadama ia havaraia. (Roma 10:10, 17; Heberu 11:6) Unai abidadama dainai kara ia karaia. Hegeregere, Baibel ia gwau: “Inai dainai umui emui lalona umui giroa, bona Dirava ese emui kara dika do ia kokia. Gabeai Lohiabada ese goada matamata do ia henia umui dekenai.”​—⁠Kara 3:19.

Oibe, ta ese mauri do ia davaria totona, namona be Dirava ena kara maoromaoro taravatudia do ia badinaia. Dirava ena Hereva be mai ena siahu, hereva koikoi bona kara koikoi ia manadalaia vadaeni tauna do ia haidaua, bena mai ena momokani ida do ia hereva bona do ia kara. (Tito 2:10) Tatau be tatau ida o hahine be hahine ida idia sihari heheni karadia, heudahanai, bona sihari kava ia rakatania, bena ia kara maoromaoro. (1 Korinto 6:9-11) Unai be iena lalona ena mamina ta dainai nega kwadogi sibona lalonai lasi, to Dirava ena hereva ia tahua namonamo bona ia badinaia dainai, unai kara dika ia hadokoa vaitani.​—⁠Efeso 4:22-24.

Kudou-maoro tauna ese Dirava ia lalokau henia bona ena kara ia moalelaia dainai, gabeai unai ese do ia ha-uraia, ena mauri be Dirava dekenai do ia gwauhamatalaia bona ranu bapatiso amo unai do ia hamomokania. (Mataio 28:19, 20; Roma 12:1) Idia bapatiso vadaeni Keristani taudia be Dirava vairanai mauri idia davaria vadaeni. (1 Petero 3:21) Inai tanobada dikana do ia hadikaia ore neganai, Dirava ese unai hisihisi amo do ia hamauridia vaitani.​—⁠Apokalupo 7:9, 14.

Hahemauri Ena Anina Oi Dekenai

Inai hereva kwadogina ese ia hedinarai goevagoeva, mauri do oi davaria totona, ‘Lohiabada Iesu be emu lalona ai’ oi abia sibona be hegeregere lasi. Namona be Iehova Dirava bona Iesu Keriso do oi diba maoromaoro bona emu kara kereredia do oi hamaoromaoroa. Reana oi laloa unai bamona do oi karaia be auka, to Iehova ena Witness taudia idia ura oi do idia durua, unai bamona do oi karaia totona. Oiemu ruma lalonai davana lasi Baibel stadi do idia karaia, unai amo oi do idia durua diba, hahemauri korikorina ia lao henia dalana ai do oi raka matamaia totona.b

Dirava ena hahemaoro dinana be kahirakahira dainai, unai bamona do oi karaharaga be gau badana! Peroveta tauna ena hereva be hari do oi badinaia be namo, ia gwau: “Lohiabada ena badu dinana be umui dekenai ia do ginidae lasi neganai, do umui guriguri hebou. Umui manau taudia ibounai e, Lohiabada ena oda umui kamonai henia noho taudia e, Lohiabada do umui tahua mai noinoi danu. Kara maoromaoro do umui karaia, bona Lohiabada ena vairanai do umui manau. Unai neganai sedira iena badu dinana dekenai, Lohiabada ese umui do ia naria.”​—⁠Sepanaia 2:2, 3.

[Footnotes]

[Box on page 6]

MAURI DO OI DAVARIA TOTONA . . .

◻ Dirava bona Iesu do oi dibaia maoromaoro.​—⁠Ioane 17:3.

◻ Do oi abidadama.​—⁠Roma 10:17; Heberu 11:6.

◻ Emu kara dika dainai oi helalo-kerehai bona emu kara oi haidaua.​—⁠Kara 3:19; Efeso 4:22-24.

◻ Emu mauri be Dirava dekenai do oi gwauhamatalaia bona bapatiso do oi abia.​—⁠Mataio 16:24; 28:19, 20.

◻ Taunimanima do oi haroro henidia noho.​—⁠Mataio 24:14; Roma 10:10.

[Pictures on page 7]

Mauri davaria dalana be Baibel stadilaia, ena hereva badinaia, gwauhamata, bona bapatiso