ita laloa hekwarahi lasi. Badina Dirava ese gau ibounai ia diba, bona iena diba ese iseda kudouna ena diba ia hereaia momokani.”

To, ita ese Dirava ena lalokau karana be dika bada herea negadia sibodia lalonai ita mamia lasi. Iehova be iseda abidadama dekenai bona iseda lalona ena hemami dekenai idia vara gaudia ia laloa bada. Oibe, namo lasi ita laloa iseda hemami, iseda helalo, bona iseda ura be gau maragidia dainai iseda guriguri lalonai ita gwauraidia lasi. (Filipi 4:⁠6) Oi be emu turana namona ida oi helai neganai, emu mauri lalonai idia vara anina bada gaudia sibona oi gwauraidia, a? Umui ese anina maragi gaudia danu umui kikilaidia, ani? Unai hegeregerena, gari lasi ida emu mauri lalonai idia vara gaudia idauidau be Iehova dekenai oi herevalaia diba, badina oi diba ‘oi ia laloa noho.’​—⁠1 Petero 5:⁠7.

Oibe, turana karana ta be do ia noho daudau lasi bema nega ibounai oi ese oi sibona oi herevalaia. Unai hegeregerena, namo lasi iseda guriguri lalonai ita sibona ita laloa. Namona be iseda lalokau Iehova totona ita gwauraia hedinarai bona ena ura totona ita guriguri danu. (Mataio 6:​9, 10) Guriguri be Dirava ita noia ita ia durua totona sibona, lasi to ia be dala namona ia ita tanikiu henia bona ita hanamoa totona. (Salamo 34:1; 95:⁠2) ‘Diba ita abia’ siboda eda stadi hanaihanai karana amo ese ita do ia durua unai ita karaia totona, Iehova bona ena dala ita dibaia namonamo totona. (Ioane 17:⁠3) Heduru karana be Salamo bukana oi duahia, bona kamonai hesiai taudia haida edia guriguri gwauraia dalana Iehova dekenai oi itaia diba.

Iehova ena hetura karana be dava bada gauna momokanina. Namona be ita hahedinaraia unai ita abia dae iseda guriguri amo; ita laloa bada gaudia ibounai ita gurigurilaidia mai iseda kudouna ibounai ida bona iseda lalona dekenai idia noho gaudia ita hahedinaraia ia dekenai. Unai amo Salamo torea tauna ese ia gwauraia moale herevana do ita gwauraia: “Oi ese oi abia hidi taudia, bona oi ese oiemu gabu helagana dekenai oi mailaidia taudia, be idia moale bada.”​—⁠Salamo 65:⁠4.

Duahia Taudia Edia Henanadai

Iesu ena mamoe bona nanigosi parabolena ita stadilaia neganai, ita moale bada herea. “Gima Kohorona,” October 15, 1995 gauna, ese ia hahedinaraia lalohadai matamatana dainai, ita gwau diba Iehova ena Witness taudia be hari hapararaia gaukara idia karaia noho, a?

Oibe. Momo be unai idia laloa bada badina Mataio 25:​31, 32 ia gwau: “Taunimanima ena Natuna be mai ena hairai danu do ia mai, mai ena aneru helagadia danu, ena terona namo herea momokani latanai do ia helai. Vadaeni bese ibounai be iena vairana dekenai do idia haboua. Vadaeni ia ese idia do ia hapararaia, mamoe naria tauna ese mamoe bona nanigosi ia hapararaia bamona.” Gima Kohorona, October 15, 1995 gauna, ese ia hahedinaraia dahaka dainai unai siri edia anina be hisihisi bada herea ia matamaia murinai do idia vara. Iesu be mai ena hairai ida do ia mai, mai ena aneru danu, bona ena hahemaoro terona latanai do ia helai. Bena, unai neganai taunimanima do ia hapararaia. Edena bamona do ia hapararaia? Taunimanima be unai nega ia do mai lasi neganai idia karaia eiava idia karaia lasi gaudia amo do ia hahemaoro henidia.

Ita ese tanobada kota ena hepapahuahu ta ida unai ita hahegeregerea diba; kota dekenai idia do lao lasi neganai gau haida idia vara guna. Kota idia karaia bona hahemaoro ia do henia lasi neganai, nega daudau lalonai hamomokania gaudia idia tahua. Hari idia mauri noho taunimanima be mamoe eiava nanigosi taudia ai do idia lao hamomokania karadia be nega daudau lalonai idia hedinarai. Bona hamomokania gaudia momo idia do vara noho. To Iesu be iena terona latanai ia helai neganai, unai tahua negana do ia doko. Ia hegaegae vadaeni hahemaoro ia henia totona. Taunimanima do ia haria mase hanaihanai do idia abia eiava mauri hanaihanai do idia abia.

To, Mataio 25:32 dekenai ia gwau taunimanima hapararaia mauri eiava mase totona karana be nega vairai do ia vara dainai, namo lasi ita laloa ena anina be hari inai negai hapararaia eiava haria gaukara ta ia vara diba lasi. Baibel lalonai, Mataio karoa 13 ese do ia vara guna hapararaia gaukarana ia herevalaia. Dirava Momokani Tamona Tomadiho Henia mai Lalo-Tamana Danu bukana ena rau 179-80 ese unai ia herevalaia ena hereva kwarana maragina “Taunimanima ia Hapararadia” henunai.a Unai buka ia gwau: “Iesu ese inai nega ena dokona ia herevalaia neganai, gau badadia ma haida danu ia gwauraia. Inai gaudia ta be, ‘Basileia ena taunimanima’ bona ‘Satani ena taunimanima’ do ia hapararadia. Iesu ena parabole ta lalonai uiti umana ta ia herevalaia, ena biaguna ena inai tauna ta ese ava dikadia edia uhe unai uma dekenai ia hadoa.”

Unai buka ese Iesu ena parabole Mataio 13:​24-30 bona ena anina siri 36-43 dekenai ia herevalaia. Oi itaia siri 38 dekenai, uhe namodia ese Basileia ena taunimanima ia laulaulaia, to ava dikadia ese Satani ena taunimanima ia laulaulaia. Siri 39 bona 40 idia hahedinaraia ‘tanobada ena dokona neganai’​—⁠hari ita noholaia negana​—⁠unai ava dikadia do idia haboua. Idia hapararadia bona idia gabudia, idia hadikaia ore.

Unai parabole be horoa Keristani taudia ia herevalaia (mamoe bona nanigosi edia parabole lalonai idia be Iesu ena tadikaka). Ia hedinarai goevagoeva herevana be inai: Iseda nega lalonai hapararaia gaukarana badana ta ia vara, horoa taudia be sibodia idia gwauraia Keristani taudia to edia kara ese idia hahedinaraia idia be “Satani ena taunimanima” amo idia idau.

Iesu ese taunimanima idia hapararaia, o idia haria karadia edia haheitalai haida ia henia. Oi laloatao ia ese mase ia lao henia dala lababana ia herevalaia neganai ia gwau: “taunimanima momo herea be unai dala dekenai idia raka vareai.” (Mataio 7:13) Unai hereva be dokona dekenai ia vara gauna ia herevalaia lasi. Unai hereva be ia vara noho gauna ia herevalaia, hegeregere hari taunimanima momo lasi be mauri ia lao henia dala aukana dekenai idia raka. Oi laloatao danu, Iesu be iena aposetolo taudia ia siaidia lao neganai, ia gwau kara namo taudia haida do idia davaria. To ma haida be kara namo lasi taudia, bona aposetolo taudia be edia aena dekena amo kahu do idia kokia negea, “idia dekenai sisiba goada henia totona.” (Luka 9:⁠5) Momokani hari inai negai Keristani taudia be taunimanima vairanai edia haroro gaukara idia karaia neganai unai bamona kara ia vara, ani? Dirava ena sivarai ita harorolaia neganai, haida idia kamonai namo herea, to ma haida be idia dadaraia.

Mamoe bona nanigosi ia herevalaia Gima Kohorona ia gwau: “Ena be parabole lalonai ia gwauraia kota karana be nega sisina murinai do ia vara, to harihari danu mai anina bada karana ta ia vara noho. Ita Keristani taudia ese taunimanima hamauridia gaukarana ita karaia noho; taunimanima ia hapararadia herevana ita harorolaia noho. (Mataio 10:​32-39).” Mataio karoa 10 lalonai, Iesu ia gwau ia murinai raka karana ese taunimanima do ia hapararaia​—⁠tamana bona natuna mero, natuna kekeni bona sinana.

Keriso ena tadikaka lauma helaga ese ia horoa taudia unai, be tanobada hegegemadai Basileia ena sivarai harorolaia gaukarana idia gunalaia noho. Taunimanima be idia kamonai eiava idia kamonai lasi neganai idia hahedinaraia idia be edena bamona taudia. Ita taunimanima be ita gwau diba lasi, ‘Inai tauna be mamoe; unai tauna be nanigosi,’ Mataio karoa 25 ena hereva hegeregerena. To, ita ese sivarai namona be taunimanima dekenai ita laohaia karana amo, do idia hahedinaraia edena kahana dekenai idia gini​—⁠idia be edena bamona taudia bona Iesu ena tadikaka taudia be edena bamona do idia kara henidia. Unai dainai, kota ese ia davaria hamomokania gaudia idia momo idia lao hegeregerena, Iesu ena tadikaka idia durua taudia bona idia dadaraia taudia edia kara be idia hedinarai noho. (Malaki 3:18) Gima Kohorona ese ia hahedinaraia hegeregerena, Iesu be kahirakahira ena terona dekenai do ia helai bona hahemaoro hereva do ia henia, taunimanima be unai nega ginigabena ai unai kota karana amo do ia hapararadia mauri do idia abia eiava do idia mase ore.

[Footnote]