Emu Natuna Oi Durua Iehova Do Ia Abia Hidi Totona, A?

MERO ta ia gwau: “Lau laloa Baibel stadilaia karana be lalona veria lasi karana bona ia be mai hesikuna. Egu lalona dekenai lau gwau, lau tubu bada neganai Iehova ena Witness tauna ta ai do lau lao lasi.” Ena be Keristen ruma besedia edia natudia momo be reana gabeai Iehova tomadiho henia dalana do idia abia hidi, to unai mero hegeregerena, reana idia daradara guna, bena murinai dala idia abia hidi Iehova be edia Dirava ai do ia lao totona.

Nega haida tama sina ese edia natudia idia hakaua namonamo dalana idia daradaralaia. Nega momo mai edia lalo-hekwarahi danu sibodia edia kara idia tahua, inai tamana ta hegeregerena, nega ta ia gwau: “Lau koikoi lasi, nega haida egu natudia idia mahuta neganai edia vairadia lau itaia, bona idia lalohisihisi dainai mata ranudia idia do noho lau itaia neganai, lau laloa lau sisiba henidia be reana maoro lasi.” To iena natuna mero ruaosi be idia tubu bada neganai Iehova hesiai henia dalana idia abia hidi.

To memero kekeni haida ese Iehova bona Keristen orea idia rakatania bona Satana ena tanobada dekenai idia vareai. Vadaeni, edia natudia be Iehova ena dala do idia abia hidi totona, tama sina be edena bamona idia durudia diba? Unai henanadai haerelaia totona, namona be inai ita diba guna, ena be tama sina idia ura dikadika edia natudia be Iehova idia bamoa noho, to dahaka dainai idia rakatania?

Memero Kekeni Haida ese Iehova Idia Rakatania Ena Badina

Badina badana ta be memero kekeni haida ese Iehova eiava iena kara idia diba namonamo lasi. Ena be idia maragi negana amo Keristen heboudia dekenai idia lao, to idia lao kava, Iehova idia tahua namonamo lasi. (Isaia 55:6; Kara 17:27) Atai dekenai ai sivaralaia vadaeni merona be Keristen heboudia dekenai ia kamonai henia herevadia ese ena lalona idia veria lasi, badina platfom amo idia hereva neganai unai hereva edia anina ia diba lasi.

Natudia dekenai hereva momokani uhedia idia hadodia, to haida edia kudoudia ese idia veridia, bona idia laloa Satana ena tanobada lalonai, hekwarahi be lasi, bona kohu ura henia karadia be mauri namona. Idia haida idia ura dikadika edia lagani tamona uru taudia idia bamodia bona idia ura edia kara idia tohotohodia.​—1 Sisiga 28:9; Luka 8:​12-14; 1 Korinto 15:33.

To, tanobada hegegemadai, Keristen ruma besedia edia natudia momo herea ese dala idia abia hidi Iehova ena kahana dekenai idia gini totona. Edia tama sina ese idia hadibadia namonamo karana amo dahaka ita diba?

Maragi Negana amo Durudia

Oiemu natudia be Iehova do idia abia hidi totona, gau badana be maragi negana amo oi durudia. Idia maragi neganai edia kudouna oi hamarerea diba bona idia ura diba idia abia, unai dainai nega momo idia itaia gaudia bona oi hadibaia herevadia be edia mauri ibounai lalonai do idia lalodia. (Hereva Lada-isidia 22:6) Unai dainai, emu natudia idia do maragi neganai, idia dekenai Iehova ena namo, iena lalokau bona iena siahu bada, oi hadibadia hamatamaia, bona mai emu lalona ibounai ida oi durudia, bena do idia diba Iehova ese dahaka ia karaia idia totona, vadaeni, unai amo edia moale ia dekenai do idia habadaia diba. Unai do idia karaia totona, tama sina momo be Watchtower Society ena buka bona magasin amo Iehova ia havaraia gaudia edia sivarai idauidau idia gaukaralaidia namonamo.

Danu, Iehova bona ena tomadiho dekenai idia abidadama bona idia hemataurai totona, gau badana be maragi negana amo idia hadibadia. Keristen heboudia dekenai bema ita itaia idia do sikuli lasi taudia idia hekwarahi hereva idia torea totona, sibodia edia Baibel amo siri idia tahua totona, eiava matadia idia mahuta neganai edia tama o sina ida mei rumana dekenai idia lao ranu keruma amo edia vairana idia huria totona, unai ese iseda kudouna ia hamarerea, ani? Ena be unai be gau maragidia, to unai kara amo natudia idia hadibadia Iehova dekenai idia hemataurai bona idia abidadama be gau badana!

Maragi negana amo sibodia edia stadi karana idia manadalaia be gau badana danu. Tau mai adavana edia natudia mero rua edia lagani be 2 neganai, Hadibaia Tauna Badana Ita Kamonai Henia bukana idia dekenai idia duahia.a Gabeai, sikuli dekenai idia lao neganai, daba ta ta iboudiai idia toreisi bona edia sinana ida Lau Egu Bible Sivarai Buka bona Mauri Hanaihanai Paradaiso Lalonai buka idia stadilaia.* Unai murinai, daba aniani idia do ania lasi neganai, edia tamana ese daba ena dina siri ia gwauraia bona idia kikilaia. Unai tamana bona sinana edia hekwarahi dainai hahenamo bada idia davaria, badina vanegai edia natuna memerodia be Iehova hesiai henia dalana idia abia hidi, ta ena lagani be 10 bona ma ta be 11 neganai bapatiso idia abia edia gwauhamata idia hahedinaraia totona.

Japan dekenai, Watch Tower Society ena brens opesi lalonai hesiai gaukara ia karaia tauhau namona ta ia gwau, ia maragi neganai ena sinana be hanuaboi iboudiai ia badinai ia helai bona ia durua ia guriguri totona, bona unai ese ia durua Iehova ia tura henia totona. Unai kara ia laloaboio diba lasi​—herevana ia be edeseniai ia lao eiava dahaka ia karaia, Iehova be ia kahirakahira dekenai ia noho bona karaharaga Ia durua.

Natudia hadibaia dalana dekenai idia kwalimu tama sina idia diba edia natudia be mai edia kara dika Adam dainai, bona edia natudia be idia maragi negana amo bema dala kererena idia badinaia neganai, idia durudia unai kara idia hamaoromaoroa totona. (Hereva Lada-isidia 22:15) Natudia idia do maragi neganai, sibodia edia ura tahua, lalo-auka, hekokoroku, bona taunimanima maumauraia karadia be idia dekena amo ita kokia be gau badana. Bema lasi, gabeai unai uhe do idia tubu bona Dirava bona iena dala dekenai do idia gwau-edeede. Hegeregere, tama sina haida edia ura be namo to edia natudia dekenai gau momo idia henia dainai natudia be sibodia idia laloa bada. Gabeai, unai natudia be edia tama sina bona Iehova idia matauraia be ia auka, idia be Baibel ia gwauraia ‘tanikiu lasi taudia’ bamona. (Hereva Lada-isidia 29:21) To, ruma dekenai natudia dekenai gaukara idia henidia neganai, bona idia hadibadia idia gima noho haida idia durudia totona, unai natudia momo be edia tama sina bona Iehova dekenai idia tanikiu henia.

Mai anina bada gauna ma ta be inai, natudia idia maragi neganai idia badinaia diba tiokratik gaukara idia henidia do idia manadalaia totona. Bema natuna ia do maragi neganai unai idia karaia noho lasi, reana ena lalohadai bona kudouna do ia honu taunimanima ma haida edia hereva amo, bona unai kara do ia tahua. Namona be ia goada karaia inai kara do ia karaia totona: Baibel ibounai ia duahia haorea, Watchtower Society ena buka ta ia stadilaia, Haroro School lalonai ia vareai, sivarai namona ia harorolaia, bona bapatiso do ia abia.

Takafumi ia gwau ia maragi neganai Gima Kohorona bona Noga! magasin duahia hanaihanai karana ia manadalaia badina ena sinana ese auka lasi henanadai ia torea bona aniani hegaegaelaia daiutu ena pata dekenai ia atoa, bena sikuli amo ia giroa mai neganai magasin amo haere ia tahua. Yuri ia gwau ia maragi neganai dina haida pioneer taudiab ida idia noho, unai pioneer taudia be Keristen haroro taudia momo lasi gabuna dekenai idia lao idia noho totona, idia ida ia lao haroro, ia itaia aniani namodia idia nadudia, bona mai moale danu haroro gaukara idia karaia goadagoada, bona unai ese iena lalona ia veria, idia bamona Iehova ena hesiai gaukara do ia karaia totona. Memero kekeni momo idia gwau idia maragi neganai, nega momo edia tamana bona sinana ese idia hakaudia lao Betele dekenai, unai ladana amo Watch Tower Society ena hedikwota bona brens opesi idia gwauraia, bona unuseniai mai edia moale danu Iehova ena hesiai gaukara idia karaia uhau bona ulato idia itaia. Natudia momo be idia maragi neganai Betele idia vadivadi henia, bona idia bada neganai idia momo be tanobada hegegemadai Betele dekenai idia gaukara hari.

Emu Natudia Totona Nega Oi Henia

Bema nega bada bona nega namodia oi henia emu natudia durudia totona, reana gabeai dala do idia abia hidi Iehova idia hesiai henia totona. Idia dekenai Baibel stadi oi karaia neganai, idia diba unai stadi oi hegaegaelaia ena nega ena bada be dahaka. Bema pura gunana stadi umui hadokoa gabuna oi diba lasi, eiava gau maragina ta dainai stadi oi karaia lasi, idia dekenai oi hahedinaraia stadi karana be anina bada lasi. To, bema idia itaia unai stadi karaia totona tamana bona sinana ese gau haida idia reaia, idia hegaegae namonamo, bona herevana dahaka ia vara unai stadi idia karaia hanaihanai, natudia idia diba unai stadi be mai anina bada. Ena be taravatu lasi, to sinana haida be dabua namona idia atoa natuna ia stadi henia totona, hebou dekenai idia lao eiava dekena tauna idia stadi henia neganai hegeregerena. Unai amo idia hahedinaraia Iehova tomadiho henia karana be mai anina bada.

Emu natudia ese Baibel ena diba do idia moalelaia totona, gau badana be nega bada oi henidia bona oi hekwarahi bada unai diba be edia lalona momokani dekenai do ia diho totona. Natuna maragidia be idia kamonai gaudia be drama amo idia haheitalaia neganai idia moale. Hegeregere, tamana ta ese ena natudia ia durudia Baibel ia gwauraia toreisi lou sivaraina idia laloa namonamo totona. Ia be daiutu maragina ta lalonai ia vareai, bona ia raka lasi neganai, ia be ia toreisi lou tauna Lasaro ena kara ia haheitalaia.​—Ioane 11:​17-44.

Natudia be taunimanima badadia ai idia lao noho neganai, edia lalona ena ura, edia daradara, bona edia lalo-hekwarahi gaudia be momo dainai, aonega dalanai durudia totona edia tama sina ese nega bada idia henidia be gau badana. Mai edia lalokau bona mai edia lalo-parara tama sina edia natudia be Iehova do idia abidadama henia totona, gau badana be nega idia atoa durudia totona. Natuna hani hadibaia gaukarana dekenai ia kwalimu tamana ta ia gwau, ena natudia be hekwakwanai idauidau idia davaria neganai, dina ta ta iboudiai idia ida Watchtower buka bona magasin amo heduru hereva idia tahua bona idia kikilaia ela bona unai hekwakwanai ia ore.

Hahine ta ena natudia be rua bona pioneer gaukara ia karaia dainai ia bisi bada herea, to ia itaia ena natuna tamona be ia hereva momo lasi bona tiokratik gaukara ia moalelaia lasi. Unai dainai sinana ia laloa, namona be sikuli dinadia iboudiai ruma dekenai ia noho ena natuna be adorahi kahanai ia ginidae neganai, bona ti idia inua hebou neganai ena natuna kekeni ida ia kiki. Sinana bona natuna kekeni idia kiki hebou namonamo karana amo natuna ia ura henia heduruna ia abia. Hari, haisikuli amo ia doko, bona ena sinana ia bamoa pioneer gaukara dekenai.​—Hereva Lada-isidia 20:5.

Hebamo Bona Haheitalai Namona

Nega idia atoa edia natudia totona, to unai sibona lasi, namona be hebamo namodia idia henidia danu. Hereva Lada-isidia 13:20 ia gwau: “Aonega taudia ida ia raka tauna be do ia aonega, to kavakava taudia ia bamodia tauna ese dika do ia davaria.”

Natudia hadibaia dalana dekenai idia kwalimu tama sina momo idia lalo-parara unai hereva be ia momokani. Mai ena natuna hani tauna ta ia gwau: “Guna negana lau laloa neganai, lau laloa hereva momokani orea dekenai emai natudia edia turadia be momo dainai, unai ese ia durudia Iehova idia hesiai henia totona. Idia lau hagoadaia emai kongregesen dekenai sibona lasi, to kongregesen ma haida amo taunimanima idia hetura henidia namonamo totona.” Lagani momo lalodiai Betele dekenai ia gaukara Keristen elda tauna ta be ena mero negana ia laloa, ia gwau: “Lau be mero neganai, ai be ia bada lasi rumana ta dekenai ai noho, to hanaihanai sekit naria tauna ai boiria ai danu ia noho totona. Danu, aiemai kongregesen ena special pioneer taudia be nega momo ai danu idia aniani hebou. Emai ruma dekenai idia digu bona ai idia bamoa momo. Idia edia ekspiriens lau kamonai bona edia moale lau itaia, bona unai ese lau ia durua ful-taim haroro gaukarana do lau laloa bada totona.”

Taunimanima be hekwakwanai idia davaria neganai, hebamo namodia ese idia durudia diba. Hahine ta ena natuna merona be hekwakwanai ia davaria neganai, ia ese Iehova ena Witness orea ena loaloa naria tauna ida unai hekwakwanai ia kikilaia. Unai tau ia gwau haroro gaukara ia karaia neganai, namona be ena mero ia hakaua lao danu. Unai naria tauna ia gwau: “Bema unai bamona oi karaia, lauma dalana dekenai do ia goada bona ena hekwakwanai do ia hanamodia diba.” Unai hahine ia gwau: “Aiemai kongregesen lalonai dala idia hegaegaelaia adorahi kahanai ai lao haroro totona, bona sikuli natudia momo, lagani bada regular pioneer taudia haida, bona elda ta ese idia karaia. Guna, egu natuna ia ura lasi ia lao, to daudau lasi murinai ia ura ia karaia, badina ruma dekenai ia giroa mai neganai ia moale bona hebamo namodia dainai goada ia abia. Haisikuli dekenai ia do noho neganai, bapatiso ia abia bona hua ta ta iboudiai heduru pioneer gaukara ia karaia, bona sikuli ia haorea neganai, regular pioneer gaukara ia karaia.” Hebamo namodia dainai bona Iehova ena ura ia karaia dainai namo ia davaria.

Sedira hebamo namodia idia noho lasi oiemu natuna do idia tura henia totona, to Iehova hesiai henia dalana idia abia hidi memero kekeni be nega momo idia gwau edia tama sina edia haheitalai namona be gau badana durudia totona. Memero kekeni momo ese edia tama sina idia lalodia bada bona idia ura edia kara idia tohotohodia. Yuri ese ena sinana ena kara ia laloatao, ia gwau ia be heabidae hahine bona taunimanima ia durudia, telefon amo ia hereva henidia bona gorere taudia edia aniani ia hegaegaelaia. Tatsuo ena ruma bese lalonai memero be hani, ia gwau hari idia ibounai be idia tubu bada vadaeni bona Iehova ena hesiai gaukara idia karaia, ia gwau: “Sinagu ese ai ia stadi henia hanaihanai diba lasi, badina Tamagu be Witness tauna lasi bona emai varavara taudia ese idia dagedage henia bada. To lau itaia hereva momokani totona ia gini goada bona Iehova ena hesiai gaukara ia moalelaia, bona unai ese lau ia hagoadaia. Danu, hekwakwanai ai davaria neganai, mai ena ura danu ai ia durua noho hanuaboi ai ela bona daba rere kahirakahira dekenai.” Tama sina edia aonega hereva be mai ena siahu bada bema abidadama kara idia karaia danu. Yoichiro ese ena tama sina inai bamona ia gwauraidia: “Nega ta lau kamonai lasi egu tama sina ese kongregesen taudia be hagoadaia lasi hereva amo idia gwauraidia; bona ai natudia idia koua taunimanima edia kerere dainai ai udu-mauri lasi.”​—Luka 6:​40-42.

Moale Gauna be Natudia be Iehova Idia Abia Hidi

Ita gwau diba lasi dala ta oi badinaia neganai emu natudia be Iehova do idia abia hidi. Nega ta ta ai reana idia totona do oi lalo-hekwarahi. To guna ai kikilaia lalo-hekwarahi tamana ena hereva be inai: “Ai be tama sina dainai, hanaihanai Iehova ena tanobada oreana ia gwauraia heduru herevadia be mai abidadama danu ai badinaia toho. Unai be heduru bada herea hekwakwanai ai hanaidia totona.” Edia hekwarahi bada dainai natudia hadibaia gaukarana dekenai idia kwalimu.

Oibe, bema oi goada karaia Baibel ia gwauraia heduru herevadia oi badinadia totona, bema emu natudia dekenai Iehova idia lalokau henia ena badina idauidau oi hadibadia, bona mai emu abidadama danu unai hereva oi badinaia bona oi ura dikadika oi durudia, gabeai reana oiemu hekwarahi dainai do oi kwalimu diba danu. Ai kikilaia vadaeni merona ena hereva oi laloatao, a? Ena be ia gwau ena lalona ia hadaia Iehova ena Witness tauna ai do ia lao lasi totona, to gabeai ena lalohadai ia haidaua. Ia hekwakwanai momo laganidia lalonai ena sinana ese ia durua, bona murinai ia gwau: “Lau moale badina ia hesiku lasi to lau ia durua noho!” Reana gabeai emu natudia be unai bamona do idia karaia.​—Galatia 6:9.

[Footnotes]

[Picture on page 30]

Natudia naria negana oi laloa neganai oi moalelaia, a?