• Vanegai Tau ta Oi Hagoadaia, A?
    Gima Kohorona—1995 | January 15

    • Vanegai Tau ta Oi Hagoadaia, A?

      ELENA ena mauri lagani be 17 neganai, doketa taudia ese ena bogana dekenai kensa gorere idia davaria. Iena sinana, Mari, ese Elena ena hisihisi bada ia itaia neganai ia lalohisihisi bada.

      Nega ia hanai murinai, Elena be hospital ta Madrid, Spain, dekenai idia siaia; iena ruma Canary Islands amo, unai be kilomita 1,900. Madrid dekenai, doketa taudia idia gwau do idia ivaia to rara do idia gaukaralaia lasi. (Kara 15:​28, 29) To daudau lasi idia ivaia matamaia murinai, ia hedinarai ena gorere dainai Elena do ia mase. Kensa be ena tauanina ibounai dekenai ia lao, bona ivaia taudia ese idia kokia diba lasi. Madrid dekenai ia ginidae murinai dina 8 idia ore bena ia mase.

      Mari ese unai lalohisihisi bada negana be sibona ia haheaukalaia lasi. Keristen elda taudia rua ese sibodia edia loaloa davana idia karaia bona kekeni sinana bona ena natuna mero badana idia bamodia bona idia lao Madrid dekenai, bona unuseniai idia noho ela bona Elena ia mase. Mari ia gwau: ‘Lau idia durua egu lalohisihisi bada karana lau haheaukalaia totona. Lau idia hagoadaia karana lau laloaboio diba lasi. Lauma dalanai lau idia hagoadaia bona lau idia durua bada herea momokani. Momokani, idia be “lai koua gabuna hegeregerena.” ’​—Isaia 32:​1, 2.

      Mai edia lalokau mamoe naria taudia ese mai edia hebogahisi ida iena mamoe idia naridia dainai, Iehova ia moale. (Hereva Lada-isidia 19:17; 1 Petero 5:​2-4) To, hagoadaia hereva henia karana be elda taudia edia maduna sibona lasi. Keristen taudia iboudiai idia hebou lauma dalanai heduru hereva idia abia totona, bona ‘idia hagoadaia heheni’ totona. (Heberu 10:​24, 25) Hagoadaia heheni be Keristen hebamo karana ta.

      Hagoadaia Heheni Karana be Dahaka?

      Ranu ia abia lasi neganai, palaoapalaoa hairaina be do ia marai, unai hegeregerena, taunimanima ta ta​—ruma bese bona kongregesen lalonai​—be bema hagoadaia hereva idia abia lasi, do idia manoka. To, bema nega korikori dekenai hagoadaia hereva idia abia, hetoho idia davaria taudia idia haheauka diba, lalo-metau taudia edia lalona ia hamoalea diba, bona mai edia abidadama danu Dirava idia hesiai henia taudia ia hagoadaia diba.

      Greek gado hereva dekenai “hagoadaia” ena anina danu be lalohisihisi hamaragia, hereva amo durua, bona hereva namodia henia. Unai dainai, tau ta hagoadaia ena anina be ita hamaoroa ena kara be ia namo sibona lasi. Namona be ia badinaia diba heduru hereva ita henia bona lauma dalanai ita durua.

      Oibe, Greek hereva ta idia hahanaia “hagoadaia”, ena anina ma ta be “oi boiria mai oi dekenai.” Lauma dalanai iseda tadikaka bona taihu ida ita raka neganai, bema idia ta do ia manoka eiava do ia hekwakwanai ita durua haraga diba. (Kohelete 4:​9, 10) Gau namona be Iehova ena taunimanima ese gaukara be “mai lalo-tamona danu idia karaia hebou.” (Sefania 3:9) Bona aposetolo Paulo be Keristen tauna ta ia gwauraia “durua tauna.” (Filipi 4:3) Idia gaukara hebou neganai, idia gini hebou maduna tamona idia huaia, unai ese metau ia hamaragia, unai ia momokani lauma dalanai idia manoka taudia dekenai.​—Mataio 11:​29 itaia.

      Hagoadaia Hereva Idia Henia

      Hagoadaia hereva ita henia be gau badana, unai dainai namona be Baibel lalonai hagoadaia karana ena haheitalai haida ita laloa. Dirava ena peroveta tauna Mose be kahirakahira ia mase neganai, Iehova ese Iosua dekenai maduna ia henia Israel taudia do ia gunalaidia totona. Unai be gaukara metauna, Mose be unai ia diba vadaeni. (Numera 11:​14, 15) Unai dainai, Iehova ese Mose dekenai ia gwau “Iosua oi hagania bona oi hagoadaia bona ena lalona do oi ha-aukaia.”​—Deuteronomi 3:28.

      Israel ena hahemaoro taudia edia nega lalonai, Iefeta ena natuna kekenina be mai ena ura danu ena tamana ena gwauhamata herevana hegeregerena ia karaia, bona ruma bese havaraia karana ia reaia Iehova ena dubu dekenai hesiai gaukara do ia karaia totona. Ia reaia gauna idia laloaboio, a? Lasi, badina Hahemaoro Taudia 11:40 ia gwau: “Lagani ta ta amo Israel kekenidia ese dina 4 Iefeta, tau Gilead, ena natuna kekenina idia vadivadi henia bona ena ladana idia hanamoa.” Iefeta natuna kekenina be sibona ena ura ia dadaraia bona taunimanima ese idia vadivadi henia neganai reana unai ese ia hagoadaia bada.

      Nega haida hagoadaia hereva henia totona idia gari lasi be namo. Aposetolo Paulo ena laolao ginigunana lalonai, Asia Minor ena siti haida dekenai dagedage bada ia davaria. Antioka amo idia lulua, bona Ikonio dekenai kahirakahira idia hamasea, bona Lustera dekenai nadi amo idia hodoa bona idia rakatania, idia laloa ia mase. To, daudau lasi murinai, Paulo bona idia bamoa taudia be unai siti dekenai idia giroa lao, “Iesu ena diba tahua taudia edia kudouna idia hagoadaia. Idia hereva goada, idia gwau: ‘Hisihisi momo lalonai Dirava ena Basileia do [ita] raka vareai.’ ” (Kara 14:​21, 22) Paulo be ia gari lasi ena mauri ia henia unai diba tahua taudia matamatadia ia hagoadaia totona.

      To, ita gwau lasi Keristen diba tahua taudia matamatadia sibona ita hagoadadia. Lagani haida murinai Paulo be laolao aukana ta ia karaia Roma dekenai ia lao neganai. Unuseniai kota vairanai do ia gini. Roma ia lao henia neganai reana ena lalona ia metau sisina. To Roma amo sautist kahana kilomita 74 gabuna dekenai ia ginidae neganai ena kudou ia moale. Dahaka dainai? Badina Sitoa Toi bona Apio ena Hoihoi Gabunai Roma tadikakadia be idia mai ia idia hedavari henia totona. “Paulo ese idia ia itaia neganai Dirava dekenai ia tanikiu henia bona lalona dekenai goada ia abia.” (Kara 28:15) Unai bamona negadia lalonai, ita hedinarai sibona ese iseda abidadama tadikaka edia lalona reana ia hagoadaia diba.

      Lalona Hagoadaia Daladia Ita Tahua

      Dala idauidau ai haida edia lalona ita hagoadaia diba. Tadikaka ta eiava taihu ta ese hereva namona ia karaia Haroro Sikuli ai, a? Oi moale badina lauma dalanai memero bona kekeni badadia haida be kongregesen lalonai idia noho, a? Burukadia edia haheauka ese oi ia hamoalea, a? Ruma-ta-ruma-ta haroro gaukara dekenai painia ta ena Baibel gaukaralaia namonamo karana oi laloa bada, a? Vadaeni, unai kara iboudiai dainai idia oi hanamoa bona edia lalona oi hagoadaia.

      Lalona hagoadaia karana be mai anina bada kongregesen lalonai sibona lasi, to ruma bese lalonai danu. Unai kara ese tama sina ia durudia ‘Lohiabada ena hadibaia hereva edia natudia dekenai do idia hadibaia’ totona. (Efeso 6:4) Natuna ta ita hadibaia ia be kara ta dekenai ia kwalimu, bona ena kwalimu ena badina ita gwauraia neganai, ena lalona ita hagoadaia momokani unai! Edia mauri lagani 13 ia lao 19 negana lalonai, hedibagani bona metau momo idia hekwarahilaia diba dainai, namona be edia lalona ita hagoadaia hanaihanai.

      Bema maragi neganai lalona idia hagoadaia lasi, mero eiava kekeni edia mauri ia dika diba. Harihari Michael, Keristen elda ta, be mai moale ida taunimanima ia bamodia, to ia gwau: “Egu tamana be nega ta lasi lauegu kara ia hanamoa. Lau bada lau lao neganai lau laloa lau namo lasi. . . . Ena be hari egu lagani be 50, to lau moale bema egu turadia ese egu elda gaukarana idia gwauraia namo. . . . Lau dekenai idia vara gaudia ese lau idia hadibaia ma haida edia lalona lau hagoadaia be gau badana, bona dala haida lau tahudia edia lalodia lau hagoadaia totona.

      Namona be Daidia Edia Lalona Ita Hagoadaia?

      Namona be idia gaukara goada Keristen elda taudia edia lalona ita hagoadaia. Paulo ia gwau: “Aiemai varavara taudia e, umui dekenai ai noinoi, ekalesia ena dala umui idia hadibaia noho taudia be mai mataurai danu do umui kamonai henidia. Edia gaukara dainai do umui lalokau henidia bona mataurai henidia.” (1 Tesalonika 5:​12, 13) Nega haida reana ita laloa elda edia gaukara aukana ita totona be vaia edia gaukara bona ita laloa bada lasi. To bema ita ese idia ita hanamodia edia gaukara dainai, ita ese edia maduna ita hametaua lasi bamona.

      Namona be ita huanai hekwakwanai momo idia davaria taudia edia lalona ita hagoadaia danu. Baibel ese ita ia sisiba henia, ia gwau: “Gari taudia umui hagoadaia, bona manoka taudia umui durua.” (1 Tesalonika 5:14) Mai natuna to adavana lasi taudia, vabu bona dogae, memero bona kekeni badadia, burukadia, bona gorere taudia be nega haida idia lalohisihisi eiava lauma dalanai idia manoka diba.

      Maria be Keristen hahinena ta bona ena adavana ese ia rakatania. Ia gwau: “Iobu bamona, nega haida lau ura lau mase. To lau haheauka noho, badina haida ese lauegu lalona idia hagoadaia. Idia lau diba namonamo elda taudia rua ese hora momo idia negea lau idia hagoadaia ful-taim hesiai gaukara lau rakatania lasi totona. Bona mai edia hebogahisi taihudia rua ese lau idia hagoadaia, egu lalona ena hisihisi ibounai idia lau hamaorodia neganai. Baibel amo, idia ese lau idia durua Iehova ena lalohadai unai gaudia dekenai lau diba totona. Lau diba lasi nega hida Salamo 55:​22 ai duahia, to lau diba unai siri be egu mauri lalonai lau gaukaralaia dainai, sisina sisina egu goada lauma dalanai bona tauanina dalanai lau davaria lou. Unai ibounai be lagani 12 gunanai ia vara, bona lau moale badina ful-taim hesiai gaukara lau karaia noho ema bona hari. Ena be nega haida egu lalona ia hisihisi sisina, to egu mauri be namo bona mai ena moale. Lau diba unai bamona nega lalonai ta idia hagoadaia neganai, unai ese iena mauri ia durua bada.

      Haida ese hagoadaia hereva idia abia be namo, badina guna idia kerere bona hari idia hekwarahi unai kerere hamaoromaoroa totona. Reana idia be lalokau dalana amo sisiba idia abia vadaeni. (Hereva Lada-isidia 27:6) Bema kerere tauna ese Baibel ena sisiba ia badinaia, unai sisiba idia henia elda taudia ese kerere tauna idia hagoadaia bona idia hanamoa. Edia hagoadaia hereva ese gau namodia rua idia havaraia​—ia hamomokania idia ese kerere tauna idia lalokau henia bena do ia ‘lalohisihisi bada’ lasi, bona edia hereva dainai unai sisiba ia badinaia ena namo ia laloatao.​—2 Korinto 2:​7, 8.

      Elda ta be kerere badana ta ia karaia dainai ena kongregesen hesiai dagina ia haboioa. Unai neganai ia gwau: “Hebou dekenai lauegu elda dagi idia kokia ena hereva idia gwauraia neganai, lau laloa tadikaka be do idia hemarai lau idia hereva henia neganai, to elda taudia ese egu dagi idia kokia ena badina idia herevalaia hedinarai lasi bona lauegu lalona idia hagoadaia momo. Kongregesen tadikakadia danu ese lau dekenai lalokau bona hetura karadia momo idia karaia. Unai kara ese lau ia durua lauma dalanai lau namo lou totona.”

      Tadikaka Ita Hagoadadia

      Iseda mauri lalonai ita bisi momo dainai ma ta hagoadaia karana ita laloaboio haraga diba. To, namo bada ia havaraia diba! Bema oi ura ta oi hagoadaia momokani, gau rua oi laloatao. Ginigunana be, dahaka do oi hereva oi laloa namonamo, emu hagoadaia herevana ese do ia durua ena hekwakwanai ia hanaia totona. Iharuana be, tadikaka oi raraidia daika oi hanamoa bona daika oi hagoadaia oi itaia totona, bona nega namona ai oi lao hereva henia.

      Bema unai bamona oi karaia momo, moale bada do oi davaria. Badina ita diba, Iesu ese ita ia hagoadaia, ia gwau: “Henia kara ena moale be bada, abia kara ena moale be maragi.” (Kara 20:35) Haida ita hagoadadia neganai, ita sibona ita hagoadaia. Namona be oi hegaegae dina ta ta iboudiai ma ta oi hagoadaia toho, ani?