Simony Karana Dainai Oi Naria Namonamo!
SAMARIA tauna Simona be taunimanima ese idia matauraia bada. Ia be aposetolo edia nega lalonai ia noho, bona taunimanima be iena meamea karadia idia hoalaia bada dainai idia gwau: “Inai tau be Dirava ena Siahu, ena ladana be Siahu Badana.”—Kara 8:9-11.
To, Simona be bapatiso Keristani tauna ai ia lao murinai, ia ese guna ia gaukaralaia siahuna ia hanaia siahuna ta ia itaia. Unai siahu be Iesu ena aposetolo taudia ese idia abia, bona unai siahu dainai idia ese ma haida dekenai lauma helaga ena harihari gauna, hoa karadia idia karaia siahuna, idia henia diba. Simona be unai ia hoalaia bada dainai, aposetolo taudia dekenai moni ia mailaia bona ia noinoi: “Inai siahu umui henia lau dekenai, bona lauegu imana ia dekenai lau atoa tauna be Lauma Helaga do ia abia.”—Kara 8:13-19.
Aposetolo Petero ese Simona ia gwau henia, ia gwau: “Oiemu moni be ia dika oi danu, badina be oi laloa Dirava ena harihari gauna oi hoia diba moni dekenai. Inai gaukara dekenai oi be gabu lasi, badina be oiemu kudouna be maoro lasi Dirava ena vairanai.”—Kara 8:20, 21.
Unai Baibel sivaraina amo inai hereva “simony” ia mai, bona ena anina be “dubu lalonai dagi eiava ladana bada hoia karana.” New Catholic Encyclopedia ia gwau lagani 800 ia lao lagani 1100 lalonai, “monasteri rumadia, dubu gunalaia taudia edia orea, bisop taudia edia orea, bona pope edia orea lalonai danu simony karana idia karaia badabada.” The Encyclopædia Britannica (1878) namba 9 ia gwau: “Pope abia hidi hebouheboudia edia histori ia stadilaia tauna be do ia davaria elekseni ibounai lalonai idia ese simony karana idia karaia, nega momo herea unai hebouhebou lalodiai idia karaia simony karana be dika momokani, idia hemarailaia lasi, bona taunimanima ibounai ese idia itaia diba dalanai idia karaia.”
Hari inai nega ena Keristani taudia momokanidia ese simony karana dainai do idia naria namonamo be namo. Hegeregere, reana haida be idia dekenai hahenamo ma haida idia henia diba taudia dekenai hanamoa herevadia momo o harihari gaudia momo idia henia. Danu, reana hahenamo idia henia diba taudia be harihari gaudia idia henia diba taudia sibodia—nega momo idia ura dikadika unai idia karaia—idia kara namo henidia. Unai kara ruaosi be simony karadia, bona Baibel ese ia hahedinaraia goevagoeva idia be kerere. Petero ese Simona ia hereva auka henia, ia gwau: “Oiemu dika dekena amo oiemu lalona oi giroa, bona Lohiabada dekenai oi guriguri, ia ese sedira oiemu kudouna ena laloa [“oiemu palani,” New Jerusalem Bible] do ia huria totona. Badina be lau diba, oiemu kudouna be mama dikana dekenai ia honu, bona kara dika ese ia kwatua oi.”—Kara 8:22, 23.
Moale gauna be Simona ese ena kerere ena bada ia lalo-pararalaia. Aposetolo taudia ia noia, ia gwau: “Umui noinoi Lohiabada dekenai lau dainai, inai hari umui gwauraia gaudia idia vara lasi lau dekenai.” (Kara 8:24) Inai sivarai amo idia dibaia mai anina bada gauna idia badinaia dainai, Keristani taudia momokanidia idia hekwarahi, simony karana ena kahana ibounai idia dadaraia totona.