Lauma Dalanai Oi Goada Oi Lao Noho!

Namona be iseda bapatiso dinana be ita laloa bada bona ita laloatao dinana. Badina unai dina ai taunimanima vairanai ita hahedinaraia gwauhamata ita karaia vadaeni Dirava do ita hesiai henia totona.

MOMO be unai idia karaia totona idia hekwarahi bada herea​—⁠nega daudau idia karaia kara dikadia idia rakatania, hebamo dikadia idia rakatania, idia manadalaia lalohadai bona kara idia haidaua.

To, ena be Keristani tauna ena mauri lalonai bapatiso dinana be mai anina bada bona moale negana, unai dina be matamana sibona. Aposetolo Paulo ese Iudea dekenai idia noho bapatiso Keristani taudia ia hamaoroa: “Namona be Keriso ena hadibaia hereva, diba hamatamaia gaudia ita rakatania. Bona iena hereva badadia do ita tahua.” (Heberu 6:⁠1) Oibe, namona be Keristani taudia ibounai ‘edia abidadama do ia tamona, bona edia diba Dirava ena Natuna dekenai danu be tamona. Bona idia be tau badadia do idia halaoa, oibe, Keriso ena bada hegeregerena danu do idia abia gwauraia.’ (Efeso 4:13) Ita goada ita lao bona hereva badadia ita diba neganai, unai dala sibona amo ‘abidadama dekenai do ita marere lasi.’​—⁠Kolose 2:⁠7, NW.

Idia hanaia lagani haida lalonai, bapatiso matamata taudia tausen momo be Keristani kongregesen lalonai idia vareai. Reana oi be idia ta. Aposetolo taudia edia negai idia noho tadikaka hegeregeredia, oi ura lasi lauma dalanai beibi bamona do oi noho. Oi ura oi bada, oi goada oi lao! To edena bamona unai oi karaia diba? Bona, edena dala idauidau ai unai bamona oi goada oi lao diba?

Sibona Emu Stadi Karana amo Oi Goada Oi Lao

Paulo ese Filipi Keristani taudia ia hamaoroa: “Bona inai gauna lau gurigurilaia noho, umui emui lalokau be do ia bada ia lao noho mai emui diba maoromaoro bona lalo-parara ibounai ida.” (Filipi 1:​9, NW) Lauma dalanai oi goada totona “diba maoromaoro” oi abia be gau badana. ‘Iehova Dirava bona Iesu Keriso oi dibaia’ karana be hanaihanai oi karaia gauna, bapatiso murinai ia doko gauna lasi.​—⁠Ioane 17:⁠3.

Keristani taihu ta, ena ladana do ita gwauraia Alexandra, ena mauri lagani be 16 neganai ia bapatiso bona lagani 10 murinai unai hekwakwanai ia davaria. Ia be hereva momokani lalonai ia bada bona hanaihanai Keristani hebou bona haroro gaukara dekenai ia lao. Ena sivarai ia torea, ia gwau: “Idia hanaia hua haida lalonai, lau lalo-parara gau ta ia maoro lasi. Egu lalona lau hadaia lau sibona egu kara, egu mamina hereva momokani dekenai be dahaka, bona dahaka dainai hereva momokani lalonai lau noho do lau tahua namonamo.” Dahaka ia davaria? Ia gwau: “Hereva momokani lalonai lau noho edia badina lau davaria neganai lau gari bada. Lau laloatao lau tubu daekau noho lalonai, hebou bona haroro gaukara idia gwauraia momo. Toana be sibona egu stadi karana bona guriguri karana be do idia vara kava. To, lau sibona egu kara lau tahua neganai, lau davaria unai ia vara lasi.”

Aposetolo Paulo ia gwau: “Guna ita abia dae hadibaia hereva ena dala do ita badinaia noho be namo.” (Filipi 3:16) Unai dala ita badinaia karana ese ita ia durua ita goada ita lao noho totona. Oi do bapatiso lasi neganai, diba momo hadibaia tauna ta ese pura ta ta lalonai oi ida Baibel ia stadilaia. Lauma gaudia oi laloa bada matamaia neganai, pura ta ta ena stadi oi hegaegaelaia, bona buka lalonai idia torea hedinarai lasi siridia be Baibel lalonai oi duahia bona gau ma haida oi karaia danu. Hari oi bapatiso vadaeni, bona ‘unai dala oi do badinaia noho,’ a?

Bema lasi, emu mauri lalonai oi atoa guna gaudia do oi tahua namonamo, ‘gau badadia edia toana do oi diba.’ (Filipi 1:10) Iseda mauri lalonai ita bisi bada herea dainai, sibona eda kara ita biagua be namo, bena nega do ita atoa sibona eda Baibel duahiduahi bona stadi ita karaia totona. To, ita abia namo ese iseda hekwarahi ia hanaia. Alexandra ena ekspiriens mani oi laloa lou. Ia gwau: “Idia hanaia lagani 20 mai kahana lalonai hereva momokani lalonai lau noho neganai, hebou bona haroro gaukara dekenai lau lao kava.” To, ma ia gwau: “Hari lau lalo-parara unai gaudia be mai anina bada, to hekwakwanai idia vara neganai unai gaudia sibona ese lau idia durua diba lasi. Unai ia vara ena badina be lau sibona egu stadi karana lau karaia lasi, bona nega ta ta sibona lau guriguri bona egu guriguri be egu kudouna amo lau gwauraia lasi. Hari lau lalo-parara egu lalohadai do lau haidaua be namo bona sibona egu stadi karana do lau hamatamaia, unai amo Iehova do lau dibaia namonamo bona ia do lau lalokau henia bona iena Natuna ese ita dainai ia henia gauna do lau laloa bada.”

Bema oi ura heduru oi abia sibona emu stadi karana oi hamatamaia totona, oiemu kongregesen lalonai elda taudia bona lo Keristani taudia haida be mai moale ida oi do idia durua diba. Bona danu, May 1, 1995, bona August 15, 1993, Gima Kohorona lalonai bona May 15, 1986, Watchtower, lalonai heduru hereva namodia idia noho.

Dirava Kahirakahira Dekenai Oi Lao be Namo

Oi goada oi lao dalana ma ta be emu hetura karana Dirava ida. Haida be unai bamona idia karaia haraga be gau badana. Anthony mani oi laloa, ia be mero maragi neganai ia bapatiso. Ia gwau: “Emai ruma bese lalonai bapatiso ia abia natuna ginigunana be lau. Egu bapatiso murinai, egu sinana be mai lalokau ida lau ia rosia. Lau itaia ia moale bada herea. Ai moale bada herea bona egu mamina be ia goada.” To, unai sivarai ena kahana ma ta ia noho. Anthony ia gwau: “Nega daudau lalonai emai kongregesen lalonai matamata ta ia bapatiso lasi, unai dainai lau hekokoroku bada. Hebou dekenai lau haere bona egu hereva lau henia dainai lau hekokoroku. Iehova hanamoa karana lau laloa lasi, to taunimanima ese lau idia hanamoa karana lau laloa bada. Iehova lau tura henia namonamo lasi.”

Anthony hegeregerena, haida be gwauhamata idia karaia Iehova idia hamoalea totona lasi, to ma haida idia hamoalea totona. Ena be unai bamona idia karaia, Dirava ia ura unai taudia be edia gwauhamata hegeregerena ia do idia hesiai henia. (Hadibaia Tauna 5:4 itaia.) To, bema Iehova idia tura henia lasi, unai idia karaia be auka. Anthony ia gwau: “Egu bapatiso negana ai lau mamia moalena be ia noho daudau lasi. Lau bapatiso murinai, lagani ta ia do ore lasi lalonai, kara dika badana lau karaia bona kongregesen elda ese lau idia sisiba henia. Unai kara lau karaia loulou dainai kongregesen murimurinai lau idia atoa. Iehova dekenai egu mauri lau gwauhamatalaia bena lagani 6 murinai, tau ta lau alaia mase dainai, pulisi ese lau idia dogoatao bona dibura dekenai lau idia atoa.”

Iehova ida Hetura Namonamo Karana Oi Havaraia

Herevana oi be edena bamona, Keristani taudia ibounai be Baibel ena boiboi idia badinaia diba: “Dirava dekenai do umui raka kahirakahira lao, vadaeni ia ese umui dekenai do ia raka kahirakahira mai.” (Iamesi 4:⁠8) Momokani, oi be Baibel oi stadilaia matamaia neganai Dirava kahirakahira oi noho. Oi dibaia Dirava be Kerisendom lalonai idia tomadiho henia laumana ta sibona lasi, to ia be lauma tauna korikorina bona ia be mai ena ladana, Iehova. Oi dibaia danu ia be mai ena kara namodia, ia be ‘hebogahisi bona hariharibada Diravana, badu dekenai ia haraga lasi, to hebogahisi bona lalokau dekenai ia haraga.’​—⁠Esodo 34:⁠6.

To, emu gwauhamata hegeregerena Dirava oi hesiai henia totona, ia badibadinai do oi lao be namo! Edena bamona oi karaia diba? Salamo torea tauna ia guriguri ia gwau: “Lohiabada e, oiemu kara lau dekenai do oi hadibaia. Oiemu dala lau dekenai do oi hedinaraia.” (Salamo 25:⁠4) Baibel bona Society ena buka idauidau oi stadilaia karana ese oi do ia durua Iehova oi dibaia goevagoeva totona. Hanaihanai emu lalona ibounai ida oi guriguri be mai anina bada danu. Salamo torea tauna ese ita ia hagoadaia ia gwau: “Emui kudouna edia ura gaudia, be ia dekenai do umui hamaoroa.” (Salamo 62:⁠8) Oi itaia Dirava ese emu guriguri ia haerelaia neganai, do oi mamia Dirava be oi ia laloa bada. Unai amo do oi mamia oi be ia badibadinai oi noho.

Dirava kahirakahira dekenai oi lao negana ma ta be hahetoho bona hekwakwanai idia vara neganai. Reana oi be hekwakwanai aukadia bona emu abidadama idia tohoa gaudia do oi davaria, hegeregere gorere, hahetoho oi davaria sikuli bona gaukara gabunai, eiava moni dalanai hekwakwanai oi davaria. Bona danu reana tiokratik gaukara, hegeregere haroro gaukara, hebou lao henia karana, eiava emu natudia ida Baibel oi stadilaia be auka oi dekenai. Namo lasi unai hekwakwanai be oi sibona oi huaia! Iehova oi noia goadagoada oi ia durua totona, ena sisiba bona ena hakaua dalana totona oi noinoi. (Aonega Herevadia 3:​5, 6) Ena lauma helaga totona oi noinoi! (Luka 11:13) Dirava ena heduru mai lalokau ida oi mamia neganai, ia badibadinai do oi lao momokani. Salamo torea tauna Davida ia hereva hegeregerena, “Lohiabada ena kara do umui tahua namonamo, iena dala do umui tohoa namonamo, vadaeni do umui diba momokani, Lohiabada be namo momokani. Lohiabada dekenai idia abidadama taudia ese, moale do idia davaria.”​—⁠Salamo 34:⁠8.

Anthony be dahaka ia karaia? Ia gwau: “Lau laloatao, guna Iehova ena ura karaia totona, lauma dalanai lau be mai egu tahua gaudia momo. Unai lau laloa neganai, lau lalohisihisi bada. To unai hisihisi bona lalo-hekwarahi negana ai, Iehova ena lalokau lau laloatao. Nega sisina daudau lalonai Iehova lau guriguri henia lasi, to gabeai lau karaia, bona egu kudouna ibounai ida gau ibounai lau gwauraia ia dekenai, bona lau noia lau do ia gwauatao. Baibel lau duahia matamaia danu bona lau hoa badina gau momo lau laloaboio bona lau davaria danu Iehova lau diba namonamo lasi.” Ena be Anthony ese ia karaia kara dika ena davana dibura rumana dekenai ia do haorea lasi, to unai gabu ena Witness taudia ese idia durua lauma dalanai ia goada ia lao totona. Mai moale ida Anthony ia gwau: “Iehova bona iena orea lau tanikiu henia, badina egu kara gunadia lau kokia diba bona lau hekwarahi noho dina ta ta ai kara matamata lau hahedokilaia totona. Hari, egu hetura karana Iehova ida be mai anina bada momokani lau dekenai.”

Lauma Dalanai Oi Goada Oi Lao Emu Haroro Gaukara Lalonai

Iesu Keriso ese ena murinai idia raka taudia ia hagania “Basileia ena Sivarai Namona” idia harorolaia taudia ai do idia lao. (Mataio 24:14) Oi be sivarai namona harorolaia tauna matamatana dainai, oiemu diba haroro gaukara dekenai be reana ia maragi. Vadaeni, edena bamona do oi goada oi lao bena ‘haroro gaukara oi karaia namonamo’ diba?​—⁠2 Timoteo 4:⁠5.

Dala ta be lalohadai maorona do oi hahedinaraia. Haroro gaukara be “dava bada gauna,” hahenamo ta bamona do oi laloa. (2 Korinto 4:⁠7, NW) Ia amo iseda lalokau, abidadama bona kara maoromaoro Iehova dekenai ita hahedinaraia. Ia ese dala ia kehoa iseda dekena taudia dekenai laloa momo karana ita hahedinaraia totona. Haroro gaukara lalonai ita sibona ita henia karana ese moale momokanina do ia havaraia.​—⁠Kara 20:⁠35.

Iesu danu be haroro gaukara ia laloa maoromaoro. Haida dekenai Baibel ena hereva momokanidia ia herevalaia be “aniani” bamona ia dekenai. (Ioane 4:34) Unai dainai, iena ura ma haida ia durua totona be inai hereva dekenai ia hedinarai, ia gwau “Lau ura.” (Mataio 8:⁠3) Iesu be taunimanima ia hebogahisi henia, bona idia haida be Satani ena tanobada dainai “edia tauanina ia manokamanoka, bona idia lao idau gabu idau gabu dekenai.” Unai bamona taudia ia laloa bada momokani. (Mataio 9:​35, 36) Oi danu, lauma dalanai dibura dekenai idia noho bona Dirava ena Hereva amo diba idia abia be namo taudia ‘oi ura’ oi durua, a? Vadaeni do oi ura dikadika Iesu ena hahegani oi badinaia: “Umui lao bona bese iboudiai taudia be hahediba taudia ai do umui halaoa.” (Mataio 28:​19, NW) Momokani, oi do ia doria emu goada bona mauri hegeregerena haroro gaukara do oi karaia.

Oi goada oi lao dalana ma ta be hanaihanai do oi haroro​—⁠bema oi hegeregere pura ta ta ibounai. Unai oi karaia neganai, ta be nega ta ta sibona ia haroro dainai ia abia hemarai bona gari mamina do ia haorea. Hanaihanai oi haroro dainai dala ma haida ai hahenamo do oi davaria danu. Oi do ia durua hereva momokani oi laloa bada totona, oiemu lalokau Iehova bona emu dekena tauna dekenai do oi habadaia, bona oi ia durua Basileia ena helaro do oi laloa noho totona.

To, edena bamona bema gau ta dainai oi haroro momo diba lasi? Bema unai gauna oi haidaua diba lasi, hahegoada oi abia diba badina mai emu lalona ibounai ida emu hesiai gaukara oi karaia neganai, Dirava be unai ia moalelaia. (Mataio 13:23) Reana dala ma haida ai oi goada oi lao diba, hegeregere emu haroro dalana oi hanamoa. Kongregesen lalonai, Haroro Sikuli bona Hesiai Hebou amo heduru bada oi abia diba. Ita haroro namonamo neganai, do ita moalelaia bona anina namona do ita havaraia.

Vadaeni, ia hedinarai goevagoeva, lauma dalana ia goada ia lao karana be ta ena bapatiso dinana ai ia doko lasi. Aposetolo Paulo ese guba dekenai mase diba lasi maurina do ia abia ena helaro be inai bamona ia gwauraia: “Lauegu varavara taudia e, lau laloa lasi, inai kwalimu ahuna lau abia vadaeni. To kara tamona lau goadalaia noho, lauegu kara gunadia lau laloaboio, bona vaira neganai gaudia do lau goadalaia. Unai dainai heau helulu ena dokona gabuna dekenai maoromaoro lau heau henia, kwalimu ahuna do lau abia totona. Inai kwalimu ahuna be guba dekenai mauri matamata, Dirava ese lau ia boiria totona gauna, Keriso Iesu dainai. Lauma ena gaudia dekenai ita goada vadaeni taudia be inai lauegu laloa bamona do ita laloa be namo. To bema umui haida emui laloa be idau, Dirava ese emui lalona do ia hadiaria diba.”​—⁠Filipi 3:​13-15.

Oibe, Keristani taudia iboudiai, herevana edia helaro be guba dekenai mase diba lasi maurina do idia abia eiava tanobada ai Paradaiso lalonai mauri hanaihanai do idia abia, namona be ‘vaira negana gaudia tahua karana do idia goadalaia’​—⁠idia hekwarahi bada, mauri ena ahuna idia abia totona! Oi bapatiso be namo herea, to unai be matamana sibona. Oi hekwarahi noho lauma dalanai oi goada oi lao totona. Hebou bona sibona emu stadi karana amo, ‘tau badadia bamona laloa dobu gaudia’ do oi lalo-pararalaia. (1 Korinto 14:​20) Oi ese hereva momokani ‘ena lababa, bona ena lata, bona ena ataiai, bona ena dobu, do oi diba momokani.’ (Efeso 3:18) Oi goada oi lao noho ese oi ia durua hari inai nega lalonai do oi moale noho sibona lasi, to danu oi do ia durua Dirava ena tanobada matamatana lalonai emu gabu oi abia totona, unuseniai Dirava ena guba Basileiana henunai, emu mauri ibounai lalonai do oi goada noho ela bona hanaihanai!

[Picture on page 29]

Nega ita atoa sibona eda stadi ita karaia totona, sibona eda kara ita biagua be namo

[Picture on page 31]

Lalohadai maorona ese ita ia durua diba iseda haroro gaukara ita moalelaia totona