Bapatiso

Anina: Inai hereva “bapatiso” be Greek gado herevana, ba·ptiʹ-​zein, amo idia hahanaia; unai hereva ena anina be ranu “lalonai hadihoa.” (A Greek-English Lexicon, by Liddell and Scott) Keristen taudia edia bapatiso ranu lalonai be toa ta; ia hahedinaraia idia ese Iesu Keriso ena amo Iehova Dirava idia gwauhamata henia vadaeni Iena ura do idia karaia hanaihanai. Buka Helaga ese bapatiso ma haida ia gwauraidia; idia haida be inai: Ioane ena bapatiso, bona lauma helaga amo bapatiso karana, bona lahi amo bapatiso karana.

Dirava ena Hereva idia abia dae momokani taudia ese bapatiso idia abia dae haraga, eiava?

Mat. 28:​19, 20: “Unai dainai do umui lao, bese ibounai be diba tahua taudia do umui halaoa, bona Tamana, Natuna, Lauma Helaga ena ladanai do umui bapatiso henia idia dekenai. Bona idia dekenai do umui hadibaia, umui dekenai lau henia hereva ibounai be do idia badinaia.”

Kara 2:41: “Ena hereva idia abia dae taudia be bapatiso idia abia.”

Kara 8:12: “Filipo ese Dirava ena Basileia Sivarai Namona, bona Iesu Keriso ena ladana ia haroro neganai, idia abidadama henia, bona bapatiso idia abia, tatau bona hahine.”

Kara 8:​36-38: “Idia ruaosi dala dekenai idia lao ela bona ranu gabuna ta dekenai idia ginidae. Bona [Etiopia] eunuko tauna ia gwau, ‘Oi itaia, ranu be inai. Dahaka ese egu bapatiso ia koua?’ . . . Vadaeni ia hamaoroa, kariota do ia hadokoa . . . bona Filipo ese ia bapatisoa.”

Keristen bapatiso dalana maorona be edena​—⁠ta ese ranu sisina bapatiso tauna ena kwarana latanai ia negea, eiava ranu lalonai ia hadihoa, a?

Mar. 1:​9, 10: “Ioane ese Iesu ia bapatisoa Ioridane sinavai lalonai. Iesu ranu ia rakatania neganai, nega tamona ia itaia guba ia kehoa.”

Kara 8:38: “Idia ruaosi ranu lalonai idia diho Filipo bona eunuko tauna, bona Filipo ese ia bapatisoa.”

Aposetolo edia negai Keristen taudia ese beibi idia bapatisodia eiava?

Mat. 28:19: “Unai dainai do umui lao, bese ibounai be diba tahua taudia do umui halaoa . . . do umui bapatiso henia idia dekenai.”

Kara 8:12: “Idia abidadama henia, bona bapatiso idia abia, tatau bona hahine.”

To gabeai, Origen (185-254 C.E.) ia gwau: “Ekalesia ena kara be beibi danu idia bapatisodia.” (Selections From the Commentaries and Homilies of Origen, Madras, India; 1929, p. 211) Carthage ena Kaunsolo Ihatoina (253 C.E.) ese unai kara ia gwauraia maoro.

Tomadiho ena sivarai torea tauna, Augustus Neander ia gwau: “Abidadama be mai anina bapatiso dekenai bona bapatiso be mai anina abidadama dekenai; unai dainai unai negai [lagani 100 A.D. vairanai] beibi idia bapatisodia lasi. . . . Lagani 200 A.D. murinai idia gwau unai kara be aposetolo edia kara hegeregerena, guna idia be unai bamona idia gwauraia lasi; unai ese ia hahedinaraia unai kara be aposetolo ese idia hamatamaia lasi.”​—⁠History of the Planting and Training of the Christian Church by the Apostles (New York, 1864), p. 162.

Keristen tauna be ranu lalonai ia bapatiso dainai, Dirava ese ena kara dika ia gwauatao, a?

1 Ioane 1:7: “Bema diari lalonai ita raka noho, . . . iena Natuna Iesu ena rarana ese iseda dika ibounai do ia huria momokani.” (Unai dainai, bapatiso ranuna ese iseda kara dika ia huria oho lasi, to Iesu ena rarana ese.)

Mat. 3:11: “Lau [Ioane Bapatiso] be ranu dekenai lau bapatisoa umui, lalona giroa ena toana. To lauegu murina dekenai do ia mai tauna [Iesu Keriso] be lauegu siahu do ia hanaia. Lau be namo lasi iena tamaka do lau abia loaloa.” (Mt 3 Siri 5, 6, bona Kara 13⁠:24 ese idia hahedinaraia, Ioane ese Iuda taudia sibodia ia bapatisodia. Badina be dahaka? Badina be Iuda taudia ese Dirava ena Taravatu, idia gwauhamatalaia vadaeni gauna, be idia utua bona Ioane ese ia hahegaegaedia Keriso totona.)

Kara 2:38: “Umui ibounai emui lalona umui giroa bona bapatiso umui abia, Iesu Keriso ena ladana dekenai, umui emui kara dika do idia gwauatao totona.” (Unai bapatiso sibona dainai Dirava ese edia kara dika ia gwauatao, a? Mani inai oi laloa: Unai Iuda taudia, Petro be unai bamona ia hereva henidia taudia, be mai edia kerere Keriso ena mase dainai. [Ac 2 Siri 22, 23 itaia.] Bapatiso idia abia neganai, unai ese ia hahedinaraia Iesu idia abidadama henia, idia laloa ia be Mesia o Keriso. Bema unai bamona idia karaia, unai dala tamona amo Dirava ese edia kara dika do ia gwauatao. [Kara 4⁠:12; 5⁠:​30, 31])

Kara 22:16: “Oi toreisi, bapatiso oi abia, oiemu kara dika ia huria totona, iena ladana dekenai oi boiboi dainai.” (Kara 10⁠:43 itaia danu.)

Daidia be lauma helaga amo idia bapatiso?

1 Kor. 1:2; 12:​13, 27: “Dirava ese umui ia boiria iena helaga taudia do umui lao totona. Umui be Dirava ena, badina be Keriso Iesu danu umui hakapua dainai. . . . Oibe, ita ibounai Lauma tamona lalonai ita idia bapatisoa, vadaeni tauanina tamona ita lao vadaeni. Ita be Iuda taudia, Iuda lasi taudia, idia guia taudia, bona ura kwalimu taudia. To Dirava ese ita ibounai dekenai Lauma tamona ia henia vadaeni, ita inua totona. Umui ibounai be Keriso ena tauanina.” (Daniel 7⁠:​13, 14, 27 ese ia hahedinaraia, unai “helaga taudia” be taunimanima Natuna, Iesu Keriso, ida Basileia lalonai do idia lohia hebou.)

Ioane 3:5: “Taunimanima be ranu dekena amo bona Lauma Helaga dekena amo bema ia vara lasi, ia be Dirava ena Basileia lalonai do ia vareai diba lasi.” (Ta be lauma amo ia bapatiso neganai ia be ‘Lauma Helaga dekena amo ia vara.’ Luka 12⁠:32 ese ia hahedinaraia “orea maragi” sibona ese unai hahenamo idia abia. Apokalupo 14⁠:​1-3 itaia danu.)

Lauma helaga amo idia bapatiso taudia iboudiai be gado idauidau ai idia hereva diba eiava taunimanima idia hamauridia diba, a?

1 Kor. 12:​13, 29, 30: “Ita ibounai Lauma tamona lalonai ita idia bapatisoa, vadaeni tauanina tamona ita lao vadaeni. . . . Ibounai be aposetolo taudia, a? . . . Ibounai be hoa kara idia karaia taudia, a? Ibounai be gorere idia hanamoa diba, a? Ibounai be idau momokani gadodia idia hereva diba, a?”

Inai sinado badadia, “Gorere Hanamoa Karadia” bona “Gado Idaudia ai Hereva Karana,” itaia danu.

‘Bapatiso mase taudia totona’ ena anina be dahaka?

1 Kor. 15:​29: “Badina dahaka haida ese bapatiso idia abia mase taudia totona? Sedira toreisi lou idia hamomokania dainai unai bamona idia karaia, ani?”

Greek gado herevana, hy·perʹ, be unai siri lalonai Motu gado ai idia hahanaia neganai, “totona” idia torea. Ena anina ma haida be “dainai” bona “ena gabunai.” (A Greek-English Lexicon, by Liddell and Scott) Unai siri lalonai ena anina be dahaka? Paulo ena hereva ena anina be, mauri taudia ese bapatiso idia abia, bapatiso lasi mase taudia totona, a?

Baibel ena siri ma haida ese mase bona bapatiso nega tamona idia gwauraidia, to unai siri ese taunimanima ta sibona ena bapatiso idia gwauraia, mase tauna ta dainai ia abia bapatisona idia gwauraia lasi

Roma 6:3: “Ita bapatiso neganai Keriso Iesu danu ita hakapua tamona, ita bapatiso neganai Iesu danu ita mase.” (Mareko 10⁠:​38, 39 itaia danu.)

Kol. 2:12: “Umui [Kolose ekalesiana ai umui mauri noho taudia] emui bapatiso neganai Keriso danu umui idia guria hebou. Bona emui bapatiso neganai Keriso danu umui toreisi lou hebou. Inai bamona ia vara badina be Dirava ena siahu umui abidadama henia dainai. Unai siahu ese Keriso ia hatorea isi lou mase dekena amo.”

“New World Translation” Baibel lalonai 1 Korinto 15⁠:29 ena hereva hahegeregerea dalana be maoro bona unai siri edia anina hegeregerena

1 Kor. 15:​29, NW: “Bema unai bamona lasi, mase taudia ai do idia lao totona bapatiso idia abia taudia ese dahaka do idia karaia? Bema mase taudia do idia toreisi lou lasi, dahaka dainai unai bamona taudia ai do idia lao totona bapatiso idia abia?” (Unai dainai, idia bapatisodia vareai mauri dalana ta lalonai, bena Iesu hegeregerena Dirava do idia badinaia ela bona mase, bena gabeai lauma ai do ia hatoredia isi lou, Iesu ia hatorea isi lou hegeregerena.)

Lahi amo idia bapatiso taudia ese dahaka idia davaria?

Luka 3:​16, 17: “Inai tau [Iesu Keriso] ese . . . lahi dekenai umui do ia bapatiso henia. Iena itapo be ena imana dekenai ia hegaegae noho, iena uiti do ia hagoevaia totona. . . . Uiti ena momoru, be bodo lasi lahi dekenai do ia gabua ore.” (Do ia haorea ela bona hanaihanai.)

Mat. 13:​49, 50: “Tanobada dokona neganai be unai bamona. Aneru ese kara dika taudia bona kara maoromaoro taudia do idia hapararaia. Kara dika taudia be lahi badana dekenai do idia negea vareai.”

Luka 17:​29, 30: “Lota be Sodoma dekena amo ia raka siri dinanai lahi bona nadi siahu guba dekena amo idia moru, ibounai ia alaia ore. Taunimanima ena Natuna do ia hedinarai dinanai danu unai bamona kara do ia vara.”

Lauma helaga amo idia bapatiso be idau; Iesu ena hahediba taudia ese unai bapatiso idia abia

Kara 1:5: “[Iesu ese ena aposetolo mai edia kamonai ia hereva henidia, ia gwau:] Ioane be, ranu dekenai bapatiso ia karaia, to dina momo do [idia] ore lasi neganai, Lauma Helaga dekenai bapatiso do umui abia.”

Kara 2:​2-4: “Guba dekena amo karaharaga regena ta ia diho mai, lai bada ena regena hegeregere, idia helai hebou noho ruma ibounai ia hahonua. Bona lahi ena malana hegeregere idia hedinarai. Bona inai malana be idia makohia kahana ta ta, bona inai taudia ta ta edia kwarana latanai idia diho mai [unai lahi ese ia koudia ahu lasi, hegeregere ia lalonai idia bapatiso bamona]. Bona idia ibounai Lauma Helaga dekenai idia honu, bona gado idauidau dekenai idia hereva, Lauma Helaga idia dekenai ia henia hegeregerena.”