Tanikiu Karana Oi Hahedinaraia, A?

West Africa ai, misinari rumana ta dekenai, gunaguna sisia ta ia noho, ena ladana be Teddy. Bema tau ta ese Teddy dekenai vamu sisina ia negea, Teddy ese maoromaoro ia hadonoa, vamu ena mamina ia moalelaia lasi bona ia koria namonamo lasi. Dina siahu lalonai ia hahodi haragaharaga noho, do ia abia diba vamuna ia naria noho. Vamu ia ore murinai, ia giroa bona ia lao.

Teddy ese ia abia gaudia dainai tanikiu karana ta ia hahedinaraia lasi. Bona ta ia laloa lasi unai do ia hahedinaraia, badina ia be sisia sibona.

BEMA tanikiu hahedinaraia karana ita laloa, nega momo ita laloa taunimanima edia kara ese animal edia kara ia hereaia. To nega momo unai ia vara lasi bona ita lalohisihisi. Taunimanima momo ese mauri lalonai idia abia diba gaudia iboudiai idia abia bena gau ma haida totona idia naria. Unai danu ita hoalaia lasi. Baibel ia gwau dina gabedia ai, taunimanima be tanikiu karana do idia diba lasi.​—2 Timoteo 3:​1, 2.

To, Dirava ena hesiai taudia edia lalohadai be idau. Idia ese aposetolo Paulo ena sisiba idia abia dae, ia ese ena Keristani tadikaka ia hagoadadia tanikiu karana do idia hahedinaraia.​—Kolose 3:15, NW.

Iehova ese Tanikiu Karana Ia Hahedinaraia

Iehova Dirava be haheitalai goevadaena, ma haida edia kara namodia laloa bada karana dekenai. Iena lalohadai ena abidadama hesiai taudia dekenai mani oi laloa. Dirava ena lauma ese Paulo ia hasiahua bona, Heberu Keristani taudia ia tore henia, ia gwau: “Dirava ena kara be gagevagageva lasi, ia be maoromaoro momokani. Unai dainai ia ese emui kara namodia do ia laloaboio lasi. Umui ese Dirava umui lalokau henia. Inai lalokau ese laloa namodia umui dekenai ia havaraia, vadaeni umui ese Dirava ena taudia umui durua vadaeni, bona do umui durua noho danu.”​—Heberu 6:10.

Iehova ese ena abidadama hesiai taudia ia laloa bada karadia edia sivarai be momo. Ia ese Aberahamo ia hanamoa bona ena tubudia edia namba ia habadaia, ela bona “edia momo be guba dekenai noho hisiu, bona kone dekenai noho miri bamona.” (Genese 22:17) Hahetoho lalonai Iobu ia abidadama noho karana be Iehova ese ia laloa bada dainai, Iobu ese ia haboioa taga badana ia henia lou sibona lasi, to “ena kohu gunana ia habadaia ela bona nega rua.” (Iobu 42:10) Iehova ese lagani tausen momo lalonai taunimanima ia kara henia karadia ese inai hereva idia hamomokania: “Lohiabada ena matana ese tanobada ena kahana ibounai idia itaia noho, ia ese ia dekenai idia badinaia momokani taudia do ia hagoadaia totona.”​—2 Sivarai 16:⁠9.

Dirava ese iena ura idia karaia toho taudia ia laloa bada bona idia dekenai davana namona ia ura ia henia be vaia ena kara badadia. Unai ita abia dae be mai anina bada Keristani abidadama dekenai. Paulo ia gwau: “Tau ta bema Dirava ia abidadama henia lasi neganai, ia hegeregere lasi Dirava ena ura do ia badinaia. Badina be bema tau ta be Dirava kahirakahira ia ura lao neganai, ia ese Dirava do ia abidadama henia guna, . . . ena abidadama be inai bamona: Dirava idia tahua taudia ibounai, be davana namona Dirava ese do ia henidia.”​—Heberu 11:6.

Bema Iehova ena kara be idau, ia kara auka bona iseda kerere ia tahua, ita ibounai be dika do ita davaria. Idaunegai salamo torea tauna ia gwau: “Bema oi ese aiemai kara dika ibounai oi duahia neganai, daika ese oiemu kota lalonai ia kwalimu diba?” (Salamo 130:3) Iehova ese ma haida edia kara namodia ia laloa maragi lasi bona edia kerere ia tahua lasi. Ia idia hesiai henia taudia ia naria namonamo. Ia ese tanikiu karana ia hahedinaraia.

Iesu​—Ma Haida Edia Kara Namodia Ia Laloa Bada Tauna

Iesu Keriso ese ena guba Tamana ena kara ia hahedinaraia goevagoeva dainai, ma haida edia abidadama karadia ia laloa bada. Nega ta Ierusalema ena dubu dekenai ia vara gauna mani oi laloa: “Iesu ese iena matana ia abia isi, kohu momo taudia ia itaia, boubou moni be maua ena lalonai idia udaia. Ma vabu ogogamina ta ia itaia, iena moni maragimaragi rua ia udaia. Vadaeni Iesu ia gwau, ‘Momokani umui lau hamaoroa, inai vabu mai ogogami danu ia udaia moni ese idia ibounai edia moni ia hanaia. Badina be idia ese edia moni bada herea dekena amo sisina sibona boubou maua dekenai idia udaia, to inai vabu be mai ogogami danu, to ia ese iena moni ibounai, iena mauri dekenai durua gauna ia udaia.’ ”​—Luka 21:1-4.

Bema unai moni sibona ita laloa, unai vabu ese ia henia gauna be maragi, bona bema taga taudia ese idia henia moni ida ita hahegeregerea, ia henia monina be maragi momokani. Unuseniai idia noho taudia momo be reana ia idia itaia lasi. To, Iesu ese unai vabu ia itaia. Iena mauri ia lalo-pararalaia. Oibe, Iesu ese unai vabu ia itaia bona ia laloa bada.

Sivarai ta be taga hahinena ta, Maria, ena sivarai. Iesu be aniani patana badinai ia hekure neganai, unai hahine ese davana bada herea oela mai ena bonana namo ia bubua Iesu ena aena bona ena kwarana dekenai. Haida be Maria ena kara idia maumauraia, idia laloa unai oela idia hoihoilaia diba bona moni be ogogami taudia durua totona idia henia diba. To Iesu be dahaka ia laloa? Ia gwau: “Umui rakatania. Iena kara umui koua lasi. Ia be kara namona lau dekenai ia karaia. Momokani lau hamaoroa umui, tanobada ena kahana ibounai dekenai inai Sivarai Namona do idia haroro karaia, bona inai hahine ena kara danu do idia gwauraia, bona iena kara do idia laloatao.”​—Mareko 14:3-6, 9; Ioane 12:3.

Iesu be ma dala ta ai unai oela idia gaukaralaia totona ia maumau lasi. Ia ese Maria ena lalokau bona abidadama karana namona ia laloa bada. Unai sivarai be Baibel lalonai ia noho ena kara namona ita laloatao totona. Unai sivarai bona ma haida idia hahedinaraia Iesu be ma haida edia kara namodia ia laloa bada tauna.

Bema oi be Dirava ena hesiai tauna ta, oi diba momokani Iehova Dirava bona Iesu Keriso ruaosi ese tomadiho goevana totona oi karaia gaudia idia laloa bada. Unai ita diba ese idia kahirakahira dekenai ita ia veria lao bona ita ia hasiahua, edia kara ita tohotohoa bona tanikiu karana ita hahedinaraia totona.

Satani ese Ma Haida Edia Kerere Ia Tahua

Hari ita ese tanikiu karana ia hahedinaraia lasi tauna ta​—Satani Diabolo​—ena kara mani ita laloa. Satani ese Dirava ena kara namodia ia laloa bada lasi dainai, ia ese Dirava ia gwau-edeede henia karana ia gunalaia bona unai amo dika bada ia vara.

Satani be sibona ena lalona ai ma haida edia kerere ia tahua bona ia abia vadaeni gaudia ia moalelaia lasi, bona ma haida dekenai unai kara ia hadoa matamaia. Mani, Eden umana dekenai idia vara gaudia oi laloa. Iehova ese tau bona hahine ginigunadia ia havaraia, paradaiso bamona uma gabuna dekenai ia atodia, bona idia ia hamaoroa, ia gwau: “Uma gabu dekenai gini au ibounai edia huahua oi ania diba, idia be taravatu lasi.” Taravatu tamona sibona ia atoa. Dirava ia gwau: “To kara namo bona kara dika hadibaia au ena huahua oi ania lasi, badina be inai huahua oi ania dina dekenai do oi mase momokani.”​—Genese 2:​16, 17.

To, daudau lasi murinai, Satani ese Iehova ena hereva ena momokani ia henanadailaia. Satani ia ura Heva ena lalona ia veria Iehova do ia tanikiu henia lasi bona do ia gwau-edeede henia, guna ia ese ia karaia bamona. Ia henanadai, ia gwau: “Momokani, uma gabu ena au huahua ta ania lasi taravatu Dirava ese ia atoa o lasi?” (Genese 3:⁠1) Ena hereva ena anina be Dirava ese Heva amo gau namona ta ia hunia, unai gauna ese ena matana do ia kehoa bona Dirava bamona ai do ia lao diba. Ena be Iehova ese hahenamo momo ia henia, to Heva ese tanikiu karana ia hahedinaraia lasi. Dirava ese ia taravatua gauna ia ura dikadika ia abia.​—Genese 3:⁠5, 6.

Unai amo ia vara dika idauidau be ita diba namonamo. Ia ese ladana Heva ia abia “badina ia be mauri taudia ibounai edia sinana,” to dala ta ai ia be idia mase taudia ibounai edia sinana ai ia lao. Taunimanima iboudiai ese mase ia havaraia kara dika be Adamu amo idia abia.​—Genese 3:​20; Roma 5:​12.

Dirava Bona Keriso Oi Tohotohoa

Satani bona Iesu edia kara edia idau mani oi laloa. Baibel ese Satani ia gwauraia “samania tauna . . . Dirava ena vairanai, dina bona hanuaboi, guna ia gini, iseda varavara ia samania.” (Apokalupo 12:10) To “Iesu be mai ena siahu, iena ladana dainai Dirava dekenai idia mai taudia do ia hamauridia. Badina be inai: Iesu ia noho hanaihanai, bona ia ese inai taudia totona Dirava ia noia noho hanaihanai.”​—Heberu 7:25.

Satani ese Dirava ena hesiai taudia ia samania. Iesu ese idia ia laloa bada bona idia totona Dirava ia noia noho. Keristani taudia ese Keriso idia tohotohoa dainai, namona be idia ta ta edia namo idia tahua bona idia laloa bada. Bema unai idia karaia, idia hahedinaraia ma haida edia kara namodia laloa bada karana ia haheitalaia goevagoeva tauna, Iehova Dirava, idia tanikiu henia.​—1 Korinto 11:⁠1.

[Picture on page 17]

Iesu ese Maria ena kara namona ia laloa bada