(Ioane 8⁠:44; ma danu 2 Tesalonika 2⁠:​9, 10 itaia.) Inai lalohadai, mase taudia be idau gabuna dekenai idia mauri noho bona idia ida ita herevahereva diba lalohadaina, ese taunimanima ia durudia lasi. Apokalupo 18⁠:23 ia gwau, Babulono Badana ena “meamea karadia ese bese ibounai idia koia.” Rohe taudia edia kara, ‘mase taudia ida herevahereva karana,’ be koikoi karana. Unai kara amo taunimanima be demoni (Dirava idia gwau-edeede henia anerudia) ida idia herevahereva bona nega momo unai taunimanima ese gado idaudia, idia ura lasi gadodia, idia kamonai bona unai lauma dikadia ese idia hahekwarahidia.

Ta ese babalau karadia amo ena gorere hanamoa dalana o ena mauri naria dalana ia tahua be dika, eiava?

Gal. 5:​19-21: “Tauanina ena kara be ita ibounai ita diba. Karadia be inai: Heudahanai, kara mirodia, matabodaga, kaivakuku tomadiho henia kara, meamea . . . Guna umui lau hamaoroa, bona hari lau sisiba henia lou momokani, unai bamona idia karaia taudia ese Dirava ena Basileia do idia abia lasi.” (Bema ta ese meamea tauna o babalau tauna ena heduru ia tahua, anina be Satana ena hereva koikoi mase dekenai ia abia dae; Satana bona ena demoni edia amo siahu idia abia toho taudia edia heduru ia tahua. Unai bamona ia karaia tauna ese ia hahedinaraia ia be Iehova Dirava ena inai taudia edia turana. Bema ta be unai bamona ia karaia noho, heduru momokani do ia abia lasi, to dika do ia abia hanaihanai.)

Luka 9:24: “Ena mauri ia dogoatao tauna be ena mauri do ia abia lasi, to [Iesu Keriso murinai ia raka dainai] lau totona iena mauri do ia negea tauna be ena mauri do ia abia.” (Ta be sibona ena mauri ia naria o ia dogoatao totona, bema Dirava ena taravatu Baibel lalonai ia utua mai ena ura ida, mauri hanaihanai do ia abia diba lasi. Kara kava unai, ani?)

2 Kor. 11:​14, 15: “Satani sibona ese iena kara ia senisia diba, bona ia ese diari aneruna ena kopina ia atoa diba. Unai dainai Satani ena hesiai taudia, bema edia kara idia senisia, bona taunimanima vairanai idia be kara maoromaoro taudia bamona, inai be hoa gauna, a?” (Unai dainai, bema ita itaia babalau o meamea karadia amo gorere taudia idia hanamodia nega sisina, unai do ita hoalaia lasi be namo.)

Rau 141-5 itaia danu, inai sinado “Gorere Hanamoa Karadia” henunai.

Ta be nega vairai do idia vara gaudia do ia diba totona eiava ia karaia gwauraia karana dekenai do ia kwalimu totona, rohe karadia amo heduru ia tahua be aonega karana, a?

Isa. 8:19: “Bae hamaoromui, baeto ‘Rohe taudia bona mea taudia, e tanatanamu bona e hereva hemaunumu taudia, na ba nanadaidia’ negana ai ba laloa, taunimanima ese edia Dirava basiema nanadaia a?”

Lev. 19:31: “Rohe taudia bona babalau taudia na basio lao henidia; basio tahudia bona edia kara miro ai basio miro. Lau binai Iehova, emui Dirava.”

2 Pav. 21:6: “[King Manase ese] mari bona bagu-haoro karadia e kara, bona rohe taudia bona mea taudia na e daidaidia. Iehova vairanai e kara havara-havara, bona e habadua.” (Unai bamona kara ia karaia totona, Manase ese Satana bona ena lauma dikadia edia heduru ia tahua. Unai dainai ‘Iehova vairanai ia kara dika,’ bona unai kara dainai Iehova ese ia panisia badabada. To ia helalo-kerehai bona unai kara dikadia ia negedia neganai, Iehova ese ia hanamoa.)

Babalau gaudia gadaralaia eiava toa namona bamona gauna ena anina tahua karadia edia dika be dahaka?

Deut. 18:​10-12: “Ta ese babalau eiava mari eiava rohe karadia basine kara, eiava mea ḡaudia basine abi, eiava basine vada, eiava lauma basine nanadaidia, eiava kara hehunidia basine kara, eiava mase taudia basine hahanedia. Badina be unu kara bodagadia e karamu taudia na Iehova ese e dadaraidiamu.” (Babalau amo diba hehunina idia hahedinaraia toho eiava nega vairai do idia vara gaudia idia gwauraia toho, unai gau idia tahua namonamo dainai lasi, to toa ta ena anina idia gwauraia hedinarai dainai eiava siahu idaudia edia heduru amo. Iehova ia gwau unai bamona kara be taravatu iena hesiai taudia dekenai. Badina be unai kara iboudiai amo lauma dikadia, demoni unai, ese idia bolodia diba eiava idia ida idia herevahereva diba. Unai kara idia karaia taudia ese Iehova idia badinaia lasi, to idia kara dika henia rohoroho.)

Kara 16:​16-18: “Dina ta guriguri gabuna ai lao neganai, hesiai kekeni ta ia davaria ai. Unai kekeni be meamea lauma ese ia abia. Ia be vairai do idia vara gaudia ia gwauraia. Inai kekeni ena biaguna be moni momo idia abia ena meamea kara amo.” (Momokani, kara maoromaoro ia ura henia tauna ese unai dala amo diba do ia tahua momokani lasi bona gadara bamona do ia tahua lasi danu. Paulo ese unai kekeni ena boiboi ia hesikulaia, bena unai lauma be iena amo ia lulua.)

Lauma dikadia be taunimanima hegeregeredia idia hedinarai diba, a?

Noa ena negai, gwau-edeede anerudia ese tauanina idia karaia sibodia edia, taunimanima edia hegeregeredia. (Gen. 6⁠:​1-4) To Abata Badana ia vara neganai, edia tauanina ai idia mauri noho diba lasi dainai idia rakatanidia bena aneru hegeregeredia guba dekenai idia giroa lou. Iuda 6 ese ia gwauraidia inai bamona, ia gwau: “Aneru haida danu, edia dagi korikori ena maka dekenai idia noho lasi, bona edia gabu korikori idia rakatania. Unai dainai Dirava ese hel ena dibura masemase gabuna dekenai idia ia atoa. Unuseni, noho hanaihanai auri seini dekena amo idia ia guia. Bona unai gabu do idia noho ela bona Kota Bada Dinanai.” Iehova ese edia dagi gunadia guba dekenai be idia edia amo ia kokia, bona iena palani ia hadibalaidia lasi dainai idia be dibura masemase ai idia noho bamona. Unai sibona lasi, to ia guidia danu, anina be ia koudia. Ia koudia dainai dahaka idia karaia diba lasi? Tauanina idia karaia diba lasi sibodia edia, bona tanobada hahinedia ida idia mahuta hebou diba lasi, Abata Badana be do lasi neganai idia karaia bamona. Baibel ena sivarai ese idia hahedinaraia, unai nega amo ela bona aposetolo edia negai, nega haida kamonai anerudia ese tauanina idia karaia sibodia edia bona tanobada ai Dirava ena hesiai gaukara idia karaia. To Abata Badana murinai, Dirava ese guna ia henidia siahuna idia gaukaralaia kerere anerudia edia amo unai siahu ia kokia, bena idia be dala lasi tauanina do idia karaia lou sibodia edia.

To lauma dikadia ese matahanai taunimanima idia henidia diba, bena unai matahanai gaudia be gau korikoridia bamona idia hedinarai idia vairadiai. Satana ese Iesu ia dibagania neganai, unai dala amo “tanobada edia basileia ibounai mai edia hairaina” ia hahedinarai henia.​—⁠Mat. 4⁠:⁠8.

Edena dala amo ta be lauma dikadia edia siahu amo ia siri diba?

Her. 18:10: “Iehova ladana na kohoro aukana; kara maoromaoro tauna na ia lalonai e heau vareaimu bena e maurimu.” (Dirava ena ladana be mea gauna bamona dika ia koua lasi. Unai siri lalonai Iehova ena “ladana” anina be Ia sibona. Iehova ita diba bona ita abidadama henia momokani, bona iena siahu henunai ita noho bona iena taravatu ita badinadia neganai, ia ese ita ia gimaia. Bema unai bamona ita karaia, bena Dirava ena ladana Iehova ita gwauraia ena heduru ita noia neganai, iena Hereva lalonai ia gwauhamata vadaeni hegeregerena, ita do ia gimaia.)

Mat. 6:​9-13: “Inai bamona do umui guriguri. ‘ . . . Dibagania dika gabuna dekenai ai do oi hakaua vareai lasi, to Satani ena imana dekena amo do oi hamauria ai.’ ” Danu, namona be “guriguri do umui goadalaia nega ibounai.” (Roma 12⁠:12) (Idia ura momokani hereva momokani do idia diba bona Dirava ese ia gwauraia dalana ai do idia tomadiho henia taudia edia guriguri be ia ese ia kamonai.)

1 Kor. 10:21: “Lohiabada ena pata dekenai noho aniani bona lauma dikadia edia pata dekenai noho aniani ruaosi be nega tamona umui ania diba lasi.” (Idia ura Iehova ese do ia tura henidia bona do ia gimadia taudia be meamea taudia edia hebou lalodiai idia vareai lasi be namo. Kara 19⁠:19 ese ia gwauraidia taudia edia kara hegeregerena, namona be edia babalau bona meamea gaudia iboudiai idia hadikadia ore eiava idia negedia.)

Iak. 4:7: “Dirava ena ura do umui karaia. Satani do umui tuari henia, vadaeni umui dekena amo do ia heau boio.” (Unai bamona do oi karaia totona, mai emu momokani ida Dirava ena ura oi dibaia bona emu mauri lalonai oi badinaia. Bema Dirava oi lalokau henia, unai ese oi do ia hagoadaia bena taunimanima garidia do oi gari lasi. Babalau o meamea karadia amo oi siri vaitani, bona babalau bona meamea taudia edia hereva oi kamonai lasi.)

“Dirava ese ia henia tuari dabua ibounai,” Efeso 6⁠:​10-18 ese ia gwauraia dabuadia, oi atoa, bona unai dabua ena kahana ibounai oi naria namonamo mai emu goada ida, do idia dika garina.

Babulono Badana

Anina: Tomadiho koikoi ena basileia, tanobada ibounai lalonai. Ia lalonai be tomadiho koikoi oreadia iboudiai; edia hahediba herevadia bona edia kara be Dirava korikorina tamona, Iehova, ena tomadiho herevadia bona karadia hegeregeredia lasi. Noa ena negai ia vara Abata Badana murinai, tomadiho koikoi be Babel (gabeai ena ladana idia hatoa Babulono) dekenai ia matamaia. (Gen. 10:8-10; 11:4-9) Bena nega taina daudau lalonai, Babulono ena tomadiho herevadia bona karadia be tano momo lalodiai idia abia vareai. Unai dainai tomadiho koikoi ibounai idia gwauraia Babulono Badana be maoro.