Baibel Ena Hereva Momokani be Portugal ai Idia Harorolaia

PORTUGAL ena not kahana, Caminha, amo ela bona ena saut kahana, Vila Real de Santo Antônio, haoda gaukara boutidia momo mai edia kala idauidau be Atlantic Konena kahirakahira ai idia heau. Unai kone ena lata be kilomita 800. Lagani handred momo lalodiai haoda taudia be ‘lagatoi dekenai davara badana idia heau hanaia,’ unai dainai Portugal taudia momo edia aniani korikorina be gwarume.​—⁠Salamo 107:⁠23.

Idia hanai laganidia 70 lalodiai, haoda gaukarana idauna ta be Portugal ai idia karaia. Iehova ena Witness taudia idia gaukara goada, sivarai namona be gwarume bamona taudia tausen momo dekenai idia harorolaia. (Mataio 4:⁠19) May 1995 ai, Basileia harorolaia taudia be 44,650​—⁠anina be Portugal taudia 210 210 amo ta ta be haroro taudia. Siti haida lalodiai taunimanima 105 105 amo ta ta be haroro taudia.

Haroro taudia be momo herea dainai, gabu momo dekenai edia teritori be pura ta ta iboudiai idia karaia ore. Unai dainai Portugal dekenai Witness taudia idia ura bada hamatamaia herevadia idauidau idia gaukaralaia, edia Baibel helarona be ma haida do idia hamaorolaia totona. Oibe, idia diba Baibel ena hereva momokani be dala idauidau ai idia harorolaia be gau badana.​—⁠1 Korinto 9:​20-23.

Tomadiho Idia Laloa Taudia Durua Karana

Portugal ai, lagani 1991 ena sensas ese ia hahedinaraia, edia mauri laganidia be 18 o unai ataiai taudia 10 10 amo 7 7 idia gwau idia be Roman Katolik taudia. To, idia momo be Baibel ena hereva idia diba lasi. Niuspepa ta ladana Jornal de Notícias ia gwau: “Gau dika hereana Katolik tanodia ai be inai: Baibel idia diba lasi!” Badina be dahaka? Portugal ena niuspepa ta ladana Expresso ese haere ia gwauraia. Pris taudia 500 be Fátima ai idia hebou murinai, unai niuspepa ia gwau: “Bisop ia gwau, namona be pris ese ena gaukara idaudia momo ia rakatania, bena ia ese ena dagi korikorina, ‘haroro tauna’ dagina, ia haginia lou diba. . . . Bema pris ese Sivarai Namona ia harorolaia mai ena lalona ibounai ida, ia be mai ena nega lasi gaukara idaudia do ia karaia.”

Iehova ena Witness taudia edia kara be idau. Portugal ai idia gaukara goada, Baibel ena hereva momokani be dala idauidau ai idia harorolaia totona. Unai dainai, Katolik taudia momo mai edia lalo-momokani ese Baibel ena hereva idia dibaia noho.

Carlota be Katolik tomadihona goadalaia kekenina, bona ia be Katolik oreana ena iut grup ena memba ta. Ia be tisa ta danu, pri-sikuli ta lalonai. Unai sikuli ai Witness tauna ta, Antônio, ia gaukara. Antônio be regula painia tauna ta, anina be ful-taim haroro tauna, unai dainai dina tubua iboudiai, aniani negana ai, Baibel ia herevalaia iena gaukara bamodia dekenai. Dina ta Carlota ese hel lahina herevana bona Maria tomadiho henia karana ia nanadailaia. Antônio ese Baibel ena hereva unai gau dekenai ia hahedinarai henia, bena unai murinai nega momo Baibel idia herevalaia. Carlota be Kingdom Hall dekenai hebou ia lao henia negana ginigunana ai, ia hoa bada. To, unai hebou horadia bona iena iut grup edia hebou horadia be hegeregere. Unai dainai ia diba namona be idia ruaosi amo ta do ia abia hidi. Edena do ia abia hidi?

Carlota ese iut grup taudia iboudiai ia haboua, bena Baibel amo ia hamaorodia dahaka dainai unai orea amo do ia doko. Idia iboudiai ese ena kara idia gwauraia dika, kekeni tamona sibona, ladana Stela, ia kamonai namonamo. Gabeai, Carlota be ia ida idia herevahereva neganai, Stela ese mauri ena badina bona ena anina ia nanadailaia momo. Carlota ese buka ta ladana Life​—⁠How Did It Get Here? By Evolution or by Creation?a ia henia, bena Baibel stadi be ia ida ia hamatamaia.

Unai murinai Carlota be lauma dalanai ia goada ia lao, bena June 1991 ai bapatiso ia abia, bena hua 6 murinai regula painia gaukarana ia karaia matamaia. May 1992 ai, Antônio ese ia adavaia, bena edia gabu kahirakahira dekenai, heduru ai idia dabu kongregesen ta lalonai idia ruaosi ese painia gaukarana idia karaia hebou noho. Stela be edena bamona? May 1993 ai bapatiso ia abia, bona hari ia ese regula painia gaukarana ia karaia.

Mero ta ladana Francisco ese tomadiho ia goadalaia momokani. Sunday ta ta iboudiai, daba kahanai ia lao Mass bona adorahi kahanai ia lao Rosary gwauraia loulou totona. Dubu ai ia be mai ena gaukara; Mass neganai ia ese pris ia durua. Nega ta Dirava ia noia, gabeai ia ese “helaga tauna” ai do ia halaoa!

Francisco ia ura dikadika Baibel ta do ia abia iena, bona dina ta ena turana ta ese ta ia henia. Ia hoa, badina be ia davaria Dirava be mai ena ladana, Iehova. (Esodo 6:3; Salamo 83:⁠18) Esodo 20:​4, 5 ia duahia neganai, ia hoa dikadika, badina be ia davaria tomadiho lalonai kaivakuku gaukaralaia karana be Dirava ese ia taravatua! Ena dubu be kaivakuku amo ia honu, unai dainai Dirava ia noia goadagoada do ia durua, hari ia daradaralaia gauna do ia lalo-pararalaia totona. Dina haida murinai, ia ida guna idia sikuli hebou merona ta ia davaria, bena ia nanadaia badina be dahaka hanuaboi sikulina ia rakatania.

Ena turana ia gwau: “Hari lau be hanuaboi sikulina namo hereana lau lao henia.”

Francisco ese ia nanadaia, ia gwau: “Unai be edena sikuli, bona dahaka oi stadilaia?” Ena turana ena haere ia kamonai neganai ia hoa dikadika.

Ena turana, ia gwau: “Lau ese Baibel lau stadilaia, Iehova ena Witness taudia edia Kingdom Hall dekenai. Oi ura do oi lao, a?”

Francisco be nega ginigunana hebou ia lao henia neganai, ia itaia gaudia ia hoalaia​—⁠taunimanima idia moale; idia herevahereva hebou mai edia gado namo ida; memero kekeni be edia tamadia sinadia ida idia helai hebou bona idia hakala namonamo.

Francisco ia gwau: “Unuseniai lau be idau tauna ta, to mamina lau abia lau be unai famili taudia ta!” Unai nega amo ema, ia be hebou ia lao henidia loulou. Hari, Francisco be kongregesen ena elda tauna ta, bona ia mai ena adavana bona edia natudia ruaosi ida ese Basileia gwauhamatadia namo hereadia Dirava ena Hereva lalonai idia moalelaia.

Varavara Dekenai Hereva Momokani Gwauraia Karana

Manuela be regula painia hahinena ta Lisbon ena kahanai, bona ia ese lauma gwarumedia momo ia veria vadaeni, badina be taunimanima iboudiai, ena varavarana danu, ia haroro henidia mai ena gado namo bona mai ena haheauka ida. Idia ta be ena taihuna korikorina, José Eduardo. Ia ese karate bona tuari kohudia gaukaralaia karana ia sikulilaia vadaeni. Nega momo ia ese taravatu ia utua, unai dainai idia kota henia neganai idia gwau iena kerere 22 dainai lagani 20 dibura rumana ai do ia noho. Iena dagedage be auka herea dainai, dibura rumana taudia oredia ese idia gari henia, unai dainai sekuriti aukana dibura daiutuna ta ai idia koua.

Lagani 7 lalodiai Manuela ese José Eduardo ia vadivadi henia loulou mai ena hesiku lasi, to nega ibounai José ese ena Baibel herevana ia dadaraia. Dokonai, buka ta ladana Life​—⁠How Did It Get Here? By Evolution or by Creation? idia halasia neganai, ta ia abia dae, bena Baibel stadi ia abia matamaia. Maoromaoro ena kara momo ia haidaua momokani. Pura tamona murinai dibura taudia 200 vairadiai ena abidadama ia gwauraia hedinarai, bena pura ma ta murinai 600 vairadiai ia gwauraia. Gwaumaoro ia abia, dibura rumana ena kahana ma haida ai idia noho taudia do ia vadivadi henidia. Ena kara ia haidaua momokani dainai, ena dibura laganidia idia hadihoa 15 dekenai. Lagani 10 ia haoredia murinai, idia ruhaia bona taravatu henunai idia atoa. Unai nega amo ema bona hari, lagani 5 idia ore vadaeni. Hari, José Eduardo be Iehova ena bapatiso Witness tauna ta bona kongregesen ena hesiai tauna ta. Momokani, unai be hegeregere ‘uda sisia bona mamoe be idia noho hebou mai maino danu’!​—⁠Isaia 11:⁠6.

Manuela ese ena famili ia haroro henidia loulou dainai, moale ia davaria. Ena adavana bona ena famili taudia ma hani ia durua, Iehova ena hesiai do idia lao henia totona. Hari, ena adavana be hesiai tauna ta.

“Do Lau Luludia”

Maria do Carmo be Lisbon kahanai ia noho neganai, Witness taudia ese idia vadivadi henia. Idia gwauraia herevana ia ura henia, unai dainai ia ese ena adavana, Antônio, ia noia, Baibel stadi ta be ruma ai do ia abia. Ia gwau, “Unai oi laloa lasi! Bema Iehova ena Witness taudia be iseda ruma ai lau davaria, egu aena amo do lau botadia bona hekwadi varona amo do lau luludia.” Antônio be karate hahedibalaia tauna bona unai kara ia diba momo; ia be mai ena beleta koremana. Unai dainai Maria do Carmo ese ena lalona ia hadaia ena Baibel stadi be gabu idauna ta ai do ia abia.

Gabeai, Antônio ia lao England, dina 8 lalodiai karate kosina ta karaia totona, bona unai neganai Maria do Carmo ese buka ta ladana Lau Egu Bible Sivarai Buka be ena sutkeisi lalonai ia udaia.b Antônio ia laolao lalonai ia be mai ena nega bada, unai dainai unai buka ia duahia. Peleini ai ia lou mai lalonai, lai-gubana ese peleini ia haheudeheudea bada, bona ia diho be auka. Antônio ese Iehova ia guriguri henia, ena nega ginigunana unai.

Antônio be ena ruma ai ia ginidae murinai, ena adavana ia stadi henia Witness hahinena ese hebou ta dekenai ia boiria mai. Ia lao, bona ia davaria taunimanima iboudiai ese idia gado namo henia. Dala idia karaia ta ese Baibel stadi be ia ida do ia karaia, bena daudau lasi, Antônio ia diba namona be gau haida dekenai ena lalona do ia hadaia. Unai ia karaia, bena karate hahedibalaia gaukarana ia rakatania bena ena stiuden taudia be hari ela bona hanaihanai maino ai do idia noho diba dalana ia hadibalaidia. Hari, idia ta, ia danu be mai ena beleta koremana, be bapatiso Keristani tauna ta.

Antônio be April 1991 ai bapatiso ia abia. Ia bapatiso bena kerukeru heduru painia gaukarana ia karaia matamaia. Hua 6 murinai regula painia gaukarana ia karaia matamaia, bena nega daudau lasi murinai Baibel stadi 12 ia karaia. July 1993 ai, kongregesen ena hesiai tauna ta ai idia halaoa.

Nega Kwadogi Lalonai Idia Kara Loulou Teritorina Ai

Portugal ena gabu momo ai, pura ta ta iboudiai teritori idia karaia. Witness taudia ese edia “haoda gaukarana” be edena bamona idia karaia, anina do idia davaria totona?

João ese ruma ta ta iboudiai lalodiai idia noho taudia ta ta iboudiai ia hereva henidia toho. Hahine ta ia vadivadi henia neganai, ia nanadaia ma haida be ruma ai idia mahuta eiava lasi. Hahine ese ia hamaoroa ena adavana bona edia memero ruaosi danu be unuseniai idia mahuta, to do ia davaridia be auka, badina be idia gaukara dainai hanuaboi neganai sibona idia noho. Unai dainai João ia raka oho, bona unai gabu taudia ma haida ia vadivadi henidia. Hora ta mai kahana murinai, tau ta be ia dekenai ia mai.

Unai tau ese João ia hereva henia, ia gwau: “Oi gwau oi ura lau do oi hereva henia. Mani lau oi hamaoroa dahaka oi ura.”

João ia hoa, ia gwau: “Oi lau diba lasi. Oi be daika?”

“Lau be Antônio; egu ruma be inai dala ai. Oi ese egu sinana oi hamaoroa oi ura ena famili taudia oredia do oi hereva henidia, unai dainai lau mai; lau ura diba dahaka oi ura.”

João ese Antônio ia haroro henia goevagoeva bona ia ida Baibel stadi ta ia hamatamaia. Stadi iharuana murinai, Antônio ese ia noia pura ta ta iboudiai nega rua do idia stadi. Hua hani murinai, ia ese João ia bamoa bona ia noho gabuna ai sivarai namona ia harorolaia matamaia. Ma hua toi murinai bapatiso ia abia. Vanegai ena sinana danu ese Baibel ia stadilaia matamaia. Ita haroro neganai, ruma taudia ta ta iboudiai ita hereva henidia toho be gau badana!

Unai sivarai namodia ese idia hahedinaraia, Portugal ai, lauma haoda gaukarana badana ia do noho. Unuseniai idia gaukara goada Witness taudia be Iehova ese ia hanamoa dainai, Baibel stadi namodia tausen tausen idia karaia. Baibel ena hereva momokani be taunimanima iboudiai do idia hadibalaia daladia ma haida idia tahua noho lalonai, aposetolo Paulo ese Keristani taudia Filipi ai ia tore henidia herevana be hari inai negai ia momokani Portugal ai: “Keriso idia harorolaia noho, dala idauidau ibounai dekenai.”​—⁠Filipi 1:⁠18.

[Footnotes]

[Map on page 23]

(For fully formatted text, see publication)

SPAIN

PORTUGAL

[Pictures on page 24, 25]

Portugal ai, Witness taudia ese dala iboudiai idia gaukaralaia, Baibel ena hereva momokani hahedibalaia totona