Duahia Taudia Edia Henanadai

Iobu 1:8 ita duahia neganai, ia maoro ita laloa Iobu ia mauri noho negana lalonai, ia sibona taunimanima iboudiai amo be Iehova ia abidadama henia, a?

Lasi. Iobu 1:8 ena hereva ena anina be unai bamona lasi, unai siri ia gwau:

“Iehova ese Satana ma ia nanadaia, ia gwau: ‘Egu hesiai tauna Iobu oi laloa vadaeni, a? Tanobada dekenai tau ta be ia bamona lasi; ia be kerere ta lasi bona kara maoromaoro tauna; Dirava garina ia gari bona kara dika amo ia raka oho, ani?’ ” Dirava be Iobu 2:3 dekenai unai bamona Iobu ia herevalaia lou, unuseniai Satana ia nanadaia, ia gwau: “Egu hesiai tauna Iobu oi laloa vadaeni, a? Tanobada dekenai tau ta be ia bamona lasi; ia be kerere ta lasi bona kara maoromaoro tauna; Dirava garina ia gari bona kara dika amo ia raka oho, ani?”

Iobu bukana lalonai ia hahedinaraia Iobu sibona lasi, to abidadama taudia ma haida danu be Dirava ia abidia dae. Karoa 32 ia matamaia neganai, ita be Elihu ena sivarai ita duahia. Ena be ia be tau matamatana ta, to Elihu ese Iobu ena lalohadai kererena ia hamaoromaoroa bona ia ese Dirava momokanina ia hanamoa bada.​—Iobu 32:​6–33:​6, 31-33; Iobu 35:​1–36:2.

Unai dainai, Dirava ena hereva ‘tanobada dekenai tau ta be Iobu bamona lasi’ ena anina be Iobu ena kara maoromaoro be ia hedinarai bada momokani. Sedira Aigupito dekenai Iosef ia mase negana murinai bona Mose be Dirava ena peroveta hesiai gaukarana ia do hamatamaia lasi negana lalonai Iobu ia mauri noho. Unai negana lalonai Israel taudia hutuma bada be Aigupito dekenai idia noho. Ita gwau diba lasi idia ibounai be abidadama lasi bona Dirava ese ia abidia dae lasi; sedira idia momo be Iehova idia tabekau henia. (Esodo 2:​1-10; Heberu 11:23) To, idia ta lasi be Iosef ia karaia gaukara badana idia karaia, bona unai tomadiho taudia be tomadiho momokani dalana dekenai gaukara bada herea idia karaia lasi, Mose be Aigupito amo Israel bese taudia ia hakaudia lao hegeregerena.

To, gabu ma ta dekenai abidadama bada tauna ma ta ia noho. “Usu tanona ai tau ta ia noho, ladana be Iobu. Ia be kerere ta lasi, bona kara maoromaoro tauna; Dirava garina ia gari, bona kara dika amo ia raka oho.”​—Iobu 1:1.

Unai dainai, Iehova ese Iobu ia gwauraia diba abidadama bada bona Dirava badinaia momokani tauna badana ta. Unai hegeregerena, Bible torea taudia Esekiel bona Iakobo be guna sivaraidia amo Iobu idia gwauraia diba kara maoromaoro bona haheauka haheitalaia tauna namona.​—Esekiel 14:14; Iakobo 5:11.

Lagani Ena Hebou—October 3, 1992

LAGANI ENA HEBOU: Watch Tower Bible and Tract Society of Pennsylvania ena memba taudia be October 3, 1992 ai Iehova ena Witness taudia edia Assembly Hall dekenai do idia hebou, 2932 Kennedy Boulevard, Jersey City, New Jersey dekenai. Daba kahana 9:30 a.m. ai memba taudia sibodia do idia hebou guna, bena 10:00 a.m. ai hebou badana do idia karaia.

Bema lagani gunana amo memba taudia edia address idia idau, namona be Corporation ena Seketere Opesi be hari idia hadibaia bena August 1 nega sisina murinai Society ese idia dekenai toretore bona hebou edia pepapepa idia siaia diba.

Hebou ena pepapepa bona boiria mai pepana be memba taudia dekenai do idia siaia hebou, namona be idia torea bona August 15 ia do abia lasi neganai do idia siaia lou Society ena Seketere Opesi dekenai. Namona be memba ta ta iboudiai be edia pepapepa idia torea bona idia siaia lou haraga, bena idia ta ta iboudiai do idia hahedinaraia unai hebou dekenai do idia mai diba eiava lasi. Pepapepa dekenai unai idia torea hedinarai goevagoeva be gau badana, badina idia ura diba momokani hida do idia mai.

Ai laloa unai hebou ena lata, bisinesi hebou bona ripoti danu, do ai haorea adorahi 1:00 p.m. dekenai eiava unai hora sisina murinai. Adorahi kahanai hebou be lasi. Gabu ena bada ia hegeregere lasi dainai, mai edia tiketi taudia sibodia do idia vareai diba. Dala idia hegaegaelaia lasi haida ese telefon amo unai hebou do idia kamonai henia totona.

International Bible Students Association of Papua New Guinea Inc. ena memba taudia be 3.00 p.m., October 3, 1992 ai do idia hebou, Branch Opesi, Port Moresby dekenai.