Abidadama

Anina: “Abidadama ena anina be inai bamona: ita daradara lasi, to ita diba Dirava ena davana namona ita naria kava lasi. Matana dekenai ita itaia lasi, to iseda lalona ia diba momokani inai gauna do ita abia.” (Heb. 11⁠:⁠1) Abidadama momokani be ta ese sibona ena ura hegeregerena ia abia dae kava herevadia amo ia vara lasi. Ta ese abidadama momokani ia abia totona, namona be ena abidadama ena badina bona hamomokania gaudia ia dibalaia, bona unai ena anina be ena kudouna lalonai ia laloa bada be namo. Unai dainai, ena be abidadama momokani be diba maorona amo ia vara, to Baibel ia gwau, ta be ena “kudouna” amo Dirava ia abidadama henia.​—⁠Roma 10⁠:10.

Dahaka dainai taunimanima momo be mai edia abidadama lasi?

Abidadama be Dirava ena lauma ena huahua ta, bona iena lauma idia tahua taudia ia henidia mai ena moale ida. (Gal. 5⁠:22; Luka 11⁠:13) Anina be, abidadama lasi taudia ese unai lauma idia tahua lasi, eiava badina kererena dainai idia tahua, eiava ena siahu be edia mauri lalonai idia koua. Unai kerere idauidau edia badina haida be inai:

Baibel ena hereva idia diba maoromaoro lasi: Dirava ena lauma ese Baibel ia havaraia. (2 Tim. 3⁠:​16, 17; 2 Sam. 23⁠:⁠2) Bema ta ese Baibel ena hereva ia tahua lasi, abidadama momokani be ia lalonai do ia tubu lasi. Ena be tomadiho oreadia taudia be mai edia Baibel reana, to bema edia gunalaia taudia ese taunimanima edia hereva idia hadibadia bona Dirava ena hereva idia hadibadia lasi, Dirava bona iena palani do idia abidadama henia momokani lasi. Edia lalo-hekwarahi bona hekwakwanai kokidia totona, sibodia edia lalohadai eiava taunimanima ma haida edia lalohadai hegeregeredia do idia kara.​—⁠Mataio 15⁠:​3-9 itaia danu.

Tomadiho idia lalohisihisilaia: Taunimanima momo ese Kerisendom ena dubu oreadia edia koikoi idia lalohisihisilaia, badina be unai orea idia gwau Dirava ena Hereva idia gwauraia hedinarai, to unai hereva idia badinaia lasi. Ma haida be guna Keristen lasi tomadiho oreadia lalodiai idia noho, to unai orea edia kara edia huahua dikadia idia itaia, eiava idia davaria unai orea edia hahediba herevadia ese idia durudia momokani lasi, lalo-hekwarahi gaudia idia hanaidia totona. Dirava korikorina idia diba maoromaoro lasi dainai, unai bamona taudia be tomadiho iboudiai amo idia siri.​—⁠Roma 3⁠:​3, 4; Mataio 7⁠:​21-23 itaia danu.

Idia diba lasi dahaka dainai Dirava ese kara dika ia koua haraga lasi: Taunimanima momo idia diba lasi dahaka dainai Dirava ese kara dika ia koua haraga lasi, unai dainai idia samania, idia gwau iena kerere dainai kara dika iboudiai idia vara. Idia diba lasi Dirava ena ura dainai lasi to Adam ena kara dika dainai taunimanima idia kara dika. (Roma 5⁠:12) Reana idia diba lasi Satana Diabolo ese inai tanobada ia biagua, unai dainai Satana ese ia havaraia karadia dikadia idia laloa kerere, idia gwau Dirava ese unai ia havaraia. (1 Ioane 5⁠:19; Apok. 12⁠:12) Bema unai idia diba sisina sibona, reana idia laloa Dirava be tanobada ena dika koua karana dekenai ia hesiku, badina idia diba lasi Satana ese Dirava ena lohia dalana ia hepapahuahulaia bona idia diba lasi Dirava ia haheauka noho dainai idia be mai edia dala hahemauri do idia davaria. (Roma 2⁠:4; 2 Pet. 3⁠:⁠9) Danu, idia diba goevagoeva lasi Dirava ese kara dika idia goadalaia taudia hamasedia ore negana ia gwauraia hidi vadaeni.​—⁠Apok. 22:​10-12; 11:18; Hab. 2:3.

Tauanina ena ura bona ena lalohadai ese edia mauri idia biagudia: Abidadama mai anina korikori lasi idia abia taudia momo edia kara be inai bamona: Nega ibounai gau idaudia idia tahua goadagoada. Reana idia haida idia gwau Baibel ena hereva idia abia dae, to idia tahua namonamo lasi, eiava idia duahia neganai, ena anina bona ena badina bona edia mauri lalonai do idia badinaia diba dalana be idia laloa namonamo lasi. (Sisiga Ginigunana 28⁠:9 itaia danu.) Idia haida ese edia abidadama idia hagoadaia lasi, to kara kereredia ura henia urana idia koua lasi, bena unai ura ese edia lalona ia biagua dainai Dirava bona ena dala idia rakatania.​—⁠Heb. 3⁠:12.

Ta ese abidadama edena bamona ia abia diba?

Roma 10:17: “Abidadama ia vara be Sivarai Namona kamonaia dekena amo.” (Kara 17:​11, 12; Ioane 4:​39-42; 2 Sisiga 9:​5-8 itaia danu. Namona be ta ese Baibel ena hereva ia dibaia guna, bena ia tahua namonamo ela bona do ia diba do ia abia dae be maoro, badina ia be momokani.)

Roma 10:10: “Iseda kudouna ena abidadama dekena amo Dirava vairanai do ita maoromaoro.” (Ta ese Dirava ena hereva bona ena kara ia haeroa o ia laloa namonamo loulou neganai, unai hereva be ena kudouna lalonai ia atoa.)

Bema ta ese Dirava ena gwauhamata hegeregeredia ia kara bena iena kara dainai Dirava ese ia hanamoa, unai ese ena abidadama ia hagoadaia.​—⁠Salamo 106⁠:​9-12 itaia.

Hereva hegeregerena: Reana oiemu turana ta be inai bamona oi herevalaia diba: ‘Lau abidadama henia. Lau diba iena hereva do ia hamomokania; bona lau diba bema lau be mai egu hekwakwanai, do ia durua lau.’ Varani sibona oi hedavari henia tauna ta be unai bamona oi herevalaia diba lasi, ani? Nega daudau lalonai oi bamoa bona ena kara namo ia hamomokania loulou tauna sibona be unai bamona oi herevalaia diba. Dirava abidadama henia karana danu be unai bamona. Iehova do oi abidadama henia totona, namona be nega taina daudau lalonai ia bona ena kara dalana oi dibaia.

Ia abia dae Dirava ia mauri noho

Rau 100-106 itaia danu, inai sinado badana “Dirava” henunai.

Kara maoromaoro negana matamatana ia naria

Taunimanima ta be Iehova ese ena hesiai taudia ia kara henidia sivaraidia ia diba namonamo neganai, Iosua bamona ia laloa. Iosua ia gwau: “Umui iboumui ai vada o diba, lalomui ai bona laumamui ai, Iehova, emui Dirava, ese ena gwau-hamata namodia iboudiai emui ai vada e hamomokanidia, ta se reaia. Iboudiai vada e momokani, ta se moru.”​—⁠Ios. 23⁠:14.

Baibel ena gwauhamata be gorere taudia do idia namo lou bona mase taudia do idia toreisi lou. Iesu Keriso ena hoa karadia sivaraidia ese unai gwauhamata idia hamomokania. Unai sivarai be gori lasi. Mani Evanelia bukadia haniosi edia hereva oi duahia, bena do oi diba unai hoa karadia sivaraidia edia mamina be sivarai momokanidia hegeregeredia. Idia vara gabudia bona idia vara negadiai idia lohia taudia edia ladana idia gwauraia; edia matadia amo idia itaia taudia haida, tamona lasi, edia sivarai idia torea bona unai sivarai idia noho ema bona hari. Bema unai gau oi haeroa o oi laloa namonamo, unai ese emu abidadama Baibel ena gwauhamata dekenai do ia hagoadaia.

Mani Iehova ena Witness taudia edia Kingdom Hall bona edia hebouhebou badadia dekediai oi lao, bena sibomu emu matana amo do oi itaia, Baibel ena sisiba badinaia karana ese taunimanima edia mauri ia haidaua; edia kara ia hamaoromaoroa diba bona bese idauidau bona kopi idauidau taudia ia durudia diba, varavara korikori bamona idia noho hebou bona idia gaukara hebou totona.

Bema ta be mai ena abidadama, iena kara be anina bada lasi a?

Iak. 2:​17, 18, 21, 22, 26: “Bema abidadama sibona ia noho, to kara be lasi, unai abidadama be anina lasi. To tau ta sedira ia hereva, ia gwau, ‘Oi be mai oiemu abidadama, to lau be mai lauegu kara namodia.’ Vadaeni, lauegu haere be inai bamona, ‘Tau ta mai ena abidadama, to mai ena kara lasi, unai bamona tauna ta ia noho, a? Lasi momokani. To lau ese lauegu abidadama do lau hamomokania lauegu kara namodia dekena amo.’ Gunaguna iseda tamana Aberahamo ese iena natuna Isako pata helagana latanai boubou totona ia atoa neganai, Dirava ese ia gwauraia maoromaoro. Oibe, Dirava ese Aberahamo ena kara namona ia itaia dainai, ia gwauraia maoromaoro. Oi itaia, Aberahamo ena abidadama be iena kara namona danu nega tamona idia gaukara. Bona unai dainai iena kara namodia ese iena abidadama idia hamomokania vadaeni. Ita diba, tauanina bema mai ena lauma lasi, ia be mase gauna, ani? Vadaeni unai bamona danu abidadama mai ena kara namodia lasi, be mase gauna.”

Hereva hegeregerena: Reana tauhau ta ese haneulato ta ia tura henia bona ia hamaoroa ia lalokau henia. To bema headava herevana ia hamaorolaia lasi, ia hahedinaraia ena lalokau be momokani lasi, ani? Unai hegeregerena, iseda kara amo ita hahedinaraia iseda abidadama bona iseda lalokau be momokani. Bema Dirava ita kamonai henia lasi, anina be ita lalokau henia momokani lasi bona ita abia dae lasi iena dala be maoromaoro. (1 Ioane 5⁠:​3, 4) To, herevana dahaka kara namodia ita karaia, hahemauri be iseda kara ena davana lasi. Mauri hanaihanai be Dirava ese Iesu Keriso ena amo ia henia harihari gauna, iseda kara ena davana lasi.​—⁠Ef. 2⁠:​8, 9.