Hadibaia Hereva

◼ July Bona August edia henia gauna: Inai buklet ta oi gaukaralaia diba: Dirava ese Ita Ia Laloa Eiava?, Inai Gavamani ese Paradaiso Do Ia Mailaia, Ita Mase Neganai Dahaka Ia Vara Ita Dekenai?, “Itaia! Lau ese Gau Iboudiai Lau Hamatamataia,” Mauri Ena Anina be Dahaka​—Edena Bamona Oi Davaria Diba?, Mauri Hanaihanai Tanobada Dekenai Oi Abia!, Oiemu Lalokau Tauna ta Ia Mase Neganai, Toi Tamona Oi Abia Dae be Namo, Eiava? September: Mauri Hanaihanai Paradaiso Lalonai. October: Gima Kohorona bona Awake! magasin ta ta. Lou henia oi karaia bona edia ura ia bada neganai, sabskripsen oi henia toho. November: Diba ese Mauri Dekenai Ita Ia Hakaua Lao eiava Dirava Ia Ura Dahaka Ita Karaia? buklet. Do ita hekwarahi Baibel stadi ita hamatamaia totona.

◼ September lalonai, sekit naria taudia ese pablik tok ladana “Keristani Taudia Momokanidia ese Dirava Ena Hahediba Herevadia Idia Hahairaia Dalana” do idia henia matamaia.

◼ Umui Abia Lou Diba Kaset Teipi:

Lau Egu Bible Sivarai Buka​—New Guinea Pidgin

Psalms​—English

Laki Gadara Ita Karaia be Kerere Lasi, A?

¹ Papua New Guinea lalonai taunimanima momo herea be Sunday dina ibounai kasi eiava laki gadara idauidau idia karaia. Iehova ena Witnes taudia ese Basileia ena sivarai idia herevalaia totona idia vadivadi henidia neganai, idia momo be edia kasi gadara idia laloa bada dainai idia ura lasi idia kamonai. Unai dainai, idia be inai tanobada dikana lalonai noho namo davaria dalana idia dibaia negana ta idia reaia unai. Bema idia ese Dirava ena Hereva idia kamonai henia lasi bona idia badinaia lasi neganai, mauri hanaihanai paradaiso lalonai do idia abia lasi.

² Iehova ena Witnes taudia momo be hanua lalodiai idia noho bona hanua taudia momo be laki gadara idia karaia. Nega momo edia varavara bona gabu taudia idia kasi danu. Unai be hetoho bada herea tadikaka bona taihu bona edia natudia dekenai, badina unai kara idia itaia hanaihanai. Vadaeni, nega ta ta sibona edia varavara bona turadia ida idia laki gadara karaia be ia dika eiava? Moale sisina davaria totona idia karaia be namo, a?

³ Laki gadara idauidau be idau nega amo ema bona hari idia karaia noho. Gunaguna tomadiho orea idauidau ese idia dadaraia. Idia gwau unai kara lalodiai inuinu kekero bona hereva mirodia idia vara momo. Gavamani ese ia dadaraia badina idia laloa unai kara ese lahedo, koikoi, bona taravatu utua karadia ia havaraia. Laki gadara ese ta ia hanamoa diba lasi, to hekwakwanai bona lalohisihisi bada ia havaraia diba. Bema ta ese laki gadara ia karaia loulou, Keristani kongregesen murimurinai do idia atoa. Bema ta ese unai kara ia rakatania lasi, mauri hanaihanai do ia haboioa.

⁴ To reana ta do ia gwau: “To lau be kasi momo lasi tauna” eiava “nega haida egu dekena taudia ida lau kasi neganai, moni bada lau gadaralaia lasi” eiava, “Ta ese lau ia itaia lasi, unai dainai ta lau hahekwakwanaia lasi. Bema lau uini dainai moni lau abia, egu haroro gaukara ena nega lau habadaia diba.”

⁵ To, gau badana be inai: Dirava ena lalohadai laki gadara dekenai be dahaka? Baibel ese laki gadara be edena bamona ia gwauraia? Namona be henunai idia noho herevadia ita laloa:

◼ Ia be mataganigani karana ta​—ta ia ura iena moni sisina amo moni bada herea ia abia.​—Ef. 5:3.

◼ Ia be lahedo karana ta​—taunimanima momo idia ura moni bada idia abia haraga, bena do idia gaukara lasi.​—2 Tes. 3:10; Aon. 6:​6-11.

◼ Ia be henaohenao karana ta​—ta ese moni sisina ia henia to taunimanima haida edia moni bada ia abia.​—Ef. 4:28.

◼ Unai kara dainai hebamo kereredia, idia inuinu kekero, bona matabodaga karadia idia vara.​—1 Kor. 15:33.

◼ Unai kara be taunimanima lalokau henidia lasi karana. Ta ese laki gadara dekenai moni ia negea dainai, ena ruma bese taudia edia dabua bona aniani idia hegeregere lasi.​—Ioa. 13:​34, 35.

⁶ Laki gadara idia rakatania lasi taudia dekenai dahaka ia vara? Laki gadara be mataganigani karana dainai idia be orea murimurinai do idia atoa. Laki gadara iboudiai idia dika. Iehova bona iena orea ese idia moalelaia lasi. Laki gadara karaia sisina ena dika ta be ta ia veria diba ia be laki gadara karaia loulou tauna ai ia lao totona bena mauri hanaihanai do ia haboioa. Namona be hanaihanai Roma 14:​12 ena hereva ita laloaboio lasi, ia gwau: “Badina be ita ibounai ta ta ese, iseda kara ena badina, be Dirava ena vairana dekenai do ita gwauraia hedinarai.”