Oi Laloa Haida ese Emu Kara Idia Laloa Kerere, A?

ANTONIO ia lalo-hekwarahi bada. Haraga herea bona mai badina ta lasi ida iena turana namona Leonardo be ia dekenai ia moale lasi.a Nega haida Antonio ena hanamoa herevana ia laloa lasi, bona idia noho hebou neganai, toana be haba ta be idia huanai ia noho. Antonio ia gari matamaia, ia laloa ia karaia kara ta eiava ia gwauraia herevana ta dainai ena turana ese lalohadai kererena ia abia. To dahaka kara o hereva?

Lalohadai kererena be nega momo ia vara. Idia momo be maragi bona idia hanamoa haraga diba. To lalohadai kereredia haida ese badu idia havaraia diba, bema oi hekwarahi bada oi hamaoromaoroa totona, to idia do noho. Dahaka dainai taunimanima ese lalohadai kererena idia abia? Unai ena anina be dahaka, unai bamona hekwakwanai idia abia taudia dekenai? Dahaka do oi karaia bema haida ese oi karaia gauna idia laloa kerere? Bona ma haida edia lalohadai oi dekenai be mai anina, eiava?

Do Ia Vara Karana Ta

Taunimanima ma haida ese iseda lalohadai bona ura idia diba lasi dainai, gabeai ta ese oiemu hereva eiava kara do ia laloa kerere. Lalohadai kererena ia vara haraga diba. Nega haida ita ura iseda lalohadai ita gwauraia hedinarai goevagoeva bona maoromaoro, to unai bamona ia vara lasi. Regerege bona kamonai karana idia hadikaia gaudia haida dainai, reana taunimanima ese iseda hereva idia hakala henia namonamo diba lasi.

Kara haida dainai lalohadai kererena ia vara diba. Hegeregere, reana hemarai tauna idia laloa kerere diba, idia gwau ia be moale lasi tauna, haida amo ia idau, eiava ia hekokoroku. Guna idia vara gaudia dainai, reana ena hemami ia dika haraga bona hekwakwanai haida ia laloa namonamo diba lasi. Taunimanima edia kastom bona gado be idauidau dainai, ita gwau diba lasi ma ta be nega ibounai iseda kara o hereva do ia lalo-pararalaia. Ma danu, ta ese ripoti kereredia bona udu mauri hereva ia kamonai diba, unai dainai ita hoa lasi ta ena lalohadai iseda hereva eiava kara ena anina dekenai be nega haida ia maoro lasi. To momokani, bema ta ia laloa taunimanima ese ena ura idia laloa kerere, reana unai hereva ese idia do ia hagoadaia lasi.

Hegeregere, Anna ena turana ia noho lasi neganai, ma haida dekenai ia herevalaia, ia gwau taunimanima momo ese ia idia ura henia, ia be hereva namona. Ma haida ese unai hereva idia gwauraia lou, to Anna ese ia gwauraia hegeregerena idia gwauraia lasi. Anna ia hoa bona ia lalohisihisi badina iena turana be mai badu ida taunimanima haida vairanai ia gwau henia, ia gwau Anna be ia mama badina mero ta ese ia kara namo henia. Ia ese Anna ena hereva ibounai ia laloa kerere, bona Anna ese ena turana ia hamaoroa loulou ia ura lasi ia hadikaia, to ena hekwarahi ibounai be anina lasi. Unai hekwakwanai ese hisihisi bada ia havaraia, bona nega bada ia lao ela bona Anna ese unai lalohadai kererena ia hamaoromaoroa diba.

Nega momo ma haida ese oiemu ura do idia laloa bona unai amo idia ese oi do idia kara henia. Unai dainai, vaia, taunimanima ese oiemu ura idia laloa kerere neganai, do oi lalohisihisi. Reana do oi badu, oi laloa badina ta ia noho lasi ta ese oi ia laloa kerere totona. Oi dekenai unai bamona kara be maoro lasi, kerere tahua karana, eiava ia kerere momokani, bona ​​—⁠bema unai hereva kerere idia gwauraia taudia edia lalohadai oi laloa bada​​—⁠oi do ia hahisia bada.

Reana oi badu taunimanima ese oi idia hahemaoro henia dalana dainai, to ma haida edia lalohadai oi matauraia be namo. Bema edia lalohadai ita dadaraia unai be Keristani karana lasi, bona ita ura lasi iseda hereva eiava kara ese taunimanima ma haida ia hadikaia. (Mataio 7:​12; 1 Korinto 8:​12) Unai dainai nega haida, reana do oi ura ma haida edia lalohadai kererena oi dekenai oi hamaoromaoroa toho. To, bema ma haida edia lalo-namo oi laloa momo, unai ese sibona matauraia lasi karana eiava ma haida ese oi idia dadaraia mamina ia havaraia diba. Badina ma haida edia lalohadai oi dekenai be oiemu namo korikorina ia hahedinaraia lasi.

To, reana oi davaria unai maumau herevana be mai ena badina. Unai danu ese oi ia hahisia diba, to bema mai emu ura bona momokani ida oiemu goevadae lasi karadia oi abia dae, unai ese anina namona ia havaraia diba, oi ia hagoadaia emu kara haida do oi haidaua totona.

Ia Havaraia Dika

Lalohadai kereredia ese anina dikana ia havaraia diba eiava ia havaraia diba lasi. Hegeregere, bema aniani rumana ta dekenai oi kamonai tau ta ia hereva badabada, reana do oi laloa ia be hemarai lasi tauna o ia be hekokoroku tauna. To reana oi kerere. Sedira ia hereva henia tauna ena taiana idia dika bona ia kamonai namonamo diba lasi. Eiava oi laloa sitoa dekenai ia gaukara hahinena be hahine namona lasi, to reana ia gorere. Ena be unai bamona laloa kerere ese maoro lasi lalohadai idia havaraia, to idia ese anina dikana eiava nega daudau ia noho dika idia havaraia lasi. To, nega haida laloa kerere karana ese dika bada ia havaraia diba. Idaunegai Israela dekenai idia vara sivarai rua mani oi laloa.

Amono ena king Nahasa ia mase murinai, Davida ese gwaukau taudia ia siaia ena natuna Hanunu, ena tamana ena gabu ia abia bona ia lohia matamaia tauna, idia hagoadaia totona. To, unai gwaukau taudia edia vadivadi idia laloa kerere, idia laloa Amono tanona idia spai henia totona idia lao, unai dainai guna Hanunu ese gwaukau taudia ia hahemaraia bona unai murinai Israela taudia ia tuari henia. Unai kara dainai, taunimanima 47,000 bamona idia mase​​—⁠unai ibounai ia vara badina edia ura namona idia laloa kerere.​​—⁠1 Sivarai 19:​1-​19.

Israela ena sivarai lalonai, lalohadai kererena ma ta be dala idauna ta ai idia hamaoromaoroa. Rubena bona Gado ena iduhu taudia bona Manase ena iduhu kahana ta, ese Ioridane Sinavai badinai taunimanima idia itaia haraga boubou patana idia haginia. Israela taudia oredia ese unai kara idia gwauraia abidadama lasi karana, Iehova gwau-edeede henia karana. Unai dainai idia hebou idia tuari henidia totona. Kara ta idia do karaia lasi neganai, Israela iduhudia ma haida ese gwaukau taudia idia siaia, sibodia idia laloa abidadama lasi karana dekenai edia badu idia gwauraia totona. Unai bamona idia karaia be namo, badina unai boubou patana idia haginia taudia idia gwau idia ura lasi tomadiho goevana amo idia raka siri. To, unai boubou patana idia haginia edia abidadama Iehova dekenai idia hahedinaraia totona. Inai lalohadai kererena dainai momo idia mase diba, to aonega karana dainai unai bamona dika badana ia vara lasi.​​—⁠Iosua 22:​10-​34.

Lalokau Dekenai Hekwakwanai Hamaoromaoroa

Unai sivarai rua ita hahegeregerea neganai, ita ia hadibaia. Momokani, hekwakwanai hamaoromaoroa be aonega karana. Unai sivarai iharuana lalonai, daika ia diba hida ese edia mauri idia haboioa lasi badina unai kahana rua idia herevahereva? Nega momo, ta ena ura korikorina oi lalo-pararalaia lasi neganai, taunimanima haida ese edia mauri do idia haboioa lasi, to reana emui hetura karana do umui haboioa. Unai dainai bema oi laloa ta ese oi ia kara namo henia lasi, oi diba momokani gau ibounai oi lalo-pararalaia, eiava oi laloa kerere? Unai tauna ena ura korikorina be dahaka? Ia oi nanadaia. Oi laloa emu kara lau laloa kerere, a? Ia ida oi herevahereva. Namo lasi oi hekokoroku dainai oi herevalaia lasi.

Iesu ese lalohadai kererena hamaoromaoroa urana ia hagoadaia gauna namo hereana ia gwauraia: “Unai dainai, oiemu harihari gauna pata helaga dekenai oi atoa gwauraia neganai be do oi laloa guna, oiemu tadikakana dekenai mai emu kerere. Bema unai bamona, oiemu harihari gauna pata helaga ena vairana dekenai do oi rakatania, oi lao, oiemu tadikakana danu maino do umui ruaosi karaia guna, gabeai oi giroa lou, oiemu harihari gauna Dirava dekenai do oi henia.” (Mataio 5:​23, 24) Unai dainai dala maorona be taunimanima ma haida idia noho lasi neganai, unai tauna sibona dekenai oi lao. Bema oi ia habadua tauna be oiemu maumau herevana be ma ta amo ia kamonaia guna, unai ese emui hekwakwanai do ia habadaia. (Aonega Herevadia 17:⁠9) Oiemu tahua gauna be lalokau dalana amo maino do oi karaia. Mai badu lasi ida unai hekwakwanai be auka lasi bona samani lasi herevadia amo oi gwauraia hedinarai goevagoeva. Unai hekwakwanai dainai, oiemu hemami be edena bamona oi gwauraia hedinarai. Bena iena lalohadai ia gwauraia neganai, oi kamonai namonamo. Namo lasi oi karaharaga bona iena kara ena badina oi gwauraia dika. Namona be oi laloa unai tauna ia ura lasi oi ia hahisia. Namona be oi laloatao, lalokau ena “abidadama ia goada noho.”​​—⁠1 Korinto 13:⁠7.

Momokani, ena be lalohadai kererena oi hamaoromaoroa vadaeni, to reana ta be do ia lalohisihisi noho eiava unai kara ia havaraia dika do ia noho. Dahaka oi karaia diba? Bema ia namo, mai momokani ida sori herevana oi gwauraia be maoro, bona kara ma haida danu oi karaia diba unai hekwakwanai oi hamaoromaoroa totona. Nega ibounai, lalohisihisi tauna ese inai lauma amo ia vara sisibana ia badinaia be namo: “Bema tau ta ese iena bamona tauna ia maumauraia, ia kara dika henia dainai, namona be unai dika do ia gwauatao. Lohiabada ese umui emui dika ia gwauatao, vadaeni unai bamona do umui karaia danu. To unai kara ibounai ia hereaia kara be lalokau. Do umui lalokau henia, vadaeni do umui noho hebou namo herea, mai laloa tamona danu.”​​—⁠Kolose 3:​13, 14; 1 Petero 4:⁠8.

Ita do goevadae lasi negana ai, lalohadai kererena bona ma haida hahisia karana be do idia vara noho. Ita ibounai ese kerere ita karaia diba eiava ma haida laloa lasi dalanai eiava hebogahisi lasi dalanai ita hereva diba. Baibel ia gwau: “Ita ibounai ese nega momo kerere ita karaia. To bema tau ta ese iena hereva dekena amo kerere ta ia karaia lasi, ia be goeva bona namo momokani. Ia ese iena tauanina ibounai ia biagua bona naria diba.” (Iamesi 3:⁠2) Iehova Dirava be unai kara ia diba namonamo dainai, ita dekenai inai oda ia henia: “Do oi badu haraga lasi. Bona bema badu be emu lalona dekenai oi dogoatao noho, inai be kavakava taudia edia kara. Taunimanima edia hereva ibounai do oi kamonai henia lasi, oiemu hesiai tauna ese oiemu ladana ia hadikaia neganai oi kamonai garina. Badina oi be oi diba, nega momo oi ese haida oi hereva dika henia vadaeni.”​​—⁠Hadibaia Tauna 7:​9, 21, 22.

“Lohiabada ese Oiemu Laloa Gaudia Ia Tohoa Noho”

Bema toana be ta ena lalohadai kererena oi dekenai oi kokia diba lasi, dahaka do oi karaia? Oi lalohisihisi lasi. Keristani karadia oi habadaia bona hahedinaraia noho. Iehova oi noia oi ia durua emu kara haida oi hanamoa totona. Oiemu namo korikori be taunimanima ma haida ese idia laloa hegeregerena lasi. Iehova sibona ese “oiemu laloa gaudia ia tohoa” diba. (Aonega Herevadia 21:​2) Taunimanima ese Iesu idia laloa maragi bona idia dadaraia, to Iehova ena laloa dalana ia haidaua lasi. (Isaia 53:⁠3) Ena be haida ese oi idia laloa kerere, to Iehova dekenai oiemu ‘kudouna ena ura gaudia’ oi gwauraia diba. Oi diba momokani oiemu kara do ia lalo-pararalaia, badina “Lohiabada ese gau ia itaia lasi, taunimanima ese idia itaia bamona. Taunimanima ese tau ena toana idia itaia, to Lohiabada ese tau ena kudouna ia itaia.” (Salamo 62:8; 1 Samuela 16:⁠7) Bema kara namo oi karaia noho, reana gabeai oi idia laloa kerere taudia do idia diba idia kerere bona edia lalohadai do idia haidaua.​​—⁠Galatia 6:9; 2 Timoteo 2:​15.

Inai hereva ena hamatamaia kahana dekenai ai gwauraia tauna, Antonio, oi laloatao, a? Ena lalona ia hagoadaia Baibel ena sisiba do ia badinaia, bona ena turana Leonardo ida ia kiki, ia nanadaia dahaka ia karaia ia habadua totona. Dahaka ia vara? Leonardo ia hoa bada. Ia gwau Antonio ese gau ta ia karaia lasi ia habadua totona bona ia ura lasi ena kara be idau ia dekenai. Bema ia moale lasi, reana unai neganai gau momo ia lalohadailaia. Leonardo ia sori badina ia diba lasi ena turana ia hahisia bona ia tanikiu henia unai kara be ia dekenai ia gwauraia. Ia gwau vaira negana ai do ia naria namonamo, ma haida be unai bamona lalohadai do idia abia lasi totona. Edia huanai ia noho hekwakwanai ia ore, bona edia hetura namonamo karana ia hadikaia lasi.

Ta ese oiemu kara ia laloa kerere neganai, emu hemami do ia namo lasi. To bema dala namodia ibounai oi tahua unai hekwakwanai hamaoromaoroa totona bona Baibel ena hakaua herevadia, lalokau bona dika gwauatao karana oi badinaia, reana anina namona do oi davaria.

[Footnote]

[Pictures on page 23]

Emui hekwakwanai hamaoromaoroa totona, lalokau bona dika gwauatao karana ese anina namona do idia havaraia