Karoa 27
Heduru Abia Totona Oi Guriguri be Namo
TANOBADA ena siahu dikana amo idia gini siri totona, Keristen taudia be guriguri amo heduru idia abia be namo. Iesu ia gwau: “Emui Tamana guba dekenai ia noho ese Lauma Helaga idia noinoi taudia dekenai do ia henidia.” (Luka 11:13, HM) Dirava ena lauma helaga, ena gaukara siahuna unai, ita abia be namo, to ita abia totona, guriguri amo ita noia be namo.
2 Ita guriguri anina be Dirava ita hereva henia mai eda hemataurai danu. Reana gau ta ita noia eiava Dirava ita tanikiu henia o ita hanamoa. (1 Sisiga 29:10-13) Iseda Tamana guba dekenai ia noho ita badinaia namonamo totona, namona be nega momo ita guriguri henia. (Roma 12:12; Efeso 6:18) Ita noia neganai, ena gaukara siahuna do ia henia. Unai siahu ese ita do ia hagoadaia, bena ena be Satana eiava ena tanobada ese ita ia hahisia o ia dibagania, to Dirava ena ura do ita karaia noho.—1 Korinto 10:13; Efeso 3:20.
3 Reana oi hekwarahi bada noho, Dirava habadua karana ta oi hadokoa totona. Bema unai bamona, Iehova ena heduru oi tahua be namo. Oi guriguri henia. Aposetolo Paulo be unai bamona ia karaia. Ma ia gwau: “Lau dekenai goada ia henia Diravana dainai gau iboudiai lau karaia diba.” (Filipi 4:13; Salamo 55:22; 121:1, 2) Kara bodaga ia hadokoa hahinena ta ia gwau: “Ia mo sibona ia goada, oi ia durua unai kara oi hadokoa totona. Namona be Iehova oi laloa emu Tamana bamona, bona unai bamona oi laloa totona, oi guriguri henia be namo.”
4 To reana tau ta ia gwau: ‘Nega momo Dirava ena heduru lau noia, to kara dika lau hadokoa diba lasi.’ Kuku ania taudia haida be unai bamona. Idia ta idia nanadaia, ia be edena negai ia guriguri. Ia haere, ia gwau: “Adorahi ai, lau mahuta gwauraia neganai, bona dabai, lau toreisi neganai, bona danu lau manoka bona kuku lau ania murinai Iehova lau hamaoroa lau sori egu kara dainai.” Ena turana ta ia gwau: “Kuku oi ania gwauraia neganai Dirava ena heduru oi abia be namo, ani? Vadaeni, unai neganai Iehova oi noia be namo, bena oi do ia hagoadaia.” Vadaeni unai bamona ia karaia neganai heduru ia abia bona kuku ania karana ia hadokoa.
5 To, ena be Dirava oi guriguri henia, ena be ena Hereva oi tahua, bona ena be ena orea lalonai oi vareai, to kara maoromaoro oi karaia do ia auka. Oibe, do oi hekwarahi bada, bona reana hisihisi do oi ania. (1 Korinto 9:27) Kara dika idia manadalaia taudia ese unai kara idia ura henia bada. Unai dainai ta be kara dika ia hadokoa neganai, hisihisi ia ania. Oi hegaegae a, kara maoromaoro karaia totona hisihisi do oi ania?—1 Petro 2:20, 21.
DIRAVA ESE IA KAMONAIA GURIGURIDIA
6 Taunimanima momo idia davaria idia guriguri be auka. Dirava ita itaia diba lasi, unai dainai namona be ita be mai eda abidadama; unai amo Dirava do ita guriguri henia bena ita do ia kamonai henia. Namona be ita abiadae Iehova be momokani ia noho bona ita noia gaudia ia karaia diba. (Heberu 11:6) Bema ita be mai eda abidadama unai bamona bona bema Dirava ita hereva henia mai eda momokani danu, ita diba ita do ia durua. (Mareko 9:23) Roma tuari biaguna Korenelio, ena be ia be Dirava ena orea tauna ta lasi, to Dirava ia noia mai ena momokani danu neganai, Dirava ese ia kamonai henia.—Kara 10:30-33.
7 Haida idia davaria edia lalohadai idia gwauraia hedinarai be auka. To namona be guriguri amo Dirava idia hereva henia. Iseda ura gaudia bona iseda lalohadai, ita gwauraia toho gaudia, be ia diba vadaeni. (Mataio 6:8) Iseda Tamana guba dekenai ia ura lasi ta ese ita ia hadibaia herevadia idaudia amo ita hereva henia, to ia ura sibona eda hereva amo ita hereva henia mai eda momokani danu. (Iakobo 4:6; Luka 18:9-14) Taunimanima ese idia matauraidia totona hereva idaudia amo idia guriguri eiava hereva haida idia gwauraia loulou taudia be ia ese ia kamonai henidia lasi.—Mataio 6:5, 7.
8 Ena be oi emu kudouna lalonai oi guriguri to Dirava ia kamonai diba. Nehemia bona Hana be unai bamona idia guriguri neganai ia kamonai henidia. (Nehemia 2:4-8; 1 Samuel 1:11-13, 19, 20) Herevana oi emu tau-anina be edena bamona oi karaia, nega idauidau ai bona gabu idauidau ai oi guriguri diba. To Bible ese ia hahedinaraia, lalo-manau hahedinaraia totona oi igo diho o emu tuina dekenai oi diho be namo. (1 Hanua Pavapavadia 8:54; Nehemia 8:6; Daniel 6:10; Mareko 11:25; Ioane 11:41) Bona Iesu ia hahedinaraia, namona be sibona eda guriguri be hehuni gabuna dekenai ita gwauraia, taunimanima ese ita idia itaia lasi gabuna unai.—Mataio 6:6.
9 Guriguri be iseda tomadiho ena kahana ta. Unai dainai, ita ia karaia Diravana Iehova sibona ita guriguri henia be namo. (Mataio 4:10) Bona Bible ese ia hahedinaraia Keristen taudia be Dirava dekenai idia lao dalana tamona be Iesu ena amo. Anina be Iesu ena ladanai ita guriguri be namo.—Ioane 14:6, 14; 16:23; Efeso 5:20; 1 Ioane 2:1, 2.
10 To, Iehova be guriguri iboudiai dekenai ia moale a? Lasi, badina be Bible ia gwau: “Taravatu ia kamonai henia lasi tauna ena guriguri be gau dika rohorohona.” (Hereva Lada-isidia 28:9; 15:29; Isaia 1:15) Unai dainai, bema ita ura Dirava ese iseda guriguri ia kamonaidia, namona be ena taravatu ita badinaia. Bema lasi, ita do ia kamonai henia lasi. Bible ia gwau: “Ita noia gaudia iboudiai be ia ese ia henia ita dekenai; badina be iena oda ita badinaia bona ia hamoalea karadia ita karaia dainai.”—1 Ioane 3:22.
11 Anina be iseda guriguri hegeregerena ita karaia be namo. Hegeregere, bema tau ta ese Dirava ia noia do ia durua kuku ania karana hadokoa totona, ia lao bona kuku ia hoia be kerere. Danu, bema Iehova ia noia do ia durua mata-bodaga karadia amo ia siri totona, bena buka dikadia ia duahia o laulau dikadia ia itaia, unai be hegeregere lasi. Eiava bema iena manoka gabuna be kasi dainai Dirava ia noia do ia durua unai kara ia hadokoa totona bena kasi gabuna dekenai ia lao be hegeregere lasi. Dirava ese iseda guriguri ia kamonai henia totona, namona be iseda kara amo iseda hereva ita hamomokania ia vairanai.
12 Vadaeni, ita ta ta be dahaka ita gurigurilaia diba? Iseda kara Iehova vairanai idia hanamoa o idia hadikaia gaudia iboudiai ita gurigurilaia diba, iseda gorere bona iseda natudia naria dalana danu. (2 Hanua Pavapavadia 20:1-3; Hahemaoro Taudia 13:8) Aposetolo Ioane ia gwau: “Gau ta iena ura hegeregerena ai bema ita noia, ia ese ita ia kamonai henia.” (1 Ioane 5:14) Unai dainai, gau badana be Dirava ena ura ita diba guna bena iena ura hegeregerena ita noia. (Hereva Lada-isidia 3:5, 6) Bema ita guriguri neganai, sibona eda ura gaudia sibodia lasi, to Dirava ena ura danu ita laloa, Iehova ese iseda guriguri do ia abiadae. Namona be dina iboudiai Iehova ita tanikiu henia, ia henia gaudia namodia dainai.—Ioane 6:11, 23; Kara 14:16, 17.
13 Iesu ese guriguri maoromaoro dalana ia hahedinaraia. (Mataio 6:9-13) Ia hahedinaraia Dirava ena ladana, iena basileia bona iena ura tanobada dekenai ita gurigurilaia guna be namo. Gabeai, sibona eda ura gaudia, hegeregere aniani, dika gwauatao, bona hedibagani bona Satana Diabolo amo hamauria, ita gurigurilaia be namo.
HAIDA DAINAI GURIGURI
14 Iesu be ena kara amo ia hahedinaraia ma haida dainai ita guriguri be gau badana. (Luka 22:32; 23:34; Ioane 17:20) Paulo be unai bamona guriguri edia namo ia diba dainai nega momo haida ia noidia, ia dainai do idia guriguri. (1 Tesalonika 5:25; 2 Tesalonika 3:1; Roma 15:30) Dibura ai ia noho neganai, ia gwau: “Lau egu helaro be emui guriguri dainai lau do idia ruhaia.” (Filemona 22; Efeso 6:18-20) Bena nega sisina murinai dibura amo idia ruhaia dainai, ita diba ia dainai idia gwauraia guriguridia ese idia durua.
15 Paulo danu ese ma haida dainai ia guriguri. Ia gwau: “Nega ibounai ai guriguri umui dainai, iseda Dirava ese umui do ia laloa ena boiboi kamonai dekenai do umui hegeregere.” (2 Tesalonika 1:11) Congregation ma ta dekenai ia gwau: “Dirava ai noia, do umui kara dika lasi . . . to do umui kara maoromaoro totona.” (2 Korinto 13:7) Namona be ita lalokau henidia taudia dainai ita guriguri, Paulo ia karaia bamona. Momokani, “kara maoromaoro tauna ena guriguri ese anina ia havaraia mai siahuna danu.”—Iakobo 5:13-16.
16 Oi be edena bamona—Bible stadi be nega tamona pura ta ta dekenai oi abia negadia sibodia oi guriguri, eiava ma nega haida danu oi guriguri, a? Heduru ita abia totona, namona be Dirava ita guriguri henia nega momo. (1 Tesalonika 5:17; Luka 18:1-8) Mai emu manau danu oi hereva henia, emu turana ta, oi lalokau henia bona oi abidadama henia tauna, oi hereva henia hegeregerena. Momokani, guba bona tanobada ia lohiaia Diravana oi guriguri henia bena oi ia kamonai henia be hahenamo bada herea!—Salamo 65:2.
[Study Questions]
1. Dahaka heduru Dirava ena amo ita abia be namo, bona edena dala amo ita abia?
2. (a) Guriguri be dahaka? (b) Guriguri ena anina idauidau be dahaka dahaka? (c) Dahaka dainai guriguri be gau badana?
3. (a) Dahaka goada be Dirava ena amo ita abia diba? (b) Dirava ita badinaia namonamo dalana tamona be dahaka?
4. Edena dala amo tau ta ese goada ia abia bena kuku ania karana ia hadokoa?
5. (a) Dirava ena ura karaia maoromaoro totona, dahaka oi karaia be namo? (b) Dahaka ese ia hahedinaraia kara dika idia hadokoa taudia momo be hisihisi idia ania?
6. (a) Dahaka dainai momo idia davaria idia guriguri be auka? (b) Dirava ese iseda guriguri ia kamonaia totona, dahaka ita karaia be namo?
7. (a) Dirava ese edena bamona guriguri ia moalelaia? (b) Dirava ese edena bamona guriguri ia dadaraia?
8. (a) Dahaka dainai ita diba iseda kudouna lalonai ita guriguri neganai Dirava ia kamonai? (b) Bible be taravatu ia atoa, ita guriguri neganai iseda tau-anina be edena bamona do ita karaia, a?
9. (a) Daika sibona ita guriguri henia be namo, bona dahaka dainai? (b) Dirava ese iseda guriguri ia abiadae totona, daika ena ladanai ita guriguri be namo?
10. (a) Edena taudia edia guriguri be Dirava ese ia moalelaia lasi? (b) Dirava ese iseda guriguri ia kamonaidia totona, dahaka ita karaia guna be namo?
11. Iseda guriguri hegeregerena ita karaia anina be dahaka?
12. (a) Dahaka dahaka ita gurigurilaia be namo? (b) Dirava ese iseda guriguri ia moalelaia totona, dahaka ita diba guna be namo?
13. (a) Iesu ese ia hahedinaraia dahaka dahaka ita gurigurilaia guna be namo? (b) Dahaka dahaka be gabeai ita gurigurilaia be namo?
14. Bible be edena bamona ia hahedinaraia ma haida dainai ita guriguri be gau badana?
15. Iseda lalokau taudia dainai edena bamona ita guriguri diba?
16. (a) Heduru abia totona edena negai ita guriguri be namo? (b) Dahaka dainai guriguri be hahenamo badana ta?
[Picture on page 227]
Bema ta ia ura bada kuku ia ania neganai, dahaka ia karaia be namo—heduru abia totona ia guriguri eiava ena ura dikana ia karaia, a?
[Picture on page 229]
Heduru abia totona oi guriguri bena hedibagani lalonai oi raka vareai, a?
[Picture on page 230]
Sibona oi noho neganai oi guriguri o ma haida danu umui noho neganai sibona, a?