Guriguri

Anina: Dirava momokanina hereva henia karana eiava dirava koikoidia hereva henidia karana. Guriguri tauna be ia hereva hedinarai eiava sibona ena lalona dekenai ia hereva hehuni.

Taunimanima momo idia laloa hegeregerena, oi danu oi laloa Dirava ese emu guriguri ia haerelaia lasi, a?

Dirava ena lalona ia hegeregere daidia edia guriguri do ia kamonai?

Sal. 65:2; Kara 10:​34, 35: “Guriguri ikamonaina Diravana e, taunimanima iboudiai na bae vasi.” “Dirava ese taunimanima edia toana ia laloa lasi. To bese ibounai lalonai, Dirava dekenai ia gari bona kara maoromaoro ia karaia tauna, Dirava ese do ia abia dae.” (Ta ese Dirava ia guriguri henia neganai, Dirava ese ena bese, o ena kopina, o ena ogogami, o ena taga ia laloa lasi. To ia ese ena lalona ena ura bona ena mauri dalana ia laloa.)

Luka 11:2: “Umui guriguri neganai be umui gwau, ‘Aiemai Tamana e, oiemu ladana do ai hahelagaia.’ ” (Baibel ia gwau Tamana ena ladana be Iehova; oi ese ia oi guriguri henia eiava “helaga taudia” oi guriguri henidia, a?)

Ioane 14:​6, 14: “Iesu ia haere, ia gwau, ‘Dala be lau, hereva momokani be lau, mauri danu lau. Tamana dekenai do idia lao taudia ibounai edia dala ta be lasi, lau sibona. Bema gau ta lauegu ladana dekenai umui noia, lau be do lau karaia.’ ” (Oi be Iesu ena ladanai oi guriguri a, badina be oi diba oi be kara dika tauna ta dainai namona be oi dainai Dirava do ia noinoi henia?)

1 Ioane 5:14: “Dirava ita abidadama henia dainai, ita diba momokani, bema gau ta iena ura hegeregerena ita noia neganai, ia ese ita dekenai do ia kamonai.” (Unai oi diba momokani totona, namona be Dirava ena ura oi dibaia guna. Bena oi naria namonamo, iena ura hegeregerena mo do oi noia.)

1 Pet. 3:12: “Lohiabada ese kara maoromaoro taudia ia naridia noho. Bona edia guriguri ia kamonai henia noho. To Lohiabada ese kara dika taudia edia dala ia koua noho.” (Iehova ese ena Hereva amo ia hahedinaraia vadaeni dahaka be maoro bona dahaka be kerere; oi ese unai hereva oi tahua namonamo vadaeni a?)

1 Ioane 3:22: “Do ita noia gaudia ibounai be ia ese ita dekenai do ia henia. Badina be iena taravatu ita badinaia noho, bona ia do ita hamoalea karadia ita karaia noho dainai.” (Oi be momokani oi ura Dirava do oi hamoalea a, bona iena oda herevadia, oi diba vadaeni gaudia, be mai emu momokani ida oi badinaia toho, a?)

Isa. 55:​6, 7: “Iehova a tahua, doini ba davaria diba negana ai; a boi henia, ia na doini kahikahi negana ai. Kara dika tauna ese ena dala baine rakatania, bona kara gageva-gageva tauna ese ena lalo-hadai baine rakatanidia, Iehova baine lou henia, bena ia ese baine bogaia hisi, eda Dirava baine lou henia, bena ia ese ena dika idoinai baine gwaua tao.” (Mai ena hebogahisi ida, Iehova ese kara dika taudia danu ia boiridia do idia guriguri henia. To, edia guriguri do ia kamonai totona, namona be edia dala kereredia bona edia lalohadai kereredia amo idia helalo-kerehai momokani bona edia raka dalana idia haidaua.)

Dahaka dainai Dirava ese taunimanima haida edia guriguri ia kamonai lasi?

Mat. 6:5: “Umui guriguri neganai, koikoi taudia bamona umui karaia lasi, badina be idia ura dubu dekenai bona dala edia huanai idia gini, vadaeni idia guriguri, taunimanima ese idia itaia totona. Umui lau hamaoroa momokani, edia davana ibounai idia abia vadaeni.” (Luka 18⁠:​9-14 danu)

Mat. 6:7: “Umui guriguri neganai, hereva kava momo umui gwauraia loulou lasi, Dirava diba lasi taudia bamona, badina be idia laloa edia hereva momo dainai Dirava idia do ia kamonai.”

Her. 28:9: “[Dirava ena] taravatu ikamonaina amo taiana e daro kepokepomu tauna ena ḡuriḡuri na ḡau dika-rohorohona.”

Mika 3:4: “Bena Iehova bae tai henia, a ia ese basine haere henidia; una negana ai vairana na edia amo baine hunia, badina be idia na vada e kara dika.”

Iak. 4:3: “Bema Dirava umui noia neganai, emui ura gauna umui davaria lasi, badina be mai laloa kerere danu umui noia. Emui laloa be unai gauna do umui abia, bona do umui gaukaralaia emui tauanina edia ura dikadia totona.”

Isa. 42:​8; Mat. 4:​10: “Lau na Iehova, ladagu bunai; hairaigu na ta asina heniamu, i’imodaigu na e koro kaivakukudia asina henidiamu.” “Lohiabada [Iehova] oiemu Dirava do oi tomadiho henia, ia sibona dekenai hesiai gaukara do oi karaia.” (Salamo 115⁠:​4-8 danu) (Guriguri be tomadiho karana ta. Bema laulau o kaivakuku oi guriguri henidia, Dirava ese unai ia moalelaia a?)

Isa. 8:19: “Bae hamaoromui, baeto ‘Rohe taudia bona mea taudia, e tanatanamu bona e hereva hemaunumu taudia, na ba nanadaidia’ negana ai ba laloa, taunimanima ese edia Dirava basiema nanadaia a? Mase taudia bema nanadaidia mauri taudia daidiai a?”

Iak. 1:​6, 7: “To unai tau ia noinoi neganai, namona be ia abidadama sibona, bona daradara lasi. Badina be daradara tauna be davara ena hurehure bamona. Lai ese ia doria lao doria mai, ia be gini gabuna lasi. Bema daradara tauna ia laloa gau ta Lohiabada dekena amo do ia abia diba, iena laloa be anina lasi.”

Dahaka dahaka ita gurigurilaia be maoro?

Mat. 6:​9-13: “Unai dainai, inai bamona do umui guriguri. ‘[1] Aiemai Tamana e, guba dekenai oi noho, oiemu ladana do ai hahelagaia. [2] Oiemu Basileia do ia mai, [3] oiemu ura gauna tanobada dekenai do ai karaia, guba dekenai idia karaia bamona. [4] Hari dina aiemai aniani mani oi henia ai dekenai. [5] Aiemai dika mani oi gwauatao, badina be ai dekenai idia hadikaia taudia edia dika ai gwauatao. [6] Dibagania dika gabuna dekenai ai do oi hakaua vareai lasi, to Satani ena imana dekena amo do oi hamauria ai.’ ” (Mani inai oi laloa: Dirava ena ladana bona ena ura ita gurigurilaia guna be namo.)

Sal. 25:​4, 5: “Iehova e, emu kara ba haheitalaigu, emu dala ba hadibalaigu. Emu hereva momokanidia ai ba hakaugu, ba hadibagu, badina be oi na lau ihamaurigu Diravana.”

Luka 11:13: “Umui laloa, umui be dika taudia, gau namodia emui natuna dekenai henia be umui diba, to emui Tamana guba dekenai ia noho ese Lauma Helaga idia noinoi taudia dekenai do ia henidia lasi, a?”

1 Tes. 5:​17, 18: “Nega ibounai do umui guriguri. Emui mauri lalonai ia vara gaudia ibounai dainai Dirava do umui tanikiu henia.”

Mat. 14:​19, 20: “Iesu ese aniani gaudia 5 sibona, bona gwarume rua sibona ia abia, guba dekenai ia itaia, bona aniani ia hanamoa. Vadaeni aniani ia makohia sisina sisina, diba tahua taudia dekenai ia henia. Vadaeni idia ese taunimanima hutuma dekenai idia henia. Ibounai idia aniani, idia boga kunu.”

Iak. 5:16: “Umui ta ta totona do umui guriguri.”

Mat. 26:41: “Do umui naria bona umui guriguri, Satani ena laloa dekenai do umui vareai garina.”

Fil. 4:6: “Gau ta totona do umui laloa hekwarahi lasi. To emui dabu gaudia do umui abia totona Dirava do umui noia. Bona umui noia negadia ibounai, mai tanikiu danu do umui guriguri henia.”

Bema Ta Ia Gwau​—⁠

‘Mani ita guriguri hebou guna, bena emu haroro herevana oi gwauraia lau dekenai’

Reana inai bamona oi haere henia diba: ‘Lau moale, badina be emu hereva dainai lau diba oi ese guriguri oi laloa bada. Ai Iehova ena Witness taudia danu ai guriguri loulou. To inai oi diba a: Iesu ese ena hahediba taudia ia hamaorodia taunimanima vairadiai do idia guriguri lasi, edia guriguri karadia dainai haida ese do idia hanamodia totona? . . . (Mat. 6⁠:⁠5)’ Bena reana ma oi gwau: ‘Mani ena hereva oredia oi laloa; ia hahedinaraia dahaka ita laloa bada bona ita gurigurilaia guna be namo. Lau mai inai, ita ruaosi be unai gau ita herevalaia hebou totona. (Mat. 6⁠:​9, 10)’

Eiava inai bamona oi hereva diba: ‘Lau diba tomadiho oreadia taudia haida be unai bamona idia karaia. To ai Iehova ena Witness taudia be unai bamona ai karaia lasi, badina be Iesu ese ena hahediba taudia ia hadibadia edia haroro gaukarana be dala idauna amo do idia karaia. Mani inai oi laloa: Ia gwau lasi, “Ruma dekenai do umui vareai neganai do umui guriguri guna.” Mani iena hereva Mataio 10⁠:​12, 13 dekenai oi laloa. . . . Bona Mat 10 siri 7 danu mani oi itaia, inai siri lalonai ia hamaorodia dahaka do idia herevalaia. . . . Unai Basileia ese oi bona lau bona ma haida danu edena bamona ia durua diba? (Apok. 21⁠:⁠4)’