Karoa 26
Ita Hekwarahi, Kara Maoromaoro Karaia Totona
SATANA ena tanobada do ia noho lalonai, Keristen taudia do idia hekwarahi noho, ena siahu dikana amo idia gini siri totona. Aposetolo Paulo ia gwau: “Dirava ena tuari dabua ibounai umui karaia; bena do umui goada, Diabolo ena kara koikoi do umui koua diba.” (Efeso 6:11-18) To namona be ita hekwarahi, sibona eda ura dikadia koua totona danu. Bible ia gwau: “Taunimanima . . . idia maragi negana amo edia laloa be dika.”—Genese 8:21, HM; Roma 5:12.
2 Adam ena amo kara dika ita abia, unai dainai iseda kudouna be reana kara dika idia ura henia bada. Bema unai ura ita gavaia, mauri hanaihanai Dirava ena nega matamatana lalonai do ita abia lasi. Unai dainai namona be ita hekwarahi, kara maoromaoro ita karaia totona. Aposetolo Paulo danu be unai bamona ia hekwarahi; ia gwau: “Kara namo lau karaia gwauraia neganai, dika be lau dekenai ia noho.” (Roma 7:21-23) Oi be unai bamona oi lalo-hekwarahi neganai, dahaka do oi karaia?
3 Oi diba vadaeni, Dirava ena gwauhamata be mauri hanaihanai tanobada ena paradaiso lalonai do oi abia diba. Unai gwauhamata oi abiadae, bona oi ura unai mauri namona oi abia. Oi diba bema Dirava ena ura oi karaia, noho hanaihanai hahenamo do oi davaria. To reana oi emu kudouna lalonai oi ura kara dikadia oi karaia. Reana nega haida oi ura dikadika oi heudahanai o gau ta oi henaoa o kara dikana idauna ta oi karaia. Reana inai buka idia duahia taudia haida, ena be idia diba Dirava ese unai kara ia taravatua, to idia karaia noho. Kara namo idia ura karaia neganai kara dika idia karaia, badina be Bible ena hereva be momokani: “Taunimanima edia kudouna be koikoi herea bona dika rohoroho.”—Ieremia 17:9.
ITA KWALIMU DIBA
4 To ita gwau lasi taunimanima ta ese sibona ena ura dikadia ia koua diba lasi. Bema oi ura momokani, emu kudouna oi hagoadaia diba, bena dala maorona dekenai oi do ia hakaua. To unai be oi sibona. (Salamo 26:1, 11) Ma ta ese oi ia hakwalimua diba lasi. Unai dainai, gau ginigunana be Bible dekenai diba oi tahua noho. (Ioane 17:3) To diba emu kwarana lalonai oi abiadae sibona be hegeregere lasi. Namona be emu kudouna lalonai oi abiadae danu. Namona be oi diba gaudia oi laloa bada, bena do oi ura oi badinaia.
5 Dahaka oi karaia be namo, Dirava ena taravatu oi laloa bada totona? Namona be idia oi laloa namonamo. Sibona dekenai oi henanadai: Dirava kamonai henia karana ena namo be dahaka? Bena ena taravatu idia badinaia lasi taudia edia mauri oi laloa; idia ta, lagani 19 ia abia kekenina ta, ia gwau: “Nega toi V .D. gorerena lau abia. Unai gorere dainai egu bogana idia kokia bona hari lau be natudia lau havaraia diba lasi.” Madi, Dirava ena taravatu idia utua taudia ese hisihisi momo idia havaraia. (2 Samuel 13:1-19) Hahine ta ia heudahanai murinai, ia be mai ena lalo-hisihisi danu ia gwau: “Lau gwau-edeede moale lau davaria totona. To hari lau be unai kara dainai lau lalo-hisihisi noho.”
6 Taunimanima haida idia gwau heudahanai, inuinu kekero bona muramura dikadia ania karana be moale karadia. To unai bamona moale ia ore haraga. Oi naria namonamo, oi idia koia bena dala kererena oi gavaia dainai, ia noho daudau moalena momokanina oi haboioa garina. Mose oi laloa; ia mero neganai Farao ena natuna kekenina ese ia naria, sibona ena natuna bamona. Pavapava ena ruma lalonai ia noho namo herea, idau negai Egypt dekenai. To, ia bada neganai, “ia be Dirava ena bese taudia danu do idia dika hebou ia ura bada, kara dika ena moale, idia noho daudau lasi gaudia, ia ura maragi.” (Heberu 11:24, 25) Momokani, Egypt ena pavapava ena ruma taudia ese edia lebulebu karadia idia moalelaia. Vadaeni, badina be dahaka Mose ese unai moale ibounai ia dadaraia?
7 Badina be Mose ese Iehova Dirava ia abidadama henia. Danu, unai taudia edia kara dikadia edia moale ia hanaia momokani gauna ia diba. Bible ia gwau: “Gabeai do ia abia davana ia raraia noho.” Mose ese Dirava ena gwauhamata ia laloa namonamo. Ena abidadama be Dirava ese kara maoromaoro negana matamatana do ia havaraia. Iehova ena lalokau bada bona ena hebogahisi edia mamina be ena kudouna lalonai ia abia. Mose ese Iehova ena sivarai ia kamonai o ia duahia sibona lasi. Bible ia gwau “ia haheauka, ita itaia lasi Diravana ia itaia vadaeni bamona.” (Heberu 11:26, 27) Mose dekenai Iehova bona ena gwauhamata be gau korikoridia.
8 Oi danu ese Iehova oi abidadama henia emu lalokau Tamana bamona, a? Iena gwauhamata, mauri hanaihanai be tanobada ena Paradaiso lalonai do ia henia, be oi duahia neganai, oi laloa oi danu be unai hahenamo do oi abia diba a? (Rau 156-162 itaia.) Hedibagani momo dekenai ita kwalimu totona, namona be Iehova ita badinaia momokani. Bona namona be, Mose hegeregerena, ‘gabeai do ita abia davana ita raraia noho.’ Mero ta be kekeni ta ese ia dibagania idia sihari kava totona, to iena lalohadai be Mose ena hegeregerena. Ia gwau: “Sihari kava karana amo moale sisina davaria totona mauri hanaihanai helarona lau haboioa be hegeregere lasi.” Lalohadai maorona unai, ani?
HAIDA EDIA KERERE ESE ITA IDIA HADIBAIA
9 Namona be hanaihanai oi naria namonamo, King David bamona oi moru garina. Nega ta ena ruma dekenai ia noho neganai ena matana ia negea, hahine mai hairaina Bataseba ia itaia. Lalohadai kererena ia abia garina ena vairana ia giroa haraga be namo, to ia raraia noho. Bena ena ura dikana dainai ia be Bataseba danu idia heudahanai. Gabeai, Bataseba ia rogorogo dainai edia heudahanai ia hunia diba lasi, unai dainai dala ia karaia, ena adavana be tuari lalonai do idia alaia mase totona.—2 Samuel 11:1-17.
10 Momokani, unai kara be dika rohoroho. Bona David ese unai kara dika ena davana ia abia. Gabeai ia lalo-hisihisi bada iena kerere dainai, bona ia panisia totona Iehova ese hekwarahi iena ruma bese lalonai ia havaraia ela bona ia mase. (Salamo 51:3, 4; 2 Samuel 12:10-12) David ena kudouna be koikoi herea; ena ura dikadia ese idia halusia. Gabeai ia gwau: “Kara kerere ai lau vara, bona kara dika ai lau egu sinana ese lau ia havaraia.” (Salamo 51:5) To David be unai hedibagani amo ia raka siri diba. Iena kerere be Bataseba ia raraia noho; unai hedibagani amo ia raka siri lasi dainai ia ura tau ta ena adavana danu idia heudahanai.
11 David ena sivarai ita diba dainai, namona be ita naria namonamo, mata-bodaga lalohadai havaraia gaudia dekenai. Hegeregere, bema sihari kava karadia bona heudahanai sivaraidia oi duahia eiava unai kara be muvini piksa o video dekenai oi itaia, reana “mata-bodaga” lalohadai do oi abia, ani? Unai dainai unai bamona gaudia amo oi siri be namo. (Kolose 3:5; 1 Tesalonika 4:3-5; Efeso 5:3-5) Heudahanai ena hedibagani lalonai oi vareai lasi. Mero ta ia gwau: “Reana ta ia gwau, ‘ai diba dahaka kara be dika.’ To daika be unai hedibagani lalonai ia vareai vadaeni neganai sibona ena ura ia koua diba? Unai kara amo ita siri be namo.”
12 Bema David ese Iosef ena haheitalai ia laloatao, Dirava be unai bamona ia kara dika henia bada lasi. Egypt dekenai Potifara ese Iosef na iena ruma naria tauna ai ia halaoa. To Potifara ia noho lasi neganai, ena adavana ese Iosef ia hamaoroa, ia gwau: “Ita mahuta hebou.” To Iosef ia ura lasi. Nega ta Iosef ena dabua ia dogoatao, ia veria idia mahuta hebou totona. To Iosef ia heau oho. Ena kudouna ia goada, badina be sibona ena tau-anina hamoalea dalana ia tahua lasi, to Dirava ena ura ia laloa. Ia gwau: “Inai kara dika badana be edena bamona do lau karaia bona Dirava do lau kara dika henia?”—Genese 39:7-12.
HEDURU AMO OI KWALIMU DIBA
13 Oi kwalimu totona, namona be Bible ena hereva be emu kudouna lalonai oi abiadae bena do oi ura oi badinaia. To danu, namona be Dirava ena orea taudia danu umui hebou. Ena be kara dika momo oi karaia vadaeni, to iena orea ena heduru amo oi emu kara oi haidaua diba. Idau negai Korinto taudia, edia kara be unai bamona idia haidaua taudia, be Paulo ese ia tore henidia, ia gwau: “Sihari kava taudia, bona dirava koikoi tomadiho henia taudia, bona heudahanai taudia, bona tatau danu idia hekure hebou tataudia, bona henao taudia, bona mata-ganigani taudia, bona inuinu kekero taudia, bona hereva dika taudia, bona koikoi amo moni idia veria taudia—idia iboudiai be Dirava ena basileia do idia abia lasi. To guna umui haida be unai bamona. To umui ia huria vadaeni.”—1 Korinto 6:9-11.
14 Inai gau oi laloa! Ena be unai Keristen taudia haida be guna unai bamona kara dikadia idia karaia, to Keristen orea ese ia durudia dainai edia kara idia haidaua. Aposetolo Paulo danu be guna kara dikadia ia karaia. (1 Timoteo 1:15) Tito ia tore henia, ia gwau: “Ita danu gunaguna mai eda kavakava bona mai eda gwau-edeede bona ita idia hakaua kerere; ita be ura dikadia bona moale idauidau edia hesiai taudia.”—Tito 3:3.
15 To ena be Paulo be Keristen tauna ai ia lao, to iena ura dikadia, guna edia hesiai ia lao henia karadia, ia dadaraia be auka. Ia gwau: “Sibona egu tau-anina lau paisia bona hesiai tauna ta bamona lau biagua, haida lau haroro henidia murinai lau sibona do lau hegeregere lasi garina.” (1 Korinto 9:27) Paulo be sibona ia “kara auka henia.” Ena be ena tau-anina ia ura kara dika ia karaia, to ia be sibona ia doria, kara namo ia karaia totona. Bema iena kara oi tohotohoa, oi danu oi kwalimu diba.
16 Bema oi emu kara dikana ta oi hadokoa hegeregere lasi, Iehova ena Witness taudia edia hebouhebou badana ta dekenai oi lao. Hebou taudia edia kara goeva bona edia moale do oi hoalaia. To idia momo be guna idia sihari kava, idia heudahanai, idia inuinu kekero, kara bodagadia idia karaia, kuku o buatau o muramura dikadia idaudia idia ania, idia henaohenao, idia koikoi bona idia kasi. (1 Petro 4:3, 4) Idia hekwarahi vadaeni, unai kara dikadia hadokoa totona. Namona be oi naria lasi, to unai bamona taudia oi bamodia, edia congregation hebou idauidau dekenai. Oi goada karaia! Idia kwalimu bona kara maoromaoro idia karaia noho. Vadaeni Dirava ena heduru amo oi danu be unai bamona oi karaia diba.
17 Bema Bible be Iehova ena Witness taudia danu umui stadi hebou vadaeni, reana edia hebou dekenai oi lao vadaeni, Kingdom Hall dekenai. Namona be nega ibounai oi lao. Ita ibounai be unai Keristen hebamo amo goada be lauma dalanai ita davaria be namo. (Heberu 10:24, 25) Congregation ena elder taudia oi dibadia. Edia maduna be “Dirava ena mamoe serina” idia naria. (1 Petro 5:1-3; Kara 20:28) Unai dainai, bema emu kara dikana ta oi hadokoa be auka, idia dekenai oi lao haraga, heduru oi abia totona. Do oi davaria idia be mai edia lalokau bona hebogahisi danu.—1 Tesalonika 2:7, 8.
18 Satana ena tanobada sibona lasi, to sibona eda ura dikadia danu, ese ita idia doria, kara dika ita karaia totona. Unai dainai Dirava ita badinaia be mai ena hekwarahi nega ibounai. To iseda hekwarahi be kahirakahira do ia ore. Satana do idia kokia bona ena tanobada dikana ibounai do idia haorea. Bena Dirava ena nega matamatana lalonai, kara maoromaoro sibona do ia noho dainai, do ita hekwarahi bada lasi. Kara dika ibounai do ia ore dainai, kara maoromaoro do ita karaia be do ia auka lasi.
19 Nega momo unai nega matamatana ena namo oi laloa. Oibe, ‘hahemauri helarona be emu kwarana gauna ai oi halaoa.’ (1 Tesalonika 5:8) Namona be emu lalohadai be hahine matamatana ta ena bamona; ia gwau: “Iehova ese lau dainai ia karaia karadia iboudiai bona ena gwauhamata iboudiai lau laloa noho, bona lau ura ia lau hamoalea. Hari lau hamoalea be mai ena hekwarahi, to lau egu hekwarahi ena davana, mauri hanaihanai, do lau abia.” Bema kara maoromaoro ita tahua momokani, ‘Iehova ena gwauhamata namodia iboudiai’ do ia hamomokania, ia idia lalokau henia taudia dekenai.—Iosua 21:45.
[Study Questions]
1. Edena gau rua dainai Keristen taudia idia hekwarahi?
2. (a) Dahaka dainai nega momo ita ura bada kara dika ita karaia? (b) Dahaka dainai iseda ura dikadia ita koua toho be namo?
3. (a) Taunimanima momo be edena bamona idia lalo-hekwarahi? (b) Unai bamona idia lalo-hekwarahi ese edena hereva Bible lalonai ia hamomokania?
4. (a) Daika dainai do oi kwalimu o do oi moru? (b) Kara maoromaoro oi kwalimulaia totona, dahaka oi karaia be namo?
5. Dirava ena taravatu oi laloa bada totona, dahaka oi karaia be namo?
6. (a) Dahaka dainai kara dika ena moale be hegeregere lasi? (b) Mose be edena bamona noho ia abia diba, Egypt dekenai?
7. Dahaka dainai Mose ese Egypt ena pavapava ena ruma taudia edia “kara dika ena moale” ia dadaraia?
8. (a) Ita kwalimu totona, dahaka ita karaia be namo? (b) Bema ita aonega, edena lalohadai, mero ta ena hegeregerena, ita abiadae be namo?
9. King David be edena bamona ia moru bena ia kara dika?
10. (a) Ena kara dika dainai David be dahaka panisi ia abia? (b) Ia heudahanai lasi totona David be dahaka ia karaia be namo?
11. (a) David ena sivarai ese dahaka ia hadibaia ita dekenai? (b) Dahaka dahaka ese mata-bodaga lalohadai idia havaraia diba? (c) Mero ta ia hereva bamona, aonega tauna be dahaka amo ia siri?
12. Dahaka dainai Iosef ena haheitalai ita laloatao be namo?
13, 14. (a) Oi kwalimu totona, dahaka oi karaia be namo? (b) Korinto taudia haida be Keristen taudia ai idia lao neganai, edia kara be edena bamona idia haidaua, bona dahaka heduru amo? (c) Guna Paulo bona Tito be edena bamona taudia?
15. (a) Dahaka dainai ita diba Paulo be kara maoromaoro ia karaia be auka? (b) Paulo ena haheitalai ese ita edena bamona ia durua?
16. Edena taudia hari inai nega lalonai be edia haheitalai ese ita ia durua ita kwalimu totona?
17. (a) Ita kwalimu totona, dahaka hebamo ita abia be namo? (b) Bema oi be mai emu lalo-hekwarahi, edena taudia ese oi idia durua diba?
18. Edena helaro ese ita ia hagoadaia, ita hekwarahi noho totona?
19. Dahaka dainai Iehova hamoalea totona oi hekwarahi bada be namo?
[Picture on page 219]
Idau negai Egypt taudia ese edia noho idia moalelaia, vadaeni dahaka dainai Mose ese ia dadaraia?
[Pictures on page 220, 221]
David ese ia raraia noho; heudahanai ena hedibagani amo ia raka siri lasi
[Picture on page 222]
Iosef ia heau oho Potifara ena adavana ese ia dibagania neganai