Lagani 2004 Ena Tiokratik Haroro Sikuli

¹ Iehova ese taunimanima ia durua tanobada ibounai dekenai mai anina bada gaukarana idia hagugurua totona. Unai ia karaia dalana ta be, pura ta ta ai Tiokratik Haroro Sikuli dekenai idia henia treinini karana amo. Oiemu noho dalana hegeregerena sikuli ena kahana idauidau lalonai oi vareai, a? January ai gau haida do idia idau, unai ese stiuden taudia do ia durua namo bada idia abia totona.

² Sisiba Henia Tauna Iharuana Haidaua Loulou Karana: Instraksen tok bona Baibel ena hereva badadia idia karaia tadikaka ese sisiba henia tauna iharuana ena heduru idia moalelaia. Bema idia manada elda taudia be momo, lagani ta ta ai idia ta ta be sisiba henia tauna iharuana ena gaukara do idia karaia. Unai dala amo gaukara ena maduna idia haria diba; to gau badana be, elda bona idia manada vadaeni hesiai taudia be hereva henia taudia bona hadibaia taudia namodia idauidau edia diba amo namo bada do idia abia.

³ Riviu Ena Sediual: Bema riviu purana dekenai emu kongregesen be sekit hebouhebou do idia abia, vadaeni riviu (bona pura ena program ibounai) be pura vaira ai do umui karaia, bona pura vaira ena program be riviu purana ai do umui karaia be namo.

⁴ Bema riviu purana dekenai sekit naria tauna do ia vadivadi, sediual hegeregerena program be ane, hereva karana, bona Baibel ena hereva badadia amo do umui karaia be namo. Instraksen tok (hereva karana murinai idia henia gauna) be pura vaira ena program amo umui abia hanai be namo.

⁵ Baibel ena hereva badadia murinai Hesiai Hebou be miniti 30 lalonai do umui karaia, to unai miniti 30 umui hamaoromaoroa diba, unai amo bema Hesiai Hebou dekenai kahana be toi, idia ta ta be miniti 10 10 amo do umui karaia eiava bema kahana be rua, idia ta ta be miniti 15 15 amo do umui karaia. (Hadibaia hereva umui karaia lasi be namo.) Hesiai Hebou murinai ane do umui abia, bona sekit naria tauna ese miniti 30 lalonai hereva do ia henia.

⁶ Pura vaira ena Tiokratik Haroro Sikuli be sediual hegeregerena hereva karana bona Baibel ena hereva badadia do umui karaia guna, bena riviu do umui karaia.

⁷ Lauma dalanai oi tubu totona, unai dala ta ta oi badinaia namonamo. Emu Tiokratik Haroro Sikuli amo heduru oi abia neganai, emu kongregesen oi hagoadaia, Baibel ena peroveta herevana oi hagugurua, bona sivarai hereadaena, ita harorolaia be namo sivaraina, ia Torea Tauna ia hanamoa.​​—Isa. 32:​3, 4; Apok. 9:​19.

Henanadai Mauana

◼ Iseda noho gabu ena teritori ia naria kongregesen ita lao henia ena namo haida be dahaka?

Kongregesen ese ita ia hagoadaia ‘lalokau ai kara namodia ita karaia’ totona. (Heb. 10:​24, 25) Kongregesen amo hereva momokani ita dibaia bona ita ia durua hahediba taudia halaoa gaukarana ita hagugurua totona. (Mat. 28:​19, 20) Danu ita ia hagoadaia mai abidadama ida hahetoho ita haheaukalaia totona, bona lalokau naria taudia ese ita idia durua lalo-metau bona lalo-hekwarahi ita hanaia totona. Ia hedinarai goevagoeva, lauma dalanai ita goada noho totona kongregesen be gau badana. To, iseda noho gabu ena teritori ia naria kongregesen ita lao henia ena namo haida idia noho, a?

Taunimanima ta ta edia noho daladia be idauidau bona gau haida, hegeregere moni gaukara, abidadama lasi adavana, bona motuka dainai reana ta be ena abia hidi ia karaia diba. To, ta be ena noho gabu ena teritori ia naria kongregesen ia bamona neganai, lauma dalanai bona dala idauidau ai namo bada do ia davaria. Bema dika badana ta ia vara, elda taudia ese pablisa ibounai idia hadibaia haraga diba.

Nega momo, kahirakahira idia noho kongregesen heboudia ita lao henia be ia auka lasi, dala ia noho ita ginidae haraga bona ma haida ida ita herevahereva, mai anina bada gaudia haida ita karaia, bona ane bona guriguri lalonai ita noho totona. Iseda noho gabu ai kamonai matamata taudia idia noho neganai, dala ia noho ita hereva henia totona, idia ida Baibel ita stadilaia totona, bona idia ura hebouna dekenai ita hakaua mai diba.

Ai diba ruma bese kwaradia be mai guriguri ida unai gauna do idia lalohadailaia, bona edia ruma bese ena namo, lauma bona tauanina dalanai, gau ibounai do idia laloa namonamo bona abia hidi do idia karaia.​​—1 Tim. 5:8.