Mahuta Hebou Karana

Anina: Taunimanima bona animal besedia lalodiai tau ena kara bona ena tauanina ena kahana be idau, hahine ena hegeregeredia lasi. Unai edia idau dainai tau be hahine ida idia kara heheni natudia havaradia totona, bona unai idau be mai anina bada taunimanima edia mauri lalonai. Dirava be mauri ena Badina bona ia ese taunimanima ia havaradia iena kara do idia hahedinaraia totona, unai dainai mahuta hebou karana amo natu havaraia karana ita matauraia bada be namo.

Baibel ia gwau mahuta hebou karana be kara dikana, a?

Gen. 1:28: “Dirava ese [Adam bona Eva] ia hanamodia, idia dekenai ia gwau, Emui bese umui havaraia, do umui hutuma. Tanobada ena gabu ibounai dekenai umui noho.” (Dirava ena oda herevana do idia badinaia dalana tamona be do idia mahuta hebou, ani? Unai bamona do idia karaia be kara dika lasi, to unai be Dirava ena ura hegeregerena tanobada do idia hahonua dalana. Taunimanima haida idia gwau ‘Dirava ese ia taravatua auna huahuana’ Eden lalonai be huahua korikorina lasi, to mahuta hebou karana ia laulaulaia, bona unai taravatu amo Dirava ese Adam bona Eva ia haganidia unai kara do idia karaia lasi. To unai lalohadai be Dirava ena hahegani Genese 1⁠:28 lalonai ida idia hahegeregerea diba lasi. Bona Baibel ena hereva ma ta ida idia hahegeregerea diba lasi danu; unai hereva be inai: Ena be Adam bona Eva ese unai taravatu auna huahuana Eden lalonai idia ania, to Baibel ia gwau idia mahuta hebou Dirava ese Eden amo ia luludia murinai; Eden lalonai idia mahuta hebou sivaraina be lasi.​—⁠Gen. 2:17; 3:​17, 23; 4:1.)

Gen. 9:1: “Dirava ese Noa mai ena natuna danu ia hanamoa, ia gwau, Natuna momo umui havaraia, vadaeni emui bese tanobada gabu ibounai dekenai do idia noho.” (Noa ena negai ia vara Abatana Badana murinai, Dirava ese unai hahenamo herevana ia gwauraia bona natudia havaradia haheganina ia gwauraia lou. Dirava ese ena lalohadai mahuta hebou karana maorona dekenai ia haidaua lasi.)

1 Kor. 7:​2-5: “Lebulebu ia vara garina tatau ese edia adavana ta ta do idia abia be namo. Hahine taudia danu edia adavana korikori sibona do idia abia be namo. Tau ese iena adavana dekenai headava kara do ia henia, hahine ese danu iena adavana dekenai headava kara do ia henia. . . . Umui ta ta dekenai headava kara do umui koua lasi. To bema umui laloa tamona, headava kara karaia lasi . . . To nega daudau lasi, headava kara do umui karaia lou. Badina be sedira emui haheauka be hegeregere lasi, bona Satani ena hedibagani ese umui do ia abia garina.” (Unai ese ia hahedinaraia, heudahanai be kerere to tau be ena adavana korikorina ida idia mahuta hebou be kerere lasi.)

Idia do headava lasi taudia idia mahuta hebou be kerere, a?

1 Tes. 4:​3-8: “Dirava ena ura be inai: . . . heudahanai karadia do umui rakatania momokani. Umui ta ta emui adavana danu do umui noho hebou mai helaga bona mai maoromaoro Dirava ena vairana dekenai. Emui adavana umui abidia be, umui ura henidia lasi mai matabogada danu, Dirava diba lasi bese taudia bamona. Bona inai kara dekenai tau ta ese iena ekalesia bamona ta do ia koia lasi, bona kara dika henia lasi. Lohiabada ese inai bamona idia karaia taudia edia dika davana do ia henidia. Inai bamona umui ai sisiba henia guna, ani? Dirava ia boiboi ita dekenai, do ita heudahanai totona lasi, to do ita helaga totona. Unai dainai, inai hadibaia hereva ia negea tauna, ese taunimanima ia negea lasi, to ia ese Lauma Helaga umui ia henia tauna, Dirava, ia negea inai.” (Greek gado herevana, por·neiʹa, be Motu gado ai idia hahegeregerea neganai, “heudahanai” idia torea. Unai Greek gado herevana ena anina be headava lasi taudia edia mahuta hebou karana bona headava taudia ese edia adavana lasi taudia ida idia mahuta hebou karana.)

Ef. 5:5: “Heudahanai tauna bona matabodaga tauna bona kohu ura dikadika tauna be gabu lasi, Keriso bona Dirava edia Basileia lalonai.” (Unai hereva ena anina be inai lasi: Guna ia heudahanai tauna ese Dirava ena Basileia ena hahenamo do ia abia diba lasi. To Dirava ese do ia lalo-namo henia totona, namona be unai kara ia rakatania. Korinto Ginigunana 6⁠:​9-11 itaia danu.)

Bema tau bona hahine idia noho hebou to gavamani ena taravatu hegeregerena o edia bese edia kastom hegeregerena idia headava lasi, Baibel ia gwau unai be hegeregere, a?

Rau 171-2 itaia, inai sinado “Headava” henunai.

Baibel ese tatau be tatau ida idia mahuta hebou karana be edena bamona ia gwauraia?

Roma 1:​24-27: “Inai bamona idia kavakava dainai Dirava ese idia ia rakatania, vadaeni edia ura hegeregere tauanina ena ura dikadia bona kara mirodia idia karaia. Idia sibodia tauanina ta ta idia hadikaia hemarai kara idauidau dekena amo. . . . Taunimanima be inai bamona idia karaia dainai Dirava ese idia ia rakatania, vadaeni edia ura dikadia mai hemarai danu idia karaia. Edia hahine danu headava kara maorona idia hadikaia, vadaeni hahine ta ese ma hahine ta dekenai idia sihari henia. Bona inai bamona danu tatau ese hahine idia rakatania, vadaeni tatau ese ma tatau dekenai idia sihari henia. Inai bamona hemarai karadia dainai edia dika davana idia abia noho.”

1 Tim. 1:​9-11: “Taravatu be kara maoromaoro taudia totona lasi. Lasi, Taravatu be inai bamona taudia totona: taravatu negea taudia, kerere taudia, Dirava gari henia lasi taudia, kara dika taudia, . . . sihari kava taudia, tatau ese tatau danu sihari karaia taudia . . . Oibe, Taravatu be inai bamona taudia totona, bona ekalesia ena hadibaia hereva momokani idia negea taudia danu. Unai hadibaia hereva momokani be Namo Herea Momokani bona Hairai Diravana ena Sivarai Namona.” (Levitiko 20⁠:13 itaia danu.)

Iuda 7: “Sodoma bona Gomora bona idia kahirakahira noho hanuadia . . . edia taudia ese sihari kava bona kara bodaga idauidau idia karaia momo. Unai dainai Dirava ese edia kerere davana ia henidia, noho hanaihanai lahina ena hisihisi. Edia dika davana be toana ia hedinaraia ita dekenai, vadaeni ita ese idia bamona do ita karaia lasi.” (Genese 19:​4, 5, 24, 25 itaia danu.)

Guna tatau ida idia mahuta hebou tataudia be Keristen korikori taudia ese edena bamona idia lalodia?

1 Kor. 6:​9-11: “Lebulebu taudia, kaivakuku idia tomadiho henia taudia, heudahanai taudia, eiava lebulebu hahine edia kara idia tohotohoa tatau, eiava tatau ese tatau danu hemarai karadia idia karaia . . . taudia ta lasi be Dirava ena Basileia do ia davaria diba. Umui haida be guna unai bamona umui karaia. To Dirava ese umui emui kara dika ia huria vadaeni, ia ese helaga taudia umui ia halaoa vadaeni. Bona hari Dirava ena vairana dekenai umui be maoromaoro, Lohiabada Iesu Keriso dainai bona Dirava ena Lauma dainai.” (Herevana taunimanima be guna unai bamona idia karaia, to bema edia kara mirodia idia rakatanidia, Iehova ena taravatu maorodia idia badinadia, bona Dirava ese Keriso ena amo taunimanima edia dika ia gwauatao dalana idia abia dae, Dirava vairanai idia goeva diba. Idia helalo-kerehai murinai Keristen kongregesen lalonai idia abidia dae diba.)

Keristen korikori taudia be inai idia diba: Ena be ura kereredia haida be taunimanima edia lalona momokani dekenai idia noho badina be idia vara neganai edia tamadia o sinadia edia amo idia abia dainai, eiava edia tauanina idia kerere dainai, eiava idia bogaragidiai idia noho taudia amo idia abia dainai, to bema idia ura momokani Iehova do idia hamoalea, unai ura kereredia do idia halusidia diba. Taunimanima haida edia kara korikori be idia badu haraga. Reana guna edia badu idia biagua toho lasi; to Dirava ena ura idia diba, idia ura idia hamoalea, bona iena lauma ena heduru amo idia boga-auka neganai, edia badu idia koua diba. Reana tau ta be kekero muramurana inua momo tauna, to bema lalohadai maorona ia abia, unai ese do ia durua do ia inuinu kekero lasi totona. Unai hegeregerena, reana tau ta ese tatau ia ura henidia bada, to bema Dirava ena sisiba Baibel lalonai ia badinaia, hemarai karadia do ia karaia lasi. (Efeso 4⁠:​17-24 itaia danu.) Iehova ia ura lasi do ita laloa kara kerere be dika momokani lasi; mai ena hebogahisi bona mai ena hereva goadana ida unai kara kerere ena anina dikana ita ia hadibalaia, bona ‘edia mauri gunana mai ena dika dabua gunana bamona idia ura kokia bona mauri matamata idia ura atoa’ taudia ia durudia bada.​—⁠Kol. 3⁠:​9, 10.

Baibel ena taravatu mahuta hebou karana dekenai be anina lasi hari inai negai, bona taunimanima edia ura ia koua kava, a?

1 Tes. 4:​3-8: “Dirava ena ura be inai: . . . heudahanai karadia do umui rakatania momokani. . . . Unai dainai, inai hadibaia hereva ia negea tauna, ese taunimanima ia negea lasi, to ia ese Lauma Helaga umui ia henia tauna, Dirava, ia negea inai.” (Baibel ena hereva mahuta hebou karana dekenai be idaunegai idia noho taudia haida ese idia lalohadailaia gauna sibona lasi. Unai hereva be taunimanima ia havaradia Diravana ena amo ia mai; ia hahedinaraia goevagoeva namona be taunimanima ese dahaka do idia karaia Dirava ese do ia lalo-namo henidia totona; ena sisiba ese ruma bese taudia ia durudia, do idia noho namonamo totona bona edia bese murimurinai idia noho taudia do idia tura henidia maoromaoro mai edia moale ida totona. Baibel ena sisiba idia badinaia taudia ese kara bodagadia amo idia vara lalohisihisidia bona goreredia idia davaria lasi. Idia ura Dirava vairanai edia lalona do idia goeva bona do idia lalo-hekwarahi kava lasi; bona hari inai nega lalonai Baibel ena sisiba ese ia durudia unai bamona idia kwalimu totona.)

Bema Ta Ia Gwau​—⁠

‘Tatau be tatau ida idia mahuta hebou karana be edena bamona oi laloa?’

Reana inai bamona oi haere henia diba: ‘Lauegu lalohadai be Baibel ena hereva hegeregerena. Lau laloa Baibel ena hereva ese taunimanima edia lalohadai ia hanaia, badina ia ese taunimanima ia havaradia Diravana ena lalohadai ia gwauraia. (1 Kor. 6⁠:​9-11) Unai siri ese ia hahedinaraia Keristen taudia ai idia lao tataudia haida be guna tatau ida idia mahuta hebou taudia. To Dirava idia lalokau henia bona iena lauma ena heduru idia abia dainai, edia kara idia haidaua.’

Eiava inai bamona oi hereva diba: ‘Emu henanadai lau do haerelaia lasi neganai, lau ura lau gwau, lau itaia unai kara idia gwauraia maoro taudia momo ese Baibel idia abia dae lasi Dirava ena Hereva hegeregerena. Oiemu lalohadai Baibel dekenai be dahaka?’ Oi hereva henia tauna bema ia gwau Baibel ia abidadama henia, reana ma oi gwau: ‘Tatau be tatau ida idia mahuta hebou karana be hari inai negai ia vara kara matamatana lasi. Baibel ese Iehova Dirava ena lalohadai, ia haidaua lasi lalohadaina, ia hahedinaraia goevagoeva. (Rau 263-4 dekenai idia noho herevadia oi gwauraidia reana.)’ Oi hereva henia tauna bema ia gwau ia laloa Dirava be lasi bona Baibel ia abia dae lasi, reana ma oi gwau: ‘Bema Dirava be lasi, ita ia hahemaoro henia tauna be lasi, bona sibona eda ura ita karaia diba, ani? Unai dainai henanadai badana be inai: Dirava ia noho a, bona ia be iseda mauri ena badina, a? [danu, Dirava ena lauma amo Baibel idia torea, eiava?] (Rau 53-63 eiava 100-106 dekenai idia noho herevadia oi gwauraidia.)’