Sabati

Anina: Inai hereva “sabati” be Heberu gado herevana sha·vathʹ amo idia hahanaia. Ena anina be “laga-ani, doko.” Mose ena Taravatu hegeregerena, sabati idauidau be inai: pura ena dina namba 7; dina helagadia ma haida lagani ta lalonai; lagani namba 7; lagani namba 50. Iuda taudia edia kalenda hegeregerena, edia Sabati dinana be pura ena dina namba 7​—⁠Friday adorahi dina ia diho ela bona Saturday adorahi dina ia diho neganai. Sibodia idia gwauraia Keristen taudia momo idia gwau Sunday be edia Sabati dinana, bona unai dina ai idia laga-ani bona idia tomadiho; ma haida be Iuda taudia edia kalenda hegeregerena pura ena dina namba 7 ai idia laga-ani.

Keristen taudia ese pura ena sabati dinana idia matauraia be maoro, a?

Eso. 31:​16, 17: “Israel taudia ese Dina Helaḡa bae matauraia uru idoidiai; ia na baine mia hanaihanai herohemainona toana. Ia na mia hanaihanai toana, lau bona umui Israel taumui padadai.” (Sabati dinana matauraia karana be toa ta, Dirava bona Israel taudia padadiai; bema Dirava ese bese iboudiai ia haganidia Sabati taravatuna do idia matauraia, ia be toa ta lasi Dirava bona Israel taudia padadiai. Heberu gado herevana ‛oh·lamʹ be Motu gado ai idia hahegeregerea neganai, “mia hanaihanai” idia torea. Unai Heberu gado herevana ena anina be nega daudauna, ena daudau ia do hedinarai lasi bona ta ese ia do gwauraia hedinarai lasi. Nega haida ena anina be ‘ela bona hanaihanai,’ to nega haida ena anina be idau. Numera 25⁠:13 ai Dirava ese unai Heberu gado herevana amo hahelaga taudia edia orea ia gwauraia, unai orea be gabeai ia doko, Heberu 7⁠:12 ena hereva hegeregerena.)

Roma 10:4: “Keriso ia mai dainai, sibodia edia goada dekenai Taravatu badinaia karana dekena amo maoromaoro idia tahua dalana be ia doko. Unai Dirava vairanai maoromaorona be Iesu abidadama henia taudia sibodia idia abia.” (Unai Taravatu hegeregerena Sabati dinana idia matauraia. Dirava ese Keriso ena amo unai Taravatu ia hadokoa. Dirava ese ita ia gwauraia maoro, Sabati dinana ita matauraia dainai lasi, to Keriso ita abidadama henia dainai.) (Galatia 4⁠:​9-11; Efeso 2⁠:​13-16 danu)

Kol. 2:​13-16: “Dirava ese iseda dika ibounai ia gwauatao. Taravatu momo be ita ese ita utua dainai iseda samania hereva be momo, vadaeni iseda kerere pepa be ia noho. To Dirava ese iseda kerere pepa satauro dekenai ia ikoko karaia, vadaeni iseda kerere be idia ore. . . . Unai dainai, tau ta ese taravatu do ia gwauraia lasi emui aniani totona, o emui inuinu totona, o aria dina badana totona, hua matamata dinana totona o Sabati dinana totona.” (Mose ena Taravatu henunai ia noho tauna bema idia hahemaoro henia neganai idia davaria Sabati taravatuna ia utua, Esodo 31⁠:14 bona Numera 15⁠:​32-35 edia hereva hegeregerena, hebou taudia iboudiai ese idia hodoa mase. Unai Taravatu henunai ita noho lasi dainai, Sabati matauraia karana idia do goadalaia taudia idia moale be namo. Unai siri ese ia hahedinaraia hegeregerena, Dirava ese dala idauna amo ita ia gwauraia maoro dainai, Israel taudia ia henidia sabati taravatuna badinaia karana be anina lasi hari inai negai.)

Edena bamona Sunday be Kerisendom taudia momo edia tomadiho dinana badana ai ia lao?

Ena be Keriso be pura ena dina ginigunana (Sunday) ai mase amo ia toreisi lou, to Baibel ese ita ia hagania lasi unai dina do ita hahelagaia.

“Keristen taudia edia dina helagana, pura ta ta amo idia hahelagaia dinana, ena ladana idia hatoa ‘Dies Solis,’ o ‘Sunday,’ Etene taudia ese gunaguna idia hatoa ladana hegeregerena, badina be Etene taudia bona [sibodia idia gwauraia] Keristen taudia edia lalohadai idia hatamonadia dainai. Unai hegeregerena, [lagani 321 C.E. ai, ena hahegani ta lalonai] Constantine ia gwau pura ena dina ginigunana be ‘Dina tomadiho henia dinana,’ ia lohiaia taudia iboudiai, Etene taudia bona Keristen taudia, edia. . . . Unai dala amo ia ese ena Basileia lalonai idia noho tomadiho daladia idauidau ia hatamonadia.”​—⁠Lectures on the History of the Eastern Church (New York, 1871), A. P. Stanley, p. 291.

Dirava ese sabati taravatuna Adam ia henia dainai iena bese taudia iboudiai ese idia badinaia be maoro, a?

Iehova Dirava ese tanobada be taunimanima do idia noholaia totona ia hegaegaelaia murinai, iena gaukara, tanobada bona ena anina havaraia gaukarana, amo ia laga-ani. Genese 2⁠:​1-3 be unai bamona ia hereva. To Baibel ia gwau lasi Dirava ese Adam ia hagania pura iboudiai edia dina namba 7 be sabati dinadia bamona do ia matauraia.

Deut. 5:15: “Ba laloa, oi [Israel] na hesiai tauna Aigupto tanona ai, bena Iehova, emu Dirava, ese imana e toia roro mai siahuna ida, unu amo e hakaumu lasi; taunabunai, Iehova, emu Dirava, ese vada e haḡanimu, Dina Helaḡa ba badinaia.” (Unai siri lalonai Dirava ia gwau ia ese sabati taravatuna Israel taudia ia henidia Aigupito amo ia hamauridia dainai; Eden lalonai idia vara gaudia ia gwauraidia lasi.)

Eso. 16:​1, 23-29: “Israela ena hebou ibounai be Elima dekena amo idia lao, taunimanima idia noho lasi gabuna ena ladana Sin dekenai idia ginidae . . . Hua iharuana ena dina 15, Aigupito idia rakatania murinai, unuseni ai idia ginidae. Vadaeni [Mose] ese idia dekenai ia hamaoroa, ia gwau, Iehova be inai bamona oda ia karaia, ia gwau, ‘Kerukeru be laga-ani dinana, Iehova ena dina helaga.’ . . . Dina 6 lalonai [mana] do umui haboua, to dina namba 7, aniani be dohore umui davaria lasi, badina ia be laga-ani dinana. . . . Vadaeni Iehova ese Mose dekenai ia hamaoroa, ia gwau, . . . Umui laloa, lau Iehova ese laga-ani dinana umui dekenai lau henia vadaeni.” (Guna idia ese dina iboudiai be dina 7 7 amo idia duahia bona dina 7 idia gwauraia pura ta, to Dirava ese sabati taravatuna ia henidia negana ginigunana be unai.)

Mose ena Taravatu be mai kahana rua a, bona Keristen taudia be ena kahana ta (Taravatu Ten) henunai idia do noho, a?

Iesu ese Taravatu ia gwauraia neganai, ia hahedinaraia ia be mai ena kahana rua, a?

Mat. 5:17, 21, 23, 27, 31, 38: “Umui laloa lasi lau be Mose ena taravatu bona peroveta herevadia hadikaia totona lau mai. Hadikaia lasi, to hamomokania totona lau mai.” Bena Iesu ese edena taravatu ia gwauraia? “Umui kamonai vadaeni, sene taudia dekenai idia hamaoroa, idia gwau, ‘Umui alaia lasi [Eso. 20⁠:13; Taravatu Namba 6]’ . . . Unai dainai, oiemu harihari gauna pata helaga dekenai oi atoa gwauraia neganai [Deut. 16⁠:​16, 17; Taravatu Ten ena taravatu ta lasi] . . . Umui kamonai vadaeni, sene taudia dekenai idia hamaoroa, idia gwau, ‘Umui heudahanai lasi [Eso. 20⁠:14; Taravatu Namba 7].’ Bona sene taudia ma idia gwau, ‘Ena adavana do ia negea tauna ese hadokoa pepana do ia henia ia rakatania totona [Deut. 24⁠:1; Taravatu Ten ena taravatu ta lasi].’ Umui kamonai vadaeni, idia hamaoroa, idia gwau, ‘Matana ena davana be matana, isena ena davana be isena [Eso. 21⁠:​23-25; Taravatu Ten ena taravatu ta lasi].’ ” (Unai amo ia hedinarai Iesu ese Taravatu Ten bona Taravatu oredia ia hapararadia lasi, ia gwau lasi idia be idauidau. Unai dainai, bema ita hapararadia bona ita gwau idia be idauidau, unai be maoro lasi ani?)

Farisea tauna ta ese Iesu ia nanadaia, ia gwau: “Hadibaia tauna e, taravatu dekenai edena hereva be ia bada herea momokani?” Unai negai Iesu ese Taravatu Ten ia gwauraidia, a? Lasi, ia gwau: “ ‘Lohiabada oiemu Dirava dekenai do oi lalokau henia mai emu lalona ibounai, mai emu lauma ibounai, mai emu kudouna ibounai.’ Inai be taravatu bada herea momokani. Ia be ginigunana. Iharuana be inai, ginigunana hegeregerena, ‘Oiemu badibadinai tauna dekenai oi lalokau henia, oi sibona oi lalokau henia bamona.’ Inai hereva ruaosi be taravatu bona peroveta taudia edia hereva ibounai edia anina idia haboua.” (Mat. 22⁠:​35-40) Bema taunimanima haida ese Taravatu Ten idia dogoatao noho (Deut. 5⁠:​6-21) bona idia gwau Keristen taudia be idia henunai idia do noho to Taravatu oredia henunai idia do noho lasi, Iesu ena hereva, Deuteronomi 6⁠:5 bona Levitiko 19⁠:18 amo taravatu badadia ia gwauraia herevadia, be idia dadaraia unai, ani?

Baibel ese Mose ena Taravatu ena dokona ia herevalaia neganai, ia gwau Taravatu Ten danu idia doko, a?

Roma 7:​6, 7: “Ita mase vadaeni dainai inai kara ese ita idia guia lou lasi. Bona harihari Taravatu dekena amo Dirava ese ita ia ruhaia vadaeni. . . . Unai dainai, dahaka do ita hereva? Taravatu be ia dika, a? Lasi momokani! Bema Taravatu ese lau ia hadibaia lasi, be edena bamona kara dika ena toana do lau diba? Bona Taravatu ese bema ia hereva lasi lau dekenai inai bamona, ‘Oi ura dika lasi,’ lau be ura dika ena anina edena bamona do lau diba?” (Unai siri lalonai, Paulo ia gwau Dirava ese Iuda Keristen taudia be ‘Taravatu dekena amo ia ruhaia vadaeni,’ bena unai Taravatu ta ia gwauraia. Edena ia gwauraia? Taravatu Namba 10. Unai amo ia hahedinaraia unai Taravatu amo danu Dirava ese ia ruhadia.)

2 Kor. 3:​7-11: “Taravatu be Dirava ese nadi palakana dekenai ia torea, bona unai ia henia neganai Dirava ena hairai diarina ia hedinarai. Inai Taravatu ena kara taunimanima latanai be mase ia havaraia. To Taravatu ia vara neganai Dirava ena hairai diarina danu ia vara nega tamona. Unai neganai Mose ena vairana ia diaridiari herea dainai Israela taudia ese [idia] itaia noho hegeregere lasi. To unai diaridiari ia noho daudau lasi. Taravatu ena diaridiari be unai bamona neganai, Lauma ena diaridiari ese do ia hanaia, ani? . . . Badina be bema unai dala gunana, ia noho daudau lasi gauna, be mai ena hairaina neganai, inai dala matamata, do ia noho hanaihanai gauna ena hairaina be namo bada herea momokani ani?” (Unai siri ese taravatu, Dirava ese “nadi palakana dekenai ia torea” gauna, ia herevalaia, ia gwau Mose ese unai taravatu ia abia neganai “ena vairana ia diaridiari herea dainai Israela taudia ese [idia] itaia noho hegeregere lasi.” Unai siri ese edena taravatu ia herevalaia? Esodo 34⁠:​1, 28-30 ese ia hahedinaraia unai siri ese Taravatu Ten ia herevalaidia, Dirava ese nadi dekenai ia torea taravatudia unai. Baibel ese ia hahedinaraia unai taravatu danu be “noho daudau lasi gauna” ena kahana ta.)

Dirava ese Mose ena Taravatu mai ena Taravatu Ten ia hadokoa dainai, taunimanima be sibodia edia ura idia karaia diba, a?

Lasi vaitani; kara dikadia momo, Taravatu Ten lalodiai ia taravatulaidia karadia unai, be Keristen Greek Revarevadia lalodiai ia taravatulaidia lou. (To sabati taravatuna ia gwauraia lou lasi.) To ena be taravatu ta be namo herea, to lalohadai dikadia ese taunimanima edia lalona idia biagua neganai, unai taravatu do idia utua. To Taravatu gunana ena gabu ia abia taravatuna matamatana be Heberu 8⁠:10 ese ia gwauraia inai bamona: “Lohiabada ma ia gwau, ‘Vaira neganai lau ese taravatu ta ma Israela taudia danu do lau karaia. Lauegu taravatu be edia lalona dekenai do lau atoa, edia kudouna dekenai do lau torea. Lau be idia edia Dirava, idia danu be lauegu bese taudia.’ ” Unai bamona taravatu edia namo ese nadi palakadia dekenai ia torea taravatudia edia namo ia hanaia momokani, ani?

Roma 6:​15-17: “Kara dika ita karaia be namo, a? Badina be taravatu henunai lasi, to Dirava ena hariharibada henunai ita noho dainai? Lasi bona lasi momokani. Umui diba lasi, a? Bema umui ese emui tauanina umui henia tau ta dekenai bona iena hereva umui kamonai henia neganai, umui be iena hesiai gaukara umui karaia noho taudia. Vadaeni, bema umui be kara dika ena hesiai gaukara taudia neganai, umui be mase do umui davaria. To bema umui be Dirava umui kamonai henia neganai, Dirava ese umui do ia gwauraia maoromaoro. To Dirava dekenai tanikiu ita henia. Badina be guna neganai umui be kara dika ena hesiai gaukara umui karaia, to gabeai umui ese mai emui lalona ibounai Dirava ena hadibaia hereva umui kamonai henia.” (Gal. 5⁠:​18-24 itaia danu.)

Pura ena Sabati dinana ena anina be dahaka Keristen taudia dekenai?

Keristen taudia edia “laga-ani” be dina dina iboudiai idia abia

Heberu 4:​4-11 ia gwau: “Buka Helaga [Genese 2⁠:2] ese dina namba 7 ia herevalaia, ia gwau, ‘Dirava ese iena gaukara ibounai ia karaia haorea, vadaeni dina namba 7 ia laga-ani.’ Ma Buka Helaga [Salamo 95⁠:11] lalonai ia gwau, ‘Lauegu laga-ani gabunai do idia vareai lasi.’ Unai Israel taudia, Sivarai Namona idia kamonaia guna taudia ese unai laga-ani idia davaria lasi, idia abidadama henia lasi dainai. To Dirava ena gwauhamata ia do noho dainai, haida be iena laga-ani lalonai do idia vareai. Unai dainai Dirava ese dina ma ta ia abia hidi, ‘hari dina’ ia gwauraia. Vadaeni, nega daudau ia lao murinai, Dirava ese Davida ena uduna dekena amo inai bamona ia hereva [Salamo 95⁠:​7, 8 ai], ia gwau, ‘Hari dina bema iena gadona umui kamonai, umui emui lalona do umui koua lasi.’ Bema Iosua ese unai taudia dekenai Dirava ia gwauhamatalaia laga-ani ia henidia, Dirava be dina ma ta do ia herevalaia lasi. Unai dainai ita diba Dirava ena taudia edia laga-ani be ia do noho. Ia be Dirava ena laga-ani bamona, dina namba 7 ia laga-ani neganai. Badina be Dirava ena laga-ani dekenai ia vareai tauna ese iena gaukara dekena amo ia laga-ani noho. Ia laga-ani, Dirava ese iena gaukara dekena amo ia laga-ani bamona. Unai dainai mai iseda goada ibounai Dirava ena laga-ani do ita vareai toho. Bona ita ta ese Dirava ena hereva do ia utua lasi, gunaguna idia utua bamona, ita ta do ia boio garina.”

Paulo ese Keristen taudia ia hagoadadia dahaka amo do idia laga-ani totona? Idia edia “gaukara dekena amo.” Edena gaukara? Guna idia karaia karadia, idia amo idia hamomokania toho idia be kara maoromaoro taudia. Ena be guna idia laloa hahegani haida badinaia karana amo bona kara ma haida amo Dirava ena hahenamo bona mauri hanaihanai do idia abia diba, to hari unai bamona idia laloa lasi. Kamonai lasi Iuda taudia edia kerere be unai, “idia sibona ese unai maoromaoro dalana idia tahua. Unai dainai Dirava ena dala idia abia dae lasi.” (Roma 10⁠:⁠3) Keristen korikori taudia iboudiai idia diba ita ibounai be kara dika ai ita vara bona Keriso ena boubou gauna idia abidadama henia taudia mo sibodia be Dirava ese ia gwauraidia maoro. Dirava ena Natuna ena hahediba herevadia iboudiai idia lalodia bona idia badinadia toho. Dirava ena Hereva amo sisiba idia abia dae mai edia manau ida. Idia laloa lasi unai dala amo Dirava ena hahenamo do idia abia edia davana hegeregerena; to edia kara amo edia lalokau bona edia abidadama idia hahedinaraia. Unai dala amo ‘Dirava ena hereva idia utua lasi,’ Iuda besena ese gunaguna idia utua bamona.

Genese 2⁠:2 ese ia gwauraia “dina namba 7” be dina ta mai ena hora 24 lasi. (Rau 129 itaia, inai sinado “Gau Iboudiai Havaradia” henunai.) Unai hegeregerena, Keristen korikori taudia edia “laga-ani” dinana be dina ta mai ena hora 24 lasi. Edia kamonai karana amo bona Baibel ena sisiba badinaia karana amo, dina dina iboudiai unai laga-ani idia moalelaia diba, bona Dirava ena nega matamatana lalonai do idia moalelaia bada.

Nega vairai taunimanima be lagani 1,000 ‘sabatina’ lalonai do idia laga-ani

Mar. 2:​27, 28: “Idia dekenai Iesu ia hamaoroa, ‘Dirava ese Dina Helaga ia karaia taunimanima totona, Dirava ese taunimanima ia karaia lasi Dina Helaga totona. Unai dainai Taunimanima ena Natuna be Dina Helaga ena Lohiabada.’ ”

Iesu ia diba Iehova ese Sabati ia havaraia, toa ta bamona Dirava bona Israel taudia padadiai, ia dainai edia gaukara amo do idia laga-ani totona. Iesu ia diba danu, Mose ena Taravatu ia hagugurua dainai iena mase amo do ia hadokoa. Ma ia diba unai Taravatu, mai ena sabati taravatuna, be “dohore idia vara gau namodia edia laulau sibona.” (Heb. 10⁠:1; Kol. 2⁠:​16, 17) Unai “gau namodia” be “Dina Helaga” lalonai do idia vara, bona Iesu be unai “Dina Helaga” o Sabati ena Lohiabada.

Keriso be lohiabada edia Lohiabada dainai, lagani 1,000 lalodiai tanobada do ia lohiaia. (Apok. 19⁠:16; 20⁠:6; Sal. 2⁠:​6-8) Tanobada ai ia noho neganai, Sabati dinana ai hoa dalana amo gorere taudia ia hamauridia mai ena hebogahisi ida; unai amo ia hahedinaraia bese idauidau iboudiai edena bamona do ia durudia, iena Lohia Laganidia 1,000 lalodiai. (Luka 13⁠:​10-13; Ioane 5⁠:​5-9; 9⁠:​1-14) Sabati ena anina korikorina idia abia dae taudia be mai edia dala, unai “sabati” ena laga-ani amo namo do idia davaria.

Bema Ta Ia Gwau​—⁠

‘Keristen taudia ese Sabati dinana idia matauraia be maoro’

Reana inai bamona oi haere henia diba: ‘Mani, lau oi hamaoroa dahaka dainai oi be unai bamona oi laloa?’ Bena reana ma oi gwau: ‘Namona be Baibel ena hereva hegeregerena Sabati ita laloa, ani? . . . Baibel ena siri haida ese lau idia durua Sabati lau laloa maoromaoro totona. Mani do ita duahidia hebou. (Bena rau 345-51 dekenai idia noho siridia haida oi duahidia bona edia anina oi gwauraia.)’

‘Dahaka dainai Sabati umui matauraia lasi?’

Reana inai bamona oi haere henia diba: ‘Lau haere maoromaoro totona, lau ura diba edena sabati oi gwauraia, badina Baibel ese sabati idauidau ia gwauraidia; unai oi diba a? . . . Dirava ese sabati taravatudia Iuda taudia ia henidia. To Baibel ese sabati idauna, Keristen taudia ese do idia matauraia gauna, be ia gwauraia; unai oi diba a?’ Bena reana ma oi gwau: (1) ‘Ai be pura ena Sabati dinana ai matauraia lasi, badina Baibel ia gwau unai taravatu be “ia noho daudau lasi gauna.” (2 Kor. 3⁠:​7-11; rau 348-9 itaia danu.)’ (2) ‘To sabati ta ai badinaia noho. (Heb. 4⁠:​4-11; rau 350-1 itaia danu.)’