Iehova Ena Ladana Be Mai Ena Hairai Bada!
“Iehova e, aiemai Lohiabada, tanobada ibounai dekenai oiemu ladana be mai ena hairai bada!”—SALAMO 8:1, 9.
1. Dahaka dainai Iehova ese Kanana taudia ia hamasedia ore gwauraia?
LAGANI 1473 B.C.E. lalonai, Israel be gwauhamata tanona dekenai idia ginidae vadaeni. To unai murinai idia be lagani haida lalodiai Dirava ena oda hegeregerena idia tuari noho, badina be ia ura unai tano idia noholaia taudia dikadia do idia hamasedia ore. Unai Kanana taudia be momokani idia dika rohoroho a? Momokani idia dika rohoroho! Kaivakuku idia tomadiho henidia, bona matabodaga karadia idauidau idia karaia momo dainai Iehova ese ia badu henidia dikadika, bona Dirava ena bese taudia idia hakereredia diba. Unai dainai Dirava ese ia hadibaia hegeregerena, Mose ia gwau Ia ese Iena bese helagana, Israel, do ia gaukaralaia, unai bese mirodia hamasedia ore totona. Unai dala amo, unai tano be Iehova ena ura hegeregerena unai bese do ia “loridia lasi.”—Levitiko 18:1-30; Deuteronomi 12:29-32.
2. Tanobada ena tomadiho oreadia ese dahaka “huahua” idia havaraia noho?
2 Hari inai negai ita be reana ita henanadai, ita gwau, Inai tanobada ena dika davana ia henia totona Dirava ese do ia hadikaia ore be maoro a? Vadaeni, tanobada ena tomadiho oreadia be edena bamona? Madi, idia ese Iehova Dirava idia matauraia lasi. Kerisendom taudia ese ia, “mauri ranuna ena lohilohi gabuna, idia rakatania vadaeni, bona sibodia edia ranu guridia idia karaia, idia parara guridia, ranu be idia lalodiai do ia noho lasi.” (Ieremia 2:13) Edia orea idauidau edia hahediba herevadia lalodiai hereva momokani ena “ranu” be ia noho lasi. Idia ese tanobada ena tuari bona politik idia durua bona ena lebulebu karadia idia abia dae; unai amo idia hahedinaraia idia be tanobada ena. Iesu ena hereva hegeregerena, edia “huahua” amo ita dibadia.—Mataio 7:16, 17; Galatia 6:7, 8 itaia.
3. Tanobada ese Dirava ena taravatu ia utua dainai, dahaka ia vara?
3 Hari inai negai tanobada taudia edia kara be edena bamona? Kekeni momo idia rogorogo kava, idia momo bona hahine momo ese edia natudia, edia bogadia lalodiai idia do noho gaudia, idia hamasedia, bona ruma bese momo idia parara; sibodia be Keristen idia gwauraia besedia bogaragidiai inai kara idia bada idia lao. Tano haida dekenai, headava rua rua amo ta ta idia hadokoa. Taunimanima edia lebulebu karadia ese anina dikadia ma haida idia havaraia. Idia ta be niuspepa ta ladana The New York Times, June 13, 1986 gauna, ese ia gwauraia, ia gwau: “IDIA LALOA HARIHARI AMO ELA BONA LAGANI 1991 AIDS GORERENA DAINAI IDIA MASE TAUDIA EDIA MOMO BE NEGA 10 DO IA BADA IA LAO.” Unai sivarai ese ia hahedinaraia, United States lalonai AIDS gorerena idia abia taudia do idia momo daekau ela bona lagani 1991 lalonai edia momo ese 100,000 do ia hanaia, bona lagani ta ta ai dola 16 bilion do idia negea unai gorere hanamoa toho totona. Inai mase gorerena be taunimanima ta amo ia hanai ma ta dekenai, tatau ese tatau idia sihari henidia neganai, taunimanima ese drag idia iusilaia kerere neganai, bona rara idia abia hanai neganai—inai kara iboudiai be Dirava ena taravatu utua karadia.—1 Korinto 6:9, 10; Galatia 5:19-21; Kara 15:19, 20.
4. (a) Dahaka dainai iseda tuari be idau, Israel be Iosua ena negai idia karaia tuarina hegeregerena lasi? (b) Tanobada taudia be edena bamona ita kara henidia be maoro, bona badina be dahaka?
4 Iosua ena nega lalonai Iehova ese Iena bese helagana ia siaia, tuari korikori amo Gwauhamata Tanona do idia hagoevaia totona. Hari inai nega lalonai, iseda tuari be lauma tuarina. (2 Korinto 10:3, 4) Ita Witness taudia ese Dirava ena Hereva idia badinaia lasi taudia ita ala-ala henidia lasi. Iena nega korikori ai Iehova be sibona ena dala amo do ia kokidia. (Deuteronomi 32:41, 43) Lebulebu taudia ita tura henidia lasi, to lalokau momokanina ita hahedinaraia diba, Basileia ena sivarai namona ita hadibadia neganai. (1 Korinto 15:33) Dirava ena Hereva amo ita stadi henidia diba bona edia lalona ita hagoevaia diba, ‘edia lalona do idia giroa, bona Dirava ese edia kara dika do ia kokia’ totona.—Kara 3:19; Mataio 21:31, 32; Luka 5:27-32.
Rahaba bona Iena Ruma Taudia
5, 6. (a) Dahaka dainai spai taudia be Ieriko dekenai idia lao bena Rahaba ena ruma dekenai idia daekau? (b) Hari inai nega lalonai, nega momo Iehova ese heduru idia noia taudia be edena bamona ia durudia? (c) Rahaba be edena bamona ia hahedinaraia ia be “maino tauna ta”?
5 Israel be Ioridane Sinavaina idia do hanaia lasi neganai, Iehova ese Ieriko hanuana ia herevalaia idia dekenai. Iosua ese spai taudia rua Israel ibounai ena ladanai ia siaidia, ia hamaorodia, ia gwau: “Umui lao, tano umui itaia, bona Ieriko hanuana danu.” Ieriko idia itaia ena badina be dahaka? Ena be unai hanua be Kanana lao henia dalana ia biagua, to ia maragi bona hanua taudia ese Israel ena tuari taudia idia koudia diba lasi. To spai taudia be unuseni do idia lao neganai, Ieriko idia noholaia taudia do idia hahedinaraia goevagoeva diba, Iehova idia ura henia eiava idia inai henia. Vadaeni, spai taudia “ruaosi idia lao; bena ariara hahinena ta, ladana Rahaba, ena ruma dekenai idia daekau, unuseniai idia noho.” (Iosua 2:1-7) Momokani, Dirava ese unai spai taudia ia hakaudia lao Rahaba ena ruma dekenai; unai hegeregerena, hari inai nega lalonai nega momo aneru ese Iehova ena Witness taudia idia hakaudia lao, lauma heduruna abia totona idia guriguri noho taudia dekenai! “Iehova ese kara maoromaoro taudia ia itadia tao; edia taitai ia ese ia hakala henia.”—Salamo 34:15; 2 Sisiga 16:9 itaia.
6 Dahaka dainai unai spai taudia be ariara hahinena ta ena ruma dekenai idia vareai? Kara bodagadia karaia totona lasi, to Kanana taudia koidia totona idia vareai. Rahaba ese spai taudia ia hereva henidia neganai, iena hereva amo ia hahedinaraia ia ura lasi do idia sihari henia. Ia diba idia be Iehova ena hesiai taudia, unai dainai ia hamaorodia diba, ia ura bada Iehova tomadiho henia tauna ai do ia lao. Ena ruma ena guhi dekenai ia hunidia, unai kara dainai ena hanua taudia ese idia hamasea diba. Ia be Iesu ese ia parabolelaia ‘mamoedia’ hegeregerena, Lohiabada ena “tadikakana” idia hebogahisi henidia taudia unai. (Mataio 25:31-46) Hari inai nega lalonai unai bamona ‘maino taudia’ be idia kamonai neganai, Iehova ena Witness taudia idia daradara lasi, to maoromaoro idia vadivadi henidia bona Bible amo idia stadi henidia.—Luka 10:5-7.
7. (a) Rahaba be edena bamona ia hahedinaraia Iehova ia abidadama henia? (b) Hari inai negai, kamonai matamata taudia be edena bamona idia laloa bona edena bamona idia kara be namo?
7 Rahaba be Iehova ena siahu karadia edia sivarai ia diba vadaeni. Unai spai taudia dekenai ia ese ena abidadama ia gwauraia hedinarai, ia gwau: “Lau diba Iehova ese momokani inai tano umui do ia henia, bona umui dainai gari ese ai ia abia bona inai tano taudia iboudiai edia lalona idia manoka.” Rahaba ese ia hamaorodia Iehova ena siahu karadia edia sivarai ia kamonai vadaeni, ma ia gwau: “Iehova, emui Dirava, be guba Diravana bona tanobada Diravana. Unai dainai, Iehova ena ladanai lau umui gwauhamata henia: Lau ese umui lau bogaia hisi hegeregerena umui danu lauegu tamana ena ruma do umui bogaia hisi, bona toa korikorina be lau umui henia.” (Iosua 2:9-13) “Iehova ena dina” ai ia ese hahemaoro karadia do ia karaia, to Dirava ena hereva momokani be hari inai negai idia dibaia matamata taudia, be Rahaba bamona unai hahemaoro garina idia gari lasi be namo. (Sefania 1:14-18) Tanobada ena dala amo idia raka siri bona Iehova ena Witness taudia edia heduru idia abia dae hahemauri idia abia totona.—Salamo 3:6-8; Hereva Lada-isidia 18:10.
8. (a) Rahaba ese “varo kakakakana”iena uindo dekenai ia hahedinaraia; unai ese dahaka ia laulaulaia? (b) Dahaka dainai Rahaba be Dirava vairanai ia maoromaoro, bona unai dainai dahaka ia vara
8 Spai taudia ese Rahaba idia henia toana be “varo kakakakana” ta, idia hamaoroa ia amo idia diho uindona dekenai do ia kwatua. (Iosua 2:17-21) Rahaba ese inai toa do ia hahedinaraia dainai, ena ruma taudia do idia hamauridia, Ieriko do idia hadikaia ore neganai. Unai hegeregerena, hari inai negai Rahaba hegeregerena ai idia lao taudia ese toa ta idia hahedinaraia be namo, hahemauri idia abia totona; anina be Iehova idia tomadiho henia, idia gwauhamata henia, bona bapatiso idia abia. Apokalupo 7:9, 10, 14 ese ia gwauraidia, ia gwau idia be “hutuma bada herea,” “idia ese edia dabua idia huria vadaeni Mamoe ena Natuna ena rarana lalonai, vadaeni edia dabua be kurokuro momokani.” Iesu ena rarana, ia bouboulaia gauna, be idia abidadama henia, bona Keristen karadia amo edia abidadama idia hamomokania. (Roma 10:9, 10) Iakobo 2:24, 25 ia gwau: “Umui itaia, kara namodia dainai taunimanima be Dirava ena vairanai idia maoromaoro, abidadama sibona dainai lasi. Unai bamona danu, ariara hahine Rahaba be iena kara dainai Dirava ena vairanai ia maoromaoro. Badina be ia ese Israela ena hesiai taudia iena rumai ia abidia dae, bona dala idauna dekena amo ia siaidia lao, vadaeni idia heau mauri.”
9. (a) Rahaba ena “kara” haida be dahaka? (b) Hari inai negai idia haroro, idia gari lasi; unai dainai dahaka ia vara?
9 Rahaba ena “kara” haida be inai: Spai taudia ruaosi be iena ruma dekenai ia hunidia bona taunimanima ma haida be iena ruma dekenai ia haboudia idia hamauridia totona. Unai hegeregerena, hari inai nega lalonai “hutuma bada herea” ese “hesiai tauna mai ena kamonai bona mai ena kara maoromaoro”idia durua momo noho; inai orea ese lauma aniani “aniani negana” korikori ai ia hariharilaia bona Basileia harorolaia gaukarana tanobada hegegemadai ia naria. (Mataio 24:45-47) Rahaba ese ena tamana ena ruma taudia ia hereva henidia, ia gari lasi—unai kara dainai dika ia davaria diba, badina be iena kara be hanua taudia idia hamaorodia diba. (Mataio 10:32-36 itaia.) Unai hegeregerena, hari inai nega lalonai tano momo dekenai Iehova ena Witness taudia edia gaukara idia koua toho, to namona be idia haroro noho, idia gari lasi. Inai bamona idia karaia dainai, taunimanima momo idia haboudia, bona nega momo ruma bese taudia iboudiai ese Babulono Badana idia rakatania bona Iehova tomadiho henia karana goevana idia badinaia.—Salamo 73:28; 107:21, 22.
Ieriko—Unai Negai bona Hari Inai Negai
10. Dahaka dainai Ieriko be dala idauna amo idia kara henia?
10 Vadaeni, namona be unai idau negai karadia be dala idauna amo ita laloa. “Ieriko hanuana be idia koua ahu, Israel taudia dainai; ta ia raka lasi lasi, bona ta ia raka vareai lasi.” Kanana hanuana ginigunana unai, Iehova ese ia hadikaia ore gwauraia. Ia be idia abia gauna ginigunana, unai dainai ia be Iehova ena bona kara idauna be ia dekenai idia karaia. Iosua ia gwau: “Hanua be boubou gauna ta bamona do umui hadikaia ore; ia mai ena anina ibounai be Iehova ena.”—Iosua 6:1, 17; Esodo 22:29; Levitiko 27:26 itaia.
11. (a) Hari inai negai, dahaka be unai hegeregerena? (b) Babulono Badana ena “gari” sivaraina ta ma oi gwauraia.
11 Unai hegeregerena ai ia lao gauna be Babulono Badana, tanobada ibounai ena tomadiho koikoi basileiana unai, hari inai ala-ala momo negana lalonai iena kerere be bada herea! Iena ikoukou ia koudia toho, Iehova ena Witness taudia do idia vareai lasi totona. Rahaba ia gwauraidia taudia hegeregeredia, ia ese Dirava ena orea taudia garidia ia gari. Hegeregere, Italy ena niuspepa ta ladana La Repubblica, November 12, 1985 gauna, ena kwara herevana ta be inai: “KATOLIK DUBU OREANA IA BOIBOI, IEHOVA ENA WITNESS TAUDIA GARIDIA IA GARI DAINAI.” Unai sivarai ese hebou ta ia gwauraia, Roman Katolik bisop badana ta ese ena orea taudia haida be Bologna dekenai ia haboudia, Iehova ena Witness taudia edia “dika” koua totona. Pope ese telegram ta ia siaia idia dekenai, edia lalona hagoadaia bona durudia totona. Hereva ta idia halasia, idia gwau: “Tanobada ibounai dekenai idia loaloa noho.” Ma idia gwau “harihari dubu oreana do ia hegaegae” inai “dika” koua totona. To do ia kwalimu a?—Ieremia 1:17-19.
12. (a) Babulono Badana ena lalohadai “dirava” dekenai be edena bamona ia idau, hereva momokani hegeregerena lasi? (b) Badina be dehaka Iehova be ena witness taudia dainai do ia tuari?
12 Babulono Badana lalonai be dirava idauidau momo herea, Kerisendom ena Toi Tamona Diravana bona Asia taudia edia dirava milion momo danu. Iosua ia do hagania lasi neganai, Mose ia gwau: “Israel e, oi kamonai: Iehova iseda Dirava be Iehova tamona.” Hari inai negai Iehova ena Witness taudia sibodia ese hari Dirava tamona ena ladana idia abia isi noho. (Deuteronomi 6:4; Efeso 4:6) Iehova be ita dainai do ia tuari, Iosua ena negai bona Israel ena hakaua taudia namodia ma haida edia negai ia karaia hegeregerena. —2 Sisiga 20:15, 17; 32:7, 8; Isaia 54:17.
Hahemaoro Karana
13. (a) Dahaka idia karaia guna bena gabeai Ieriko idia tuari henia? (b) Unai hegeregerena, dahaka be hari inai negai ia vara?
13 Iosua ia hegaegae namonamo Ieriko tuari henia totona. Tano gagaena dekenai idia vara tataudia ia peritomedia. Edia kopina be unai bamona ia utua be toa ta, ia hahedinaraia Iehova badinaia momokani karana idia koua diba gaudia iboudiai be idia abia oho unai. (Deuteronomi 10:16; 30: 5, 6) Israel taudia ese Pasova ariana idia karaia lou. Tano ena anina idia ania matamaia neganai, Dirava ese hoa dalanai ia henidia anianina, mana ia doko. Danu, “Iehova ena tuari oreana ena lohia,” Hereva unai, taunimanima ta ai ia do lao lasi neganai, be Iosua dekenai ia hedinarai, ena lalona ia hagoadaia totona. Iosua ese ia kamonai henia mai ena manau danu. Inai ibounai be Iehova ena Witness taudia dekenai idia vara gaudia hegeregeredia, hari idia ese edia gaukara idia karaia mai edia lalona ibounai danu. Lohiabada Iesu Keriso ese ia hakaua noho lalonai, “hesiai tauna mai ena kamonai bona mai ena kara maoromaoro” ia raka vairai mai ena goada danu; unai dainai lauma aniani gaudia idauidau mai edia digara bada ita ania noho.—Iosua 5:1-15.
14. Iehova ese Iosua ia hagania Ieriko be edena dala idauna amo do idia tuari henia?
14 Vadaeni tuari gabuna mani oi itaia. Iehova ese ia gwauraia karadia be idau vaitani! Hanua idia rakaia hegege, nega tamona. Dina ta ta amo unai bamona idia karaia, ela bona dina 6 idia ore. Israel ena hahelaga taudia ese maua helagana idia huaia, unai maua be toa ta, ia hahedinaraia Iehova ese ia bamodia. Hahelaga taudia 7 be idia vairadiai idia raka, kibi idia hiriria, bona Israel ena tuari taudia be unai hahelaga taudia vairadiai bona muridiai idia raka. To dina namba 7 ai daba momokani ai idia toreisi bona hanua idia rakaia hegege nega 7. Ieriko hanua taudia idia gari dikadika!—Iosua 6:2-15.
15. Unai hegeregerena Iehova ena Witness taudia be dahaka idia karaia hari inai nega lalonai?
15 Iehova ena Witness taudia be hari inai negai tanobada hegegemadai idia karaia karadia be unai hegeregerena. Vanegai iseda Basileia gaukarana ia bada ia lao momokani. Lagani 5 lalodiai, ema bona lagani 1985, pioneer taudia be 134 percent amo idia momo daekau. Pioneer taudia bona Basileia harorolaia taudia ma haida be daba momokani ai idia toreisi bona Iehova ena hahemaoro herevadia idia harorolaia mai edia goada danu. Kerisendom ena tomadiho oreadia edia gunalaia taudia edia matana ai, inai Witness taudia be “bese badana mai siahuna ida.” Dubu naria taudia be “hisihisi bada ese ia abidia,” badina be idia itaia, hereva momokani harorolaia gaukarana dainai lalo-maoromaoro taudia momo ese idia rakatanidia bona Iehova ena kaha dekenai idia gini.—Ioel 2:1-3, 6.
16. Ieriko ia moru neganai, dahaka hoa karadia idia vara? (b) Rahaba be ena abidadama dainai dahaka davana namona ia abia?
16 Bena Iosua ese taunimanima ia hamaorodia, ia gwau: “Umui boiboi, badina be Iehova ese hanua umui ia henia vadaeni.” Vadaeni taunimanima idia boiboi bada. Tano ia mareremarere bona hoa gauna badana ia vara—Ieriko ena magu idia moru. Iehova ena oda hegeregerena Israel taudia idia raka vareai haraga, mauri gaudia iboudiai hanua lalonai idia hamasedia ore. Lahi amo idia gabua. To itaia! Magu ena kahana maragina ia do gini nabo, bona iena uindo dekenai varo kakakakana ta ia noho. Rahaba bona ena tamana ena ruma taudia idia hakaudia lasi, idia be dika idia davaria lasi. Gabeai Rahaba ese ena abidadama ena davana ma ta ia abia: Ia be Israel tauna Salmon ena adavana ai bona Iesu Keriso ena tubuna ai ia lao.—Iosua 6:16-26; Mataio 1:5.
17. Unai hoa karadia ese dahaka idia laulaulaia?
17 “Unai dainai Iehova ese Iosua ia bamoa; iena sivarai be tanobada ibounai dekenai idia herevalaia.” Unai hegeregerena, Iehova ena ladana mai hairaina do idia abia isi, Babulono Badana do idia hadikaia ore bona ena kohu bona hairai do idia kokia neganai; unai be “hisihisi bada herea” ena matamana neganai do ia vara.—Iosua 6:27; Apokalupo 17:16; 18:9, 10, 15-17; Mataio 24:21, 22.
Kerere Tauna ta Ia Lusi
18. (a) Dahaka dainai “taunimanima edia lalona idia manoka”? (b) Unai hekwakwanai ia vara dainai Iosua be dahaka ia karaia?
18 Ieriko dekenai idia kwalimu momokani bena nega sisina murinai hoa gauna ta ia vara. Iosua ese tuari taudia ia siaidia Ai hanuana idia hadikaia ore totona, to Ai taudia ese idia hadareredia! “Unai dainai taunimanima edia lalona idia manoka momokani.” Iosua ena darana ia doko dainai, guriguri lalonai ia hereva badabada, ia gwau: “Madi, Lohiabada Iehova e, . . . oiemu ladana hereadaena dainai dahaka do oi karaia?”—Iosua 7:2-9.
19, 20. (a) Iehova ese Akan ena kerere edena bamona ia haorea, bona ia ese Iosua edena bamona ia hagoadaia? (b) Unai hegeregerena, dahaka be hari inai nega lalonai ia vara?
19 Bena Iehova ese Iosua ia hamaoroa Israel tauna ta ese “hemarai karana ta” ia karaia. Idia davaria unai kerere ia karaia tauna be Akan, Iuda iduhuna tauna. Ieriko ena kohu lalonai ia ese hahedoki dabuana “namo hereana” ta, Babulono gauna, ia henaoa, bona golo bona siliva danu. Iehova ese Akan ia “hahekwarahia,” ia mai ena ruma taudia danu be nadi amo idia hododia. Bena idia mai edia gau iboudiai danu be lahi amo idia gabua. Bena nadi momo herea be Akan latanai idia atodia, unai nadi senusenuna bada hereana dainai taunimanima ese Iehova ena hahemaoro karana do idia laloatao ela bona hanaihanai, bona unai gabu ena ladana idia hatoa “Akoro Kourana,” “Akoro” anina be “Hekwarahi.” Bena Iehova ese Iosua ma ia hereva henia lou, ia gwau: “Oi gari lasi; oiemu kudouna do ia hetaha lasi.” Iosua be ma nega ta tuari lalonai ia lusi lasi, unai amo Iehova ena ladana ia abia isi.—Iosua 7:10-8:1.
20 Hari inai negai ia vara kererena ta be Akan ena kara dikana hegeregerena a? Oibe. Aposetolo Paulo ia gwau “uda sisia dikadia” do idia mai, Dirava ena dala do idia dadaraia bona sibodia edia ura dalana do idia badinaia. Lagani 1919 ema, nega ta ta ai unai bamona mataganigani taudia be Dirava ena orea taudia bogaragidiai idia hedinarai. Hegeregere, lagani 10 bamona idia lao vadaeni, elda taudia haida mai edia ladana bada be idia maumau. Idia gwau, idia be ruma ta ruma ta dekenai idia haroro, Basileia sivaraina be Iesu ena aposetolo taudia idia karaia hegeregerena idia harorolaia, be hegeregere lasi. (Kara 5:42; 20:20, 21, 29, 30) Idia laloa namona be Babulono ena hahediba herevadia do idia lou henia. Mai edia aonega dikana danu idia ese haida idia hadaradaradia toho, do idia daradara ita be “nega dokonai” ita noho hari eiava lasi, bona Iehova ena Witness taudia edia gaukara idia koua toho. (2 Petro 3:3, 4) Edia kara dainai orea amo idia atodia siri.—2 Ioane 10, 11; Filipi 1:15-17; Heberu 6:4-8 itaia.
21. (a) Iehova ena gaukara be lagani 1975 ema bona lagani 1979 ia tubu daekau haraga lasi, ena badina ta be dahaka? (b) Badina be dahaka unai nega amo ema gaukara ia “haharagaia”?
21 Gima Kohorona, February 1, 1980 gauna, ese ia hahedinaraia goevagoeva ruma ta ruma ta dekenai ita haroro be Buka Helaga ena hereva hegeregerena bona mai ena anina bada. Unai dainai, unai nega amo ema bona hari, Witness taudia mai edia kamonai idia gaukara goadagoada noho! Lagani 1975 amo ema bona lagani 1979 Iehova ena gaukara ia maragi ia lao bona Iehova ena Witness taudia idia momo daekau sisina sisina sibona; reana badina be unai gwau-edeede taudia haida be idia bogaragidiai idia noho dainai. To unai murinai Basileia harorolaia taudia be lagani ta ta ai 6 percent amo idia momo daekau, ema bona lagani 1985 lalonai idia be 3,024,131, tanobada ibounai dekenai, to lagani 1975 lalonai idia be 2,179,256 sibona. Iehova ese iena gaukara ia “haharagaia” noho!—Isaia 54:2, 3; 60:22.
22. Iosua ena buka ena hereva ma haida ita tahua neganai, Iehova ena ladana dekenai dahaka ita diba be namo?
22 Momokani, Iehova ena ladana ia bada ia lao tanobada ibounai dekenai! To ia ese ma gau momo be Iosua ena buka amo ia ‘gwauraia hedinarai.’ Inai gaudia haida be stadi gabena lalonai do ita tahua.—Isaia 42:8, 9.
Iosua ena Buka Lalonai—
□ Dahaka kara be hari inai negai idia karaia karadia hegeregeredia?
□ Rahaba ena sivarai ese dahaka ia hadibaia ita dekenai?
□ Dahaka idia karaia bena unai hegeregerena iseda gaukara ita haharagaia?
□ Ieriko ia moru ese dahaka ia laulaulaia?
□ Akan ena kara dika ia hahemaorolaia dalana ese dahaka ia hahedinaraia?