Haheauka Ena Davana

¹ “Do umui gini auka dainai, emui laumana do idia mauri.” (Luka 21:19) Unai hereva, be Iesu ese “tanobada dokona” totona ia perovetalaia hereva ena kahana ta. Ia hahedinaraia iseda abidadama ita dogoatao noho lalonai, namona be ita hegaegae hahetoho momo ita haheaukalaia totona. To Iehova ia henia goada amo, ita ta ta ita haheauka diba “ela bona dokona” bona “mauri” do ita abia.​​—Mat. 24:​3, 13; Fili. 4:​13.

² Dagedage, gorere, moni ena hekwakwanai, bona lalo-metau dainai, dina ta ta be hahetoho ta. To, namona be ita laloaboio lasi, Satani ia ura iseda abidadama Iehova dekenai ia hadikaia. Dina ta ta ai iseda Tamana ita badinaia noho neganai, Ia ita durua Satani ena samani herevana ia haere henia totona. Hahetoho ita davaria neganai, moale gauna be iseda “matana ena ranu” ia laloaboio lasi! Unai be Iehova ese ia laloa bada, bona iseda abidadama ese ena kudouna ia hamoalea!​​—Sal. 56:8; Aon. 27:11.

³ Hahetoho ese Ia Hagoevaia: Hisihisi ese abidadama manokana eiava iseda manoka karana ta ia hahedinaraia diba, hegeregere hekokoroku eiava haheauka lasi karana. Baibel ena taravatu ida idia hegeregere lasi daladia amo hahetoho ita haorea totona dala ita tahua lasi, to namona be Dirava ena Hereva amo ia mai sisiba, “do umui haheauka noho,” ita badinaia. Dahaka dainai? Badina mai kamonai ida hahetoho haheaukalaia karana ese ita ia durua “ita goada momokani totona.” (Iam. 1:​2-4) Haheauka ese ita ia durua diba kara namodia ita hahedinaraia totona, hegeregere laloa namonamo karana, ma haida edia hemami laloa karana bona hebogahisi.​​—Roma 12:15.

⁴ Abidadama Ia Tohoa: Hahetoho ita haheaukalaia neganai, ita be idia tohoa vadaeni abidadama ita abia bona unai be dava bada gauna Dirava vairanai. (1 Pet. 1:​6, 7) Unai bamona abidadama dainai do ita hegeregere vaira negana ai hahetoho ita haheaukalaia totona. Danu, Dirava ena lalo-namo ita mamia diba bona unai ese iseda helaro ia hagoadaia, ita dekenai ia be gau korikorina bamona.​​—Roma 5:​3-5.

⁵ Haheauka ena davana hereadaena be Iamesi 1:12 ese ia gwauraia, ia gwau: “Dibagani ia abia neganai ia gini noho, mai haheauka danu tauna be namo. Badina be unai dika dekena amo ia kwalimu neganai, ia ese Dirava ia gwauhamata gauna, mauri hanaihanai, iena kwalimu ahuna, do ia davaria.” Unai dainai, namona be Iehova ita badinaia noho, ita diba momokani ia ese “ia idia lalokau henia taudia” dekenai davana namona do ia henia.

Kahana 2—Baibel Stadi Namodia Karaia

Hegaegae Stadi Karaia Totona

¹ Baibel stadi tauna ita hadibaia namonamo ena anina be stadi gauna ita herevalaia bona siri ita itaia sibona lasi. Ita ese stiuden tauna ena kudouna ia hamarerea dalanai ia ita hadibaia be namo. Unai ena anina be stiuden tauna ita laloa bona ita hegaegae namonamo.​​—Aon. 15:28.

² Hegaegae Dalana: Oi hegaegae totona gau ginigunana be, stiuden tauna bona ia abia be namo gaudia totona Iehova oi guriguri henia. Iehova oi noia oi ia durua stiuden tauna ena kudouna oi hamarerea totona. (Kol. 1:​9, 10) Sinado ita lalo-pararalaia namonamo totona, nega sisina lalonai karoa eiava stadi ena hereva kwarana, hereva kwarana maragidia, bona laulau oi laloa. Oi sibona oi nanadaia, ‘Inai stadi ena hereva badana be dahaka?’ Unai ese oi do ia durua stadi lalonai hereva badadia oi gwauraia totona.

³ Paragraf ta ta oi riviulaia namonamo. Buka lalonai idia noho henanadai edia haere oi tahua, hereva badadia sibona oi makaia. Paragraf lalonai idia gwauraia siridia ese hereva badadia idia durua dalana oi stadilaia namonamo, bona stadi lalonai do oi duahia siridia oi abia hidi. Reana oi ia durua gauna ta be stadi bukana ai siri edia hereva kwadogidia oi torea. Namona be stiuden tauna ia lalo-parara ia dibaia