Iseda Abiatorehai Ma Haida Dekenai

¹ Aposetolo Paulo ia mamia ena maduna be taunimanima do ia haroro henia. Ia diba Iehova ese Ena Natuna ena dava bada rarana amo dala ia karaia taunimanima idauidau ia hamauria totona. (1 Tim. 2:​3-6) Unai dainai, Paulo ia gwau: “Greek taudia bona Greek lasi taudia dekenai danu, aonega taudia dekenai bona kavakava taudia dekenai danu, lau be abiatorehai tauna.” Mai ena ura ida ia hekwarahi taunimanima ma haida dekenai sivarai namona ia harorolaia, unai amo ena abiatorehai ena davana ia henia.​​—Roma 1:​14, 15; NW.

² Paulo hegeregerena, hari inai negai Keristani taudia idia hekwarahi dala idauidau ai edia dekena taudia dekenai sivarai namona idia harorolaia totona. “Hisihisi bada herea” be kahirakahira dainai, kudou-maoro taudia ita tahua be gau badana. Namona be taunimanima ita lalokau henia momokani karana ese ita ia doria hahemauri gaukarana ita karaia goadagoada totona.​​—Mat. 24:21; Ese. 33:8.

³ Iseda Abiatorehai Davana Ita Henia: Taunimanima ita davaridia diba dalana badana be, ruma-ta-ruma-ta haroro gaukara ita karaia. Taunimanima momo be edia ruma dekenai idia noho lasi teritori ai, rekodi maorona ita karaia bona nega ma ta ai ita lou henidia, unai amo taunimanima momo ita hereva henidia diba. (1 Kor. 10:33) Danu bisinesi teritori ai, dala dekenai, loaloa bona motuka atoa gabudia, bona telefon amo taunimanima ita haroro henidia diba. Namona be ita sibona ita nanadaia, ‘Dala idauidau ai taunimanima dekenai mauri ia henia sivarai namona lau harorolaia goadagoada, a?’​​—Mat. 10:11.

⁴ Painia ta ia mamia ena maduna be ena teritori dekenai idia noho taudia ibounai do ia haroro henia. Nega momo ruma ta ena uindo be hanaihanai ia koua bona ta be ruma dekenai ia noho diba lasi. To, dina ta unai painia taihuna be haroro gaukara ia karaia lasi neganai, unai ruma vairanai motuka ta ia itaia. Ia ura lasi unai ruma ia reaia dainai, ena iduara dekenai ia pidipidi. Tau ta be iduara dekenai ia mai, bona vadivadi ginigunana murinai, unai taihu bona ena adavana ese idia lou henia matamaia. Gabeai, unai tau ese Baibel stadi ia abia dae, bona hari ia be bapatiso tadikaka ta. Unai taihu ia mamia ia be mai ena abiatorehai unai tauna dekenai, ena maduna ia laloa bona unai tauna dekenai ia haroro dainai unai tau ia moale.

⁵ Nega be ia kwadogi noho dainai, hari be nega namona haroro gaukara ita karaia goadagoada, unai amo ma haida dekenai iseda abiatorehai ena davana ita henia diba.​​—2 Kor. 6:​1, 2.

Kahana 11—Baibel Stadi Namodia Karaia

Stiuden Durua Lou Henia Idia Karaia

¹ Baibel stiuden be haroro gaukara ia karaia matamaia neganai, sivarai namona idia ura kamonai taudia do ia davaria. Edena dala ai pablisa matamata ita durua diba, unai amo lou henia do ia karaia bona kamonai tauna ena ura do ia habadaia?

² Nega ginigunana ai ta oi vadivadi henia neganai, lou henia dalana oi hegaegaelaia. Stiuden tauna oi hagoadaia ia hereva henia taudia ia laloa bada totona. (Fili. 2:4) Namona be stiuden tauna oi hadibaia ruma taudia dekenai henanadai ia henia totona, bona idia haere neganai ia kamonai, unai amo idia laloa bada gaudia do ia diba. Ta ia kamonai neganai, pablisa matamata hadibaia, mai anina bada herevadia do ia torea. Unai amo gabeai ia lou henia neganai, unai hereva badadia ia gaukaralaia diba idia herevahereva totona.

³ Lou Henia Hegaegaelaia: Vadivadi ginigunana dekenai umui herevalaia gaudia riviulaia, bena stiuden tauna oi durua ruma tauna ia ura kamonai Basileia ena sivarai ta ia abia hidi totona. (1 Kor. 9:​19-​23) Stiuden tauna ida siri ta bona do umui stadilaia buklet ena paragraf ta hegaegaelaia, stiuden tauna ese ena hamatamaia herevana lalonai ia gwauraia totona. Bona danu, stiuden ese herevahereva ena dokonai do ia gwauraia henanadai ta hegaegaelaia, unai amo dala ia karaia diba gabeai ia lou henia totona. Pablisa matamata dekenai oi hahedinaraia edena bamona ia ese vadivadi negadia ta ta ai, kamonai tauna ia durua diba Dirava ena Hereva dekenai ena diba ia habadaia totona.

⁴ Namona be stiuden tauna oi hadibaia lou henia ia karaia neganai, hamatamaia hereva kwadogina ia gwauraia. Ruma tauna ia hanamoa murinai, reana do ia gwau: “Vanegai iseda herevahereva lau moalelaia, bona hari lau mai Baibel ena hereva ma haida [sinado gwauraia] dekenai lau herevalaia totona.” Bona pablisa matamata dekenai do oi hahedinaraia edena bamona do ia kara bema tau idauna be iduara dekenai ia mai.

⁵ Lou Henia Karaia: Namona be stiuden tauna oi hagoadaia idia ura kamonai taudia ibounai ia lou henidia haraga totona. Reana