Basileia Harorolaia Gaukarana​—Hahenamo Hereadaena

¹ Dina ta ta ai, tanobada taudia bilioni momo be Iehova ese mauri totona ia henia gaudia amo namo idia abia. (Mat. 5:45) To, taunimanima haida sibona be Dirava ena Basileia ena sivarai namona idia harorolaia, bona unai gaukara namona amo edia Havaraia Tauna idia tanikiu henia. (Mat. 24:14) Edena bamona oi hahedinaraia oi be unai hahenamo hereadaena oi laloa bada?

² Basileia harorolaia gaukarana ese Dirava ia hanamoa bona hari inai nega dikana dainai idia lalohisihisi taudia dekenai helaro bona maino ia henia. (Heb. 13:15) Basileia ena sivarai idia abia dae taudia be mauri hanaihanai do idia abia. (Ioa. 17:3) Moni bada gaukarana ta eiava tanobada ena gaukara badana ta ese unai bamona hahenamo ia henia diba lasi, ani? Aposetolo Paulo be haroro gaukara ia laloa bada bona unai gaukara ia karaia dalana amo unai ia hahedinaraia. Ia dekenai unai be dava bada gauna bamona.—Kara 20:20, 21, 24; 2 Kor. 4:1, 7, NW.

³ Iseda Hahenamo Hereadaena Ita Laloa Bada: Iseda hesiai gaukara ita karaia namonamo dalana amo ita hahedinaraia, ita be eda haroro gaukarana ita laloa bada. Nega ita atoa kamonai taudia edia lalona do ia veria haroro herevana ta ita hegaegaelaia totona, a? Baibel gaukaralaia bona taunimanima hereva henia namonamo karana ita hanamoa diba, a? Iseda haroro teritori ita karaia namonamo, a? Baibel stadi ta ita hamatamaia bona karaia diba, a? Gunaguna bona harihari idia noho abidadama Keristani taudia bamona, haroro gaukarana ita laloa maoromaoro karana ese ita ia hagoadaia, bona iseda hahenamo hereadaena ita laloa bada.—Mat. 25:14-23.

⁴ Ita be buruka, gorere, eiava ma metau haida ita davaria neganai, namona be ita diba mai goada ibounai ida ita karaia haroro gaukarana be mai anina bada. Baibel ese ita ia hadibaia, Iehova be ena hesiai taudia edia hekwarahi ia laloa bada, herevana ma haida idia laloa unai be gau maragina.—Luka 21:1-4.

⁵ Basileia harorolaia gaukarana be moale bada abia dalana. Mauri lagani 92 taihu burukana ta ia gwau: “Lagani 80 bona ma haida ai Dirava ena gaukara namona lau karaia dainai lau laloa hahenamo bada lau abia​—egu lalohisihisi gauna ta be lasi! Egu mauri bema lau karaia lou, lau karaia dalana hegeregerena ai do lau karaia lou, badina, momokani, ‘Dirava ena hebogahisi mai lalokauna ese inai tanobada ena mauri ia hereaia.’ ” (Sal. 63:3) Namona be ita danu ese Dirava amo ita abia hahenamo hereadaena​—Basileia harorolaia gaukarana​—ita laloa bada.

Kahana 12—Baibel Stadi Namodia Karaia

Stiuden Taudia Durua Baibel Stadi Idia Hamatamaia Bona Karaia Totona

¹ Eda Baibel stiuden taudia be haroro gaukara idia hamatamaia neganai, reana Baibel stadi hamatamaia bona karaia karana dekenai do idia gari. Edena bamona idia ita durua diba, eda hesiai gaukara ena kahana badana ta idia laloa bada totona?—Mat. 24:14; 28:19, 20.

² Baibel stiuden tauna ta be bapatiso lasi pablisa tauna ai ia lao neganai, reana ia be Tiokratik Haroro Sikuli ai ia vareai vadaeni. Unai sikuli gaudia ia hegaegaelaia bona ia henia karana ese ena diba do idia habadaia bena ‘hereva momokani do ia hadibaia maoromaoro, bona Dirava ena vairanai do ia hemarai lasi.’—2 Tim. 2:15.

³ Emu Haheitalai amo Oi Hadibaia: Iesu be ena diba tahua taudia ia hadibaia namonamo bona ena kara amo unai ia haheitalaia. Ia gwau: “Diba tahua tauna ese . . . iena sikuli ia karaia haorea murinai, ia be iena hadibaia tauna danu do idia hegeregere diba.” (Luka 6:40) Iesu bamona, oi haroro neganai, emu kara be mai anina bada. Haroro gaukara lalonai stiuden tauna ese emu haheitalai ia itaia amo do ia laloparara, lou henia ita karaia ena badina be Baibel stadi ita hamatamaia totona.

⁴ Stiuden tauna oi hadibaia, ruma tauna ta dekenai stadi dalana ia hahedinaraia neganai, stadi ena kahana maragimaragidia ibounai ia herevalaia be namo lasi. Nega momo, stadi buka amo paragraf tamona eiava rua oi gaukaralaia diba stadi dalana oi haheitalaia totona. Heduru herevadia haida be inai Iseda Basileia Gaukara ena rau 6 bona January 2002 ena Iseda Basileia Gaukara ena rau 8 dekenai oi davaria diba.

⁵ Bema hegeregere, stiuden tauna oi noia oi ida eiava ma lo pablisa ta ida Baibel stadi ma haida umui karaia totona. Reana paragraf eiava siri badana ta ena anina ia herevalaia diba. Unai dainai, stiuden tauna be unai daladia ia itaia amo, Baibel stadi namodia karaia dalana do ia dibaia. (Aon. 27:17; 2 Tim. 2:2) Stiuden tauna oi hanamoa, bona ena gaukara ia hanamoa diba dalana oi kikilaia.