Kahana 3—Baibel Stadi Namodia Karaia

Baibel Gaukaralaia Namonamo

¹ Baibel stadi ita karaia ena badina be ita ura taunimanima be ‘diba tahua taudia do ita halaoa.’ Anina be taunimanima ita durua Dirava ena Hereva idia lalo-pararalaia bona edia mauri lalonai idia badinaia totona. (Mat. 28:​19, 20; 1 Tes. 2:13) Unai dainai, stadi lalonai Baibel ita gaukaralaia momo be namo. Matamanai, reana stiuden taudia dekenai oi hahedinaraia edena bamona idia ese edia Baibel lalonai siri ta idia davaria haraga diba. To, edena dala ai Baibel amo unai bamona taudia ita durua diba lauma dalanai idia goada idia lao totona?

² Do Oi Duahia Siridia Abia Hidi: Stadi totona oi hegaegae lalonai, namona be oi tahua edena dala ai stadi lalonai idia gwauraia siridia ese stadi ena point idia durua, bona stadi lalonai do oi kehoa bona duahia siridia oi abia hidi. To, namona be ita abia dae gaudia edia badina idia hahedinaraia siridia sibona be Baibel amo ita duahia. Namona be stadi ena point idia hahedinaraia lasi siridia ita duahia lasi. Stiuden ta ta edia noho dalana bona ura ita laloa be namo.

³ Henanadai Gaukaralaia: Namo lasi ita ese stiuden dekenai Baibel siri edia anina ita herevalaia, to stiuden ita noia ia ese unai siri edia anina ia herevalaia totona. Unai bamona ia karaia totona, namona be aonega dalana ai henanadai ita gaukaralaia. Bema siri ena anina be ia hedinarai goevagoeva, vadaeni stiuden oi nanadaia unai siri ese paragraf ia gwauraia gauna be edena bamona ia durua. Nega haida, namona be henanadai ta eiava haida oi gwauraia, unai amo stiuden oi durua lalohadai maorona ia abia totona. Bema hereva ma haida oi gwauraia be namo, vadaeni stiuden ia haere murinai oi gwauraia diba.

⁴ Hereva Momo Gwauraia Lasi: Nega momo, peva ia gaukaralaia namonamo tauna dekenai peva tamona be hegeregere, maka ta ia gwadaia totona. Unai hegeregerena, hadibaia namonamo tauna ese point tamona ia hahedinaraia totona, hereva momo ia gwauraia be anina lasi. Ia ese hereva kwadogidia amo ena hereva ia hahedinaraia goevagoeva diba. Nega haida, reana Keristani bukadia lalonai tahua karana oi karaia, siri ta ena anina oi lalo-pararalaia bona oi gwauraia goevagoeva totona. (2 Tim. 2:15) To, namona be stadi lalonai idia noho siri ta ta edia anina maragimaragidia ita gwauraia lasi. Namona be stadi ena point ia hahedinaraia siridia sibona kikilaia.

⁵ Idia Badinaia Diba Gaudia Gwauraia: Bema namo, stiuden tauna oi durua bena ia itaia edena dala ai Baibel sirina be mai anina bada ia dekenai. Hegeregere, Keristani heboudia ia do lao lasi stiuden tauna ta ida Heberu 10:​24, 25 umui duahia neganai, namona be hebou ta oi herevalaia bona oi boiria unai hebou ia lao henia totona. To ia ita doria lasi be namo. Namona be Dirava ena Hereva ese ena lalona ia doria kara ta ia karaia, Iehova ia hamoalea totona.​—Heb. 4:12.

⁶ Hahediba taudia halaoa gaukarana ena hahegani ita karaia lalonai, namona be Baibel ita gaukaralaia namonamo, unai amo taunimanima be Dirava “do idia abidadama henia bona kamonai henia.”​—Roma 16:26.

Magasin Herevalaia Daladia

The Watchtower Oct. 15

“Taunimanima haida idia laloa moni momo idia abia neganai, unai ese edia moale do ia habadaia. Oi laloa unai be momokani, a? [Haere naria.] Mani taga bada tauna ta ena hereva oi laloa. [Hadibaia Tauna 5:10 duahia.] Inai magasin ese moni bona kohu ia hereaia gaudia ia herevalaia.”

Awake! Oct. 22

“Taunimanima momo idia itaia natuna ia maragi lalonai idia hadibaia be gau badana. Oi laloa hari inai negai unai kara be mai anina bada, a? [Haere naria. Bena Aonega Herevadia 22:6 duahia.] Inai Awake! magasin be tama sina idia karaia diba karadia haida ia kikilaia, unai amo edia natuna idia durua diba taunimanima namona ai ia lao totona.”

The Watchtower Nov. 1

“Taunimanima be lohia taudia  edia  diba  dekenai idia abidadama lasi, badina idia ese hari idia vara hekwakwanai idauidau idia hamaoromaoroa diba lasi. To oi laloa daika be inai siri ena peroveta herevana ia hagugurua diba? [Salamo 72:​7, 12, 16 duahia. Bena haere naria.] Inai magasin be inai peroveta herevana ese ia gwauraia king bona ia ese do ia hagugurua gauna ia herevalaia.”