Kahana 6—Baibel Stadi Namodia Karaia

Baibel Stiuden be Henanadai ta Ia Henia Neganai

¹ Baibel stadi ta ita karaia neganai, namo lasi gau ta ita herevalaia murinai ma gau ta ita herevalaia, to namona be Baibel ena hahediba herevadia be dala namona ai ita herevalaia namonamo. Unai ese stiuden tauna ia durua, diba maoromaoro ena badina ia haginia bona lauma dalanai ia goada ia lao totona. (Kol. 1:9, 10) To, nega momo stiuden taudia be stadi lalonai gau idauidau idia henanadailaia. Unai dainai, dahaka do ita karaia?

² Oi Lalo-Parara: Bema stiuden tauna be stadi gauna ta ia henanadailaia, maoromaoro haere ita henia diba. Bema henanadai ta be umui stadilaia buka ese gabeai do ia haerelaia, namona be ia oi hadibaia. To, bema henanadai be umui stadilaia gauna amo ia idau eiava haere maorona henia totona tahua karana oi karaia guna be namo, vadaeni stadi murinai eiava ma nega ta ai unai umui herevalaia be namo. Haida idia laloa stiuden ena henanadai ita torea neganai, stiuden ia diba ena henanadai ita laloa bada bona stadi do ia heau namonamo.

³ Baibel ena hahediba herevadia momo be iseda stadi bukadia dekenai idia herevalaia momo lasi. Bema stiuden ta be hahediba hereva ta ia abia dae lasi eiava hahediba hereva koikoina ta ia abia dae, dahaka oi karaia be namo? Namona be buka maorodia ma haida lalonai Baibel ese unai ia gwauraia dalana oi itaia. Bema stiuden be unai gauna ia do abia dae lasi, reana umui rakatania, nega ma ta ai umui herevalaia totona, bona ena stadi oi karaia noho. (Ioa. 16:12) Ia be Baibel amo ena diba ia habadaia bona lauma dalanai ia goada ia lao neganai, Baibel ena hahediba herevana do ia lalo-pararalaia.

⁴ Oi Manau: Bema henanadai ta ena haere oi diba lasi, sibona emu lalohadai oi gwauraia kava lasi. (2 Tim. 2:15; 1 Pet. 4:11) Oi gwau unai gauna do oi tahua guna bona gabeai haere do oi henia. Reana unai nega oi gaukaralaia emu stiuden tauna oi hadibaia, edena dala ai tahua karana do ia karaia. Iehova ena orea ese ia henia heduru gaudia dekenai tahua karana ia karaia totona, oi hahedinaraia loulou edena dala ai unai gaudia do ia gaukaralaidia. Unai dala amo ia be sibona ena henanadai ia haerelaia diba.—Kara 17:11.

Hebouhebou Edia Program Riviulaia Dalana Matamatana

Satani ena tanobada be kara dika amo ia habadaia noho lalonai, Iehova ese ita ia hagoadaia “Dirava negea kara bona lebulebu kara do ita rakatania. Ita ia hadibaia danu, do ita noho namonamo, do ita kara maoromaoro, bona Dirava do ita matauraia.” (Tito 2:12) Lagani ta ta lalonai, ita be sekit bona dina tamona hebouheboudia ita abia. Unai be Iehova ese “hesiai tauna mai ena kamonai, bona mai ena kara maoromaoro” amo Ia hegaegaelaia daladia ta. (Mat. 24:45) Unai lauma ariadia ese ita idia hagoadaia momokani!

Unai hebouhebou edia program riviulaia dalana matamatana be lagani 2005 lalonai do ita gaukaralaia, unai ese ita do ia durua ita kamonai herevadia ita laloatao bona ita badinaia noho totona. Inai udaia pepana ena rau 6-8 ai be hebouhebou ta ta edia program edia hereva haida bona edia riviu henanadai idia noho. Kongrigeisen be edia hebouhebou idia do lao lasi bona idia lao murinai, idia ese unai gaudia be Hesiai Hebou dekenai do idia herevalaia. Unai be edena dala ai do ita karaia?

Kongrigeisen be sekit hebouhebou idia do lao lasi bona pura tamona eiava rua idia do noho neganai, tadikaka ta ese Hesiai Hebou dekenai “Sekit Hebouhebou Ena Program Matamatana” herevana be miniti 10 lalonai do ia henia, kongrigeisen ena ura ia habadaia unai program idia laloa totona. Danu, hereva henia tauna ese riviu henanadai do ia gwauraia hedinarai, bona ibounai ia hagoadaia hebouhebou ai hereva haida idia torea totona. Unai amo hebouhebou murinai do ita karaia riviu totona idia hegaegae diba.

Hebouhebou ia ore bona pura haida murinai, Hesiai Hebou dekenai dina ginigunana ena hebouhebou program be miniti 15 lalonai do ita riviulaia. Pura iharuana ai, miniti 15 be dina iharuana ena program ita riviulaia totona. Inai udaia pepana lalonai idia noho riviu henanadai be unai herevahereva lalonai do ita gaukaralaia. Namona be riviu lalonai ita herevalaia gaudia ese ita idia durua. Elda taudia ese unai riviu totona Hesiai Hebou ena kahana ma haida idia hakwadogia, idia karaia lasi, eiava idia haidaua be namo.

Dina tamona hebouhebou ena program danu be unai bamona do ita karaia, to ena program ibounai be miniti 15 lalonai do ita riviulaia. Namona be ita ibounai ese inai udaia pepana ita dogoatao namonamo bona Iehova ese ia henia hadibaia hereva namodia amo namo bada ita abia.—Isa. 48:17, 18.