Iehova Ena Dina be Kahirakahira

¹ Keristani taudia be Iehova ena dina ena mai idia laloa bada, unai nega ai Ia ese inai tanobada oromana dikana do ia haorea bona kara maoromaoro tanobada matamatana do ia mailaia. (2 Pet. 3:​12, 13) Ita diba lasi unai dina be edena negai do ia ginidae dainai, namona be ita noga noho bona ma haida ita durua unai bamona idia karaia totona. (Ese. 33:​7-9; Mat. 24:​42-44) Dirava ena peroveta Hereva laloa dobu karana amo ita diba momokani Iehova ena “dina badana be ia kahirakahira.”​​—Sep. 1:14.

² Tanobada Basileia Badadia: Apokalupo 17:​9-11 ai aposetolo Ioane ese “king 7,” tanobada basileia badadia 7 ia laulaulaia gaudia, ia herevalaia. Ioane ese “king namba 8” ia gwauraia danu, bona hari ia be United Nations oreana ia laulaulaia. Tanobada basileia badadia ma haida do idia hedinarai, a? Lasi, unai peroveta herevana ia gwau unai king namba 8 be “mase hanaihanai gabuna dekenai do ia lao,” bona ia murinai king ma ta ia gwauraia lasi. Unai peroveta herevana ese oi ia durua hari ita noholaia negana oi lalopararalaia totona.

³ Daniela 2:​31-45 ese ita ia durua Iehova ena dina ena mai ita lalopararalaia totona. Unai peroveta herevana lalonai, Nebukanesa ese nihi lalonai tanobada basileia badadia ia laulaulaia kaivakuku badana ia itaia. Unai basileia badadia ta ta be idia hedinarai vadaeni. Hari ita be edena nega lalonai ita noho? Ita be kaivakuku ena aena ese ia laulaulaia negana lalonai ita noho. Unai peroveta herevana ese gabeai do ia vara gauna ia hahedinaraia goevagoeva. Taunimanima edia gavamani do idia ore momokani, unai amo “do idia hadikaia diba lasi ela bona hanaihanai” Basileiana ese edia gabu do ia abia. Oi itaia edena dala ai unai ese ia hahedinaraia Iehova ena dina be kahirakahira, a?

⁴ Hamomokania Gaudia Ma Haida: Ita itaia diba hamomokania gaudia haida ese idia hahedinaraia Iehova ena dina be kahirakahira. Aposetolo Paulo ia perovetalaia gauna, ‘nega dokona’ ai taunimanima do idia karaia karadia unai, be ita itaia idia guguru noho. (2 Tim. 3:​1-5) Bona dokona ia do ginidae lasi neganai, namona be tanobada hegegemadai haroro gaukarana ita karaia. (Mat. 24:14) Iseda haroro gaukara lalonai, aneru ese ena hereva amo ia hahedinaraia karaharaga lalohadaina ita hahedinaraia be namo, ia gwau: “Dirava do umui gari henia, ia do umui hanamoa bada, badina be Dirava ese taunimanima ibounai do ia kota henia ena nega ia ginidae vadaeni.”​​—Apok. 14:​6, 7.

Kahana 9—Baibel Stadi Namodia Karaia

Stiuden Taudia Hegaegaelaia Idia Haroro Totona

¹ Andrea bona Filipo be idia diba Iesu be gwauhamata Mesia neganai, unai sivarai namona be idia hunia diba lasi to ma haida dekenai idia gwauraia. (Ioa. 1:​40-45) Hari inai negai danu, Baibel stiuden taudia be idia dibaia gaudia idia abidadama henia matamaia neganai, unai ese idia ia hagoadaia idia dibaia gaudia idia gwauraia totona. (2 Kor. 4:13) Edena dala ai idia ita durua diba nega bona dala idauidau ai idia haroro bona ita hegaegaelaidia unai idia karaia namonamo totona?

² Reana stiuden tauna oi nanadaia bema Baibel amo ia dibaia gaudia be ma haida dekenai ia herevalaia vadaeni. Reana ena turadia bona ruma bese taudia ia boiria diba stadi lalonai idia helai totona. Oi nanadaia bema ena gaukara turadia, sikuli turadia eiava ia diba taudia ma haida idia ura sivarai namona idia kamonai. Unai dala amo ia haroro matamaia diba. Ia oi durua bena do ia laloparara Iehova Dirava bona ena ura be ma haida dekenai ia herevalaia neganai, namona be ia laloa namonamo, bona hemataurai bona hebogahisi ia hahedinaraia.​​—Kol. 4:6; 2 Tim. 2:​24, 25.

³ Edia Abidadama Idia Herevalaia: Gau badana be Baibel stiuden taudia ita hadibaia edia abidadama idia herevalaia neganai, Dirava ena Hereva do idia gaukaralaia. Stadi ena kahana haida ai, stiuden oi nanadaia: “Baibel be edena dala ai do oi gaukaralaia oiemu ruma bese taudia dekenai hereva momokani oi herevalaia totona?” eiava “Edena Baibel siri do oi gaukaralaia emu turana dekenai unai