Haroro Gaukara ese Ita Ia Durua Ita Haheauka Totona

¹ Dirava ena Hereva ese ita ia hagoadaia “iseda vairana dekenai ia noho heau helulu, be mai haheauka danu do ita heau.” (Heb. 12:1) Heau helulu tauna be ia kwalimu totona ia haheauka be namo, unai hegeregerena kwalimu ahuna, mauri hanaihanai ita abia totona, ita haheauka be namo. (Heb. 10:36) Edena dala ai Keristani hesiai gaukara ese ita ia durua diba ita haheauka noho ela bona dokona totona?​​—Mat. 24:13.

² Lauma Dalanai Goada Ita Abia: Baibel ena gwauhamata namo hereana, kara maoromaoro tanobada matamatana totona, ita harorolaia karana ese ita ia durua iseda helaro ita dogoatao noho totona. (1 Tes. 5:8) Hanaihanai ita haroro neganai, dala ia noho Baibel amo ita dibaia hereva momokani ita herevalaia totona. Iseda abidadama ita hamomokania diba, bona unai amo lauma dalanai goada ita abia.

³ Ma haida ita hadibaia namonamo totona, Baibel ena hereva momokani ita lalopararalaia be namo. Unai hereva dekenai tahua karana ita karaia bona ita laloa dobu be namo. Unai ita karaia totona bema ita hekwarahi, unai ese iseda diba do ia habadaia, abidadama ia hagoadaia, bona lauma dalanai ita ia hanamoa. (Aon. 2:​3-5) Unai dainai, ma haida ita durua neganai, unai ese ita ia hagoadaia danu.​​—1 Tim. 4:​15, 16.

⁴ Haroro gaukara ita karaia goadagoada karana be “Dirava ese ia henia tuari dabua ibounai” ena kahana badana ta, unai dabua be mai anina bada Diabolo bona ena demoni ita dadaraia totona. (Efe. 6:​10-13, 15) Hesiai gaukara helagana dekenai ita bisi karana ese ita ia durua ita idia hagoadaia gaudia ita laloa bada bona Satani ena tanobada ita dadaraia totona. (Kol. 3:2) Iehova ena dala be ma haida dekenai ita hadibaia neganai, unai ese ita ia hadibaia lou helaga karadia ita hahedinaraia noho be gau badana.​​—1 Pet. 2:12.

⁵ Dirava Ena Siahu Amo: Vadaeni, iseda haroro gaukara ese ita ia hadibaia Iehova dekenai ita tabekau totona. (2 Kor. 4:​1, 7) Unai be hahenamo badana! Unai bamona tabekau karana ita habadaia neganai, iseda haroro gaukara ita hagugurua sibona lasi, to mauri lalonai ita davaria hekwakwanai ita hanaia diba. (Fili. 4:​11-13) Momokani, ita haheauka totona, gau badana be Iehova ita tabekau henia momokani. (Sal. 55:22) Dala idauidau ai, haroro gaukara ese ita ia durua ita haheauka totona.

Kahana 10—Baibel Stadi Namodia Karaia

Ruma-Ta-Ruma-Ta Gaukara ai Stiuden Taudia Hadibaia

¹ Elda taudia idia laloa Baibel stiuden be bapatiso lasi pablisa ai ia lao diba neganai, haroro gaukara ai kongrigeisen ia bamoa diba. (Iehova Ena Ura Ia Karaia Orea, rau 79-82 eiava Hesiai Gaukara Karaia Totona Ita Hegaegae, rau 97-100 itaia.) Edena dala ai stiuden tauna ita durua diba ruma-ta-ruma-ta haroro gaukara ia karaia totona?

² Hegaegae Hebou: Hegaegae namonamo karana be mai anina bada. Stiuden dekenai Iseda Hesiai Gaukara bona Herevalaia bukana dekenai idia torea kiki herevadia ita hahedinaraia, bona ia ita durua ena noho gabu ai ia gaukaralaia diba kiki herevana ia abia hidi totona. Matamana amo, ia ita hagoadaia haroro ai Baibel ia gaukaralaia totona.​​—2 Tim. 4:2.

³ Pablisa matamata dekenai kiki herevadia hegaegaelaia karana be gau badana. Stiuden tauna be kiki herevana ia hegaegaelaia noho lalonai, ita hahedinaraia edena bamona teritori ai idia gwauraia momo herevadia ia haerelaia diba. (Kol. 4:6) Ia ita hadibaia Keristani hesiai tauna be ruma tauna ena henanadai ibounai edia haere ia diba be gau badana lasi. Nega momo bema henanadai ta ena haere ita diba lasi, dala namona be ita noia bema ia hegeregere tahua karana ita karaia guna bena gabeai ita giroa lou neganai, unai henanadai ita herevalaia diba.​​—Aon. 15:28.

⁴ Haroro Hebou: Stiuden be nega ginigunana ruma-ta-ruma-ta gaukara ia karaia neganai, namona be umui hegaegaelaia hebou kiki herevana be oi ese oi karaia guna, bona do ia itaia. Gabeai ia ese ruma ta ia karaia diba. Nega haida, pablisa matamata be kiki herevana ena kahana ta sibona ia henia diba, hegeregere siri ia duahia bona ia herevalaia. Stiuden tauna ena kara bona diba oi laloa be namo. (Fili. 4:5) Haroro gaukara ena kahana idauidau be ia dekenai oi hadibaia noho