Magasin Rut amo Ura Habadaia

¹ Iseda haroro gaukara dekenai ita davaria taudia momo be ita idia abia dae bona mai moale ida iseda magasin bona buka idia abia, to idia ura lasi Baibel stadi idia abia dae. Dala ta be magasin rut amo edia ura ita habadaia. Magasin oi hariharilaia neganai, unai tauna ena ladana, adres, deit, ia abia magasin, umui herevalaia sirina, bona unai tauna ena ura ia hahedinaraia gauna ta oi torea diba. Magasin matamata idia ginidae neganai, emu magasin rut taudia do ia durua bada point namodia oi tahua, bona oi vadivadi lou neganai oi hahedinaraia. (1 Kor. 9:​19-23) Gabeai, iseda magasin ai idia duahia gauna ese edia ura ia habadaia diba, unai amo do idia ura diba ma haida idia abia.

² To ita laloparara taunimanima momo be magasin idia duahia sibona amo Iehova ena hesiai taudia ai do idia lao lasi. Hari inai negai taunimanima ese Iehova idia tahua be gau badana, unai dainai dahaka ita karaia diba idia ita durua totona? (Sep. 2:​2, 3; Apok. 14:​6, 7) Ita abia hidi siri namona ta be nega ta ta magasin ita henia neganai ita herevalaia, unai ese ena ura ia habadaia diba.

³ Siri Tamona Herevalaia: Oiemu magasin rut taudia oi laloa, bona ta ta ena dabu gauna hegeregerena siri ta ta oi hegaegaelaia oi herevalaia totona. (Fili. 2:4) Hegeregere, bema vanegai sibona edia lalokau tauna ia mase, reana oi lou henia loulou diba bona mase taudia dekenai ia vara gauna bona toreisi lou helarona dekenai Baibel be dahaka ia gwau oi herevalaia. Herevalaia bukana ai, inai hereva kwarana “Mase” bona “Toreisi-Lou” henunai idia noho herevadia ita gaukaralaia diba siri tamona herevalaia karana ita hegaegaelaia totona. Hereva ma haida, hegeregere gorere, buruka, bona mase be edena dala ai do idia ore momokani be gabeai oi herevalaia diba. Gau badana be unai tauna ia laloa bada gauna ita tahua bona Baibel ese unai ia herevalaia dalana ita hahedinaraia loulou.

⁴ Idia Laloparara: Ena be iseda hereva ita hakwadogia be namo, to siri tamona sibona ita duahia be hegeregere lasi. Satani be taunimanima edia lalona ia hadiburaia dainai sivarai namona idia lalopararalaia lasi. (2 Kor. 4:​3, 4) Baibel idia diba namonamo taudia danu ese heduru idia abia be namo, unai amo Baibel idia lalopararalaia diba. (Kara 8:​30, 31) Unai dainai, nega oi atoa siri oi herevalaia bona oi haheitalaia totona, Tiokratik Haroro Sikuli ai tok oi henia bamona. (Kara 17:3) Namona be unai tauna ia itaia ena mauri lalonai Dirava ena Hereva be mai anina bada.

⁵ Bema tau ta be ia dibaia gaudia ia moalelaia, emu vadivadi ta ta lalonai siri rua eiava toi oi gaukaralaia diba. Bona dala oi tahua Dahaka Ita Karaia? buklet eiava Diba bukana oi hahedinaraia totona. Unai dala ai, magasin rut ta be Baibel stadi ai oi halaoa diba.

Magasin Herevalaia Daladia

The Watchtower Apr. 15

“Hari inai negai diba be ia bada ia lao noho, ani? [Haere naria.] To, inai siri ese ia herevalaia dibana ese unai ibounai ia hereaia. [Ioane 17:3 duahia.] Inai magasin ese mauri hanaihanai ena anina bona edena dala ai mauri hanaihanai dekenai ita ia hakaua lao dibana ita abia diba ia herevalaia.”

Awake! Apr. 22

“Ena be reana taunimanima momo be Iesu Keriso idia diba, to momo idia daradara ia be daika. Iesu ena aposetolo taudia ese unai idia daradaralaia danu. Unai oi diba, a? [Haere naria. Bena Mareko 4:41 duahia.] Inai magasin ese Baibel ena hereva Iesu Keriso dekenai ia herevalaia.”

The Watchtower May 1

“Ita lalokau henia tauna ta ia mase neganai, vaia ita ura unai tauna ita itaia lou. Unai oi abia dae, a? [Haere naria.] Baibel ena gwauhamata toreisi lou dekenai ese taunimanima momo ia hagoadaia. [Ioane 5:​28, 29 duahia.] Inai magasin ese toreisi lou do ia vara negana bona daidia do idia toreisi lou ia herevalaia.”