hereva, ia gwau, ‘Oi be mai oiemu abidadama, to lau be mai lauegu kara namodia.’ Vadaeni, lauegu haere be inai bamona, ‘Tau ta mai ena abidadama, to mai ena kara lasi, unai bamona tauna ta ia noho, a? Lasi momokani. To lau ese lauegu abidadama do lau hamomokania lauegu kara namodia dekena amo.’ Gunaguna iseda tamana Aberahamo ese iena natuna Isako pata helagana latanai boubou totona ia atoa neganai, Dirava ese ia gwauraia maoromaoro. Oibe, Dirava ese Aberahamo ena kara namona ia itaia dainai, ia gwauraia maoromaoro. Oi itaia, Aberahamo ena abidadama be iena kara namona danu nega tamona idia gaukara. Bona unai dainai iena kara namodia ese iena abidadama idia hamomokania vadaeni. Ita diba, tauanina bema mai ena lauma lasi, ia be mase gauna, ani? Vadaeni unai bamona danu abidadama mai ena kara namodia lasi, be mase gauna.”

Hereva hegeregerena: Reana tauhau ta ese haneulato ta ia tura henia bona ia hamaoroa ia lalokau henia. To bema headava herevana ia hamaorolaia lasi, ia hahedinaraia ena lalokau be momokani lasi, ani? Unai hegeregerena, iseda kara amo ita hahedinaraia iseda abidadama bona iseda lalokau be momokani. Bema Dirava ita kamonai henia lasi, anina be ita lalokau henia momokani lasi bona ita abia dae lasi iena dala be maoromaoro. (1 Ioane 5⁠:​3, 4) To, herevana dahaka kara namodia ita karaia, hahemauri be iseda kara ena davana lasi. Mauri hanaihanai be Dirava ese Iesu Keriso ena amo ia henia harihari gauna, iseda kara ena davana lasi.​—⁠Ef. 2⁠:​8, 9.

Adam bona Eva

Anina: Adam be taunimanima ginigunana. Heberu gado herevana ’a·dhamʹ be Motu gado ai idia hahegeregerea neganai, “tau,” “tano tauna,” bona “taunimanima” idia torea. Eva, hahine ginigunana, be Adam ena adavana.

Adam bona Eva be momokani idia noho eiava?

Ita ibounai be tau tamona bona hahine tamona amo ita vara sivaraina ita abia dae be maoro, a?

“Hari, saiens ese tomadiho oreadia badadia be nega daudau lalonai idia harorolaia herevana ia hamomokania: Bese iboudiai . . . be tau ginigunana tamona amo idia vara.”​—⁠Heredity in Humans (Philadelphia and New York, 1972), Amram Scheinfeld, p. 238.

“Idaunegai Baibel ese ia gwauraia sivaraina, Adam bona Eva be taunimanima iboudiai edia tubudia sivaraina, be hari inai negai saiens ese ia hahedinaraia danu. Ia hahedinaraia tanobada taudia ibouboudiai be bese tamona, mai edia tubuna tauna tamona bona edia tubuna hahinena tamona.”​—⁠The Races of Mankind (New York, 1978), Ruth Benedict and Gene Weltfish, p. 3.

Kara 17:26: “Rara tamona dekenai [Dirava] ese taunimanima bese ibounai ia karaia, bona tanobada ena kahana ibounai do idia noho.”

Adam sivaraina Baibel lalonai ena mamina be taunimanima korikorina ta sivaraina hegeregerena a, eiava matamana neganai ia noho besena gorilaia sivaraina mo hegeregerena, a?

Iuda 14: “Enoka be tau namba 7 Adam ena murinai ia vara.” (Enoka be matamana neganai idia noho taudia iboudiai amo uru namba 7 tauna lasi.)

Luka 3:​23-38: “Ena gaukara ia hamatamaia neganai Iesu ena vara lagani be 30 bamona. . . . [Ena] bese be inai: . . . Davida, . . . Aberahamo, . . . Adamu.” (Idaunegai sivaraidia momo lalodiai David bona Abraham idia gwauraidia taunimanima korikoridia. Unai dainai ita ese Adam danu taunimanima korikorina ta ita gwauraia be maoro, ani?)

Gen. 5:3: “Adam ena mauri lagani be 130 neganai, iena natuna ta ia havaraia, iena toana bamona bona ia hegeregerena vadaeni, iena ladana ia hatoa Seta.” (Matamana neganai idia noho tataudia iboudiai ese Set idia havaraia lasi, bona idia iboudiai edia lagani be 130 neganai mero idia havaradia lasi.)

Baibel ia gwau gaigai ese Eva ia hereva henia; unai dainai unai sivarai ibounai be gori sibona, a?

Gen. 3:​1-4: “Gaigai be kerere aonega dekenai ia honu momokani. Iehova Dirava ia karaia mauri gaudia ibounai edia aonega be gaigai ia hanaia. Ia ese hahine dekenai ia henanadaia, ia gwau, Momokani, uma gabu ena au huahua ta ania lasi taravatu Dirava ese ia atoa o lasi? Hahine ese gaigai dekenai ia haere, ia gwau, . . . Dirava ia gwau, Unai au ena huahua umui ania lasi, bona dogoatao lasi, umui mase garina. To gaigai ese hahine dekenai ia gwau, Inai be momokani lasi, dohore umui mase lasi.”

Ioane 8:⁠44: “[Iesu ia gwau:] Satani . . . be koikoi tauna, bona ia be koikoi ibounai edia tamana.” (Eden dekenai, Satana ese hereva koikoina ginigunana ia gwauraia. Gaigai ena uduna amo ia hereva. Genese ena sivarai ese gori gaudia ia parabolelaidia lasi taunimanima hadibadia totona. Apokalupo 12⁠:9 itaia danu.)

Unai bamona karadia be inai: Taunimanima ta ia hereva neganai bema ena uduna ia hamarerea lasi, taunimanima idia laloa ena gado regena be idau gauna ta amo ia lasi. Numera 22⁠:​26-31 oi itaia, ia gwau Iehova ese Balaam ena doniki ena uduna ia kehoa bena doniki ia hereva.

Bema “Adam ginigunana” be taunimanima korikorina ta lasi, “Adam dokona,” Iesu Keriso, be edena bamona?

1 Kor. 15:​45, 47: “Buka Helaga lalonai ia torea, ia gwau, ‘Tau ginigunana, Adam, be Dirava ese ia karaia, taunimanima edia mauri ia abia.’ To Adam dokona, gabeai ia mai tauna be mauri hanaihanai ia henia Laumana. Adam ginigunana be tano kahuna dekena amo Dirava ese ia karaia, bona ia be tanobada dekena amo. To Adam iharuana be guba dekena amo ia mai.” (Bema ta ia gwau Adam, Dirava ia kara dika henia tauna, be taunimanima korikorina lasi, ena hereva ena anina be inai: Iesu Keriso be taunimanima hamauridia totona ena mauri ia henia be anina lasi. Unai amo ia ese Keristen abidadamana ia dadaraia.)

Iesu ese Genese ena sivarai edena bamona ia laloa?

Mat. 19:​4, 5: “[Iesu] ia gwau, ‘Be, Buka Helaga [Genese 1⁠:27; 2⁠:24 ai] umui duahia lasi, a? Ia torea, “Hamatamaia nega ia karaia neganai Dirava ese tau bona hahine [Adam bona Eva] ia karaia, ia gwau, ‘Inai dainai tau be ena tamana sinana do ia rakatania, ena adavana dekenai do ia hakapua, vadaeni idia ruaosi be tamona idia noho.’ ” ’ ” (Iesu ia laloa Genese ena sivarai be momokani, unai dainai namona be ita danu ita abia dae ia be sivarai momokanina, ani?)

Bema Ta Ia Gwau​—⁠

‘Adam ia kara dika be Dirava ena ura, iena palani hegeregerena’

Reana inai bamona oi haere henia diba: ‘Taunimanima momo be unai bamona idia hereva. To bema emu ura karana ta lau karaia, lau karaia dainai lau do oi gwau dika henia, a? . . .