Tanobada Hegegemadai “Hahemauri be Kahirakahira!” Distrik Hebouhebou Ena Boiboi Pepana Hariharilaia

Kongrigeisen Ta Ta Ena Pablisa ese Boiboi Pepana Do Idia Hariharilaia

¹ Lagani 2006 ai, April bona May lalonai distrik hebouhebou be tano haida dekenai idia hamatamaia neganai, tano 155 bamona ai boiboi pepadia be do idia hariharilaia. Unai bamona do idia karaia ela bona tanobada hegegemadai distrik hebouhebou ia ore. July bona August ena wiki ginigunana ai, Germany, Czech Republic, bona Poland dekenai spesel distrik hebouhebou do idia abia, bona unuseniai boiboi pepadia do idia hariharilaia danu.

² Ita be tanobada ena dokonai ita noho dainai, distrik hebouhebou ena hereva​—Dirava ese inai tanobada dikana amo ita do ia hamauria herevana​—ese kudou-maoro taudia edia lalona ia hamarerea be namo. Namona be unai hereva ese edia lalona ia veria vaira negai do ia vara gauna idia laloa totona. Tanobada hegegemadai, Iehova ena Witnes taudia edia kongrigeisen 98,000 mai kahana idia hagoadaia, hebouhebou ena boiboi pepadia idia hariharilaia totona. Unai amo taunimanima milioni momo ese lalona ia hagoadaia bona helaro ia henia sivaraina idia kamonai diba.

³ Kongrigeisen ibounai dekenai boiboi pepadia momo do idia henia, unai amo pablisa ta ta be boiboi pepadia 50 idia abia diba. Bema boiboi pepa oredia idia do noho, kongrigeisen ena painia taudia ese idia gaukaralaia diba. Hebouhebou ia do matamaia lasi neganai, kongrigeisen ta ta be wiki toi lalonai boiboi pepadia do idia hariharilaia be namo. Unai amo nega bada ia noho kongrigeisen ena teritori ibounai dekenai boiboi pepadia idia hariharilaia totona.

⁴ Namona be ruma taudia ta ta dekenai boiboi pepadia ita henia. To, bema haida be ruma dekenai idia noho lasi, edia iduara badinai pepa ta ita rakatania diba. Namona be ita gaukara goadagoada unai wiki toi lalonai boiboi pepadia ita hariharilaia totona.

⁵ Ai diba momokani, tanobada hegegemadai “Hahemauri be Kahirakahira!” hebouhebou ena boiboi pepadia hariharilaia gaukarana dainai, haroro namona do umui henia. Bona ai guriguri, tanobada hegegemadai boiboi pepadia hariharilaia gaukarana dekenai, Iehova ese emui hekwarahi ia hanamoa.

Emu Baibel Stadi Oi Nanadaia Bema ta Ia Ura Stadi, A?

Bema Baibel stadi ta oi karaia noho, namona be stiuden tauna oi nanadaia bema iena turadia, varavara bona gaukara turadia idia ura Baibel amo diba idia abia. Bena unai taudia edia ladadia be oi dekenai ia henia diba. Stiuden amo gwaumaoro oi abia bena stadi hahedinaraia totona unai taudia oi vadivadi henia neganai, oi stadi henia tauna ena ladana oi gwauraia diba. Reana do oi gwau, “[Stiuden ena ladana gwauraia] ese Baibel stadilaia karana ia moalelaia, bona ia laloa oi be davana lasi Baibel stadi amo namo do oi abia.” Bena Baibel Hadibaia bukana amo, stadi karaia dalana be nega kwadogina lalonai oi hahedinaraia.

Bema emu Baibel stiuden be lauma dalanai ia goada ia lao, ia oi hagoadaia ena turadia bona ruma bese taudia dekenai stadi karaia dalana ia herevalaia totona. Idia ia boiria diba iena stadi dekenai idia helai. Eiava bema unai be ia hegeregere lasi, dala ia karaia diba idia oi hedavari henia bona stadi dalana oi hahedinaraia. Unai ese stiuden do ia durua Baibel amo ia abia dibana be ma haida dekenai ia herevalaia totona.

Ena be oi lou henia taudia danu Baibel stadi oi do hamatamaia lasi, to idia oi nanadaia diba bema haida idia ura Baibel idia stadilaia. Idia dekenai Baibel Hadibaia bukana oi henia neganai, reana oi nanadaia, “Inai buka do ia moalelaia tauna ta oi diba, a?”

Ita be nega dokona ai ita noho dainai, ita ura dala idauidau ibounai ita gaukaralaia taunimanima ita durua sivarai namona idia kamonai totona. Unai dainai, emu Baibel stadi oi nanadaia vadaeni, bema ta ia ura stadi, a?